SULA MAR 35

Kaka Inyalo Timo Yiero Mabeyo

TUGE

Waduto watimoga yiero e ngimawa. To thoth yiero ma watimo nyalo kelonwa ber kata rach, kendo ginyalo miyo wabed gi winjruok maber gi Jehova kata ooyo. Kuom ranyisi, nyalo dwarore ni wayier kama wabiro dakie, tich ma wabiro tiyo, kod ka be wabiro kendo kata ibiro kendwa. Ka watimo yiero mabeyo, wabedo gi ngima maber kendo wamoro Jehova.

1. Ere kaka inyalo tiyo gi Muma mondo okonyi timo yiero mabeyo?

Ka pok itimo yiero moro, kwa Jehova mondo okonyi, kae to inon Muma mondo ing’e paro ma Jehova nigo e wi yiero ma idwaro timono. (Som Ngeche 2:3-6.) Seche moko Jehova miyowaga chik ma achiel kachiel. Ka nitiere chik ma kamano, gima ber minyalo timo en luwo chikno.

To nade ka onge chik ma achiel kachiel e Muma ma nyisi gima onego itim? Jehova pod biro tayi “e yo monego iwuothie.” (Isaya 48:17) Obiro timo kamano nade? Nyalo bedo ni nitie puonj mag Muma ma nyalo konyi. Puonj mag Muma gin adiera ma nyisowa paro ma Nyasaye nigo kod kaka oneno gik moko. Kinde mang’eny, wafwenyoga paro ma Nyasaye nigo e wi wach moro sama wasomo Muma. Ka wang’eyo kaka Jehova neno gik moko, mano nyalo konyowa mondo watim yiero ma more.

2. Gin ang’o monego inon ka pok itimo yiero moro?

Muma wacho niya: “Ng’at mariek paro ka pok okawo okang’ moro amora.” (Ngeche 14:15) Mano nyiso ni ka pok watimo yiero moro amora, onego wakaw thuolo mondo wapar matut e wi yiero ma wadwaro timono. Sama idwaro timo yiero moro, inyalo penjori niya: ‘Gin puonj mage manie Muma motudore gi wachni? En yiero mane ma biro miyo abed gi paro mokuwe? Ere kaka yiero ma adwaro timoni biro mulo jomamoko? To maduong’ie moloyo, be yiero ma adwaro timoni biro moro Jehova?’—Rapar mar Chik 32:29.

Jehova nigi ratiro mar nyisowa gik makare kod ma ok kare. Sama wang’eyo chike kod puonj mag Nyasaye e yo maber kendo watemo matek mondo waluwgi, mano nyiso ni watiego chunywa. Chunyno en nyalo ma wan-go mar pogo ber gi rach. (Jo-Rumi 2:14, 15) Ka watiege maber to obiro konyowa timo yiero mabeyo.

TIM NONRO

Non ane kaka puonj mag Muma kod chunywa mar pogo ber gi rach nyalo konyowa e timo yiero.

3. We mondo Muma otayi

Puonj mag Muma nyalo konyowa nade sama watimo yiero? Tug VIDIO, kae to uwuo e wi penjo ma luwo.

VIDIO: Yie Mondo Puonj mag Muma Otayi (5:54)

En mich mane maber ma Jehova osemiyowa?
Ang’o momiyo Jehova nomiyowa michno?
Ang’o mosemiyowa mondo okonywa tiyo gi michno e timo yiero mabeyo?

Mondo ine ranyisi achiel mag puonj mag Muma, som Jo-Efeso 5:15, 16, kae to uwuo e wi kaka inyalo ‘tiyo maber gi kinde ma in-go’ mondo . . .

isom Muma pile.
ine kaka inyalo bedo dichwo, dhako, janyuol, kata nyathi maber.
idhi e chokruoge mag kanyakla.

4. Tieg chunyi mondo okonyi timo yiero mabeyo

Seche ma nitie ndiko ma nyiso achiel kachiel gima onego watim, timo yiero nyalo nenore ni yot. To nade ka onge chik ma achiel kachiel? Tug VIDIO, kae to uwuo e wi penjo ma luwo.

