DILONGI 35
Mutindu ya kubaka banzengolo ya mbote
Beto nionso beto kebakaka banzengolo. Banzengolo yango mingi kenatinaka beto mambote to bampasi mpe yalenda bongisa to kubebisa nguizani na beto na Yehova. Na kifuani, beto lenda baka nzengolo na diambu yina metadila kisika ya kuvuanda, mutindu ya kukokisa bansatu na beto na kinsuni, to kukanisa kana beto lenda kuela. Kana beto mebaka banzengolo ya mbote, beto kevuanda na luzingu ya kiese mpe beto kesepedisa Yehova.
1. Yinki mutindu Biblia lenda sadisa nge samu na kubaka banzengolo ya mbote?
Tekila nge baka nzengolo mosi, lomba lusadusu ya Yehova na nzila ya kisambu, mpe tadila mbote Biblia samu nge zaba mutindu Yehova ketadilaka diambu yango. (Tanga Bingana 2:3-6.) Na bantangu yankaka, Yehova kepesaka nsiku ya puelele. Kana yakele mutindu yina, kupona kuzitisa nsiku yango yakele diambu meluta mfunu yina nge lenda sala.
Bosi kana Biblia pesa nsiku mosi ve ya puelele yina kena kumonisa diambu yina nge fueti sala? Yehova ketatamana kutuadisa nge ‘na nzila yina nge fueti tambula.’ (Yezaya 48:17) Na yinki mutindu? Yakele na bansikudukusu mingi yina lenda tuadisa nge. Bansikudukusu ya Biblia kele bakedika yina kemonisaka mabanza ya Nzambi mpe mutindu yandi kekukimonaka. Mbala mingi beto kelongukaka mutindu Nzambi ketadilaka mambu ntangu beto ketangaka masolo ya Biblia. Kana beto mebakusa mutindu Yehova ketadilaka mambu, beto lenda baka banzengolo yina kesepedisa yandi.
2. Yinki mambu nge fueti tadila tekila nge baka nzengolo mosi?
Biblia metuba: ‘Muntu ya mayele ketadilaka konso kitambi na yandi.’ (Bingana 14:15) Yazola tuba ti tekila kubaka nzengolo, beto fueti baka ntangu ya kukanisa mambu yango. Ntangu nge kena kutadila diambu yango mosi mosi, kukiyuvusa: ‘Yinki nsikudukusu ya Biblia munu fueti sadila? Yinki nzengolo kepesa munu kiyenge na mabanza? Nzengolo na munu kevuanda na yinki bupusi na bantu yankaka? Yina meluta mfunu, nzengolo yango kesepedisa Yehova?’—Kulonga 32:29.
Yehova kele na yinsua ya kuzabisa beto yinki kele mbote mpe yinki kele yimbi. Kana beto mezaba mbotembote minsiku mpe bansikudukusu na yandi, mpe beto mebaka nzengolo ya kulanda yau, beto kelonga kikansasa na beto. Kikansasa kele lokola ndinga mosi yina kele na kati na beto yina kezabisaka beto kana diambu beto mesala kele ya mbote to ya yimbi. (Baroma 2:14, 15) Kikansasa yina melongua kesadisa beto beto baka banzengolo ya mbote.
KOTA NA MPINDA
Longuka mutindu bansikudukusu ya Biblia mpe kikansasa kesadisaka beto samu na kubaka banzengolo.
3. Bika Biblia tuadisa nge
Yinki mutindu bansikudukusu ya Biblia lenda tuadisa beto ntangu beto kena kubaka banzengolo? Tula VIDEO, mpe na manima tadila biuvu yayi melanda.
-
Yinki kele kimpuanza ya kupona?
-
Samu na yinki Yehova pesaka beto kimpuanza ya kupona?
-
Yinki yandi pesaka beto samu na kusadisa beto beto sadila kimpuanza na beto ya kupona na mutindu meluta mbote?
Samu na kumona kifuani ya bansikudukusu ya Biblia, tanga Baefezo 5:15, 16. Mpe na manima tadila mutindu nge lenda ‘sadila ntangu na nge na mutindu ya mbote’ na . . .
-
kutangaka Biblia mbala na mbala.
-
kukumaka nkuelani, kibuti, muana ya bakala, to muana ya nketo ya mbote.
-
kukuendaka na balukutakanu.
4. Longa kikansasa na nge samu na kubaka banzengolo ya mbote
Kana nsiku ya Biblia kele puelele samu na diambu mosi, yakevuanda mpasi ve kubaka banzengolo ya mbote. Kasi yinki beto kesala kana nsiku ya puelele kele ve? Tula VIDEO, mpe na manima tadila kiuvu yayi melanda.
