ບົດທີ 35

ເຮັດແນວໃດຈຶ່ງຈະຕັດສິນໃຈໄດ້ດີ?

ເປີດ

ເຮົາທຸກຄົນມີເລື່ອງຕ່າງໆທີ່ຕ້ອງຕັດສິນໃຈ. ບາງເລື່ອງມີຜົນຕໍ່ເຮົາຫຼາຍແລະມີຜົນຕໍ່ຄວາມສຳພັນຂອງເຮົາກັບພະເຢໂຫວານຳ. ເຊັ່ນ ເຮົາອາດຈະຕ້ອງຕັດສິນໃຈວ່າຈະຢູ່ໃສ ຈະເຮັດວຽກຫຍັງເພື່ອຫາລ້ຽງໂຕເອງ ຫຼືຈະແຕ່ງດອງບໍ່. ຖ້າເຮົາຕັດສິນໃຈໄດ້ດີ ຊີວິດເຮົາກໍຈະມີຄວາມສຸກແລະເຮັດໃຫ້ພະເຢໂຫວາດີໃຈ.

1. ຄຳພີໄບເບິນຈະຊ່ວຍເຈົ້າແນວໃດໃຫ້ຕັດສິນໃຈໄດ້ດີ?

ກ່ອນທີ່ເຈົ້າຈະຕັດສິນໃຈເລື່ອງຫຍັງກໍຕາມ ໃຫ້ເຈົ້າອະທິດຖານຂໍຄວາມຊ່ວຍເຫຼືອຈາກພະເຢໂຫວາແລະຄົ້ນເບິ່ງຈາກຄຳພີໄບເບິນວ່າເພິ່ນຄິດແນວໃດກັບເລື່ອງນັ້ນ. (ອ່ານສຸພາສິດ 2:3-6) ໃນບາງເລື່ອງ ພະເຢໂຫວາກໍບອກກົງໆວ່າໃຫ້ເຮັດຫຍັງ. ຖ້າເປັນແນວນັ້ນ ການເຮັດຕາມສິ່ງທີ່ເພິ່ນບອກກໍເປັນການຕັດສິນໃຈທີ່ດີທີ່ສຸດ.

ແລ້ວຖ້າເປັນເລື່ອງທີ່ບໍ່ໄດ້ບອກໄວ້ກົງໆໃນຄຳພີໄບເບິນເດ? ພະເຢໂຫວາກໍຈະຊ່ວຍເຈົ້າ “ໃຫ້ຍ່າງໃນທາງທີ່ຖືກຕ້ອງ.” (ເອຊາອີ 48:17, ລ.ມ.) ເພິ່ນຈະຊ່ວຍເຈົ້າແນວໃດ? ເພິ່ນໃຫ້ມີຫຼັກການຫຼາຍເລື່ອງໃນຄຳພີໄບເບິນທີ່ຊ່ວຍເຈົ້າໄດ້. ຫຼັກການແມ່ນຄຳສອນແລະເລື່ອງລາວໃນຄຳພີໄບເບິນທີ່ຊ່ວຍໃຫ້ຮູ້ວ່າພະເຢໂຫວາຄິດແລະຮູ້ສຶກແນວໃດ. ຫຼາຍເທື່ອເຮົາຈະຮູ້ຈັກຄວາມຄິດຂອງພະເຢໂຫວາຕອນທີ່ເຮົາອ່ານຄຳພີໄບເບິນ. ເມື່ອເຮົາເຂົ້າໃຈວ່າພະເຢໂຫວາຮູ້ສຶກແນວໃດເຮົາກໍຈະຕັດສິນໃຈໃນແບບທີ່ເພິ່ນມັກ.

2. ມີຫຍັງແດ່ທີ່ເຮົາໜ້າຈະຄິດເຖິງກ່ອນທີ່ຈະຕັດສິນໃຈ?

ຄຳພີໄບເບິນບອກວ່າ: “ຄົນສະຫຼາດຄິດກ່ອນເຮັດສະເໝີ.” (ສຸພາສິດ 14:15, ລ.ມ.) ນີ້ໝາຍຄວາມວ່າກ່ອນທີ່ເຮົາຈະຕັດສິນໃຈ ເຮົາໜ້າຈະໃຊ້ເວລາເພື່ອເບິ່ງວ່າເຮົາມີທາງເລືອກຫຍັງແດ່. ແລະໃຫ້ເຮົາຄິດກ່ຽວກັບທາງເລືອກແຕ່ລະຢ່າງວ່າ: ‘ມີຫຼັກການຫຍັງແດ່ໃນຄຳພີໄບເບິນທີ່ເວົ້າເຖິງເລື່ອງນີ້? ຖ້າຂ້ອຍເລືອກແບບນີ້ຂ້ອຍຈະຮູ້ສຶກຜິດບໍ? ສິ່ງທີ່ຂ້ອຍເລືອກຈະສົ່ງຜົນຕໍ່ຄົນອື່ນແນວໃດ? ແລະທີ່ສຳຄັນທີ່ສຸດ ສິ່ງທີ່ຂ້ອຍເລືອກຈະເຮັດໃຫ້ພະເຢໂຫວາມີຄວາມສຸກບໍ?’—ພະບັນຍັດ 32:29

