XNAQʼTZBʼIL 35
¿Tzeʼn jaku jaw qjyoʼn aju mas bʼaʼn?
Qkyaqilx il tiʼj tuʼn tkubʼ qximen tiʼ kbʼantel quʼn. Ateʼ junjun tiʼchaq jaku chʼexpaj qanqʼibʼil kyuʼn ex jaku tzaj kyiʼn nya bʼaʼn tiʼj qamiwbʼil tukʼil Jehová. Jun techel, bʼalo kbʼel qximen jatumel tuʼn qanqʼin, tzeʼn kkanetel aju at tajbʼen qe ex qa qo kbʼel mojeʼ moqa miʼn. Qa ma jaw qjyoʼn aju mas bʼaʼn, qo tzalajel ex ktzalajel Jehová quʼn.
1. ¿Tzeʼn jaku tzʼonin Tyol Dios tiʼja tuʼn tjaw tjyoʼna aju mas bʼaʼn?
Naʼmxtoq tbʼant jun tiʼ tuʼna, qaninxa onbʼil te Jehová ex jyonxa tqanil toj Tyol tuʼn tel tnikʼa tiʼj alkye t-ximbʼetz (uʼjinktza Proverbios 2:3-6). At maj, in tzaj tqʼamaʼn Jehová qe toj Tyol tiʼ tuʼn tbʼant quʼn ex tbʼanel qa ma txi qbʼiʼn.
¿Yajtzun qa mintiʼ in tzaj tqʼamaʼn Tyol Dios tiʼxix tuʼn tbʼant quʼn? Kʼonil Jehová qiʼj tuʼn tjaw qjyoʼn aju mas tbʼanel (Isaías 48:17). ¿Alkye tten? In bʼant jlu tuʼn aj ttzaj tqʼoʼn nabʼil qe toj Tyol. Atz in che yolin nabʼil kyiʼj xnaqʼtzbʼil nim kyoklen, aqeju in che onin qiʼj tuʼn tel qnikʼ tiʼj alkye t-ximbʼetz Jehová at tiʼj jun tiʼ ex tiʼ in kubʼ tnaʼn. Chʼixme tkyaqil maj, in nel qnikʼ tiʼj t-ximbʼetz Jehová aj tjaw quʼjin jun txʼolbʼabʼil toj Tyol. Tuʼntzunju, aj tel qnikʼ tiʼj alkye t-ximbʼetz Jehová at, kʼonil qiʼj tuʼn tjaw qjyoʼn aju mas tbʼanel in nela toj twitz.
2. ¿Tiʼ bʼaʼn tuʼn ttzaj qnaʼn naʼmxtoq tkubʼ qbʼinchaʼn jun tiʼ?
In tzaj tqʼamaʼn Tyol Dios qa aju «xjal at tnabʼl tok tkwent tiʼj jatum in bʼet» (Proverbios 14:15). A jlu in tzaj tyekʼin qa naʼmxtoq tbʼant jun tiʼ quʼn, tnejel il tiʼj tuʼn qximen tiʼj junjuntl tumel tzeʼn tuʼn tbʼant. Tuʼntzunju, tbʼanel tuʼn tkubʼ t-xjelina jlu: «¿Alkyeqe nabʼil toj Tyol Dios at toklen tukʼilju kbʼantel wuʼne? ¿Okpe chin tzalajele tuʼn jlu? ¿Tzeʼn kʼelel toj kywitz txqantl? Ex aju mas nim toklen, ¿okpe ktzalajel Jehová tuʼn?» (Deuteronomio 32:29).
At toklen Jehová tuʼn ttzaj tqʼamaʼn qe alkye bʼaʼn ex alkye nya bʼaʼn. Jaku ten jun tbʼanel qximbʼetz moqa qnabʼil aj tel qnikʼ kyiʼj ley ex qe nabʼil ateʼkux toj Biblia ex aj kyjapun quʼn. Aju qximbʼetz, atz in yolin tiʼj aj ttzaj tqʼamaʼn qanmi qa bʼaʼn jun tiʼ moqa nya bʼaʼn (Romanos 2:14, 15). Tuʼntzunju, qa xnaqʼtzaʼn maj taʼ qximbʼetz, kʼonil qiʼj tuʼn tjaw qjyoʼn aju mas bʼaʼn.
