KATAK 35
Wãween eo ñan Kõm̦m̦ani Pepe ko Rem̦m̦an
Kõj aolep ewõr pepe ko jej aikuj kõm̦m̦ani. Elõñ iaan pepe kein remaroñ lukkuun jelõt mour ko ad im bareinwõt jem̦jerã eo ad ippãn Jeova. Ñan waanjoñak, jemaroñ aikuj pepe kõn ia eo jen jokwe ie, ta jerbal eo jenaaj kõm̦m̦ane ñan kabwe aikuj ko ad, ak el̦aññe jenaaj m̦are ak jaab. Ñe jej kõm̦m̦ani pepe ko rem̦m̦an, jenaaj lo m̦õn̦õn̦õ ilo mour ko ad im kabuñbũruon Jeova.
1. Ewi wãween kwõmaroñ kõjerbale Baibõl̦ eo ñan kõm̦m̦ani pepe ko rem̦m̦an?
M̦okta jãn am̦ kõm̦m̦ane juon pepe, jar bwe Jeova en jipañ eok im etale Baibõl̦ eo ñan lale ta l̦õmn̦ak eo An. (Riit Jabõn Kõnnaan 2:3-6.) Jet iien, Jeova ej letok juon kien ñan kaalikkartok ta eo jen kõm̦m̦ane im jab kõm̦m̦ane. El̦aññe ãindein, am̦ kããlõt ñan pokake kien in ej pepe eo em̦m̦antata kwõmaroñ kõm̦m̦ane.
Ak ta el̦aññe ejjel̦o̦k juon kien ilo Baibõl̦ me ej kaalikkar ta eo kwõn kõm̦m̦ane? Jeova enaaj jipañ im tõl wõt eok “ilo ial̦ eo em̦m̦an kwõn etal ie.” (Aiseia 48:17) Ewi wãween? Eokwe, elõñ naanin kakapilõk ko me remaroñ jipañ eok. Naanin kakapilõklõk ko ilo Baibõl̦ rej mel̦el̦e ko me rej pedpedin katak ko rem̦ool im rej kwal̦o̦k kõn l̦õmn̦ak im eñjake ko an Anij. Ekkã ad katak kõn wãween an Anij l̦õmn̦ak kõn juon men ñe jej riiti juon bwebwenato ilo Baibõl̦. Ñe jej kile im jel̦ã kõn l̦õmn̦ak im eñjake ko an Jeova, innem jemaroñ kõm̦m̦ani pepe ko me rej kabuñbũruon.
2. Ta jet iaan men ko kwõj aikuj l̦õmn̦ak kaki m̦okta jãn am̦ kõm̦m̦ane juon pepe?
Baibõl̦ ej ba: “Armej ri-jel̦ãl̦o̦kjen̦, ej kanooj lale an etetal.” (Jabõn Kõnnaan 14:15) Mel̦el̦ein bwe m̦okta jãn ad kõm̦m̦ane juon pepe, jej aikuj bõk ad iien im l̦õmn̦ak kõn jokãlõt ko ad. Ilo am̦ l̦õmn̦ak kõn kajjojo wãween ko repel̦l̦o̦k ñan kwe, kajjitõk ippam̦ make: ‘Ta naanin kakapilõklõk ko ilo Baibõl̦ rej jerbal ñan wãween eo ij iioone? Ewi iaan pepe kein renaaj kõm̦m̦an bwe in aenõm̦m̦an im jab inepata? Ewi wãween an naaj pepe in aõ jelõt ro jet? Im men eo el̦aptata, pepe in enaaj ke kam̦õn̦õn̦õik bũruon Jeova?’—Duteronomi 32:29.
Ekkar im jim̦we ñan an Jeova ba ñan kõj ta eo em̦m̦an im ta eo enana. Ñe jej kal̦apl̦o̦k ad jel̦ã im mel̦el̦e kõn kien im naanin kakapilõklõk ko An im jek ilo bũruod ñan l̦oori, jej jipañ kammineneik bõklõkõt eo ad. Bõklõkõt eo ad ej maroñ eo me ej jipañ kõj ñan kile im eñjake ta eo em̦m̦an im ta eo enana. (Rom 2:14, 15) Juon bõklõkõt me em̦õj kammineneiki enaaj jipañ kõj ñan kõm̦m̦ani pepe ko rem̦m̦an.
