SUƐI LEBOLII 35

Vɛɛ Naŋ Tosa yɛ Kɛɛsiaala Kɛndɛlaŋ?

PILEI

Naa kpou nɔ kɛɛsiaalaŋ le tosaa. Mi kɛɛsiaalaŋ ndaŋ la bɔɔbɔɔ la piiliaŋ naa tau. Mi la piiliaŋ vɛlɛ chaŋyɛi naŋ nɔ a Chɛhowa ve. Le tamaseliiyo, naapum miŋ nɔ le kɛɛsiaa tosaa le fonda naŋ cho ichali wo, mɛɛ naŋ cho wa kaniei sɔlaa yɛ, ɔɔ te ŋ nɔ pɛ miŋ chua lanɔɔ ɔɔ pɔnɔɔ. Te ŋ tosa pɛ kɛɛsiaala kɛndɛlaŋ, ŋ nɔla miŋ wa a kɔl kɛndɛ nduyɛ miŋ nɛŋi Chɛhowa kɔllo.

1. Vɛɛ ŋ nɔla yɛ ma soliŋ Baabuiyo kpeku le kɛɛsiaala kɛndɛlaŋ tosaa?

Tuupa ma tosa kɛɛsiaa, piɛi fɛŋ o Chɛhowa lo, okoŋ ma tosa yaasiaa o Baabuiyo niŋ le sinaa mɛɛ o yiyaŋ a kɛɛsiaa koŋ okɔɔ yɛ. (Nuawɔ Pulɔwaa 2:3-6.) O sɔɔŋ pum niŋ, mi Chɛhowa chɔm naa kpendekele nyɛ naŋ nɔ miŋ tosa wo o Baabuiyo niŋ. O hei niŋ, o wa bɔɔ suɛi kɛndɛ le miŋ kɛɛsiaa le tosaa nyɛ Chɛhowa dimul naa wo.

Kɛ te o wa yɛ mi sawa kpeekpei ve o Baabuiyo niŋ, le chɔmndo nyɛ ŋ nɔ ma tosa wo le? O wa bɛɛ lende, Chɛhowa cho num chɔm ‘nɛi ŋ nɔ ma kuɛ choo wo.’ (Aisaya 48:17) Vɛɛ o tosa yɛ hei? Naapum mi sawala mandaalaŋ la wa o Baabuiyo niŋ le num nɛiyo chɔmndo. Sawala mandaala Baabuiyo la cho nyɛ mala naa le tonyaa sinaa o sɔɔŋ niŋndo ni. Nduyɛ, laŋ la mala naa vɛlɛ ni le sinaa yiyaŋ Mɛlɛkaa o sɔɔŋ choo. Teleŋnda bɔɔbɔɔ te ŋ veelu pɛ diomndaŋ o Baabuiyo niŋ a sɔɔŋ pum okɔɔ, miŋ sina yiyaŋ Mɛlɛkaa o sɔɔŋ muŋ choo. Te ŋ sina pɛ yiyaŋ Chɛhowaa o sɔɔŋ choo, ŋ nɔla miŋ tosa kɛɛsiaala nɛŋi ndu kɔllo laŋ.

2. Tuupa ma tosa kɛɛsiaa, a yɛɛ okɔɔ ŋ nɔ yɛ ma yiyaŋ?

Baabuiyo dimi aa: “Wana kɔl kaloo ndu, lɔɔ pa mbo tosa nyɛ o nyɛ, mɛɛ mbo yiyaŋ nyɛ kɛndɛi.” (Pulɔwaa 14:15) Hei sim ni maa tuupa ma tosa kɛɛsiaa, a nɔ fɛŋ ma chal ma yiyaŋ a sɔɔŋ bɔɔbɔɔ okɔɔ. Te a wa pɛ yiyaŋndo o i kɛ kɛ choo, nyunaŋndɔ aa: ‘Sawa mandaa Baabui kuɛɛ chiɛɛliaŋ yɛ a suɛi hei? O sɔɔŋ muŋ niŋ kpou, i kuɛɛ tosa yɛ mi wa a kɔl kɛndɛ? Vɛɛ kɛɛsiaa nuu cho yɛ acheleŋnda piiliaŋ? I hiou kpou ve, kɛɛsiaa nuu cho pa Chɛhowa kɔllo nɛŋi?’—Ditɔnɔmii 32:29.

