LESON 35
Kouma Ou Kapav Pran Bann Bon Desizion?
Nou tou nou bizin pran bann desizion. Sertin desizion kapav ena enn bon lefe ouswa enn move lefe lor nou ek lor nou lamitie avek Zeova. Par exanp, kitfwa nou pou bizin deside kotsa nou pou reste, ki travay nou pou fer, ouswa si nou pou marye ouswa non. Kan nou pran bann bon desizion, nou kapav viv ere ek fer Zeova kontan.
1. Kouma Labib kapav ed ou pou pran bann bon desizion?
Avan ki ou pran enn desizion, priye Zeova pou gagn so led ek fer resers dan Labib pou kone ki Li panse lor la. (Lir Proverb 2:3-6.) Dan sertin ka, Zeova donn enn lord bien kler. Lerla, si ou desid pou obeir sa lord-la, samem meyer desizion ki ou kapav pran.
Me ki pou arive si pena okenn lord presi dan Labib? Zeova pou kanmem ‘gid ou lor semin ki ou bizin marse.’ (Izai 48:17) Kouma? Ena bann prinsip ki kapav ed ou. Bann prinsip Labib se bann verite zeneral ki fer nou konn seki Bondie panse ek seki Li resanti. Parfwa nou aprann seki Zeova resanti kan nou lir bann zistwar ki ena dan Labib. Kan nou konpran seki Zeova resanti, nou pou kapav pran bann desizion ki fer Li kontan.
2. Lor ki kitsoz ou bizin reflesi avan ki ou pran enn desizion?
Labib dir: “Enn dimounn ki ena enn bon zizman, reflesi bien lor sak pa ki li fer.” (Proverb 14:15) Savedir, avan ki nou pran enn desizion, nou bizin pran letan pou reflesi lor bann opsion ki nou ena. Alor, kan ou pe reflesi lor sak opsion, demann oumem: ‘Ki prinsip Labib aplike isi? Eski mo lespri pou trankil si mo swazir sa opsion-la? Eski mo desizion pou ena enn lefe lor lezot? Ek pli inportan, eski sa pou fer Zeova kontan?’—Deteronom 32:29.
Zeova ena drwa pou dir nou ki kitsoz bon ek ki kitsoz pa bon. Kan nou aprann konn so bann lalwa ek so bann prinsip, ek ki nou vremem anvi swiv zot, nou pe form nou konsians. Nou konsians se enn kitsoz dan noumem ki dir nou ki kitsoz bon ek ki kitsoz pa bon. (Romin 2:14, 15) Enn konsians ki’nn bien forme ed nou pou pran bann bon desizion.
ANOU GET INPE PLIS
Anou gete kouma bann prinsip Labib ek nou konsians ed nou pou pran bann bon desizion.
3. Les Labib gid ou
Kouma bann prinsip Labib kapav ed ou pou pran bann bon desizion? Zwe VIDEO-la, ek apre sa, get sa bann kestion-la ansam:
-
Ki ete liberte pou swazir?
-
Kifer Zeova inn donn nou liberte pou swazir?
-
Ki Zeova inn donn nou pou ki nou kapav servi nou liberte pou swazir dan meyer fason ki ena?
Lir Efezien 5:15, 16. Dan sa bann verse-la, ena sa prinsip-la: Servi tou lokazion ouswa tou nou letan dan meyer fason ki ena. Get ansam kouma ou kapav aplik sa prinsip-la pou . . .
-
lir Labib regilierman.
-
vinn enn pli bon konzwin, paran, garson, ouswa tifi.
-
asiste bann renion.
4. Form ou konsians pou pran bann bon desizion
Kan ena enn lord presi dan Labib, li paret fasil pou fer enn bon swa. Me ki pou arive si pena okenn lord presi? Zwe VIDEO-la, ek apre sa, get sa kestion-la ansam:
-
Dan sa video-la, ki sa ser-la inn fer pou form so konsians ek pou pran enn desizion ki ti pou fer Zeova kontan?
