PƐ MƐDÃPIA 35

Zi Ko Bɛi Wɔ̃ Kpeĩ Yaa Ka Ko Ge Ko Kɛɛ

À DA YƐƁO PÍÉ

Ko seĩ koo wɔ̃ ya ko ge ko kɛ. Wɔ̃ bunuzɛ lɛ ko ya ko ge ko kɛɛ, a pie lɛɛ to ko mɔ, ɛ̃ɛ̃ ko ɓɛɛla lɛ e ko Zihova ni ko fĩãa mɔ. A gɔ̃ã gɛ̃, koo bɛi ko yɛlɛtaa lɛ ko naa ko kɛ yia ka, zi ko lo gbũua ko die mɔ, ɛ̃ɛ̃ e kɛa koo naa ko piemi e kɛ ɓea ka. Ye kɔaa wɔ̃ kpeĩ ya ko ge ko kɛɛ, koo kɛɓe lɛ e Zihova zodaa kɛ geli ka.

1. Zi kpɛɛ lɛ Baaboa e bɛi gbũua i mɔ kɛ i wɔ̃ kpeĩ ya i ge ɓa kɛ?

Kɛ i tĩã wɔ̃ do yaa i ge ɓa kɛɛ, i sɛnɛɓo Zihova la gbumɔ wɛĩ, ɛ̃ɛ̃ i nyiɛ kpɔ Baaboa yi, kɛ i zi lɛ Zihova e wɔ̃ɔ gɛ̃ a kaa dɔ. (Pɔlɔvɛɛ 2:3-6 gee.) Le gbũu yia, Zihova lɛɛ wɔ̃ laa mɔ ɓa kɛɛ gee e seĩ seĩ ka. Ye aa kɛ kilia, wɔ̃ kpeĩ lɛ i bɛia kɛɛɛ, lɛ e kelɛ i to wɔ̃ e kilia pie.

Ye aa kɛ lɛ Baaboa lɛɛ́ gbaa a gee e seĩ seĩ ka kelɛ, wɔ̃ e kea kɛɛ bɛ̃ɛ̃? Zihova lɛɛ lo tĩã “zi lɛ laa mɔ i toa piea” zɔ̃ɔ̃ i lɛɛ. (Aazaya 48:17) Zi kpɛɛ ka? Liewekpo ni o ɓe lɛ o bɛi gbũu i mɔɔ. Liewekpo ni lɛ o Baaboa yia, o wanawɔ̃ɔ gana ka lɛ o zi lɛ Wala e e yɛlɛtaa kaa zɔ̃ɔ̃ ko lɛɛ. Teelea, ye kɔaa Baaboa lɛ do geea, koo zi lɛ Wala e e yɛlɛtaa ka e gbɛ̃a wɔ̃ e kilia mɔɔ mɛdã. Ye kɔaa zi lɛ Zihova e e yɛlɛtaa kaa dɔɔ, koo lo wɔ̃ lɛ e a zodaa dɔɔ.

2. Mɛɛ wɔ̃ ni lɛ laa mɔ koo yɛlɛtaa yi kɛ ko tĩã wɔ̃ yaa ko ge ko kɛ?

Baaboa laa gee: “Mi a gikãã lɛɛ, lɛɛ e yɛlɛtaa wɔ̃ e loa kɛɛ yi.” (Pɔlɔvɛɛ 14:15) A yi lɛ e kelɛ, kɛ ko tĩã wɔ̃ yaa ko ge ko kɛɛ, laa mɔ ko luo si ko ko yɛlɛtaa wɔ̃ ni lɛ ko kũ ko zɔ̃ɔ̃ kaa yi. Ye ɓaa kɛ lɛ gɛ̃pia wɔ̃ nia mɔɔ, i yɛlɛtaa wɛĩlɔɔ ni o kea yi: ‘Liewe kpɛɛ lɛ lɛ Baaboa yi lɛ a gbɛ̃ɛ̃ lɛ wɔ̃ e kea mɔ? Wɔ̃ɔ ye kpɛɛ lɛ lɛ kpeĩ m kɛ? Ye maa wɔ̃ e kea kɛɛ zi kpɛɛ lɛ a pie e lo tooa mia ye o toa mɔ? A kpanazɛɛ lɛ e kelɛ, kea lɛɛ lo Zihova gelii?’—Ditɔlɔnɔme 32:29.