QO JYON MAS TQANIL
Qo xnaqʼtzan tiʼj tzeʼn jaku che onin nabʼil ateʼ toj Biblia qiʼj ex tzeʼn jaku tzʼonin qximbʼetz tuʼn tjaw qjyoʼn aju mas bʼaʼn.
3. Bʼinxa qe nabʼil ateʼkux toj Tyol Dios
¿Tzeʼn in che onin nabʼil toj Tyol Dios qiʼj tuʼn tjaw qjyoʼn aju mas bʼaʼn? Kyqʼonke kywitze tiʼj VIDEO ex che yoline kyiʼj xjel lu:
-
¿Alkye oyaj o tzaj tqʼoʼn Jehová qe?
-
¿Tiquʼn tzaj tqʼoʼn Jehová ambʼil qe tuʼn tkubʼ qximen tiʼ kbʼantel quʼn?
-
¿Alkye onbʼil o tzaj tqʼoʼn Jehová qe tuʼn tajbʼen oyaj lu quʼn toj tumel?
Qo xnaqʼtzan tiʼj jun nabʼil tkuʼx toj Tyol Dios. Kyuʼjinktze Efesios 5:15 ex 16. Yajxitl, che yoline tiʼj tzeʼn jaku tzʼajbʼen ambʼil kyuʼne toj tumel...
-
tuʼn kyuʼjine tiʼj Tyol Dios tkyaqil qʼij.
-
tuʼn kyoke te jun tbʼanel chmilbʼaj, mambʼaj ex kʼwalbʼaj.
-
ex tuʼn kyxiʼye kyoj chmabʼil.
4. Xnaqʼtzam tnabʼila tuʼn tjaw tjyoʼna aju mas tbʼanel
Qa at jun taqikʼ Tyol Dios in yolin tiʼj jun tiʼ qaj tuʼn tbʼant quʼn, nya kwest tuʼn tjaw qjyoʼn aju mas bʼaʼn. ¿Yajtzun qa mintiʼ jun taqikʼ Tyol Dios in yolin tiʼj? Kyqʼonke kywitze tiʼj VIDEO ex che yoline tiʼj xjel lu:
-
Ik tzeʼn setz yekʼin toj video, ¿tiʼ xbʼant tuʼn ermana tuʼn tbʼaj t-xnaqʼtzaʼn t-ximbʼetz ex tuʼn tjaw tjyoʼn aju in tzalaj Jehová tiʼj?
¿Tiquʼn mintiʼ tuʼn t-xi qqanin te juntl tuʼn ttzaj tqʼamaʼn qe tiʼ tuʼn tbʼant quʼn? Kyuʼjinktze Hebreos 5:14 ex che yoline kyiʼj xjel lu:
-
Maslo bʼaʼn jaku tzʼela toj qwitz tuʼn ttzaj tqʼamaʼn juntl qe tiʼ tuʼn t-xi qbʼinchaʼn, pero ¿tiquʼn nim toklen tuʼn tel tnikʼ teyele junjun qe tiʼj alkye mas bʼaʼn tuʼn tbʼant tuʼn?
-
¿Alkyeqe onbʼil jaku che onin qiʼj tuʼn tbʼaj qxnaqʼtzaʼn qximbʼetz ex tuʼn tjaw qjyoʼn aju mas bʼaʼn?
Ik tten qximbʼetz ik tzeʼn jun mapa tuʼnju in nonin qiʼj tuʼn tel qnikʼ tiʼj alkye bʼe tuʼn t-xi qiʼn.
5. Qʼonka toklen kyximbʼetz txqantl
Tuʼnju junxitl qoʼ, junxitl qe tiʼchaq jaku jaw tjyoʼn jun twitz juntl. ¿Tzeʼn jaku kubʼ qyekʼin qa in nok qqʼoʼn toklen kyximbʼetz txqantl? Qo xnaqʼtzan tiʼj kabʼe tiʼ jaku bʼaj.
Tnejel: Qo ximen tiʼj jun ermana tgan tuʼn tbʼaj tpintarin tibʼ moqa tuʼn tok tkʼaʼ twitz. Pero in xiʼ ajbʼel toj juntl kʼloj okslal jatumel nya kykyaqil ermana kygan tuʼn tbʼaj kypintarin kyibʼ.
