LƐSIN 35

Aw Wi Go Disayd fɔ Du di Rayt Tin Dɛn?

PLE

Wi ɔl gɛt tin dɛn we wi go disayd fɔ du. Bɔku pan di tin dɛn we wi go disayd fɔ du go afɛkt wi ɛn wi padi biznɛs wit Jiova. Fɔ ɛgzampul, wi go nid fɔ disayd usay wi go de, aw wi go gɛt mɔni fɔ kia fɔ wisɛf, ɔ if wi fɔ mared. We wi disayd di rayt tin dɛn, dat de mek wi gladi ɛn wi go mek Jiova gladi.

1. Aw yu go yuz di Baybul fɔ ɛp yu fɔ disayd fɔ du di rayt tin?

Bifo yu disayd fɔ du sɔntin, pre to Jiova fɔ ɛp yu ɛn rid di Baybul fɔ si aw Jiova de fil bɔt di tin we yu de disayd fɔ du. (Rid Prɔvabs 2:3-6.) Sɔntɛnde, Jiova kin sho wi klia wan wetin wi fɔ du. If na so i bi, di bɛst tin we yu kin du na fɔ disayd fɔ du wetin Jiova tɛl yu fɔ du.

Bɔt wetin yu go du if di Baybul nɔ tɛl yu klia wan wetin fɔ du? Jiova go stil gayd yu na di “rod we yu fɔ waka na layf.” (Ayzaya 48:17) Aw? Prinsipul dɛn de we go gayd yu. Baybul prinsipul na tru tru tichin dɛn we de sho aw Gɔd de tink ɛn aw i de fil. Bɔku tɛm, wi kin lan aw Gɔd de fil bɔt sɔntin we wi rid wan stori na di Baybul. We wi no aw Jiova de fil, dat kin ɛp wi fɔ disayd fɔ du sɔntin we go mek i gladi.

2. Wetin-ɛn-wetin yu fɔ tink bɔt bifo yu disayd fɔ du sɔntin?

Di Baybul se: “Udat gɛt sɛns de luk bifo i jomp.” (Prɔvabs 14:15) Dis min se bifo wi disayd fɔ du sɔntin, wi fɔ tek tɛm tink bɔt wetin wi want. As yu de tink gud gud wan bɔt ɛni wan pan di tin dɛn we yu want fɔ du, aks yusɛf dɛn kwɛstyɔn dɛn ya: ‘Us Baybul prinsipul a go yuz? Uswan pan dɛn tin dɛn ya we a de disayd fɔ du go mek a gɛt kolat? Aw di tin dɛn we a want fɔ disayd fɔ du go afɛkt ɔda pipul dɛn? Di tin we impɔtant pas ɔl, di tin dɛn we a de disayd fɔ du go mek Jiova gladi?’—Ditarɔnɔmi 32:29.

Jiova gɛt di rayt fɔ tɛl wi wetin gud ɛn wetin bad. We wi sabi in lɔ ɛn prinsipul dɛn gud gud wan ɛn mekɔp wi maynd fɔ fala dɛn, dat go ɛp wi fɔ gɛt gud kɔnshɛns. Wi kɔnshɛns na di tin we de tɛl wi if wetin wi du rayt ɔ rɔng. (Romans 2:14, 15) We wi tren wi kɔnshɛns, i go ɛp wi fɔ disayd fɔ du di rayt tin dɛn.

LAN MƆ

Lan aw wi kɔnshɛns ɛn Baybul prinsipul dɛn go ɛp wi we wi de disayd fɔ du tin dɛn.

3. Alaw di Baybul fɔ gayd yu

Aw Baybul prinsipul dɛn go gayd wi we wi de disayd fɔ du tin dɛn? Ple di VIDIO, dɔn una tɔk bɔt di kwɛstyɔn dɛn we de dɔŋ.

VIDIO: Lɛ di Baybul in Advays dɛn Gayd Yu (5:54)

Us fayn gift Jiova dɔn gi wi?
Wetin mek Jiova gi wi fridɔm?
Wetin i dɔn gi wi we de ɛp wi fɔ yuz di fridɔm we wi gɛt fɔ du wetin wi want di bɛst we?

Fɔ si wan ɛgzampul bɔt Baybul prinsipul, rid Ɛfishians 5:15, 16. Dɔn una tɔk bɔt aw yu go “yuz [yu] tɛm di bɛst we” fɔ . . .

rid di Baybul ɔltɛm.
bi gud maredman ɔ mareduman, mama ɔ papa, bɔypikin, ɔ galpikin.
atɛnd kɔngrigeshɔn mitin dɛn.