Chɛhowa nɔ dioo le mbo chɔm naa i kɛndɛi tɛɛŋ a i wɔɔŋnde. Te ŋ kindiŋ pɛ miŋ sina sawala ndɔlaŋ a sawala mandaala Baabuiyo, nduyɛ miŋ kɛɛsiaŋ o kɔl le laŋ dɔwɔɔ o wali niŋ, miŋ nɔ kɔl iyama walaŋndo. Kɔl iyamaa cho nyɛ mala naa le sinaa ikɛndɛi a i wɔɔŋnde wo ni. (Luomaŋnda 2:14, 15) Te ŋ pɛɛku pɛ kɔl naa iyamaa nyɛkɛndɛi, o nɔla mbo mala naa miŋ tosa kɛɛsiaala kɛndɛlaŋ.

CHƆƆLU YAASIAA

Pɛɛku wɔ ma sina mɛɛ sawala mandaala Baabuiyo, a kɔl naa iyamaa mala naa le kɛɛsiaalaŋ tosaa yɛ.

3. Chɛl mi Baabuiyo chɔm num nɛiyo

Vɛɛ sawala mandaala Baabuiyo la mala yɛ naa, te ŋ wa pɛ kɛɛsiaalaŋ tosaa? Handu VIDUEIYO, okoŋ mi la suukaŋ o nyunalaŋ ndaŋ choo:

VIDUEIYO: Chɛl Mi Sawala Mandaala Baabuiyo La Chɔm Num Nɛiyo (5:54)

Di sɔvɛ kuɛɛ Chɛhowa ke yɛ naa?
Le yɛɛ Chɛhowa ke yɛ naa dioo le kɛɛsiaalaŋ tosaa a ba naa?
Yɛɛnɛ o ke yɛ naa le naa malaa miŋ tosa kɛɛsiaala kɛndɛlaŋ?

Le tamaseliiyo chɔɔ a sawa mandaa Baabuiyo okɔɔ, nuawɔ Ɛfisiaŋnda 5:15, 16. Okoŋ mi la suukaŋ mɛɛ ŋ “soliŋ teleŋ [numndo] kpeku nyɛkɛndɛi” le sɔɔŋ muŋ tosaa yɛ . . .

diomndaŋ veeloo o Baabuiyo niŋ lepaa o lepaa.
simnɔŋndo pɔnɔ kɛndɛ ɔɔ lanɔ kɛndɛ, kala chua kɛndɛ ɔɔ chua kɛndɛ.
kɔlaŋ o bɔŋaŋndaŋ.

4. Pɛɛku kɔl num iyamaa le kɛɛsiaala kɛndɛlaŋ tosaa

Te sawala Baabuiyo la wa pɛ kpendekele a suɛi pum okɔɔ, mi i wa tɛtɛlɛ le kɛɛsiaa tosaa. Kɛ te o wa yɛ maa sawa waa lende cho le? Handu VIDUEIYO, okoŋ mi la suukaŋ o nyunaa hoo choo:

VIDUEIYO: “Manda Kɔl Num Iyamaa Nyɛkɛndɛi” (5:13)

O vidueiyo hoo niŋ, sɔɔŋ kuɛɛ ndepilɛnɔɔ hoo ndoo tosa yɛ le kɔl ndɔ iyamaa pɛɛkoo, le halikpeŋ mbo tosa kɛɛsiaa nɛŋi Chɛhowa kɔllo wo?

Le yɛɛ o bɛnda miŋ dimul wanaa cheleŋ le ma tosal naa kɛɛsiaalaŋ te? Nuawɔ Hibuluiya 5:14, okoŋ mi la suukaŋ o nyunalaŋ ndaŋ choo:

Mi che bɛɛ i cho tɛtɛlɛ le wanaa cheleŋnda dimullo le ma tosal naa kɛɛsiaalaŋ, kɛ yɛɛ naapila nɔ yɛ miŋ kindiŋ le sinaa?
Nyɛm kuɛɛ naŋ nɔ yɛ le naa malaa miŋ pɛɛku kɔl naa iyamaa, le kɛɛsiaala kɛndɛlaŋ tosaa?

Kɔl naa iyamaa cho ko maa nyɛ chɔm naa nɛiyo wo. Mbo mala naa le sinaa mɛɛ naŋ nɔ miŋ bii yoomu naa yɛ

5. Nɔ bɛɛleŋ le kɔlta iyamala acheleŋnda

O cho o sɔɔŋ choo kpou le waŋnda tosa kɛɛsiaa pilɔɔ le. Vɛɛ naŋ chɔm yɛ bɛɛleŋ le kɔlta iyamala acheleŋnda? Tofawɔ tamaseliilaŋ la tiɔɔŋ:

Tamaselii 1: Ndepilɛnɔ kaala nyɔɔŋ suiinɔŋndo o hɔllo kuɛ o kunda cheleŋ niŋ. Kɛ o kunda o kuɛ hoo wo, ndepiliaa kaala nyɔɔŋ muŋ te. Nduyɛ mii paaliaŋ nda te a che pɛ mi waŋndo suiinuŋ muŋ.

