OSHILESHWA 35
Nghee to dulu okuninga omatokolo e li mondjila
Atushe otu na omatokolo oo twa pumbwa okuninga. Amwe omomatokolo oo otaa dulu okukala mawa, ile mai notaa dulu okukuma oukaume wetu naJehova. Pashihopaenenwa, otashi dulika twa pumbwa okutokola kutya openi hatu ka kala, oilonga oyo hatu ka longa tu liyambidide pashimaliwa nosho yo ngeenge natu hombolwe, ile natu hombole. Ngeenge otwa ningi omatokolo e li mondjila, ohatu dulu okukala twa hafa monghalamwenyo, nohatu ka hafifa Jehova.
1. Ongahelipi to dulu okulongifa Ombiibeli, opo i ku kwafele u ninge omatokolo e li mondjila?
Ofimbo ino ninga etokolo lonhumba, ilikana kuJehova e ku kwafele nokukonakona Ombiibeli, opo u mone etaleko laye li na sha noshinima osho. (Lesha Omayeletumbulo 2:3-6.) Peemhito dimwe, Jehova okwa yandja oshipango shokondadalunde. Opo u ninge etokolo li li mondjila, oshiwa okudulika koshipango sha tya ngaho.
Ongahelipi ngeenge kape na oshipango shopaMbiibeli shokondadalunde, osho tashi ku lombwele osho u na okuninga? Jehova ote ke ku wilika “mondjila ei u nokweenda nayo.” (Jesaja 48:17) Ngahelipi mbela? Otashi dulika pe na omafinamhango oo taa dulu oku ku wilika. Omafinamhango Ombiibeli oo oshili ya fimanenena, oyo hai holola omadiladilo nomaliudo aKalunga. Ohatu lihongo luhapu nghee Kalunga ha kala e uditile oshinima shonhumba, ngeenge hatu lesha ehokololo mOmbiibeli. Ngeenge otwa didilike nghee Jehova ha kala e udite, ohatu dulu okuninga omatokolo oo tae mu hafifa.
2. Owa pumbwa okudiladila kushike ofimbo ino ninga etokolo?
Ombiibeli oya ti: “Omunamayele ta diinine eenghatu daye.” (Omayeletumbulo 14:15) Osho osha hala okutya, ofimbo inatu ninga etokolo otwa pumbwa okukonga efimbo, opo tu diladile kwaasho twa hala okuninga. Eshi to konakona osho wa diladila oku ka ninga, lipula kutya: ‘Omafinamhango Ombiibeli elipi handi dulu okutula moilonga? Osho nda hala okuninga otashi ka pa nge ngoo ombili yopamadiladilo? Etokolo lange otali ka kuma ngahelipi vamwe? Naasho sha fimanenena, mbela otali ka hafifa ngoo Jehova?’— Deuteronomion 32:29.
Jehova oye e na oufemba woku tu lombwela osho shi li mondjila naasho sha puka. Ngeenge otwa shiiva nawa eemhango nomafinamhango aye nokutokola oku a shikula, kungaho ohatu deula eliudo letu. Eliudo olo oukwatya wetu womeni, oo hau tu kwafele tu mone kutya oshinima shonhumba oshi li mondjila, ile osha puka. (Ovaroma 2:14, 15) Eliudo la deulwa otali ke tu kwafela tu ninge omatokolo e li mondjila.
KONAKONA MOULE
Lihonga nghee omafinamhango Ombiibeli nosho yo eliudo letu hai tu kwafele tu ninge omatokolo e li mondjila.
3. Efa Ombiibeli i ku wilike
Ongahelipi omafinamhango Ombiibeli taa dulu oku tu wilika, ngeenge hatu ningi omatokolo? Dana OKAVIDIO, ndele tamu kundafana omapulo taa shikula.
-
Emanguluko lokuninga omatokolo oshike?
-
Omolwashike Jehova e tu pa emanguluko lokuninga omatokolo?
-
Okwe tu pa shike, osho tashi tu kwafele tu longife emanguluko letu lokuninga omatokolo monghedi ya denga mbada?
Opo u mone oshihopaenenwa shi na sha nefinamhango lopaMbiibeli, lesha Ovaefeso 5:15, 16, ndele tamu kundafana “nghee to dulu okulongifa nawa efimbo” . . .
-
u kale ho lesha Ombiibeli pandjikilile.
-
u ninge kaume kopahombo, omudali, omonamati, ile omonakadona e li xwepo.
-
u kale ho kala pokwoongala.
4. Deula eliudo loye, opo u kale ho ningi omatokolo e li mondjila
Ngeenge ope na oshipango shopamishangwa kombinga yoshinima shonhumba kondadalunde, otashi dulika shi kale shipu okuninga etokolo. Ndele mbela ongahelipi ngeenge kape na sha oshipango sha tya ngaho? Dana OKAVIDIO, ndele tamu kundafana epulo tali shikula.
