មេរៀនទី៣៥

របៀបធ្វើការសម្រេចចិត្តល្អ

លេង

យើងទាំងអស់គ្នាត្រូវធ្វើការសម្រេចចិត្តផ្សេងៗក្នុងជីវិត។ ការសម្រេចចិត្តជាច្រើនអាចជះឥទ្ធិពលល្អឬអាក្រក់មកលើយើង និងមកលើចំណងមិត្តភាពរបស់យើងជាមួយនឹងព្រះយេហូវ៉ា។ ជាឧទាហរណ៍ យើងប្រហែលជាត្រូវសម្រេចចិត្តអំពីកន្លែងរស់នៅ អំពីការងារ ឬអំពីការរៀបការជាដើម។ ពេលយើងសម្រេចចិត្តល្អ យើងអាចមានជីវិតដ៏សប្បាយ និងនាំឲ្យព្រះយេហូវ៉ាពេញចិត្ត។

១. តើអ្នកអាចប្រើគម្ពីរដើម្បីជួយអ្នកឲ្យសម្រេចចិត្តល្អយ៉ាងដូចម្ដេច?

មុនពេលសម្រេចចិត្តអំពីរឿងណាមួយ សូមអធិដ្ឋានសុំជំនួយពីព្រះយេហូវ៉ា ហើយពិចារណាមើលបទគម្ពីរដើម្បីដឹងទស្សនៈរបស់លោកអំពីរឿងនោះ។ (សូមអាន សុភាសិត ២:៣-៦) ក្នុងរឿងខ្លះព្រះយេហូវ៉ាបានឲ្យបង្គាប់ច្បាស់លាស់។ បើមានបង្គាប់ច្បាស់លាស់ ការសម្រេចចិត្តធ្វើតាមបង្គាប់ គឺជាជម្រើសល្អបំផុត។

ចុះយ៉ាងណាបើក្នុងគម្ពីរគ្មានបង្គាប់ច្បាស់លាស់? ព្រះយេហូវ៉ានៅតែជួយណែនាំអ្នកឲ្យ«ដើរតាមផ្លូវដែលគួរដើរ»។ (អេសាយ ៤៨:១៧) តើតាមរបៀបណា? មានគោលការណ៍ផ្សេងៗក្នុងគម្ពីរដែលអាចជួយណែនាំអ្នក។ គោលការណ៍គម្ពីរគឺជាសេចក្ដីបង្រៀនដែលប្រាប់អំពីទស្សនៈនិងអារម្មណ៍របស់ព្រះយេហូវ៉ា។ ពេលយើងអានកំណត់ហេតុណាមួយក្នុងគម្ពីរ ជាញឹកញយយើងដឹងថាព្រះយេហូវ៉ាមានអារម្មណ៍យ៉ាងណាចំពោះរឿងនោះ។ ពេលយើងដឹងអំពីអារម្មណ៍របស់ព្រះយេហូវ៉ា យើងអាចធ្វើការសម្រេចចិត្តដែលនាំឲ្យលោកពេញចិត្ត។

២. មុនសម្រេចចិត្ត តើអ្នកគួរពិចារណាអំពីកត្តាអ្វីខ្លះ?

គម្ពីរចែងថា៖ «មនុស្សឈ្លាសវៃរមែងគិតពិចារណាជាមុនសិន»។ (សុភាសិត ១៤:១៥) នេះមានន័យថា មុនយើងសម្រេចចិត្តអំពីរឿងណាមួយ យើងគួរចំណាយពេលគិតពិចារណាអំពីរឿងនោះជាមុនសិន។ ពេលអ្នកថ្លឹងថ្លែងអំពីជម្រើសនីមួយៗ សូមសួរខ្លួនអ្នកថា៖ ‹តើគោលការណ៍គម្ពីរអ្វីខ្លះដែលទាក់ទងនឹងរឿងនេះ? តើជម្រើសមួយណានឹងជួយខ្ញុំឲ្យមានសេចក្ដីសុខសាន្តក្នុងចិត្ត? តើការសម្រេចចិត្តរបស់ខ្ញុំនឹងមានឥទ្ធិពលយ៉ាងណាទៅលើអ្នកឯទៀត? សំខាន់បំផុត តើការសម្រេចចិត្តរបស់ខ្ញុំនឹងធ្វើឲ្យព្រះយេហូវ៉ាសប្បាយរីករាយឬទេ?›។—ការបំភ្លឺច្បាប់ ៣២:២៩