Kyuʼjinktze Romanos 15:1 ex 1 Corintios 10:23 ex 24. Yajxitl che yoline kyiʼj xjel lu:
-
Ik tzeʼn in tzaj kyqʼamaʼn versículo lu, ¿tiʼ jaku kubʼ t-ximen ermana tuʼn tbʼant tuʼn? Yajtzun teya, ¿tiʼ jaku bʼant tuʼna qa in kubʼ tnaʼn jun xjal nya bʼaʼn tuʼn jun tiʼ bʼaʼn in nela toj twitza?
Tkabʼin: Ojtzqiʼn tuʼn jun ermano qa in tzaj tqʼoʼn Biblia ambʼil tuʼn t-xi qkʼaʼn chʼin qʼeʼn, pero in kubʼ t-ximen tuʼn miʼn t-xi tkʼaʼn. Jun qʼij, in xi qʼoʼn txokbʼil tiʼj tuʼn tten jun rat kyukʼil erman ex in nok tqʼoʼn twitz kyiʼj junjun ermano in xi kykʼaʼn chʼin qʼeʼn.
Kyuʼjinktze Eclesiastés 7:16 ex Romanos 14:1 ex 10. Yajxitl che yoline kyiʼj xjel lu:
-
Ik tzeʼn in tzaj kyqʼamaʼn versículo lu, ¿tiʼ jaku kubʼ t-ximen ermano tuʼn tbʼant tuʼn? Yajtzun teya, ¿tiʼ jaku bʼant tuʼna aj tok tkeʼyina qa in kubʼ tbʼinchaʼn jun erman jun tiʼ aju nya bʼaʼn in nela toj twitza?
¿Tiʼ jaku bʼant tuʼna aj tkubʼ t-ximana tuʼn t-xi tbʼinchaʼna jun tiʼ?
1. Qaninxa onbʼil te Jehová tuʼn tel tnikʼa tiʼj tiʼ tuʼn tbʼant tuʼna (Santiago 1:5).
2. Jyonxa tqanil toj Tyol Dios ex kyoj quʼj tuʼn kykanet texto tuʼna aqeju in che yolin tiʼjju in kubʼ t-ximana tuʼn tbʼant tuʼna. Ax ikx, jaku txi tqanina onbʼil kye erman ma che chʼiy toj kyokslabʼil.
3. Ximana tiʼj tiʼ kbʼel tnaʼna tuʼnju kbʼantel tuʼna ex tiʼ kbʼel kynaʼn txqantl.
AJU IN TZAJ KYQʼAMAʼN JUNJUN XJAL: «Bʼinchama alkyexku taja. Mintiʼ kyoklen txqantl tuʼn ttzaj kyqʼamaʼn tiʼ kbʼantel tuʼna».
-
¿Tiquʼn bʼaʼn tuʼn qximen tiʼjju in kubʼ tnaʼn Dios ex tiʼjju in kubʼ kynaʼn txqantl?
TOJ CHʼIN YOL
Kjawil qjyoʼn aju mas bʼaʼn qa ma tzʼel qnikʼ tiʼj alkye t-ximbʼetz Jehová at tiʼjju kbʼantel quʼn ex qa ma tzʼok qqʼoʼn toklen kyximbʼetz txqantl.
Aju ma qo yolin tiʼj
-
Tuʼn ttzalaj Jehová tuʼna, ¿tzeʼn jaku jaw tjyoʼna aju mas bʼaʼn?
-
¿Tiʼ jaku bʼant tuʼna tuʼn tbʼaj t-xnaqʼtzaʼna t-ximbʼetza?
-
¿Tzeʼn jaku kubʼ tyekʼina qa in nok tqʼoʼna toklen kyximbʼetz txqantl?
OJTZQINKA CHʼINTL
¿Alkye tten jaku jaw tjyoʼna jun tiʼ aju jaku tzʼonin tiʼja tuʼn tchʼiy tamiwbʼila tukʼil Dios?
«Bʼaʼn tuʼn tjaw qjyoʼn aju bʼaʼn in nela toj twitz Dios» (Aju Xqʼuqil, 15 te abril te 2011)
Bʼaʼn tuʼn tel tnikʼa tiʼj tzeʼn in tzaj tqʼoʼn Jehová consej qe.
Keʼyinka tiʼ onin tiʼj jun xjal tuʼn tkubʼ t-ximen tiʼ tuʼn tbʼant tuʼn toj tanqʼibʼil.
Ojtzqinka mas tqanil tiʼj tzeʼn jaku tzalaj Jehová quʼn maske mintiʼ in tzaj tqʼoʼn jun ley tiʼj tkyaqilju kbʼantel quʼn.
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