KAM̦WILAL̦L̦O̦K AM̦ MEL̦EL̦E
Lale im katak wãween an naanin kakapilõklõk ko ilo Baibõl̦ im bõklõkõt eo ad jipañ kõj ilo ad kõm̦m̦ani pepe ko.
3. Kõtl̦o̦k an Baibõl̦ eo tõl eok
Ewi wãween an naanin kakapilõklõk ko ilo Baibõl̦ maroñ tõl im jipañ kõj ñe jej kõm̦m̦ani pepe ko? Kõjo̦e PIJAIN ALWÕJ eo, innem bwebwenato kake kajjitõk kein:
-
Ta in anemkwõj in kããlõt?
-
Etke Jeova ear letok ñan kõj anemkwõj in kããlõt?
-
Ta ko em̦õj an Jeova litok ñan jipañ kõj kõjerbale anemkwõj in kããlõt eo ad ilo wãween eo em̦m̦antata?
Ñan lale juon waanjoñak kõn juon naanin kakapilõklõk ilo Baibõl̦, riit Epesõs 5:15, 16. Innem bwebwenato kõn ewi wãween kwõmaroñ ‘kõjerbal iien ko am̦ ilo mãlõtlõt’ ñan . . .
-
ekkeini am̦ riit Baibõl̦.
-
kakõm̦anm̦anl̦o̦k wãween ko ippam̦ ãinwõt juon rippãlele, juon jemãn ak jinen, ak juon nejin.
-
pãd ilo iien kweilo̦k ko an eklejia.
4. Kammineneik bõklõkõt eo am̦ ñan kõm̦m̦ani pepe ko rem̦m̦an
Ñe ewõr juon kien ealikkar ilo Baibõl̦ kõn juon men, emaroñ pidodo ñan kõm̦m̦ane juon pepe em̦m̦an. Ak ta el̦aññe ejjel̦o̦k juon kien ilo Baibõl̦ me ej kaalikkar ta eo jen kõm̦m̦ane? Kõjo̦e PIJAIN ALWÕJ eo innem bwebwenato kake kajjitõk in:
-
Ilo pijain alwõj in, ta buñtõn ne ko kõrã in jeid im jatid ear kõm̦m̦ani ñan kammineneik bõklõkõt eo an im kõm̦m̦ane juon pepe me enaaj kabuñbũruon Jeova?
Etke jejjab aikuj kajjitõk ippãn ro jet ñan kõm̦m̦an pepe ñan kõj ikijjeen pepe ko jej aikuj in make kõm̦m̦ani? Riit Hibru 5:14, innem bwebwenato kake kajjitõk kein:
-
Meñe emaroñ pidodol̦o̦k ñan kajjitõk ippãn ro jet ñan kõm̦m̦an pepe ñan kõj, ak ta maroñ eo ewõr ippãd jej aikuj in kõjerbale?
-
Ta ko remaroñ jipañ eok ñan kammineneik bõklõkõt eo am̦ im kõm̦m̦ani pepe ko rem̦m̦an?
Ãinwõt juon mab, bõklõkõt eo ad ej jipañ kõj ñan jel̦ã ia eo jen etal ie ilo mour ko ad
5. Kautiej bõklõkõt ko an ro jet
Kõj aolep jeoktak jãn doon, kõn men in, eoktak pepe ko jej kõm̦m̦ani jãn doon. Ewi wãween ad maroñ kwal̦o̦k ad kautiej bõklõkõt ko an ro jet? L̦õmn̦ak kõn wãween kein ruo:
Wãween eo kein kajuon: Juon jeid im jatid kõrã me em̦m̦an ippãn kõjerbal makeup ej em̦m̦akũt ñan juon eklejia me kõrã ro jeid im jatid ie rej inepata ak abn̦õn̦õ ñe rej lo an ro jet kõjerbal makeup.
