TIMOKO 35

Bwe tulendi bongela nzengolo za mbote

WÂ MU

Beto bansoni nzengolo tubongaka, zilendi nata nsobolo kwe beto na mu tindiku tieto na Yehova. Mu tifwani, tulendi sola mbuka yi tubêla, bwe tulendi bakila mbongo, peleko tala ti tufweti kwela. Bu tubonga nzengolo za mbote, tulendi bâ na luzingu lwa nsayi mpe tulendi yangirika Yehova.

1. Bwe lendi sarila Bibila mu bonga nzengolo za mbote?

Ntete wabonga nzengolo, sambila Yehova kakubakisa, mpe taluzula Bibila mu zaba mabanza mandi. (Tanga Bingana 2:3-6.) Ntangu zakaka, Yehova mbo kahanaka ntumunu za delakana. Buna, sola mu tumama ni nzengolo yiyôkele bubote yilendi bonga.

Kâ, nti sa tala ti ka kwena ntumunu ya Bibila ko yidelakane na nzengolo’aku? Yehova mbo kakutwarisa “mu nzila yi fweti diatila.” (Izaya 48:17) Ngano bwe? Kulendi bâ mitieno milendi ku twarisa. Mitieno mia Bibila, matieleka ma nguri mena masongelaka mabanza ma Nzambi. Vula-vula, mbo tuzabaka mabanza ma Nzambi bu tutangaka Bibila. Bu tubakulaka mabanza ma Yehova, tulendi bonga nzengolo zimuyangirika.

2. Nti fweti banza ntete wabonga nzengolo?

Bibila ditêle: “Muntu we na meso ma tia, mbo wukengerelaka ntambi zandi.” (Bingana 14:15) Wuzololo tâ ti ntete tabonga nzengolo, tufweti bongaka ntangu ya banza nsololo zi tusa. Bu kwe banzi, tiyula: ‘Ntia mitieno mia Bibila ndendi sarila? Nti bilendi kungana tidzunu tia ku mutima? Bwe nzengolo’ani yisobesela bantu bakaka? Wuyôkele mfunu, ngano mbo yita Yehova nsayi?’—Lubambu 32:29.

Yehova nswa we nandi wa tu têla nti bie bia mbote na bie bia mbi. Bu tubakulaka mitieno miandi, mpe bu tusolaka mu landa mio, ngindu’eto tutomesaka. Ngindu, mbanzulu zena zitubakisaka mu zaba mbote na mbi. (Bisi-Rome 2:14, 15) Bu tulonga ngindu’eto, mbo yitubakisa mu bonga nzengolo za mbote.

YIKA NDILU

Longaka bwe mitieno mia Bibila na ngindu’aku bilendi ku bakisila mu bonga nzengolo.

3. Bika Bibila diakutwarisa

Bwe mitieno mia Bibila milendi tu twarisila bu tubongaka nzengolo? Taleno VIDEO, mpe zonzeleno biyuvu bita landa.

VIDEO: Bika mitieno mia Bibila mialutwarisa (5:54)

Ngano timpwanza tia sola ni nti?
Mu bungu dia nti Yehova katuhana timpwanza tia sola?
Nti katuhana mu tu bakisa mu sarila timpwanza tieto tia sola mu mpila yiyôkele bubote?

Mu mona tifwani timosi tia mutieno wa Bibila, tangeno Bisi-Efeze 5:15, 16. Ha manima zonzeleno bwe lendi “sarila ntangu’aku mu mpila ya mbote” mu . . .

tangaka Bibila ntangu zazansoni.
bâ muntu wa kwela, tibuti peleko mwana wa mbote.
kwendaka ku tukutakanu twa timvuka.

4. Longesa ngindu’aku mu bongaka nzengolo za mbote

Bu kubâka ntumunu ya Bibila ya delakana mu musamu, ka wubâka musamu wa mpasi ko mu sa nsololo. Kâ, nti tulendi sa tala ti ka kwena ntumunu ya Bibila ya delakana ko? Taleno VIDEO, mpe zonzeleno tiyuvu tita landa.

VIDEO: “Lunda ngindu ya mbote” (5:13)

Mu video, nti mpangi yo ya yikento yasa mu longa ngindu’andi na mu bonga nzengolo yaketi tâ Yehova nsayi?

WMu bungu dia nti tufweti lembo lomba kwe bantu bakaka batubongela nzengolo zi tufweti bonga? Tangeno Bahebre 5:14, mpe zonzeleno biyuvu ebi:

Ni bu sa ti wulendi lembo bâ musamu wa mpasi mu lomba kwe bantu bakaka batubongela nzengolo, nti tufweti lenda mu swasikisaka beto beni?
Nti bilendi ku bakisa mu kurisa ngindu’aku na mu bonga nzengolo za mbote?

Ntiana karte, ngindu’eto mbo yitubakisa mu zaba bwe tutwarisila luzingu lwetoe

5. Zitisaka ngindu ya bantu bakaka

Bantu ba swaswana, nzengolo za swaswana babongaka. Bwe tulendi zitisila ngindu ya bantu bakaka? Tataluzula misamu miole:

Musamu 1: Mpangi ya yikento yizoloko maquillage, yiziri mu timvuka tie na mpangi za zikento zi lembo zoloko maquillage.

Tangeno Bisi-Rome 15:1 na 1 Bisi-Korente 10:23, 24, mpe zonzeleno biyuvu ebi:

Mu nzila ya verse zo, ntia nzengolo mpangi yo kalendi bonga? Nti sa tala ti na muntu wena we na ngindu yimuyininaka mu sa tima, ngindu ya nge bu yikuhanaka nzila ya sa tima tiango?

Musamu 2: Mpangi yimosi ya yibakala yizebi ti Bibila ka diyiminaka ko mu nwa malavu mu mpila ya delakana, kâ solele mu lembo nwa malavu. Bamutêle mbila ku malaki mamosi ku kata mona mpangi zita nwa malavu.

Tangeno Ekleziaste 7:16 na Bisi-Rome 14:1, 10, mpe zonzeleno biyuvu ebi:

Mu nzila ya verse zo, ntia nzengolo mpangi kalendi bonga? Nti sa tala ti mweni muntu wakaka wuta sa tima ti ku yiminaka ngindu’aku mu sa?

Nti lendi sa mu bonga nzengolo za mbote?

1. Lomba kwe Yehova kakubakisa mu bonga nzengolo.—Zaki 1:5.

2. Dinga mu Bibila peleko mu mikanda mizonzeleka Bibila mu baka mitieno mi sarila. Lendi monekena mpe Bakristo ba yêla mu timpeve.

3. Banza nsobolo zi nata nzengolo’aku mu ngindu’aku na mu ngindu ya bantu bakaka.

TALA TI BAKUTÊLELE: “Nswa we naku wa yirika misamu mi zololo. Mabanza ma bantu bakaka ka mena mfunu ko?”

Mu bungu dia nti fweti dingaka mu zaba mabanza ma Nzambi, na ma bantu bakaka?

MU BUKUFI

Nzengolo za mbote tubongaka bu tudingaka mu zaba mabanza ma Yehova, mpe bu tutaluzulaka tala ti nsalulu zeto mbo zibakisa bantu bakaka peleko mbo zibamwisa mpasi.