SIRONGWA 35
Omu no tura po matokoro gomawa
Natuvenye twa hepa kutura po matokoro. Sinzi somatokoro kukundama elikwatakano lyetu naJehova ntani nanyamwetu. Pasihonena, ose kutokora oku natu tunga nomu natu gwana yimaliwa ndi nsene asi tatu kwara. Apa atu tura po matokoro gomawa, ayo kutuhafesa ntani kuhafesa Jehova.
1. Ngapi no ruganesa Bibeli yipo o ture po matokoro gomawa?
Komeho o ture po etokoro, kanderera kwaJehova a ku vatere ntani konakona Bibeli yipo o dive mutaro gwaJehova koukaro owo. (Resa Yisewe 2:3-6.) Momaukaro gamwe, Jehova kwa gava veta zokuvyukilira. Ano nsene o limburukwa koveta ozo, ove ngo tura po etokoro lyewa.
Nye ngapi nsene kwato veta ezi za vyukilira kukutantera eyi no rugana? Jehova simpe nga kulikida “nzira ezi no genda.” (Jesaya 48:17) Monkedi musinke? Pwa kara nompango edi nadi kuvatera. Nompango domoBibeli kuna kara usili ou au horora malizuvho nomagano gaKarunga. Rorunzi, ose kukwata egano omu Karunga a lizuvhu apa atu resa sihorokwa somoBibeli. Apa atu kwata egano omu a lizuvhu Jehova, ayo kutuvatera tu ture po matokoro aga aga mu hafesa.
2. Yisinke no rugana komeho o ture po etokoro?
Bibeli kutanta asi: “Vanandunge kutakamesa nontambo dawo.” (Yisewe 14:15) Eyi kutanta asi twa hepa kugazadara ko komeho tu ture po matokoro. Ngomu ono kutura po etokoro, lipura asi: ‘Mpango musinke zoBibeli za liza noukaro ou? Etokoro musinke nali retera nge ruhafo? Ngapi omu etokoro lyange na li kundama wopeke? Nye yomulyo po, alyo nga li hafesa Jehova ndi?’—Deuteronomium 32:29.
Jehova ga kara nononkondo dokututantera yoyiwa neyi yoyidona. Nsene tu diva nawa nompango nonoveta dendi ntani nokutokomena kudikwama, ose ngatu kara nezwi lyewa lyokomutjima. Ezwi lyokomutjima kuna kara sininke esi asi tu tantere youhunga neyi yoyidona. (Varoma 2:14, 15) Ezwi lyokomutjima eli va deura nawa kutuvatera tu ture po matokoro gomawa.
LIRONGA KO YOYINZI
Lironga omu nompango domoBibeli nezwi lyokomutjima nayi tu vatera tu ture po matokoro gomawa.
3. Ninka Bibeli zi ku pitisire
Ngapi nompango doBibeli nadi tu vatera tu ture po matokoro gomawa? Likida VIDIYO, makura zogereni mapuro aga naga kwama ko.
-
Uhwi musinke wouwa ga tu pa Jehova?
-
Morwasinke Jehova ga tu pera uhwi owo?
-
Yisinke ga tu pa yipo yi tu vatere tu ruganese nawa umanguruki wetu?
Tara mpango zimwe zomoBibeli pokuresa Vaefeso 5:15, 16. Makura zogereni omu no ruganesa nawa ‘nkenye karuwo ono gwana’ . . .
-
pokuresa Bibeli nkenye ezuva.
-
yipo o kare mulikwali, mukurona ndi munona gomuwa.
-
pokuza komapongo.
4. Deura ezwi lyoge lyokomutjima yipo o ture po matokoro gomawa
Ayo ureru kutura po etokoro nsene pana kara veta zomoBibeli ezi za uyunga kuhamena yuma yongandi. Nye ngapi nsene kapi pana kara veta? Likida VIDIYO, makura zogereni epuro eli nali kwama ko.