Nuawɔ Luomaŋnda 15:1 a 1 Kɔliŋtiaŋ 10:23, 24, okoŋ mi la suukaŋ o nyunalaŋ ndaŋ choo:

A mɛɛ bolii Baabuiye hei chɔm yɛ, yɛɛ ndepilɛnɔɔ hoo nɔ yɛ mbo tosa? Yɛɛ ŋ cho yɛ tosa, te a wa pɛ naapilɛ nya wana kɔl ndɔ iyamaa chɛl le mbo tosa nyɛ kɔl num iyamaa chɛl num le tosaa wo le?

Tamaselii 2: Puaapilɛnɔɔ sina maa Baabuiyo kuuna muɛiyaŋ kolɔɔ tuuleŋ te. Kɛ mbo kɛɛsiaŋ o kɔl maa o cho wa mamuɛi kolɔɔ le. A veelu puaapilɛnɔɔ hoo o yelelaŋndo opum, mbo cha puaapiliaa muɛiyaŋ kolɔɔ.

Nuawɔ Ikilisiaatii 7:16 a Luomaŋnda 14:1, 10, okoŋ mi la suukaŋ o nyunalaŋ ndaŋ choo:

A mɛɛ bolii Baabuiye hei chɔm yɛ, yɛɛ puaapilɛnɔɔ hoo nɔ yɛ mbo tosa? Yɛɛ ŋ nɔ yɛ ma tosa, te a che pɛ waŋndo tosaa nyɛ kɔl num iyamaa chɛl num le ma tosa wo le?

Sɔɔŋ kuɛɛ mala yɛ num ma tosa kɛɛsiaala kɛndɛlaŋ?

1. Nyuna Chɛhowa le mbo mala num ma tosa kɛɛsiaa kɛndɔɔ.—Chemisi 1:5.

2. Tosa yaasiaa o Baabuiyo niŋ a o yaula tɔlnuŋ o Baabuiyo choo laŋ, le ma sina kɛɛsiaala ŋ nɔ ma tol kɔɔli laŋ. A nyuna vɛlɛ Kilisiɔŋaa nɔ taasioo tau o Mɛlɛka piɛiyo niŋnda.

3. Yiyaŋ a mɛɛ kɛɛsiaa numndo cho piiliaŋ kɔl iyama numndo, vɛlɛ a kɔlta iyamala acheleŋnda yɛ.

TE WAŊNDO DIMI PƐ AA: “Nyɛ ya hɛnaŋndo ndu ya tosa ni. I buulaŋ a nyɛ waŋnda cho dimi wo le.”

Le yɛɛ naŋ nɔ yɛ miŋ kindiŋ le sinaa yiyaŋ Mɛlɛkaa vɛlɛ a yiyaŋ wanaa cheleŋ, te ŋ wa pɛ nyɛ o nyɛ tosaa?

SƆƆŊ KULLOŊ

Ŋ nɔla miŋ tosa kɛɛsiaala kɛndɛlaŋ te ŋ kindiŋ pɛ le sinaa yiyaŋ Chɛhowaa o sɔɔŋ choo. Okoŋ, miŋ yiyaŋ te suɛi naŋ yeema le tosaa ve mala niŋ pɛ acheleŋnda ɔɔ i cho nda paaliaŋ.

Nyunala miiŋgaa choo laŋ

Vɛɛ ŋ tosa yɛ kɛɛsiaala nɛŋi Chɛhowa kɔllo laŋ?
Vɛɛ ŋ pɛɛku yɛ kɔl num iyamaa?
Vɛɛ ŋ chɔm yɛ bɛɛleŋ le kɔlta iyamala wanaa cheleŋ?

Poonyiaa paale suɛi lebolle hei chuu leŋ:

Kpeleŋ ŋ nɔ ma kɛsi wo

Yiyaŋ a kɛɛsiaa ŋ nɔ le hunɔɔ tosaa wo okɔɔ. Okoŋ ma tofa kɔfoo hoo, “ Sɔɔŋ Kuɛɛ Mala yɛ Num Ma Tosa Kɛɛsiaala Kɛndɛlaŋ?” Tol nɛila yaala cho loŋ ndaŋ kɔɔli le kɛɛsiaa koŋ tosaa.

Nyɛ cheleŋr:

Your other goal