-
Ngaashi wa mona mokavidio, omumwameme okwa katuka eenghatu dilipi, opo a deule eliudo laye noku ninge etokolo olo tali hafifa Jehova?
Omolwashike tuhe na okupula vamwe ve tu ningile ko omatokolo? Lesha Ovaheberi 5:14, ndele tamu kundafana omapulo taa shikula:
-
Ponhele yokupula vamwe ve tu ningile ko omatokolo, osho hashi monika alushe sha fa shipu okuninga, oshike twa pumbwa okuninga, opo tu tokole fye vene?
-
Oshike tashi dulu oku ku kwafela u deule eliudo loye nou ninge omatokolo e li mondjila?
Ngaashi okaalita, eliudo letu ohali tu kwafele tu tokole osho tu na okuninga monghalamwenyo
5. Kala wa fimaneka omaliudo avamwe
Molwaashi ovanhu ova yoolokafana, ohava ningi omatokolo a yoolokafana. Ongahelipi hatu dulu okuulika kutya otwa fimaneka omaliudo avamwe? Tala keenghalo dopavali:
Onghalo 1: Omumwameme, oo e hole okulivaeka oinima moshipala, okwa tembukila keongalo oko ku na ovamwameme vahapu hava ningilwa nai, ngeenge ova mono vamwe va vava oinima moshipala.
Lesha Ovaroma 15:1 nosho yo 1 Ovakorinto 10:23, 24, ndele tamu kundafana omapulo taa shikula:
-
She likolelela keevelishe odo, omumwameme oo otashi dulika a li ta dulu okuninga po shike? Oshike to ka ninga po ngeenge ou li nomunhu oo eliudo laye itali shi pitike a ninge oshinima osho eliudo loye tali shi pitike u ninge?
Onghalo 2: Omumwatate oku shii kutya Ombiibeli inai tokola okulongifa oikunwa yoalkoholi pandjele, ashike okwa tokola okuhe i nwa. Okwa shivwa koshivilo, oko a mona ovamwatate tava nu oikunwa yoalkoholi.
Lesha Omuudifi 7:16 nosho yo Ovaroma 14:1, 10, ndele tamu kundafana omapulo taa shikula:
-
She likolelela keevelishe odo, omumwatate oo otashi dulika a li ta dulu okuninga po shike? Oshike to ka ninga po ngeenge owa mono vamwe tava ningi oshinima osho eliudo loye itali ku pitike u ninge?
Eenghatu dilipi tadi dulu oku ku kwafela u ninge omatokolo e li mondjila?
1. Pula Jehova e ku kwafele u ninge etokolo li li mondjila.— Jakob 1:5.
2. Ninga omapekapeko mOmbiibeli nosho yo moishangomwa oyo ya kanghamena kOmbiibeli, opo u mone omafinamhango oo to dulu okutula moilonga. Oto dulu yo okupula Ovakriste va pyokoka.
3. Konakona nghee etokolo loye tali ka kuma eliudo loye, nosho yo omaliudo avamwe.
VAMWE OHAVA TI: “Ou na oufemba wokuninga keshe osho wa hala. Ino pumbwa okulipula naasho ovanhu tava diladila.”
-
Omolwashike twa pumbwa okukala tu na ko na sha nomaliudo aKalunga, nosho yo avakwetu?
ENGONGO
Ohatu ningi omatokolo e li mondjila, ngeenge otwa mono nghee Jehova ha kala e uditile oshinima shonhumba, nokukonakona ngeenge eenghatu detu otadi ka kwafela vamwe, ile otadi ke va yahameka.
Eendululo
-
Ongahelipi to dulu okuninga omatokolo oo taa hafifa Jehova?
-
Ongahelipi to dulu okudeula eliudo loye?
-
Ongahelipi to dulu okuulika kutya owa fimaneka omaliudo avamwe?
TALA OUYELELE WA WEDWA PO
Ongahelipi to dulu okuninga omatokolo oo taa pameke oukaume weni naKalunga?
“Kala ho ningi omatokolo oo taa fimanekifa Kalunga” (Oshungonangelo, 1 Aprili 2011)
Lihonga shihapu shi na sha nanghee Jehova he tu pe omayele.
Tala osho sha kwafela omulumenhu umwe, opo a ninge etokolo la kwata moiti.
Lihonga shihapu shi na sha nanghee to dulu okuhafifa Jehova, nonande kape na oshipango shokondadalunde shi na sha naasho u na okuninga.
“Mbela oho kala alushe wa pumbwa omhango yokondadalunde?” (Oshungonangelo, 1 Desemba 2003)
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
