LIÇÃO 35

Ẽg hã ren kỹ kuprẽg há ag han ke mũ

TI VEN NĨ

Vẽnh kar tỹ kuprẽg ag hyn han ke nỹtĩ. Ẽg tỹ nén ũ kuprẽg ũ ag tỹ ẽg krĩ kónãn tĩ, kỹ ẽg pi Jeová mré há nỹtĩ. Hẽn ri ke mũn, ẽg tỹ hã tá ẽmãn kuprẽg ke mũ ti, hã tá ẽg tỹ rãnhrãj ke mũ ti, ke tũ nĩn kỹ ẽg tỹ prũg ke mũn kỹ, ke tũ nĩn kỹ vaꞌ. Ẽg tỹ kuprẽg há ag hyn han kỹ, ẽg tỹ mỹ sigsér nỹtĩ ke mũ kar Jeová mỹ há han ke mũ gé.

1. Topẽ Vĩ Rá hã ren kỹ ã ajũna ke tĩ, ã tỹ kuprẽg há ag hyn han jé?

Ã tỹ nén ũ kuprẽg ke jo, ã tỹ Jeová mré vĩ vén nĩ, ti mỹ to vĩm nĩ, ti tỹ ã ajũna ke jé, ã tỹ Topẽ Vĩ Rá ki ve jé, ti tỹ ã mré vĩ há han jé, nén ũ ãn to. (Provérbios 2:3-6 le kem nĩ.) Kejẽn, Jeová vỹ jyvẽn tar ẽg mỹ nĩm tĩ, kỹ ẽg tỹ ki króm ke nỹtĩ.

Hã ra Topẽ Vĩ Rá pi jyvẽn tĩn kỹ, ã nón tĩg jé, ã ne han tĩ? Jeová vỹ ã ajũna ke mũ, ti tóg: “ãjag tỹ hẽ mĩ mũ ki kanhró nỹtĩ jé”. (Isaías 48:17) Hã ren kỹ? Topẽ Vĩ Rá kã ki vẽnh jyvẽn ag vỹ nỹtĩ. Vẽnh jyvẽn há ag vỹ ẽg mỹ ven tĩ, Jeová ne ãkrén tĩ ti, nén ũ ag to. Ẽg tỹ Topẽ Vĩ Rá le ken kỹ, ẽg tỹ Topẽ ti jykre ki kanhrãn tĩ, tag vỹ ẽg ajũna ke tĩ, ẽg tỹ nén ũ há ag kuprẽg jé, Jeová vỹ mỹ sér tugnĩn.

2. Ã tỹ kuprẽg ũ han ke jo, ã ne to jykrén ke nĩ?

Topẽ Vĩ Rá vỹ ẽg mỹ ke tĩ: “Ũn tỹ nén kar to jykrén há han mũ vỹ nén kórég nĩ mré nén ũ há ki kanhró nĩnh mũ.” (Provérbios 14:15) Tag to ken hã vẽ hã vỹ kuprẽg ũ han ke jo, ẽg tỹ to jykrén há nĩ, tag to. Vẽnh ki jẽmẽ tĩ: ‘Topẽ Vĩ Rá vẽnh jyvẽn tỹ ne inh ajũna ke mũ? Kuprẽg tag mỹ inh krĩ tỹ kãnhvy han ke mũ? Ũnꞌũ ag ne inh to ãkrén ke mũ?’ Jo nén ũ há kãfór tĩ: ‘Jeová mỹ mỹ há ke mũ hẽn?’ — Deuteronômio 32:29.

Jeová hã ne ẽg mỹ kãmén tĩ, nén tỹ ti mỹ há nĩ ag ti kar nén tỹ ti mỹ kórég nĩ ag ti. Ẽg tỹ nén tỹ Jeová mỹ há nĩ ag ki kanhrãn há kỹ, kar ti vẽnh jyvẽn há ag ti kanhrãn, ẽg tóg Jeová vĩ ki króm sór tĩ kar ẽg tỹ ti jykre ki kanhró há han tĩ. Gen kỹ, ẽg jykre vỹ ki kanhró ke mũ nén tỹ Topẽ mỹ há nĩ ag ti kar nén tỹ ti mỹ kórég nĩ ag ti. (Roma 2:14, 15) Ẽg tỹ vẽjykre kanhró há nĩn kỹ, tag vỹ ẽg ajũna ke tĩ, ẽg tỹ kuprẽg há han jé.

VẼNH KANHRÃN KÃFÓR NĨ

Ha tugnỹm nĩ, Topẽ Vĩ Rá vẽnh jyvẽn há ag kar ẽg jykre vỹ ẽg ajũna ke tĩ, ẽg tỹ kuprẽg há ag hyn han jé.

3. Topẽ Vĩ Rá vỹ ã ajũna ke nĩnh mũ

Topẽ Vĩ Rá vẽnh jyvẽn há ag hã ren kỹ ẽg ajũna ke nĩnh mũ, ẽg tỹ kuprẽg há ag hyn han jé? Ha vé VÍDEO ti. Kar jagnẽ mré vẽmén nĩ, nén ũ tag ag to:

VÍDEO: Topẽ Vĩ Rá vỹ ã ajũna ke mũ, ã tỹ kuprẽg há ag han jé (5:54)

Jeová ne ẽg mỹ: ‘Nén ũ kuprãg ra’, ke tĩ?
Jeová ne ẽg mỹ nén ũ kuprãg kỹ, ẽg tỹ han sór kỹ han ge tĩ?
Jeová ne ẽg mỹ vin tĩ, ẽg tỹ kuprẽg há ag han nỹtĩnh mũ?

