KALABO 35

Da Leve Ɣɛ Le De Deʋe Vagɔ Wo?

TƐ GÁ

De ɓɔgapɛ da deʋe wo. Deʋei niitiɛ bɔɔlɔzu ta faa vɛɛ de va e vɛɛ siɛ-pului va e de yɔɔzu da Jehova. Ma wo-kɔ̃ɔ-mai taniga ta ga, da deʋe wo e vile vɛ va de wõini de ɣɛna. Da deʋe wo wɔnɔ e vile nii va da kɛ ga de ɓɔ ɓɔɔ va ɔɔ e vile ʋulu ʋaa va. Ani da deʋe vagɔ wona towa va ga kuuzu nɛɛ da ŋeteai zu. Towa kɛ wɔnɔ Jehova wuuzu nɛɛ.

1. Gala Kɔlɔi ɣa ɓɔ e va ɣɛ le e deʋe vagɔ wo?

Ɔ vɛɛ deʋe nɛpɛ bosu Jehova ɣaa-zaɣa-kɛ ga e ɓɔ e va. Gala Kɔlɔi lodo e kwɛ̃ɛ nii e boga e vile nii va e vaazu deʋezu. (Proverbs 2:3-6 lodo.) Jehova nii lɛɛvɛ manɛɛ de kɛ faa taniga zu. Na ma tɔ ga faa vagɔ ani da ziɛna ga nii e boga.

Zɛɓɛi manɛɛ de kɛ ani ya vaana niitiɛ wɔ Gala Kɔlɔi lɛ tɔ feeni e vile te va? Jehova ɣa vaazu pele wulozu ga yiɛ “ga velei manɛɛ e ziɛ la.” (Isaiah 48:17) Towa nii ɣɛ ɣɛ le? Tɛnɛ taniga ta Gala Kɔlɔi zu ya ɓɔ e va. Tɛnɛgi niitiɛ ta ɓɔ e va e Jehova yii-mai wɛ̃ɛ ta velei Jehova ɣa ɣi-gaa-ziɛ la. Tanisu da zoo de kwɛ̃ɛ velei Jehova ɣi-gaa-ziɛzu la e vile fai taniga va ani da Gala Kɔlɔi lodona. Ani da kwɛ̃ɛna ga velei Jehova ɣi-gaa-ziɛzu la, towa ɓɔ de va de deʋe vagɔ wo ga ya zii-la.

2. Zɛɓɛi manɛɛ e ɣi-gaa-ziɛ ma ɔ vɛɛ deʋe wosu?

Gala Kɔlɔi ɣɛ: “kele-ɣele nui ɣa ɣi-gaa-ziɛ ɔ vɛɛ faa ta nɛpɛ kɛɛzu.” (Proverbs 14:15) Na zu-wulo-zu ɣa ga dɔ vɛɛ faa ta nɛpɛ deʋezu, manɛɛ de siɛ siɣi ba de ɣi-gaa-ziɛ nii ma de vaazu kɛɛzu. Ya ɣɛna deʋe wosu e vile nii va manɛɛ e kɛ, ɣi-gaa-ziɛ gaa-zaɣa-kɛɛ niitiɛ ma: ‘Tɛnɛ sɛɓɛi e Gala Kɔlɔi zu e faa wosu e vile fai nii va? Zɛɓɛi ɓɔɔ ga kɛ ga ya va ga zii-la pɔ? Nii ge vaazu kɛɛzu tɔ vaazu faa vɛɛzu numaa va ɣɛ le? Maɓigi ɣa ga, ga nii ɣɛɛna tɔ vaazu Jehova wuuzu nɛɛ zu?’—Deuteronomy 32:29.

Jehova ɣa manɛɛ e faa vagɔ ɓɔga faa yowũ yɔɔzu lɛ ga diɛ. Ani da na tɔgitiɛ wɛ̃ɛna e vɛɛ na tɛnɛgitiɛ va, de ɣaa-ɓaa ga de ziɛ ga tiɛ towa ɓɔ de va ki pagɔ ɣɛ de ya. Ki pagɔi ɣa ɓɔ de va de faa vagɔ ɓɔga faa yowũ yɔɔzu wɛ̃ɛ. (Loomɛitiɛ 2:14, 15) Ki pagɔ ɣana de ya towa ɓɔ de va de deʋe vagɔ wo.

FAA LAMAA MAA WOLI

Wɛlɛ velei ki pagɔi ɓɔga tɛnɛgitiɛ te Gala Kɔlɔi zu, ta ɓɔ la de va de deʋe vagɔ wo.

3. Ziɛ ga nii Gala Kɔlɔi boga

Tɛnɛgitiɛ te Gala Kɔlɔi zu ta ɓɔ de va ɣɛ le da ɣɛna deʋe wosu? ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.

ƲILIOGI: Ziɛ Ga Tɛnɛgitiɛ Te Gala Kɔlɔi Zu (5:54)

Zɛɓɛi Jehova fea de ɓɔgapɛ de ya?
Zɛɓɛi e kɛɛ Jehova ɓega de va ga de deʋe wo?
Zɛɓɛi Jehova fea de ya ga ya ɓɔ de va de deʋe vagɔ wo?

Ga e wɛlɛ tɛnɛgi ta va e Gala Kɔlɔi zu, a Ɛfɛsɔitiɛ 5:15, 16 lodo. Na ɣa ɣɛɛna wo yɛpɛ e vile niitiɛ va manɛɛ e kɛ “siɛgi nii ʋaa ma.” Natiɛ ta ga . . .

yiɛ Gala Kɔlɔi lodo siɛ nɛpɛ ma.
e ɣɛ ga ŋaza keea nu ɔɔ zini-bɛ nu vagɔ, duu dee ɔɔ duu keea vagɔ ɔɔ goo-mɛni kulo lopo wolo.
yiɛ li gaalɛ-baitiɛ zu.