ព្រះយេហូវ៉ាមានសិទ្ធិប្រាប់យើងអំពីអ្វីដែលល្អនិងអ្វីដែលអាក្រក់។ ពេលយើងស្គាល់ច្បាប់និងគោលការណ៍របស់លោកច្បាស់ ហើយតាំងចិត្តធ្វើតាម នោះយើងកំពុងបង្វឹកបង្ហាត់ខ្លួនឲ្យមានសមត្ថភាពវិនិច្ឆ័យល្អ។ សមត្ថភាពវិនិច្ឆ័យគឺជាការដឹងក្នុងខ្លួនអំពីអ្វីដែលខុសនិងអ្វីដែលត្រូវ។ (រ៉ូម ២:១៤, ១៥) ពេលសមត្ថភាពវិនិច្ឆ័យរបស់យើងបានត្រូវបង្វឹកបង្ហាត់ហើយ នោះនឹងជួយយើងឲ្យធ្វើការសម្រេចចិត្តល្អ។

បង្កើនចំណេះ

សូមរៀនអំពីរបៀបដែលគោលការណ៍គម្ពីរនិងសមត្ថភាពវិនិច្ឆ័យរបស់យើង ជួយយើងឲ្យចេះធ្វើការសម្រេចចិត្ត។

៣. ចូរឲ្យគម្ពីរជួយណែនាំអ្នក

ពេលយើងធ្វើការសម្រេចចិត្ត តើគោលការណ៍គម្ពីរជួយណែនាំយើងយ៉ាងដូចម្ដេច? លេងវីដេអូ រួចពិភាក្សាសំណួរដូចតទៅ៖

វីដេអូ: ចូរឲ្យគោលការណ៍គម្ពីរជួយណែនាំអ្នក (៥:៥៤)

តើចិត្តសេរីគឺជាអ្វី?
ហេតុអ្វីព្រះយេហូវ៉ាឲ្យយើងមានចិត្តសេរី?
តើព្រះយេហូវ៉ាបានផ្ដល់អ្វីខ្លះដើម្បីជួយយើងឲ្យចេះធ្វើការសម្រេចចិត្តល្អបំផុត?

សូមអាន អេភេសូរ ៥:១៥, ១៦ ដើម្បីមើលគោលការណ៍មួយពីគម្ពីរ។ រួចពិគ្រោះអំពីរបៀបដែលអ្នកអាច«ប្រើគ្រប់ឱកាសឲ្យកើតប្រយោជន៍ច្រើនបំផុត» ដើម្បី . . .

អានគម្ពីរជាទៀងទាត់។
ទៅជាគូអាពាហ៍ពិពាហ៍ល្អជាង ឪពុកម្ដាយល្អជាង ឬកូនល្អជាង។
ចូលរួមកិច្ចប្រជុំក្រុមជំនុំ។

៤. ចូរបង្វឹកបង្ហាត់សមត្ថភាពវិនិច្ឆ័យរបស់អ្នកដើម្បីធ្វើការសម្រេចចិត្តល្អ

ពេលមានបង្គាប់ច្បាស់លាស់ក្នុងគម្ពីរអំពីរឿងណាមួយ នោះស្រួលឲ្យយើងសម្រេចចិត្តត្រឹមត្រូវ។ ចុះបើគ្មាន? លេងវីដេអូ រួចពិភាក្សាសំណួរដូចតទៅ៖

វីដេអូ: «កុំធ្វើអ្វីដែលនាំឲ្យសមត្ថភាពវិនិច្ឆ័យផ្ដន្ទាទោស» (៥:១៣)

ក្នុងវីដេអូ តើស្ត្រីនេះបានធ្វើតាមជំហានអ្វីខ្លះដើម្បីបង្វឹកបង្ហាត់សមត្ថភាពវិនិច្ឆ័យរបស់គាត់និងដើម្បីធ្វើការសម្រេចចិត្តដែលនាំឲ្យព្រះយេហូវ៉ាពេញចិត្ត?

ហេតុអ្វីយើងមិនគួរសុំអ្នកឯទៀតឲ្យសម្រេចចិត្តជំនួសយើង? សូមអាន ហេប្រឺ ៥:១៤ រួចពិភាក្សាសំណួរដូចតទៅ៖

តាមមើលទៅស្រួលជាងបើសុំអ្នកឯទៀតឲ្យសម្រេចចិត្តជំនួសយើង។ ប៉ុន្តែ តាមខគម្ពីរនេះ តើយើងគួរចេះសម្គាល់អ្វីដោយខ្លួនឯង?
តើមានអ្វីខ្លះដែលអាចជួយអ្នកឲ្យលត់ដំសមត្ថភាពវិនិច្ឆ័យរបស់អ្នក ហើយចេះធ្វើការសម្រេចចិត្តល្អ?