Ã tỹ vẽnh jyvẽn há ũ ve jé, Éfeso 5:15, 16 le kem nĩ. Kar jagnẽ mré vẽmén nĩ, ã hã ren kỹ “kurã kren tũg sórm nĩ” , ã tỹ . . .

Topẽ Vĩ Rá le ke jé, kurã kar ki.
vẽsỹ mén ke tũ nĩn kỹ prũ fi, panh, mỹnh, kósin ke tũ nĩn kỹ kósin fi han há kãfór nĩnh jé.
vẽnhmãn ag ve jé, congregação mré.

4. Ã jykre ki han tĩ, ã tỹ kuprẽg há ag han jé

Topẽ Vĩ Rá vỹ vẽnh jyvẽn tar tón kỹ, nén ũ to, gen kỹ ẽg tỹ kuprẽg há ag han ke mũ. Hã ra, ã ne han ke mũ, Topẽ Vĩ Rá pi vẽnh jyvẽn tón kỹ, nén ũ to? Ha vé VÍDEO ti. Kar jagnẽ mré vẽmén nĩ, tag to:

VÍDEO: “Ã tỹ jykre há han ra” (5:13)

Vídeo ki, régre fi ne han ke, fi tỹ fi jykre vẽnh kanhrãn jé, kar fi tỹ kuprẽg há han jé, fi tỹ Jeová mỹ há han jé?

Ẽg ne tugnĩn ũnꞌũ mỹ to vĩ tũ tĩ, ag tỹ ẽg mỹ kuprẽg ag han jé? Hebreu 5:14 le kem nĩ. Kar jagnẽ mré vẽmén nĩ, nén ũ tag ag to:

Hẽn ri ke mũn, ẽg tỹ ãkrén tĩ, ũnꞌũ ag vỹ ẽg mỹ kuprẽg ũ han kỹ, tag vỹ tỹ há kãfór nĩ. Hã ra, ẽg ne to ãkrén ke nỹtĩ?
Vídeo vỹ ẽg mỹ ven ke, ne nỹ ã ajũna kenh ke mũ, ã tỹ jykre ki han jé kar ã tỹ kuprẽg há ag han jé?

Ẽg jykrén vỹ tỹ mapa ri ke nĩ, ti vỹ ẽg ajũna ke tĩ, ẽg tỹ mũ há han jé

5. Ũn ag tỹ ag jykre respeita kem nĩ

Ũn ag vỹ jykre tỹꞌũ nỹtĩ, tag tugnĩn ag tỹ nén ag tỹꞌũ kuprẽg tĩ. Ẽg hã ren kỹ ag jykre respeita ke tĩ? Ha vé nén ũ régre ti:

Nén ũ pir: Ũn fi vỹ maquiagem to há nĩ, hã ra fi tỹ congregação ũ ra tĩg, tá régre fag vỹ maquiagem to há tũ nĩ.

Roma 15:1 kar 1 Corinto 10:23, 24 le kem nĩ. Kar jagnẽ mré vẽmén nĩ, tag to:

Vẽnh rá tag tugnĩn, kejẽn, régre fi ne han ke mũ? Ã tỹ nén ũ han sór tĩ, hã ra ũn tỹ ã mré nĩ, ti mỹ ã tỹ nén ũ han sór tĩ vỹ tỹ kórég nĩ. Ã ne han ke mũ?

Nén ũ régre: Ũn régre vỹ ki kanhrãn nĩ, Topẽ Vĩ Rá vỹ ẽg mỹ ke tĩ, ti tỹ goj fa ag kron sĩ kỹ, tag pi tỹ nén ũ kórég nĩ. Ge ra ti pi goj fa kron sĩ sór tĩ. Ũn régre ũ vỹ ti jé prẽr tĩ, ti ĩn jé, tá ti tỹ ũn ag vỹ kronkron nỹtĩ vég tĩ.

Eclesiastes 7:16 kar Roma 14:1, 10 le kem nĩ. Kar jagnẽ mré vẽmén nĩ, tag to:

Ã tỹ nén ũ han sór tĩ, hã ra ũn tỹ ã mré nĩ, ti mỹ nén ũ ẽn vỹ tỹ kórég nĩ. Ã ne han ke mũ?

Ẽg ne han ke nỹtĩ, ẽg tỹ nén ũ há ag kuprãg jé?

1. Jeová mré vĩm nĩ ti mỹ to vĩ tĩ, ti tỹ ã ajũna ke jé, ã ne han ke mũ ti kuprẽg jé. — Tiago 1:5.

2. Topẽ Vĩ Rá tugnỹm nĩ kar vẽnh rá ag gé, ã tỹ ve jé, vẽnh jyvẽn há ag vỹ ã ajũna kenh ke mũ, kar régre kanhró ag mré vãmén nĩ gé.

3. Ha to ãkrén nĩ, ã tỹ nén ũ ẽn kuprẽg kỹ ã jykre ki ne hãn ri kenh ke mũ kar ũn ag vỹ jykre ki ne hãn ri kenh ke mũ ti.

ŨN PIPIR AG VỸ KE TĨ: “Inh pi ag jykre ag to kanẽ jur tĩ. Isỹ nén ũ ag han sór kỹ, isỹ ge han tĩ.”

Ẽg ne tugnĩn Topẽ jykre ag to kar ũn ag jykre ag to jykrén ke nỹtĩ?

Ã NE KANHRÃN JA TI

Ẽg tỹ nén ũ há ag kuprãg jé, ẽg tỹ Jeová vỹ ti jykre nén ũ to ki kanhró ke nỹtĩ, kar ẽg tỹ ãkrén ke nỹtĩ gé, ũn ag ne ãkrén ke mũ ti, isỹ nén ũ ẽn kuprãg kỹ.