Riit Rom 15:1 im 1 Korint 10:23, 24, innem bwebwenato kake kajjitõk kein:
-
Ekkar ñan eoon kein, ta eo kõrã in jeid im jatid emaroñ pepe ñan kõm̦m̦ane? Ta eo kwõnaaj kõm̦m̦ane el̦aññe kwõj pãd ippãn juon armej me bõklõkõt eo an ejjab kõtl̦o̦k an kõm̦m̦ane juon men me bõklõkõt eo am̦ en kar kõtl̦o̦k am̦ kõm̦m̦ane?
Wãween eo kein karuo: Em̦m̦aan eo jeid im jatid ejel̦ã bwe Baibõl̦ ejjab ba bwe enana idaak arkool̦ ilo ad kõm̦m̦an joñan. Meñe ãindein, ak ej kããlõt ñan jab idaak. Ak em̦õj kũrl̦o̦k e ñan juon iien iiãio, ijo ej loe an ro jet idaak arkool̦.
Riit Ekklisiastis 7:16 im Rom 14:1, 10, innem bwebwenato kake kajjitõk kein:
-
Ekkar ñan eoon kein, ta eo em̦m̦aan in jeid im jatid emaroñ pepe ñan kõm̦m̦ane? Ta eo kwõnaaj kõm̦m̦ane el̦aññe kwõj lo an juon armej kõm̦m̦ane juon men me ej n̦ae bõklõkõt eo am̦?
Ta buñtõn ne ko rej tõll̦o̦k kõj ñan ad kõm̦m̦ani pepe ko rem̦m̦an?
1. Kajjitõk ippãn Jeova ñan jipañ eok kõm̦m̦an juon pepe em̦m̦an.—Jemes 1:5.
2. Kõm̦m̦an research ak etale ko ilo Baibõl̦ ak bok ko rej pedped ioon Baibõl̦ ñan lo naanin kakapilõk ko me remaroñ jejjet ñan wãween ko kwõj iiooni. Kwõmaroñ bareinwõt kepaake Kũrjin ro rerũtto ilo tõmak im bõk jipañ jãn er.
3. L̦õmn̦ak kõn wãween pepe eo am̦ emaroñ jelõt bõklõkõt eo am̦ im bõklõkõt ko an ro jet.
JET ARMEJ REJ BA: “Ewõr am̦ jim̦we im maroñ ñan kõm̦m̦ane jabdewõt men kokõn̦aan kõm̦m̦ane. Ejjab aorõk ta ko armej rej ba!”
-
Etke jej aikuj l̦õmn̦ak kõn eñjake ko an Anij im bareinwõt armej ro jet?
TARLEP IN KATAK EO ILO TUKADU
Jej kõm̦m̦ani pepe ko rem̦m̦an ñe jej etale im lale ta eñjake ko an Anij kõn wãween eo jej iioone, innem lale el̦aññe men ko jej kõm̦m̦ani renaaj jipañ ro jet ak ko̦kkure er.
Ãlij
-
Ewi wãween am̦ maroñ kõm̦m̦ani pepe ko me rej kabuñbũruon Jeova?
-
Ewi wãween kwõmaroñ kammineneik bõklõkõt eo am̦?
-
Ewi wãween kwõmaroñ kwal̦o̦k bwe kwõj kautiej bõklõkõt ko an ro jet?
KAL̦APL̦O̦K AM̦ MEL̦EL̦E
Ewi wãween kwõmaroñ kõm̦m̦ani pepe ko me renaaj kõkajoorl̦o̦k jem̦jerã eo am̦ ippãn Anij?
“Kõm̦m̦ani Pepe ko me Rej Kabuñbũruon Anij” (Imõniaroñroñ, Eprõl̦ 15, 2011)
Kal̦apl̦o̦k am̦ mel̦el̦e kõn wãween an Jeova letok naanin kakapilõk ko ñan kõj.
Lale ta ko ear jipañ juon em̦m̦aan ñan kõm̦m̦ane juon pepe elukkuun aorõk bõtab ebwe an pen ñan an kar kõm̦m̦ane.
Kal̦apl̦o̦k am̦ jel̦ã kõn ewi wãween kwõmaroñ kõm̦m̦ane juon pepe me ej kabuñbũruon Jeova meñe ejjab letok juon kien me ej kaalikkar ta eo kwõn kõm̦m̦ane.
“Do You Always Need a Bible Command?” (The Watchtower, December 1, 2003)
