ILINNIAGASSAQ 35
Qanoq aalajangiilluarsinnaasartugut
Tamatta aalajangigassaqartarpugut. Assersuutigalugu sumi najugaqassanerluta, sumi suliffeqarniarnerluta aappartaassanerlutaluunniit aalajangertariaqarparput. Aalajangiinigullu inuunitsinnut Jehovamillu ikinnguteqarnitsinnut sunniuteqangaarsinnaapput. Aalajangiilluartarutta pilluarsinnaallutalu Jehova nuannaartissinnaavarput.
1. Aalajangiilluartarumallutit Biibili qanoq atortarsinnaaviuk?
Aalajangigassaqaraangatta siulersoqqulluta Jehova qinnuigisariaqarparput. Aamma tamatumunnga tunngatillugu Jehovap isiginnittaasia paasiumallugu Biibilimi misissueqqissaartariaqarpugut. (Ussatit 2:3-6 atuarsigit). Aalajangigassatsinnut tunngassuteqartumik Biibilimi inatsiseqarsinnaavoq. Taamaattoqarpallu inatsit maleruassallugu pitsaanerpaavoq.
Aalajangigassatsinnut tunngatillugu inatsiseqanngippat Jehovap najoqqutassiat Biibilimeersut atorlugit siulersorluta ‘ingerlavigisassatsigut ingerlatissinnaavaatigut’. (Esaja 48:17) Najoqqutassiat suugamik? Najoqqutassiat tassaapput ilumoortut tunngaviusut Jehovap eqqarsartaasianik misigissusiinillu ersersitsisut. Assersuutigalugu oqaluttuaq Biibilimeersoq atuaraangatsigu Jehova pisumut tunngatillugu qanoq isumaqarnersoq paasisinnaasarparput. Taamaalilluta Jehovap isumaata paasineratigut taassuma iluarisaatut aalajangiisinnaanngortarpugut.
2. Aalajangigassaqaraangavit suut eqqarsaatigeqqaartariaqarpigit?
Biibilimi ima allassimavoq: “Silatuup alloriarnini sianigeqqissaartarpai.” (Ussatit 14:15) Aalajangigassaqaraangatta aalajangiussinnaasagut eqqarsaatigilluaqqaartariaqarpagut. Apeqqutit uku atorlugit taamaaliorsinnaavugut: ‘Aalajangigassannut tunngatillugu Biibilimi sunik najoqqutassiaqarpa? Suna eqqortuliornerussava? Aalajangiunniagara allanut qanoq sunniuteqassava?’ Pingaarnertullu: ‘Aalajangiunniagara Jehovap nuannaarutigissavaa?’ – Mosesimik 5. 32:29.
Suna eqqortuunersoq sunalu eqqunngitsuunersoq Jehovap aalajangigarai. Taassumalu inatsisai najoqqutassiaalu paasilluaraangatsigit maleruaraangatsigillu ilinniartinneqarluartumik nalunngeqatiginnissuteqalertarpugut. Nalunngeqatiginnissuterpullu iluaqutigalugu paasisinnaasarparput iliuuseriniagarput eqqortuunersoq eqqunngitsuunersorluunniit. (Romamiut 2:14, 15) Nalunngeqatiginnissuterput ilinniartinneqarluarsimappat aalajangiilluarsinnaassaagut.
ITISILIINEQ
Aalajangigassaqaraangatta najoqqutassiat Biibilimeersut nalunngeqatiginnissuterpullu sooq pingaaruteqartarnersut misissoruk.
3. Biibili siulersortigiuk
Aalajangigassaqaraangatta najoqqutassiat Biibilimeersut qanoq atorluartarsinnaavagut? VIDEO takusiuk apeqqutillu tulliuttut eqqartorlugit.
-
Jehovap susinnaatippaatigut?
-
Sooq Jehovap nammineq aalajangiisinnaatippaatigut?
-
Aalajangiilluarsinnaaqqulluta Jehovap qanoq ikiortarpaatigut?
Najoqqutassiat Biibilimeersut ilaat takujumallugu Efesossimiut 5:15, 16 atuarsigit. Eqqartorsiuk ‘piffissarput pitsaanerpaamik qanoq atorsinnaagipput’ ukununnga tunngatillugu:
-
Biibilimik atuartarnermut
-
Aappaallualernissamut, angajoqqaajullualernissamut qitornaallualernissamulluunniit
-
Ataatsimiigiartarnermut
4. Nalunngeqatiginnissutit ilinniartiguk
Aalajangigassatsinnut tunngasumik Biibilimi inatsiseqaraangat aalajangeeriaannaanerusarpugut. Taavami inatsiseqanngikkaangat? VIDEO takusiuk apeqqullu tulliuttoq eqqartorlugu.