-
Kuliza novidiyo, yisinke ga rugene munazinyetukadi yipo a deure ezwi lyendi lyokomutjima nokutura po etokoro eli nga li hafesa Jehova?
Morwasinke natu dilira kupura vantu wopeke va tu tulire po matokoro? Resa Vahebeli 5:14, makura zogereni mapuro aga:
-
Nampili ngomu ya kara ureru kupura vakwetu va tu tulire po matokoro, yisinke twa hepa kudiva kuhangura?
-
Yisinke nayi kuvatera yipo o kare nezwi lyewa lyokomutjima nokutura po matokoro gomawa?
Ngwendi karata, ezwi lyetu lyokomutjima kutuvatera tu ture po matokoro
5. Fumadeka ezwi lyokomutjima lyovantu wopeke
Vantu kutura po matokoro gokulisiga-siga. Ngapi natu fumadeka ezwi lyokomutjima lyovantu wopeke? Tu ze tu ka konakone maukaro gavali:
Ukaro 1: Munazinyetukadi ogu ga hara kulikwita yitjuniso yokosipara ta dirukire mombungakriste omu mwa kara vanavazinyetu ava va dira kuyihara.
Resa Varoma 15:1 ntani 1 Vakolinte 10:23, 24, makura zogereni mapuro aga:
-
Kuliza nonovelise edi, yisinke na rugana munazinyetukadi ogo? Yisinke no rugana nsene kuna kara nagumwe ogu ali dili kupulisira ezwi lyendi lyokomutjima a rugane eyi o rugana ove?
Ukaro 2: Munazinyetugara ga yi diva asi Bibeli kapi za nyokesa kunwa marovhu, nye age kapi aga nu. Age tava mu zigida kepongasano oku kuna kara vanavazinyetugara ava vana kunwa marovhu.
Resa Muudisi 7:16 ntani Varoma 14:1, 10, makura zogereni mapuro aga:
-
Kuliza nonovelise edi, yisinke na rugana munazinyetugara ogo? Yisinke no rugana nsene o mona muntu kuna kurugana eyi ali kunyokesa ezwi lyoge lyokomutjima?
Yisinke no rugana yipo o ture po matokoro gomawa?
1. Pura Jehova a ku vatere o ture po etokoro.—Jakopo 1:5.
2. Rugana epaparo moBibeli nomoyimbapiratjangwa yipo o gwane nompango edi nadi kuvatera. Kuvhura hena o pure ko Vakriste ava va kura pampepo.
3. Gazadara ko omu etokoro lyoge nali kundama ezwi lyoge lyokomutjima neli lyovantu wopeke.
VAMWE KUTANTA ASI: “Kuvhura o rugane nkenye eyi ono hara. Kapisi kupakera sinka eyi ava uyunga vantu”
-
Morwasinke natu karera nosinka omu a lizuvhu Karunga ntani nomu ava lizuvhu wopeke?
YINKE ONO LIRONGO?
Ose ngatu tura po matokoro gomawa nsene tu diva omu a lizuvhu Jehova kuhamena etokoro eli tuna hara kutura po ntani nokugazadara ko omu nga li kundama wopeke.
Erugururomo
-
Ngapi no tura po matokoro aga aga hafesa Jehova?
-
Ngapi no deura ezwi lyoge lyokomutjima?
-
Ngapi no fumadeka ezwi lyokomutjima lyovantu wopeke?
MAUZERA GAMWE
Ngapi no tura po matokoro aga naga nkondopeka ukaume woge naKarunga?
“Tura po matokoro aga aga yererepekesa ko Karunga” (Ruhungu, 15 Kudumogona 2011)
Lironga yoyinzi omu Jehova a tu pe mavyukiso.
Tara eyi ya vaterere mugara gumwe a ture po etokoro lyoudigu.
Lironga omu no tura po etokoro eli nali hafesa Jehova nampili kapi pana kara veta zomoBibeli.
“Wa hepa nkenye apa veta zomoBibeli ndi?” (Ruhungu, 1 Sindimba 2003)
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