-
Na video yayi, yinki mambu mpangi mosi ya nketo salaka samu na kulonga kikansasa na yandi mpe kubaka banzengolo yina kesepedisa Yehova?
Samu na yinki beto fueti lomba ve bantu yankaka babaka banzengolo na kisika na beto? Tanga Baebreo 5:14, mpe na manima tadila biuvu yayi:
-
Yinki mutindu beto kekuma na dikoki ya kusuasikisa mambu kana beto kele na kikadulu ya kulomba bantu yankaka babaka banzengolo na kisika na beto?
-
Yinki lenda sadisa nge nge kudisa kikansasa na nge samu na kubaka banzengolo ya mbote?
Lokola karte, kikansasa na beto kesadisaka beto beto zaba nzila ya mbote yina beto fueti landa
5. Zitisa kikansasa ya bantu yankaka
Konso muntu kebakaka nzengolo yina mesuasana na ya muntu yankaka. Yinki mutindu beto lenda monisa luzitu samu na kikansasa ya bantu yankaka? Tadila masolo yayi zole:
Disolo 1: Mpangi mosi ya nketo yina kezolaka kusala munzele kuendaka na kimvuka mosi kisika bampangi mingi ya banketo kezolaka ve kusala mutindu yina.
Tanga Baroma 15:1 mpe 1 Bakorinto 10:23, 24, mpe na manima tadila biuvu yayi:
-
Na kutadila baverse yayi, yinki nzengolo mpangi yango ya nketo lendaka baka? Yinki nge kesala kana nge kele na muntu mosi yina kikansasa na yandi kena kupekisa yandi yandi sala diambu yina kele mbote samu na nge?
Disolo 2: Mpangi mosi ya bakala mezaba ti Biblia pekisa ve kunua malavu na bukatikati, kasi yandi meponaka kubika kunua malavu. Bamebokidisa yandi na feti mosi, kuna yandi memona bampangi kena kunua malavu.
Tanga Longi 7:16 mpe Baroma 14:1, 10, mpe tadila biuvu yayi:
-
Na kutadila baverse yayi, yinki nzengolo mpangi yango ya bakala lendaka baka? Yinki nge kesala kana nge memona muntu yankaka kena kusala diambu yina kikansasa na nge kena kupekisa nge nge sala?
Yinki mambu lenda sadisa nge samu nge baka banzengolo ya mbote?
1. Lomba Yehova yandi sadisa nge samu nge baka nzengolo samu na diambu yina nge fueti sala.—Yakobo 1:5.
2. Sosasosa na Biblia mpe na mikanda yina kesasilaka Biblia samu na kumona bansikudukusu ya kusadila. Nge lenda yuvusa diaka Baklisto yina kele ya kuyela na kimpeve.
3. Tadila bupusi yina nzengolo na nge kevuanda na yau na kikansasa na nge mpe na kikansasa ya bantu yankaka.
BANTU YANKAKA METUBA: “Nge kele na yinsua ya kusala yina nge mezola. Nani ketulaka dikebi na mambu yina bantu yankaka kekanisaka?”
-
Samu na yinki beto fueti tadila banguilu ya Nzambi, mpe ya bantu yankaka?
BUNKUFI
Beto kebakaka banzengolo ya mbote kana beto mezaba dibanza ya Yehova samu na diambu yango mpe na manima beto ketadila kana banzengolo na beto kesadisa bantu yankaka to yakesala bau mpasi.
Mvutukulu
-
Yinki lenda sadisa nge nge baka banzengolo yina kesepedisa Yehova?
-
Yinki mutindu nge lenda longa kikansasa na nge?
-
Yinki mutindu nge lenda zitisa kikansasa ya bantu yankaka?
SOSA
Yinki mutindu nge lenda baka banzengolo yina kekumisa kinkundi na nge na Nzambi ngolo?
“Bikateli na yo ekumisa Nzambe” (Linɔ́ngi ya Mosɛnzɛli ya 15 Avril 2011)
Longuka mambu mingi na diambu metadila mutindu Yehova kepesilaka beto malongi.
Tala mambu yina sadisaka bakala mosi samu na kubaka nzengolo mosi ya mpasi.
Longuka mbotembote mutindu ya kusepedisa Yehova kana yandi pesa ve nsiku mosi ya puelele.
“Osengeli kaka komona naino mobeko ya Biblia?” (Linɔ́ngi ya Mosɛnzɛli ya 1 Décembre 2003)