Zihova lɛ nɔ laa mɔ e wɔ̃ lɛ lɛ kpeĩa wa a ye lɛ ye wa kpeĩa gee ko lɛɛ. Ye kɔaa la lɔɔ wa liewekpo nia dɔ kpokpo ɓo, ɛ̃ɛ̃ lɛ kɔaa ya ko ge ko to a piea, lɛɛ ko zogikã lakpɔ. Ko zogikã laa kɛ kɔaa wɔ̃ yie wa wɔ̃ yɔɔ dɔ. (Woloma 2:14, 15) Ye ko zogikã la aa kpɔɔ, lɛɛ lo gbũu ko mɔ ko wɔ̃ kpeĩ ya ko ge ko kɛ.

A PIE FOO

Zi liewekpo ni o Baabo yia wa ko zi zogikã e bɛi gbũua ko mɔ kɛ ko wɔ̃ kpeĩ ya ko ge ko kɛɛ gɛ̃.

3. A to Baaboa e zi zɔ̃ɔ̃ i lɛɛ

Zi kpɛɛ lɛ liewekpo ni o Baabo yia o zi zɔ̃ɔ̃a ko lɛɛ ye kɔaa kɛ wɔ̃ yapia ko ge ko kɛɛ ka? Ko VILOA gɛ̃, ɛ̃ɛ̃ kɛ ko wɛĩlɔɔ ni lɛ o to a piea yiɓo.

VILO: A To Liewekpo Ni Lɛ O Baaboa Yia O Zi Zɔ̃ɔ̃ I Lɛɛ (5:54)

Mɛɛ e zɔ̃ɔ̃ si die lɛɛ ka?
Mɛ e kɛ lɛ Zihova a to kɔaa ko zɔ̃ɔ̃ si ko die lɛɛ?
Mɛɛ aa nɔ ko lɛɛ kɛ e gbũ ko mɔ ko wɔ̃ kpeĩ kɛ?

Kɛ ko liewekpo ni lɛ o Baaboa yia gɔ̃ã gɛ̃ɛ, ko Ifisɔ̃ 5:15, 16 gee. Koo lo wɔ̃ geee e gbɛ̃a zi i bɛi ‘yɛɓo yie kɛɛa luo e i kɛlɛɛ piea’ mɔ, kelɛ . . .

i kɛ Baaboa geepia teele
i kɛ leesigɔ̃ ɛ̃ɛ̃ gɔ̃silee kpeĩ ka, i kɛ nɛ mii kpeĩ ka, ɛ̃ɛ̃ nɛ kpeĩ ka
ɓaa lo nukiela mɔɔ pakiemɔ nia yi

4. Ɓa zogikã lakpɔ kɛ i wɔ̃ kpeĩ ya i ge ɓa kɛ

Ye Baabo aa wɔ̃ gee e seĩ seĩ ka e gbɛ̃a wɔ̃ do mɔɔ, a kɛɛ lɛɛ kɛ lɔɔlɔɔ. Kɛɛ ye ye wa kilia bɛ̃ɛ̃? Ko VILOA gɛ̃, ɛ̃ɛ̃ kɛ ko wɛĩlɔɔ e to a piea yiɓo.

VILO: “I Yɛlɛ E Kɛ Ɓa Zogikã Pie” (5:13)

Viloa yia, mɛɛ wɔ̃ ni lɛ ko leegea a kɛ, kɛ e la zogikã lakpɔ ɛ̃ɛ̃ wɔ̃ a ya e ge a kɛɛ e kɛ Zihova zoda wɔ̃ ka?

Mɛ e kɛ lɛ ye waa mɔ ko to kɛɛ mia o ko zɔ̃ɔ̃ si wɔ̃ e ɓɔ koo laa yi? Ko Hiibulu 5:14 gee, ɛ̃ɛ̃ kɛ ko wɛĩlɔɔ ni o kea yiɓo:

Ye bɛ̃ɛ̃ lɛ lɛ lɔɔlɔɔ kɛ ko gee mia lɛɛ o ko zɔ̃ɔ̃ si wɔ̃ e ɓɔ ko laa yia, mɛɛ wɔ̃ lɛ ko bɛi a kɛɛ kɛ e gbũ ko mɔ ko wɔ̃ yie wa wɔ̃ yɔɔ dɔ ko die lɛɛ?
Mɛ lɛ ɓe kɛɛ e gbũ ko mɔ kɛɛ e ko zogikã lakpɔ ɛ̃ɛ̃ kɛ ko wɔ̃ kpeĩ ya ko ge ko kɛ?

