LUFUNJISHO 35
Bya Kufuukulanga Bintu Bulongo.
Atweba bonse tufuukulapo bya kuba mu bwikalo bwetu. Bintu byavula byo tufuukulapo kuba byakonsha kwitukwasha nangwa kwituletelela. Kabiji byakonsha kuwamisha bulunda bwetu ne Yehoba nangwa kwibonauna. Kimye kimo tusala mpunzha kwa kuya na kwikala ne jishinda jo tukamwenangamo mali a kwikwashishamo. Kabiji twifuukwilapo atweba bene kusongola nangwa kusongolwa. Inge twafuukulapo kuba bintu byawama, bwikalo bwetu buwama bingi kabiji tutokesha Yehoba ku muchima.
1. Baibolo wafwainwa kwimukwasha byepi kufuukulanga bintu bulongo?
Saka mukyangye kufuukula kuba kintu, patanshi lombai kwi Yehoba kwimukwasha ne kutanga Baibolo pa kuba’mba muyuke Yehoba byo amona kintu kyo mukeba kuba. (Tangai Byambo bya Maana 2:3-6.) Bimye bimo, Yehoba upana mikambizho ya kushinkamika. Onkao mambo, kyawama bingi kulondela mikambizho yanji.
Pano mwafwainwa kuba byepi inge Baibolo kechi waambapo pa kintu kyo mukeba kuba ne? Yehoba napotu ukemutangijila “mu jishinda jo mwafwainwa kuyamo.” (Isaya 48:17) Ukemutangijila byepi? Kuji mafunde akonsha kwimutangijila pa kuba bintu. Mafunde aji mu Baibolo etubuula bilanguluka Lesa ne byo omvwa ku muchima. Javula tufunda pe Lesa byo amona bintu inge twatanga jishimikila ja mu Baibolo. Inge twayuka Yehoba byo kimukola ku muchima pa bintu bimo, kitukwasha kufuukula bintu bimutokesha ku muchima.
2. Ñanyi bintu byo mwafwainwa kulangulukapo saka mukyangye kufuukula bya kuba?
Baibola waamba’mba: “Muntu wajimuka ulangulukishapo pa bintu byo oba.” (Byambo bya Maana 14:15) Akino kibena kulumbulula’mba saka tukyangye kufuukula bya kuba, patanshi twafwainwa kulangulukapo bulongo pa byo tukeba kuba. Kimye kyo musakulangulukanga bya kuba, iipuzhai anweba bene ano mepuzho: ‘Ñanyi mafunde a mu Baibolo o nafwainwa kwingijisha? Kintu kyo nkeba kuba kisakundengela kwikala na jiwi ja mu muchima jawama nyi? Nanchi byo nafuukulapo kuba bisakutuntwisha bakwetu nangwa ne? Nanchi bintu byo nafuukulapo kuba bisakutokesha Yehoba ku muchima nyi?’—Mpitulukilo ya mu Mizhilo 32:29.
Yehoba uji na luusa lwa kwitubuula kuyuka bintu byawama ne byatama. Inge twayuka bulongo mizhilo yanji ne mafunde ne kwialondelanga, tubena kufunjisha jiwi jetu ja mu muchima kwikala jawama. Jiwi ja mu muchima ke kintu kitukwasha kuyuka bintu byawama ne byatama. (Loma 2:14, 15) Inge twafunjisha bulongo jiwi jetu ja mu muchima jiketukwasha kufuukulanga bintu byawama..
FUNJILAIPO BIKWABO
Monai mafunde a mu Baibolo ne jiwi ja mu muchima byo byafwainwa kwitukwasha kufuukulanga bintu bulongo.
3. Ingijishainga Baibolo kwimutangijila mu byo muba
Mafunde a mu Baibolo afwainwa kwitukwasha byepi kufuukulanga bintu bulongo? Tambai VIDYO, ne kwisamba ano mepuzho.
-
Nanchi luusa lwa kwifuukwila bintu lo lu ka?
-
Mambo ka Yehoba o etupeela luusa lwa kwifuukwila bintu?
-
Ñanyi kintu Yehoba kyo etupa kitukwasha kufuukula bintu byawama?
Monai jino jifunde ja mu Baibolo, tangai Efisesa 5:15, 16. Kepo mwisambe byo mwafwainwa kwingijishanga “kimye kyenu bulongo” . . .
-
tangainga Baibolo kimye kyonse.
-
ikalai mwanamulume nangwa mwanamukazhi wawama mu masongola, nsemi wawama, mwana wamulume nangwa mwana wamukazhi wawama.
-
tanwainga ku kupwila.
4. Funjishai jiwi jenu ja mu muchima kwimukwasha kufuukulanga bintu bulongo
Inge mukambizho wa mu Binembelo waamba mu kushinkamika pa bintu bimo, kipeela bingi kufuukula bintu bulongo. Pano kikala byepi inge Baibolo kechi washinkamika kwamba pa bintu bimo ne? Tambai VIDYO, ne kwisamba buno bwipuzho.
-
Mu vidyo ye mwatamba, ñanyi bintu byaubile nyenga pa kuba’mba afunjishe jiwi janji ja mu muchima ne kufuukula kuba bintu bitokesha Yehoba ku muchima?