4. Tren yu kɔnshɛns fɔ disayd fɔ du di rayt tin dɛn

We di Baybul tɔk klia wan bɔt sɔntin, i kin izi fɔ disayd fɔ du di rayt tin. Bɔt wetin wi go du if di Baybul nɔ tɔk klia wan bɔt sɔntin? Ple di VIDIO, dɔn una tɔk bɔt di kwɛstyɔn we de dɔŋ.

VIDIO: “Una Tray fɔ Gɛt Gud Kɔnshɛns” (5:13)

Insay di vidio, wetin-ɛn-wetin di sista bin du fɔ tren in kɔnshɛns ɛn disayd fɔ du sɔntin we go mek Jiova gladi?

Wetin mek wi nɔ fɔ aks ɔda pipul dɛn fɔ disayd fɔ wi tin we na wi fɔ disayd fɔ wisɛf? Rid Ibruz 5:14, dɔn una tɔk bɔt dɛn kwɛstyɔn dɛn ya:

Pan ɔl we i kin izi fɔ aks ɔda pipul dɛn fɔ disayd fɔ wi, wetin wi fɔ ebul fɔ du fɔ wisɛf?
Wetin de we go ɛp wi fɔ tren wi kɔnshɛns ɛn disayd di rayt tin?

Wi kɔnshɛns tan lɛk map we de gayd wi na layf

5. Rɛspɛkt ɔda pipul dɛn kɔnshɛns

Difrɛn pipul dɛn gɛt difrɛn we fɔ disayd fɔ du sɔntin. Aw wi go sho rɛspɛkt fɔ ɔda pipul dɛn kɔnshɛns? Tink bɔt dɛn tu ɛgzampul dɛn ya:

Ɛgzampul 1: Wan sista we lɛk fɔ mek-ɔp go na wan kɔngrigeshɔn usay bɔku pan di sista dɛn nɔ kin fil fayn we dɛn si pɔsin mek-ɔp.

Rid Romans 15:1 ɛn 1 Kɔrintians 10:23, 24, dɔn una tɔk bɔt dɛn kwɛstyɔn dɛn ya:

Frɔm dɛn vas dɛn ya, wetin di sista kin disayd fɔ du? Wetin yu go du if yu de wit pɔsin we in kɔnshɛns fil se i bad fɔ du sɔntin we yu yon kɔnshɛns alaw yu fɔ du?

Ɛgzampul 2: Wan brɔda no se di Baybul nɔ se i bad fɔ drink rɔm bɔt i disayd se i nɔ go drink. Dɛn invayt am na wan pati usay i si brɔda dɛn de drink rɔm.

Rid Ɛkliziastis 7:16 ɛn Romans 14:1, 10, dɔn una tɔk bɔt dɛn kwɛstyɔn dɛn ya:

Frɔm dɛn vas dɛn ya, wetin di brɔda kin disayd fɔ du? Wetin yu go du if yu si ɔda pɔsin de du sɔntin we yu kɔnshɛns nɔ alaw yu fɔ du?

Wetin-ɛn-wetin go ɛp yu fɔ disayd fɔ du di rayt tin?

1. Aks Jiova fɔ ɛp yu fɔ disayd wetin fɔ du.—Jems 1:5.

2. Du risach na di Baybul ɛn wi buk ɛn magazin dɛn fɔ fɛn prinsipul dɛn we yu go yuz. Yu kin aks machɔ brɔda ɛn sista dɛn bak.

3. Tink bɔt aw di tin we yu go disayd fɔ du go afɛkt yu kɔnshɛns ɛn ɔda pipul dɛn kɔnshɛns.

SƆM PIPUL DƐN KIN SE: “Yu gɛt rayt fɔ du ɛnitin we yu want fɔ du. Yu nɔ fɔ kia bɔt wetin ɔda pipul dɛn tink.”

Wetin mek yu fɔ tink bɔt aw Gɔd de fil ɛn aw ɔda pipul dɛn de fil?

WETIN YU DƆN LAN?

Wi go disayd fɔ du di rayt tin dɛn we wi lan aw Jiova de fil bɔt sɔntin ɛn we wi tink bɔt aw di tin dɛn we wi disayd fɔ du go afɛkt ɔda pipul dɛn.

Rivyu

Aw yu go disayd fɔ du tin dɛn we go mek Jiova gladi?
Aw yu go tren yu kɔnshɛns?
Aw yu go sho se yu rɛspɛkt ɔda pipul dɛn kɔnshɛns?

Di det we a dɔn dis lɛsin:

Gol

Tink bɔt sɔntin we yu gɛt fɔ disayd fɔ du. Fala di tri stɛp dɛn we de na di bɔks we gɛt di taytul “ Wetin-ɛn-Wetin Go Ɛp Yu fɔ Disayd fɔ Du di Rayt Tin?”

Ɔda Gol:

Ɔda Gol