សមត្ថភាពវិនិច្ឆ័យរបស់យើងប្រៀបដូចជាផែនទីមួយ ដែលជួយយើងឲ្យសម្រេចចិត្តថាគួរទៅផ្លូវណា

៥. ចូរគោរពសមត្ថភាពវិនិច្ឆ័យរបស់អ្នកឯទៀត

មនុស្សម្នាក់ៗនឹងសម្រេចចិត្តខុសៗគ្នា។ ដូច្នេះ តើយើងអាចគោរពសមត្ថភាពវិនិច្ឆ័យរបស់អ្នកឯទៀតយ៉ាងដូចម្ដេច? សូមពិចារណាស្ថានភាពពីរ៖

ស្ថានភាពទី១: បងស្រីម្នាក់ដែលចូលចិត្តផាត់មុខ បានដូរទៅបម្រើនៅក្រុមជំនុំមួយដែលមានបងស្រីជាច្រើនមិនចូលចិត្តអ្នកណាដែលផាត់មុខទេ។

សូមអាន រ៉ូម ១៥:១ និងកូរិនថូសទី១ ១០:២៣, ២៤ រួចពិភាក្សាសំណួរទាំងនេះ៖

យោងតាមខគម្ពីរទាំងនេះ តើបងស្រីនោះប្រហែលជានឹងសម្រេចចិត្តធ្វើយ៉ាងណា? ពេលអ្នកនៅជាមួយនឹងបងប្អូនដែលមានសមត្ថភាពវិនិច្ឆ័យខុសពីអ្នក តើអ្នកនឹងធ្វើយ៉ាងណា?

ស្ថានភាពទី២: បងប្រុសម្នាក់ដឹងថា គម្ពីរមិនផ្ដន្ទាទោសការពិសាស្រាទេ តែគាត់សម្រេចចិត្តមិនពិសាស្រាទាល់តែសោះ។ ថ្ងៃមួយ បងប្អូនបានអញ្ជើញគាត់ឲ្យចូលរួមបរិភោគអាហារល្ងាចជាមួយគ្នា ហើយគាត់បានឃើញបងប្អូនខ្លះពិសាស្រា។

សូមអាន អ្នកទូន្មាន ៧:១៦ និងរ៉ូម ១៤:១, ១០ រួចពិភាក្សាសំណួរទាំងនេះ៖

យោងតាមខគម្ពីរទាំងនេះ តើបងប្រុសនោះប្រហែលជានឹងសម្រេចចិត្តធ្វើយ៉ាងណា? ពេលអ្នកឃើញបងប្អូនធ្វើអ្វីដែលខុសពីសមត្ថភាពវិនិច្ឆ័យរបស់អ្នក តើអ្នកនឹងធ្វើយ៉ាងណា?

តើមានជំហានអ្វីខ្លះដែលនាំឲ្យសម្រេចចិត្តល្អ?

១. សុំព្រះយេហូវ៉ាដើម្បីជួយអ្នកឲ្យចេះសម្រេចចិត្ត។—យ៉ាកុប ១:៥

២. ស្រាវជ្រាវក្នុងគម្ពីរនិងក្នុងសៀវភៅដែលមានមូលដ្ឋានលើគម្ពីរ ដើម្បីស្វែងរកគោលការណ៍ផ្សេងៗដែលទាក់ទងនឹងរឿងនោះ។ អ្នកក៏អាចពិភាក្សាជាមួយនឹងបងប្អូនដែលមានបទពិសោធន៍ដែរ។

៣. ពិចារណាអំពីលទ្ធផលដែលមកពីការសម្រេចចិត្តរបស់អ្នកថានឹងមានឥទ្ធិពលយ៉ាងណាលើសមត្ថភាពវិនិច្ឆ័យរបស់អ្នក និងសមត្ថភាពវិនិច្ឆ័យរបស់អ្នកឯទៀត។

មនុស្សខ្លះនិយាយថា៖ «អ្នកមានសិទ្ធិធ្វើអ្វីក៏ដោយដែលអ្នកចង់ធ្វើ។ មិនចាំបាច់ខ្វល់ពីទស្សនៈរបស់អ្នកឯទៀតទេ»។

ហេតុអ្វីយើងគួរគិតអំពីអារម្មណ៍របស់ព្រះនិងអារម្មណ៍របស់អ្នកឯទៀត?

សេចក្ដីសង្ខេប

យើងអាចសម្រេចចិត្តល្អអំពីរឿងណាមួយ ក្រោយពីយើងបានស្វែងយល់ទស្សនៈនិងអារម្មណ៍របស់ព្រះយេហូវ៉ាអំពីរឿងនោះ និងក្រោយពីយើងបានពិចារណាថា តើការប្រព្រឹត្តរបស់យើងនឹងជះឥទ្ធិពលល្អឬអាក្រក់ទៅលើអ្នកឯទៀត?