VIDIO: ‘Sik ka In gi Chuny Maler’ (5:13)

Gin okenge mage ma nyaminwano nokawo mondo otieg chunye kendo otim yiero ma moro Jehova?

Ang’o momiyo ok onego wakwa jomoko mondo otimnwa yiero ma wan wawegi e ma onego watim? Som Jo-Hibrania 5:14, kae to uwuo e wi penjo ma luwogi:

Kwayo jomoko mondo otimnwa yiero nyalo nenore ka gima yot. Kata kamano, onego wabed gi nyalo mar timo ang’o?
Ang’o ma nyalo konyowa tiego chunywa mondo watim yiero mabeyo?

Nyalo ma wan-go mar pogo ber gi rach chalo gi map ma konyowa ng’eyo kama onego wadhiye

5. Chiw luor ne yiero ma jomamoko otimo

Nikech ji ok chalre, gibiro timo yiero mopogore opogore. Inyalo nyiso nade ni ichiwo luor ne yiero ma jomoko otimo? Wanon ane ranyisi moko ariyo:

Ranyisi mokwongo: Tem ane paro ni nyaminwa moro mohero dusore odar modhi e kanyakla machielo. Moko kuom nyimine manie kanyakla modhiyeno chwanyore ka gineno yo modusorego.

Som Jo-Rumi 15:1 kod 1 Jo-Korintho 10:23, 24, kae to uwuo e wi penjo ma luwogi:

Kaluwore gi ndikogo, nyaminwano nyalo yiero timo ang’o? Inyalo timo ang’o ka in gi ng’at ma chunye oyiene timo gima in to chunyi ok oyieni timo?

Ranyisi mar 2: Owadwa moro ong’eyo maber ni Muma ok kwer wach madho kongo. Kata kamano, oseyiero ni ok obi bilo kong’o kata matin. Ogwel owadwano e budho moro kama oneno ka owete madho kong’o.

Som Eklesiastes 7:16 kod Jo-Rumi 14:1, 10, kae to uwuo e wi penjo ma luwogi:

Kaluwore gi ndikogo, owadwano nyalo yiero timo ang’o? Ibiro timo ang’o sama ineno ka ng’ato timo gima chunyi ok oyieni timo?

Gin okenge mage ma ng’ato nyalo kawo mondo otim yiero mabeyo?

1. Kwa Jehova mondo okonyi timo yiero.—Jakobo 1:5.

2. Tim nonro e Muma kod buge ma lero Muma mondo iyud puonj ma nyalo konyi. Bende, inyalo wuoyo gi Jokristo molony.

3. Non ane ka be yiero mitimono biro weyi ka in chuny maler kod ka be obiro chando chuny jomamoko.

PARO MA JOMOKO NIGO: “Anyalo timo gimoro amora ma adwaro. Gik ma ji timo kata ma giparo ok obadha!”

Ang’o momiyo onego wadew kaka Nyasaye kod jomamoko winjo?

PUONJ MADUONG’

Wanyalo timo yiero mabeyo ka wang’eyo kaka Jehova neno gik moko, kendo paro ka be gima wadwaro timono nyalo konyo jomamoko kata hinyogi.

Ang’o ma ipuonjori?

Ere kaka inyalo timo yiero ma moro Jehova?
Ere kaka inyalo tiego chunyi mar pogo ber gi rach?
Ere kaka inyalo nyiso ni ichiwo luor ne yiero ma jomamoko otimo?

Tarik ma atieke sulani:

Gima inyalo timo

Par ane yiero moro ma biro chuno ni itim e kinde ma biro. Kae to ti gi okenge adek manie sanduk ma wacho ni, “ Gin Okenge Mage ma Ng’ato Nyalo Kawo Mondo Otim Yiero Mabeyo?” mondo okonyi timo yierono.

Gik mamoko ma inyalo timo:

Your other goal