Lɛ pɛbĩĩ lɛ e lɛ zɔ̃ɔ̃ɔ lɛ ɓea, ko zogikã lɛɛ gbũ ko mɔ ko ko zɔ̃ɔ̃ si, lɛ ko naa ko lo yi ko kɛɓe yia ka

5. Ɓɛlɛya nɔ mia ye o toa lɛɛ wa zogikã wɛĩ

Mia oo wɔ̃ gbɛɛ gbɛɛ ya o ge o kɛ. Zi kpɛɛ lɛ ko bɛi mia ye o toa ɓɛlɛyaa ka wa zogikã wɛĩ? Ko a gɔ̃ã peelɛ gɛ̃:

A gɔ̃ã 1: Ko leege leezɛ lɛ a naa e wɛlɛ mɛsiwɔ̃ ka nyɔɔ, e lo nukiela lɛ ko leege loazɛ o yia oó naa o wɛlɛ mɛsiwɔ̃ kaa yi.

Ko Woloma 15:1 wa 1 Kɔleĩtĩã 10:23,24 gee, ɛ̃ɛ̃ kɛ ko wɛĩlɔɔ ni o kea yiɓo:

Lɛ zi a lonipia nia a gee a kaa, mɛɛ wɔ̃ lɛ ko leege leezɛɛ e bɛi e yɛlɛtaa yi a kɛ? Mɛɛ wɔ̃ lɛ i loa kɛɛ, ye ka mido kaa kɛ ka kieba, to a zo aa zɔ̃ɔ̃ a lɛɛ kelɛ wɔ̃ e kea lɛ wɔ̃ yɔɔ ka, kɛɛ i zo laa zɔ̃ɔ̃ i lɛɛ kelɛ ye wa wɔ̃ yɔɔ kaa ka?

A gɔ̃ã 2: Ko leege gɔ̃zɛ doo laa yidɔ kelɛ Baaboa lɛɛ́ gbaa gee yekɛ mia o yɔ mi, kɛɛ a ya e ge yekɛ e yɔ nɔɔfe mi. O a suo kɛ gbũ la, ɛ̃ɛ̃ a lɛmɔɔ e e leege vɔ gɛ̃ waa yɔ mi yi.

Ko Ikilisiase 7:16 wa Woloma 14:1, 10 gee, ɛ̃ɛ̃ kɛ ko wɛĩlɔɔ ni o kea yiɓo:

Lɛ zi a lonipia nia a gee a kaa, mɛɛ wɔ̃ lɛ ko leege gɔ̃zɛɛ e bɛi e yɛlɛtaa yi a kɛ? Mɛɛ wɔ̃ lɛ i loa kɛɛ, ye ɓaa mido gɛ̃ aa wɔ̃ lɛ i zo lɛɛ́ wee a mɔ ɓa kɛɛ kɛɛ ka?

Mɛ E Lo Gbũu I Mɔ Kɛ I Wɔ̃ Kpeĩ Ya I Ge Ɓa Kɛ?

1. Sɛnɛɓo Zihova lɛɛ kɛ e gbũ i mɔ i wɔ̃ i lo a kɛɛ dɔ.—Zĩĩ 1:5.

2. I nyiɛ kpɔ Baaboa wa Baabo-zɔ̃ɔ̃pɔɔ nia yi, kɛ i liewekpo ni lɛ o gbɛ̃ɛ̃ lɛ a mɔɔ dɔ. Ii bɛi zeĩ gikã naa ko leege ni lɛ o mɛkpala lɛɛ kɛlɛ.

3. I yɛlɛtaa wɔ̃ ɓa ya ge ɓa kɛɛ zi a pie e lo tooa i mɔ, ɛ̃ɛ̃ mia ye o toa mɔɔ yi.

MIA DO OO GEE: “A too lɛ i ka i ɓa kɛɓe kɛ zi nɔɔfe lɛ ɓa naa ɓa kɛaa ka. Deĩ lɛ e kpaa mia ye o toa wa yɛlɛtaa wɛĩ?”

Mɛ e kɛ lɛ laa mɔ ko kpaa Wala wa mia ye o toa zi yɛlɛtaa ka?

WƆ̃Ɔ WŨ

Wɔ̃ ko lo a ya ko ge ko kɛɛ, lɛɛ lo kɛɛ kpeĩ ye kɔaa zi lɛ Zihova e e yɛlɛtaa ka e gbɛ̃a mɔɔ dɔ, e kɛa wɔ̃ ko lo a kɛɛɛ, lɛɛ lo gbũu mia ye o toa mɔ, ɛ̃ɛ̃ a pie yɔɔ lɛɛ lo too o mɔɔ ka.