Mambo ka o kyatamina kwipuzha bakwetu kwitufuukwilako kuba bintu byo twafwainwa kwifuukwila atweba bene? Tangai Bahebelu 5:14, ne kwisamba ano mepuzho:
-
Kimo kimye kyakonsha kupeela bingi kwambila bakwetu kwitufukwilako bya kuba. Pano ñanyi kintu kyo twafwainwa kulangulukishapo atweba bene?
-
Ñanyi bintu byafwainwa kwimukwasha kufunjisha jiwi jenu ja mu muchima ne kufuukulanga bintu bulongo?
Byonkatu muntu byo engijisha mapu kumutangijila bulongo ku mpunzha ko abena kuya, ne jiwi ja mu muchima najo jitukwasha kufuukula bintu bulongo mu bwikalo bwetu
5. Nemekai jiwi ja mu muchima ja bakwenu
Byonkatu bantu byo bapusana ne bintu byo bafuukula nabyo bikala byapusana pusana. Tumwesha byepi amba twanemeka jiwi ja mu muchima ja bakwetu? Monai bino bintu bibiji bimweka:
Kitanshi 1: Nyenga watemwa kwipyola ku meso wavilukila mu kipwilo muji banyenga bavula babula kutemwa bya kwipyolapyola ku meso.
Tangai Loma 15:1 ne 1 Kolinda 10:23, 24, ne kwisamba ano mepuzho:
-
Kwesakana na bino byepelo, ñanyi kintu kyafwainwe kuba iwe nyenga? Mwafwainwa kuba byepi inge muji na mukwenu uji na jiwi ja mu muchima jimukanya kuba bintu bimo, pano bino jiwi jenu ja mu muchima jimuswisha kwibyuba?
Kya bubiji 2: Mulongo wayuka’mba Baibolo kechi wakanya kutoma maalwa mu kwesakanya ne. Pano bino, aye wasalapo kubula kutoma maalwa. Uno mulongo wasalapo kubula kutoma maalwa bamwita ku kijiilo kabiji wamona balongo na kutoma maalwa.
Tangai Musapwishi 7:16 ne Loma 14:1, 10, ne kwisamba ano mepuzho:
-
Kwesakana na bino byepelo, ñanyi kintu kyafwainwe kuba iwe mulongo? Mwafwainwa kuba byepi inge mwamona muntu ubena kuba bintu bimukanya jiwi jenu ja mu muchima kuba?
Ñanyi bintu bikwasha muntu kufuukula bintu bulongo?
1. Lombainga kwi Yehoba kwimukwasha kufuukulanga bulongo bintu bya kuba.—Yakoba 1:5.
2. Kebakebainga bishinka mu Baibolo ne mu mabuku alumbulula Baibolo kuba’mba mutaanemo mafunde o mwafwainwa kwingijisha. Ipuzhaiko bena Kilishitu bakosa mu lwitabilo kwimukwashako mu bintu bimo.
3. Langulukainga pa bintu bikafumamo pa byo mwafuukulapo byo bikalengela jiwi jenu ja mu muchima kwikala ne bikekala jiwi ja mu muchima ja bakwenu.
BANTU BAMO BAMBA’MBA: “Muntu mwine uji na luusa lwa kwifuukwila kuba kintu kyonse kyo akeba kuba. Ñanyi wakonsha kukalakanya mukwabo?”
-
Mambo ka o twafwainwa kulangulukapo bingi pe Lesa ne bakwetu byo bomvwa ku muchima na bintu byo tuba?
ÑANYI BISHINKA BYO MWAFUNDA?
Tufuukula bulongo bintu inge twayuka Yehoba byo omvwa ku muchima pa byo tukeba kuba ne kuyuka inge byo twafuukulapo bisakutundaika bakwetu nangwa kwibakozha ku muchima.
Mepuzho a kupitulukamo
-
Mwafwainwa kuba byepi pa kuba’mba mufuukulenga bintu bitokesha Yehoba ku muchima?
-
Mwafwainwa kufunjisha byepi jiwi jenu ja mu muchima?
-
Mumwesha byepi amba mwanemeka jiwi ja mu muchima ja bakwenu?
KEBAI BISHINKA BIKWABO
Mwakonsha kufuukula byepi bintu byafwainwa kukosesha bulunda bwenu ne Lesa?
“Fuukulainga Bintu Bileta Munema kwi Lesa” (Kyamba kya Usopa, April 15, 2011)
Funjilaipo byavula pe Yehoba byo etubuula mwa kubila bintu.
Monai bintu byakwashishe mwanamulume uno kufuukulapo kuba kintu kyakatezhe bingi.
Funjilaipo byavula pa byo mwafwainwa kutokesha Yehoba ku muchima inge kya kuba Yehoba kechi waambapo mikambizho ya kushinkamika yo mwafwainwa kulondela ne.
“Nanchi Kimye Kyonse Mukebatu Kumona Byaambapo Baibolo Nyi?” (Kyamba kya Usopa, December 1, 2003)
Mwakonsha Kutemwa
MEPUZHO O BEPUZHA JAVULA
Lufunjisho lwa Baibolo lo lu ka?
Tanai mikumbu ya mepuzho epuzha bantu javula pa mutanchi wetu wa kufunjisha Baibolo.