-
Qatanngut arnaq nalunngeqatiginnissutini ilinniartikkumallugu Jehovallu iluarisaatut aalajangiisinnaajumalluni qanoq iliorpa?
Sooq nammineq aalajangigassatsinnut tunngatillugu allat aalajangiitissanngilagut? Hebræerit 5:14 atuarsiuk apeqqutillu uku eqqartorlugit:
-
Allat aalajangiitinnissaat ajornannginnerorpasikkaluartoq, nammineq suut immikkoortissinnaasariaqarpagut?
-
Nalunngeqatiginnissutit ilinniartissinnaajumallugu aamma aalajangiilluarsinnaajumallutit suut iluaqutigisinnaavigit?
Soorlu nunap assinga iluaqutigisaripput taamatuttaaq nalunngeqatiginnissuterput iluaqutigalugu inuunitsinni sussanerluta aalajangiisinnaasarpugut
5. Allat allaanerusumik aalajangiisinnaanerat ataqqiuk
Inuit assigiinngitsut assigiinngitsunik aalajangiisarput. Allat uagutsinnit allaanerusumik aalajangiisinnaanerat qanoq ataqqisinnaavarput? Marlunnik assersuuteqariarta.
Assersuut 1: Qatanngut arnaq allakajaatut atisalersoriaatsimik nuannarisaqartoq ilagiinnut allanut nuuppoq. Atisalersoriaasiali ilageeqatigiligaasa ilaasa narrujuummissutigaat.
Romamiut 15:1 aamma Korintimiunut 1. 10:23, 24 atuarsigit apeqqutillu uku eqqartorlugit:
-
Versit tunngavigalugit qatanngut arnaq qanoq aalajangersinnaava? Illit ilerasuutiginngisat ilagisavit ilerasuutigippagu sussavit?
Assersuut 2: Qatanngutip angutip nalunngikkaluarlugu imigassartorneq Biibilimi inerteqqutigineqanngitsoq aalajangerpoq imigassartortarniarnani. Katerisimaarnermut qaaqqusaavoq, tassanilu qatanngutit imigassartortut takuai.
Oqaluussisartup oqaasii 7:16 aamma Romamiut 14:1, 10 atuarsigit apeqqutillu uku eqqartorlugit:
-
Versit tunngavigalugit qatanngut angut qanoq qisuariarsinnaava? Iliuuserissallugu ilerasuutigisartakkat allap iliuuserippagu sussavit?
Qanoq aalajangiilluarsinnaavugut?
1. Jehovamut ikioqqugit. – Jaaku 1:5.
2. Biibilimi Biibililersaarutinilu iluaqutigisinnaasannik najoqqutassiaqarnersoq misissuigit. Aamma Nalunaajaasut misilittagaqarluartut oqaloqatigisinnaavatit.
3. Aalajangiunniakkat ilerasuutigissanerlugu aamma allat narrujuummissutigissaneraat eqqarsaatigiuk.
OQARTOQARTARPOQ: “Sussanerlutit nammineq aalajangersinnaavat. Allat eqqarsaatigisariaqanngilatit.”
-
Sooq Guutip inoqatittalu misigissusii innimigisariaqarpagut?
EQIKKAANEQ
Aalajangiunniakkatsinnut tunngatillugu Jehova qanoq isumaqarnersoq paasigutsigu aamma allat iluaqutigissaneraat ajoqutigissaneraalluunniit eqqarsaatigigutsigu aalajangiilluarsinnaassaagut.
Uteqqiineq
-
Jehovap iluarisaatut qanoq aalajangiisarsinnaavit?
-
Nalunngeqatiginnissutit qanoq ilinniartissinnaaviuk?
-
Allat allaanerusumik aalajangiisinnaanerat qanoq ataqqisinnaaviuk?
NAMMINEQ MISISSUGASSATIT
Guutimut qaninnerulissutigisannik qanoq aalajangiisarsinnaavit?
Jehova uagutsinnik qanoq siunnersuisartoq pillugu paasisaqarnerugit.
Angutip imaannaanngitsumik aalajangigassaqartup suna iluaqutigineraa takuuk.
Biibilimi inatsiseqanngikkaangat Jehovap iluarisaatut qanoq aalajangiisarsinnaasugut paasiniaruk.