ພະເຢໂຫວາມີສິດທີ່ຈະບອກເຮົາວ່າອັນໃດຖືກອັນໃດຜິດ. ເມື່ອເຮົາຮູ້ຈັກກົດໝາຍແລະຫຼັກການຂອງເພິ່ນແລະຕັ້ງໃຈເຮັດຕາມ ເຮົາກໍກຳລັງຝຶກໃຈຮູ້ຜິດຮູ້ຖືກຂອງເຮົາໃຫ້ເຮັດວຽກໄດ້ດີຂຶ້ນ. ໃຈຮູ້ຜິດຮູ້ຖືກເປັນຄວາມຮູ້ສຶກໃນໂຕເຮົາທີ່ບອກວ່າອັນໃດຖືກອັນໃດຜິດ. (ໂຣມ 2:14, 15) ໃຈຮູ້ຜິດຮູ້ຖືກທີ່ໄດ້ຮັບການຝຶກຈະຊ່ວຍເຮົາໃຫ້ຕັດສິນໃຈໄດ້ດີ.

ຮຽນຮູ້ຫຼາຍຂຶ້ນ

ໃຫ້ເຮົາມາເບິ່ງວ່າຫຼັກການໃນຄຳພີໄບເບິນແລະໃຈຮູ້ຜິດຮູ້ຖືກຂອງເຮົາຈະຊ່ວຍເຮົາແນວໃດເມື່ອຕ້ອງຕັດສິນໃຈ.

3. ໃຫ້ຄຳພີໄບເບິນຊີ້ນຳເຈົ້າ

ຫຼັກການໃນຄຳພີໄບເບິນຈະຊ່ວຍເຮົາແນວໃດຕອນທີ່ເຮົາຕ້ອງຕັດສິນໃຈ? ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ໃຫ້ຫຼັກການໃນພະຄຳພີຊີ້ນຳເຈົ້າ (5:54)

ອິດສະຫຼະໃນການເລືອກແມ່ນຫຍັງ?
ເປັນຫຍັງພະເຢໂຫວາຈຶ່ງໃຫ້ເຮົາເລືອກແລະຕັດສິນໃຈເລື່ອງຕ່າງໆດ້ວຍໂຕເອງ?
ພະເຢໂຫວາໃຫ້ຫຍັງກັບເຮົາເພື່ອຊ່ວຍເຮົາໃຫ້ຕັດສິນໃຈໄດ້ດີຂຶ້ນ?

ໃຫ້ເຮົາມາເບິ່ງຫຼັກການຢ່າງໜຶ່ງໃນຄຳພີໄບເບິນນຳກັນ ອ່ານເອເຟໂຊ 5:15, 16. ແລ້ວລົມກັນວ່າເຈົ້າຈະ “ໃຊ້ເວລາໃຫ້ເປັນປະໂຫຍດຫຼາຍທີ່ສຸດ” ໄດ້ແນວໃດທີ່ຈະ . . .

ອ່ານຄຳພີໄບເບິນເປັນປະຈຳ.
ເປັນຜົວເມຍ ພໍ່ແມ່ ຫຼືລູກທີ່ດີຂຶ້ນ.
ເຂົ້າຮ່ວມປະຊຸມເປັນປະຈຳ.

4. ຝຶກໃຈຮູ້ຜິດຮູ້ຖືກຂອງເຈົ້າເພື່ອຈະຕັດສິນໃຈໄດ້ດີ

ຖ້າເຮົາມີເລື່ອງທີ່ຕ້ອງຕັດສິນໃຈແລະເລື່ອງນັ້ນມີບອກໄວ້ກົງໆໃນຄຳພີໄບເບິນ ກໍບໍ່ຍາກທີ່ເຮົາຈະຕັດສິນໃຈໄດ້ຢ່າງຖືກຕ້ອງ. ແຕ່ຖ້າເປັນເລື່ອງທີ່ບໍ່ໄດ້ບອກໄວ້ກົງໆໃນຄຳພີໄບເບິນເດ? ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: “ຢ່າເຮັດສິ່ງທີ່ລົບກວນໃຈຮູ້ຜິດຮູ້ຖືກ” (5:13)

ໃນວິດີໂອ ພີ່ນ້ອງຍິງຄົນໜຶ່ງເຮັດຫຍັງເພື່ອຝຶກໃຈຮູ້ຜິດຮູ້ຖືກແລະຕັດສິນໃຈໃນແບບທີ່ເຮັດໃຫ້ພະເຢໂຫວາພໍໃຈ?