4. Yà ɣi-gaa-ziɛi maa wolo ga e ɣɛ ga deʋe vagɔ wo nu.

Ani tɔ ka na e vile nii va de wõini de kɛ, na lɛ ɓaa ga de nii wɛ̃ɛ manɛɛ de kɛ. Kɛ zɛɓɛi ya ɓɔ de va ani tɔ kɛ lɛ na e vile nii va de wõini de kɛ? ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.

ƲILIOGI: “Ya Ɣi-Gaa-Ziɛi Maa Wolo” (5:13)

Ʋiliogi nii zu, zɛɓɛi e ɓɔni ŋaza nui nii va ga e na ki-gaa-ziɛi maa wolo, e deʋe vagɔ wo ga e Jehova yii-la?

Zɛɓɛi e kɛɛ maa lɛ nɛɛni dɔ numaa ɣaa-zaɣa-kɛ ga te deʋe wo de vɛ? A Hiiɓuluitiɛ 5:14 lodo, wo gaa-zaɣa-kɛɛ niitiɛ ɣaa wote:

Zɛɓɛi e kɛɛ na lɛ ɓaa ga de numaa ɣaa-zaɣa-kɛ ga te deʋe wo de vɛ? Zɛɓɛi e kɛɛ manɛɛ de zoo de deʋe wo ɓɔɔ ʋaa ma?
Zɛɓɛi ya ɓɔ e va e ya ɣi-gaa-ziɛi maa wolo, e deʋe vagɔ wo?

E ɣɛ velei kɔlɔi nii la ya pele wulo ga numaa, de ɣigii ɣa ɓɔ de va de deʋe wo e vile nii va de wõini de kɛ da ŋeteai zu

5. Wũfe e vaitiɛ ta leʋeitiɛ ma

Numaa ta deʋe wo ga velei te ɣi-gaa-ziɛzu la. Da dɛ ɣɛ le ga da wũfesu ta leʋeitiɛ ma? De wɛlɛ po-kɔ̃ɔ-ma felegɔ va:

Po-kɔ̃ɔ-ma maa wũgi: De ɣaa yɔwɔ̃i nii e wõini ga na wũ deɣai leve ʋai ma, e lia kuuwui nii zu taitiɛ te na tɛ lɛ wõini ga ŋaza nui nii ya na wũ deɣai leve ma.

A Loomɛitiɛ 15:1 ɓɔga 1 Kɔlĩitiɛ 10:23, 24 lodo, wo gaa-zaɣa-kɛɛ niitiɛ ɣaa wote.

E ɣɛ velei Gala goi nii boga la zɛɓɛi de ɣaa yɔwɔ̃i nii ɣa deʋe ga e kɛ? Ya leve ɣɛ le e ziɛ ga Gala goi niitiɛ ani nii e wõini ga kɛɛ ʋai taitiɛ te na tɛ lɛ wõini la?

Po-kɔ̃ɔ-ma fele kelei: De ɣaa yɔwɔ̃i nii kwɛ̃ni ga Gala Kɔlɔi lɛ boni ga nu mɛlɛ dɔɔ ɓoale, kɛ e daa ɣisu ga e mɛlɛ dɔɔ nɛpɛ kpoale. E lia ɣaa-wogi nii zu e wɛlɛ kaa yɔwɔ̃itiɛ va tiɛ dɔɔ ɓoale.

A Ecclesiastes 7:16 ɓɔga Loomɛitiɛ 14:1, 10 lodo, wo gaa-zaɣa-kɛɛ niitiɛ ɣaa wote:

E ɣɛ velei Gala goi nii boga la zɛɓɛi de ɣaa yɔwɔ̃i nii ɣa deʋe ga e kɛ? Ya leve ɣɛ le e ziɛ ga Gala goi niitiɛ ani nii ɛ lɛ wõini ga kɛɛ ʋai ya wɛlɛna e vaitiɛ va tiɛ kɛ?

Zɛɓɛi ya ɓɔ e va ga e deʋe vagɔ wo?

1. Jehova ɣaa-zaɣa-kɛ ga e ɓɔ e va e kwɛ̃ɛ nii manɛɛ e kɛ.—Jĩi 1:5.

2. Wɛlɛ tɛnɛgi taniga va Gala Kɔlɔi zu e vɛɛ da wɔlɔi taniga va ga ya ɓɔ e va e kwɛ̃ɛ nii manɛɛ e kɛ. Ya de ɣaa yɔwɔ̃i taniga ɣaa-zaɣa-kɛ ɓalaa ga te tɛnɛ fe e ya.

3. Ɣi-gaa-ziɛ nii ma ya leʋei ɣa kɛ ga ya ɣi-gaa-ziɛi e vɛɛ velei va numaa ta ɣi-gaa-ziɛ la e vile ba.

NUMAA TANIGA TA ƔƐ TEA: “Manɛɛ e nii nɛpɛ kɛ e wõini e kɛ, nu nɛpɛ na faa lɛ nii zu e wõini e kɛ?”

Zɛɓɛi e kɛɛ manɛɛ de ɓɛdɛ nii ma Jehova ɣi-gaa-ziɛzu ma e vɛɛ velei va numaa ta ɣi-gaa-ziɛ la?

NII SA È MAA WOLIA

Manɛɛ de ɣaa-ɓaa de kwɛ̃ɛ velei Jehova ɣi-gaa-ziɛzu la e vile da leʋei va e vɛɛ velei va towa faa vɛɛ la numaa ta ɣi-gaa-ziɛi va. Da na ɣɛɛna towa ɓɔ de va de deʋe vagɔ wo.