MPHANTTE 35

Ninhala ukhitiri cani ulakela upanka citthu comaana?

TOCAR

Otheene cihu ninaalakelaka upanka citthu. Citthu cinlakeleehu upanka pooti ukhala comaana awula mena. Ni ciicammo pooti ulipihaca awula uvololiha upatthani urineehu ni Yehova. Wootakihera, hi atthunaka ninaahala ulakela nipuro noorwaa ukhala, mananna owiilihera awula wakhala wiira ninaahala uthela awula mena. Nalakelaka upanka citthu comaana, hi ninaakhalana ukumi wootteeliya ni ninantteeliha nrima Yehova.

1. Manannani cinlamuliyeenyu uvarela nteko Ibiiblya wiira nkhitiri ulakela upanka citthu comaana?

Nhinaaya ulakela upanka itthu, nlompe nlepelaka ukaviheriya ni Yehova. Ni ntothe ucuwela itthu inhimyaaya Ibiiblya nhina uyo mwahooyo. (Nsome Miruku 2:3-6.) Nhina citthu cikhwaawe, Yehova naanihimyeera itthu inlamuliyeehu upanka. Wakhalaka commo, itthu yooreera upanka ukhanle wiiwelela inhimyaawe Yehova.

Vano mpankekeni wakhalaka wiira mbiiblyani khinhimiya itthu nyuuva inlamuliyeenyu upanka? Hataa ukhalaka commo, Yehova naahala uweettihani “munttalani unlamuliyeenyu weetta.” (Isaiya 48:17) Masi manannani? Ibiiblya ihaana mattharelelo anhala wuukaviherani. Mattharelelo o mbiiblyani cikhanle ikhweeli cimphwanyannya mbiiblyani cinnikavihera ucuwela moopuwelelo a Yehova. Ikwaha cinci, hi nincuwela itthu inoopuwelaawe Nluku nasomaka ihantisi yo mbiiblyani. Hi nacuwelaka mananna cinweheraawe Yehova itthu impheeleehu upanka, ninaahala ulakela upanka itthu yomaana.

2. Isiyani inlamuliyeenyu upacera wuupuwela nhinaaya ulakela upanka itthu?

Ibiiblya ineera: “Ule rina ankhili nopacera wuupuwela ratta hinaaya upanka itthu.” (Miruku 14:15) Iyo maanaaya wiira nihinaaya ulakela upanka itthu, nihaana neemelaka ni wuupuwela citthu cinhela nhina iyo itthu impheeleehu ulakela upankeeyo. Mwiikohe co: ‘Ntthareleloni no mbiiblyani ninvaranaca niila itthwiila? Ila itthu impheelaaka ulakela upankeela inaahala ukihiya ninrima wootaphuwa? Itthu impheelaaka ulakela upanka inhala wiira waakavihera awula waapanka pusya akhunanaka?’ Ni itthu ikhwaawe yootepa ukhalana ifayita inlamuliyeenyu wuupuwela phi ila: ‘Ila itthu impheelaaka upankeela inaahala untteeliha nrima Yehova?’—Deuteronomiyu 32:29.

Yehova haana isariya yoonihimyeera isiyani ikhanle itthu yomaana ni yoohinamaana. Nacuwelaka sana-saana malamulwaawe ni mattharelelwaawe, ni hataa nalakelaka weettela, hiiva ninaatthenkaca moopuwelelweehu. Moopuwelelo phi ile innikavihera ucuwela itthu yooreera ni yootakhala. (Arooma 2:14, 15) Natthenkacaka sana-saana moopuwelelweehu, anaahala unikavihera ulakela upanka citthu comaana.

MUNCERERE WIITTHUCA WINYU

Moone manannani mattharelelo o mbiiblyani ni ciicammo moopuwelelweehu annikaviheraaya ulakela upanka citthu comaana.

3. Ntthare malakihero o mbiiblyani

Mattharelelo o mbiiblyani anhala unikavihera cani woolakela upanka citthu? Moone IVIDIYU, ni mwamalihaka woona, moopele mwaha ala makohwaala:

IVIDIYU: Nhiye mattharelelo o mbiiblyani yeettiheraka ukumiinyu (5:54)

Itthuvoni inivahilyaawe Yehova?
Kontha isiyani Yehova nivahilyaawe iyo itthuvweeyo?
Isiyani inivahilyaawe Yehova innikavihera ulakela upanka citthu comaana?

Wiira moone ntakihero nimoca no nttharelelo no mbiiblyani, nsome Efesu 5:15, 16, ni mwamalihaka usoma, moopele mwaha mananna nyuuva cinlamuliyeenyu ‘uvarela nteko ukatiinyu sana-saana’ wiira nkhitiri . . .

usoma Ibiiblya khula nihuku.
ukhala ntheli awula ntheliya, nnyari awula mwaana omaana.
uhilova mmamikutthaanoni ceekristau.