Kifer fode pa nou demann lezot seki nou bizin fer? Lir Ebre 5:14, ek apre sa, get sa bann kestion-la ansam:
-
Mem si li paret pli fasil pou demann lezot seki nou bizin fer, ki nou bizin kapav diserne par noumem?
-
Ki kitsoz kapav ed ou pou form ou konsians ek pou pran bann bon desizion?
Nou konsians gid nou dan nou lavi parey kouma enn map
5. Respekte konsians lezot
Tou dimounn pa pran mem desizion. Alor, kouma nou kapav montre ki nou respekte konsians lezot? Anou get de sitiasion:
Premie sitiasion: Enn ser ki kontan makiye, al servi dan enn lasanble kot boukou ser pa tro kontan kan lezot makiye.
Lir Romin 15:1 ek 1 Korintien 10:23, 24, ek apre sa, get sa bann kestion-la ansam:
-
Dapre sa bann verse-la, ki desizion kitfwa sa ser-la pou pran? Ki ou pou fer si ou avek enn dimounn ki so konsians pa permet li fer enn kitsoz ki ou, ou konsians permet ou fer?
Deziem sitiasion: Enn frer kone ki Labib pa anpes nou bwar lalkol, me kanmem sa, li swazir pou pa bwar ditou. Li invite dan enn ti fet ek laba, li trouv bann frer pe bwar lalkol.
Lir Ekleziast 7:16 ek Romin 14:1, 10, ek apre sa, get sa bann kestion-la ansam:
-
Dapre sa bann verse-la, ki desizion kitfwa sa frer-la pou pran? Ki ou pou fer, si ou trouv enn lot dimounn pe fer enn kitsoz ki ou konsians pa permet ou fer?
Kouma ou kapav pran bann bon desizion?
1. Demann Zeova so led pou kone ki desizion ou pou pran.—Zak 1:5.
2. Fer bann resers dan Labib ek dan bann piblikasion ki baze lor Labib, pou trouv bann prinsip ki aplik ar ou sitiasion. Ou kapav osi koz lor la avek bann Kretien ki ena matirite.
3. Reflesi lor lefe ki sa desizion-la pou ena lor ou konsians ek lor konsians lezot.
SERTIN DIMOUNN DIR: “Mo gagn drwa fer seki mo anvi. Seki lezot dimounn panse, sa pa mo problem!”
-
Kifer nou bizin pran kont seki Bondie resanti ek seki lezot dimounn osi resanti?
SEKI NOU’NN APRANN
Pou nou kapav pran bann bon desizion, nou bizin konpran seki Zeova panse lor enn kitsoz, ek gete si nou bann aksion pou ed lezot ouswa fer zot ditor.
Eski Ou Rapel?
-
Kouma ou kapav pran bann desizion ki fer Zeova kontan?
-
Kouma ou kapav form ou konsians?
-
Kouma ou kapav montre respe pou konsians lezot?
DEKOUVER
Kouma ou kapav pran bann desizion ki pou fer ou lamitie avek Bondie vinn pli for?
“Prend bann decision ki honore Bondié” (Latour Degard, 1e Avril 2011)
Konpran pli bien kouma Zeova donn nou bann konsey.
Gete seki’nn ed enn dimounn pou pran enn desizion difisil.
Gete kouma ou kapav fer Zeova kontan mem kan pena okenn lord presi lor enn size.
« Vous faut-il un commandement pour tout ? » (Latour Degard, 1e Desam 2003, an Franse)
Ena Osi
KESTION KI POZE SOUVAN
Ki sa Inplike Etidie Labib Avek Bann Temwin Zeova?
Bann Temwin Zeova ofer bann letid Labib gratis, ek ou kapav servi ninport ki version Labib ki ou anvi. Santi ou lib pou invit bann manb ou fami ouswa bann kamarad ki ou anvi.