ເປັນຫຍັງເຮົາບໍ່ຄວນໃຫ້ຄົນອື່ນຕັດສິນໃຈແທນເຮົາ? ອ່ານເຮັບເຣີ 5:14 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເຖິງວ່າຈະງ່າຍກວ່າທີ່ຈະໃຫ້ຄົນອື່ນຕັດສິນໃຈແທນເຮົາ ແຕ່ເຮົາໜ້າຈະແຍກຫຍັງໃຫ້ອອກດ້ວຍໂຕເອງ?
ມີຫຍັງແດ່ທີ່ຈະຊ່ວຍໃຫ້ເຮົາຝຶກໃຈຮູ້ຜິດຮູ້ຖືກແລະຕັດສິນໃຈໄດ້ດີ?

ໃຈຮູ້ຜິດຮູ້ຖືກເປັນຄືກັບແຜນທີ່ເຊິ່ງຊ່ວຍເຮົາໃຫ້ຮູ້ວ່າຊີວິດຂອງເຮົາຄວນໄປທາງໃດ

5. ຄິດເຖິງໃຈຮູ້ຜິດຮູ້ຖືກຂອງຄົນອື່ນ

ແຕ່ລະຄົນອາດຈະຕັດສິນໃຈບໍ່ຄືກັນ. ເຮົາຈະເຮັດໃຫ້ເຫັນແນວໃດວ່າເຮົາຄິດເຖິງໃຈຮູ້ຜິດຖືກຂອງຄົນອື່ນ? ໃຫ້ເຮົາມາເບິ່ງເຫດການສອງຢ່າງນຳກັນ:

ເຫດການທີ 1: ພີ່ນ້ອງຍິງຄົນໜຶ່ງເປັນຄົນທີ່ມັກແຕ່ງໜ້າຍ້າຍໄປຢູ່ປະຊາຄົມທີ່ພີ່ນ້ອງຍິງຫຼາຍຄົນບໍ່ຄ່ອຍແຕ່ງໜ້າແລະຮູ້ສຶກບໍ່ຄ່ອຍສະບາຍໃຈເມື່ອເຫັນບາງຄົນແຕ່ງໜ້າ.

ອ່ານໂຣມ 15:1 ແລະ 1 ໂກຣິນໂທ 10:23, 24 ແລ້ວລົມກັນກ່ຽວກັບຄຳຖາມຕໍ່ໄປນີ້:

ໃນຂໍ້ຄຳພີທີ່ອ່ານໄປ ພີ່ນ້ອງຍິງທີ່ມັກແຕ່ງໜ້າອາດຕັດສິນໃຈວ່າຈະເຮັດຫຍັງ? ຖ້າເຈົ້າຢູ່ກັບຄົນທີ່ໃຈຮູ້ຜິດຮູ້ຖືກຂອງລາວບໍ່ຍອມໃຫ້ລາວເຮັດບາງຢ່າງແຕ່ເຈົ້າຮູ້ສຶກວ່າເຮັດໄດ້ ເຈົ້າຈະເຮັດແນວໃດ?

ເຫດການທີ 2: ພີ່ນ້ອງຊາຍຄົນໜຶ່ງຮູ້ວ່າຄຳພີໄບເບິນບໍ່ໄດ້ຫ້າມການດື່ມເຄື່ອງດື່ມມຶນເມົາ ແຕ່ໂຕລາວເອງກໍເລືອກທີ່ຈະບໍ່ດື່ມ. ມື້ໜຶ່ງລາວໄດ້ໄປງານລ້ຽງແລະເຫັນພີ່ນ້ອງບາງຄົນດື່ມເຄື່ອງດື່ມມຶນເມົາ.

ອ່ານຜູ້ເທສະໜາປ່າວປະກາດ 7:16 ແລະໂຣມ 14:1, 10 ແລ້ວລົມກັນກ່ຽວກັບຄຳຖາມຕໍ່ໄປນີ້:

ໃນຂໍ້ຄຳພີທີ່ອ່ານໄປ ພີ່ນ້ອງຊາຍທີ່ບໍ່ດື່ມບໍ່ຄວນເຮັດຫຍັງ? ຖ້າເຫັນຄົນອື່ນເຮັດສິ່ງທີ່ໃຈຮູ້ຜິດຮູ້ຖືກຂອງເຈົ້າບໍ່ຍອມໃຫ້ເຈົ້າເຮັດ ເຈົ້າຈະເຮັດແນວໃດ?

ເຮົາຕ້ອງເຮັດຫຍັງແດ່ເພື່ອຈະຕັດສິນໃຈໄດ້ດີ?

1. ຂໍພະເຢໂຫວາຊ່ວຍເຈົ້າໃຫ້ຮູ້ວ່າຈະຕັດສິນໃຈແນວໃດ.—ຢາໂກໂບ 1:5

2. ຄົ້ນຄວ້າຄຳພີໄບເບິນແລະໜັງສືຕ່າງໆຂອງອົງການເພື່ອເບິ່ງວ່າມີຫຼັກການຫຍັງທີ່ກ່ຽວຂ້ອງກັບເລື່ອງນັ້ນ. ແລະເຈົ້າອາດຈະລົມກັບພີ່ນ້ອງຄລິດສະຕຽນທີ່ມີປະສົບການກໍໄດ້.