4. Ntthenkace moopuwelelweenyu wiira nkhitiri ulakela upanka citthu comaana

Napheelaka ulakela upanka itthu incuweleehu wiira mbiiblyani inaahimyaaciya inanna Yehova cinweheraawe iyo itthwiiyo, khunnirikela ucuwela itthu yooreera upanka. Vano nipankekeni wakhalaka wiira yeeyo itthwiiyo khinhimiya mbiiblyani? Moone IVIDIYU, ni mwamalihaka woona, moopele mwaha nna nikohonna:

IVIDIYU: “Nkhalane moopuwelelo omaana” (5:13)

Nvidiyunimmo, isiyani yaakavihenre arokorihu utthenkaca moopuwelelwaaya ni ulakela upanka itthu yancivenle Yehova?

Kontha isiyani khaninlamuliya waalepela akhunanihu unihimyeerya itthu inlamuliyeehu upanka? Nsome Maberewu 5:14, ni mwamalihaka usoma, moopele mwaha ala makohwaala:

Waalepela akhunanihu unihimyeera itthu inlamuliyeehu ulakela upanka pooti ukhala itthu yoohirika, masi otheene cihu isiyani inlamuliyeehu “ukhitiri ucuwela”?
Toko coonileehu nvidiyuni, isiyani inhala wuukaviherani nyuuva utthenkaca moopuwelelweenyu ni ulakela upanka citthu comaana?

Khampa maapa, moopuwelelweehu anaanikavihera uthanla iphiro yooreera utthara.

5. Nhisime moopuwelelo aakhunaninyu

Atthu anaavirikana. Phimaana ciicammo anaalakela upanka citthu coovirikana. Vano manannani ninlamuliyeehu uthoonyihera wiira ninaahisima moopuwelelo aakhunanihu? Moone matakihero meeli:

Ntakihero 1: Arokorihu amoca owaacivela wiicoottihaca uwanca ni citthu cikhwaawe cinonreerihaca nthiyana anaathamela nloko nikhwaawe amphwanyannya asirokorihu enci unaarusa umoona nthiyana owiicoottihaca nnyo citthunnyo.

Nsome Arooma 15:1 ni 1 Akorintu 10:23, 24. Mwamalihaka usoma, moopele mwaha ala makohwaala:

Toko cinhimyaaya nnya iveerusunnya, isiyani arokorihwaayo atthunaka inlamuliyaaya ulakela upanka? Isiyani nyuuva inhaleenyu ulakela upanka mwakhalaka ni ntthu inonrusa ulakela upanka itthu nyuuva inoocivelani?

Ntakihero 2: Munneehu mmoca naacuwela wiira Ibiiblya khinkhottiha uwurya, masi uyo naalakela uhiwurya. Vano nihuku nayanno, uyo naalattuliya urwaa ulya uwanuwawe munneehu nkhwaawe. Naryeene nwo, uyo naawoona mayamunneehu akhwaawe yawuryaka.

Nsome Eklesyaste 7:16 ni Arooma 14:1, 10. Mwamalihaka usoma, moopele mwaha ala makohwaala:

Toko cinhimyaaya nnya iveerusunnya, isiyani munneehuuyo atthunaka inlamuliyaawe ulakela upanka? Isiyani nyuuva inhaleenyu ulakela upanka mwakhalaka nintthu nopanka itthu nyuuva ihinoocivelani ulakela upanka?

Citthuni cinhala wuukaviherani ulakela upanka citthu comaana?

1. Munlompe Yehova munlepelaka wuukaviherani ucuwela itthu yooreera upanka.—Tiyaku 1:5.

2. Ntothe mbiiblyani ni mmalivuruni cihu mattharelelo anvaranaca niitthu impheeleenyu upanka. Ciicammo mmuulumane nkristau oocuwelaca.

3. Muupuwelace wakhala wiira iyo itthwiiyo inaahala uwiirihani nyuuva ni ciicammo akhunaninyu ukhalana nrima wootaphuwa.

ATTHU AKIINA ANEERA: “Ukumyuuyo wawaka. Mi kinaapanka khula itthu inkicivela ni akinwacera itthu inoopuwelaaya atthu akhwaawe.”

Kontha isiyani unaareera wuupuwela mananna Nluku ni ciicammo akhunanihu cinhalaaya ukhala nalakelaka upanka itthu?

UTHIKILELA

Wiira nikhitiri ulakela upanka citthu comaana, nihinaaya ulakela upanka itthu, nihaana nuupuwelaka mananna Yehova cinweheraawe iyo itthwiiyo ni ciicammo wakhala wiira inaahala waakavihera akhunanihu awula waapanka pusya.

Wuupuwela

Mpankekeni wiira nkhitiri ulakela upanka citthu cinhala uncivela Yehova?
Manannani cinlamuliyeenyu utthenkaca moopuwelelweenyu?
Manannani cinlamuliyeenyu woonihera uhisimu moopuwelelo aakhunaninyu?

Kimalihile usoma ula mpanttoola nihuku:

Itthu yoohala upanka

Muupuwele itthu inhaleenyu ulakela upanka mwamphiyaaruni. Vano, nvarele nteko citthu tthaaru ciitthucileenyu nhina ikwaaturu ineera “ Citthuni cinhala wuukaviherani ulakela upanka citthu comaana?”

Itthu ikhwaawe:

Itthu ikhwaawe