SMALKANKA 35
¿Yawan nahki sip sa diara pain nani wahbi sakaia?
Yawan sut ba pain luki diara wahbi briaia sa wan rayaka ra. Dîa dîa alki briaia luki ba sip sa pain wan munaia, apia kaka saura wan munaia, bara baha ba Jehova wal pâna lâka ba sin sip sa pain, apia kaka saura munaia. Nahara luki kaiks, ban kra yawan lukaia sa anira iwbia, nahki lalah daukaia bara marit takbia sapa, apia kaka mayas takaskaia. Yawan diara pain daukaia lukisa taim, wan rayaka ba lilia sa bara Jehova sin.
1. ¿Baibil nahki sip sa hilp wan munaia diara pain baman wahbi sakaia?
Diara kum wahbi sakaia lukisma taim, pas tâura Jehova ra puram suns hilp maikbia bara Baibil ra pliks dîa aisisa diara alki briaia lukisma ba dukiara (Sins Lâka 2:3-6). Sam taim, diara kum mapara Jehova klir pali tânka ba marikisa. Baku sa kaka, kau pain sa baha bîla walaia.
Sakuna dîa daukaia lukisma ba dukiara Baibil diara wiras sa kaka, ¿dîa takaia sip sa? Jehova mai marikbia dîa daukaia bara “yabal bâk wapaia tâm” bribia (Aiseya 48:17). ¿Baha nahki daukbia? Baibil smalkanka nani mita tâm bribia. Baibil smalkanka nani ba diara kasak nani sa, smalkanka plamaya baku Gâd dîa luki ba bara nahki ai dara wali ba wan marikisa. Aima kum kum, yawan Baibil ra diara kum aisi kaikisa taim, klir wan tânka brisa ani sa Jehova lukanka ba diara kum mapara. Jehova nahki lukisa bara nahki ai dara wali ba wan tânka brisa taim, yawan sip sa wan rayaka ra diara pain wahbi sakaia bara baku Jehova lilia kabia.
2. ¿Man dîa aman lukaia sma diara kum kau alki briras kainara?
Baibil wisa “tânkira watauki ba, ai mina nani taibi ba pain laki kaikisa” (Sins Lâka 14:15). Tânka sika, diara kum kau alki briras kainara yawan aman luki takaskaia sa bara laki kaikaia dîa wahbi sâkbia. Diara nani daukaia lukisma ba kumi bani laki kaiks, bara wînam kat silp naku lukma: “¿Naha dukia mapara Baibil dîa smalkisa? ¿Ani dukia brimna ba lika âuyapah lâka aikbia? ¿Baha brimna kaka sip sa upla wala ra saura munaia? Kau pali, ¿baha brimna kaka Jehova lilia takbia?” (Kli Smalkanka 32:29).
Jehova lika ai raitka brisa wan wiaia dîa ba pain bara dîa ba saura. Gâd lâka bîla nani bara ai smalkanka nani ba wan tânka brih bîla walisa kaka, wan kupia dara walra ba kasak pain takisa. Wan kupia dara walra ba sika, wan sinska ra wan aisisa dîa ba pain bara dîa ba saura (Roman 2:14, 15). Wan kupia dara walra ba kasak sa kaka, diara pain baman wahbi sakaia hilp wan munbia.
KAU LAN TAKS
Lan taks nahki Baibil smalkanka nani bara wan kupia dara walra ba hilp wan munisa diara pain wahbi sakaia.
3. Yarka Baibil tâm bribia
Yawan diara nani tila wina kum alki briaia lukisa taim, ¿nahki Baibil smalkanka nani ba hilp wan munisa diara pain wahbi sakaia? LILKA ba kaikma, bara naha dukiara aisi banhma:
-
¿Ani prisantka tara Jehova wankan sa?
-
¿Dîa muni Jehova chans wankisa yawan silp lukaia dîa daukbia ba?
-
¿Jehova dîa hilpka wankan sa diara pain baman wahbi sakaia dukiara?
Baibil smalkanka kum kaikaia dukiara, Epesus 5:15, 16 aisi kaikma. Ningkara pana pana aisas nahki sip sa “piua brisma na pain yus” munaia diara nani na daukaia dukiara . . .
-
yu bani Baibil aisi kaikaia.
-
maya waitna, aisa, yapti bara luhpa kau pain kaia.
-
kangrigisan aidrubanka nani ra dimaia.
4. Kupiam dara walra kau yamni dauks diara pain wahbi sakaia dukiara
Diara kum mapara Baibil ba klir aisisa taim, yawan kau isi lukisa dîa daukaia. Sakuna Baibil ba diara kum param wan wiras sa kaka, ¿dîa daukaia sip sa? LILKA ba kaikma, bara naha dukiara aisi banhma:
-
Naha lilka ra mariki ba baku, ¿kristian mairin ba nahki ai kupia dara walra kau yamni daukan? ¿Bara nahki lukan diara yamni kum alki briaia Jehova pain kaikbia dukiara?
¿Dîa muni aitani apia sa upla wala wan wibia yawan dîa daukaia ba? Hibru Nani 5:14 aisi kaikma, bara naha dukiara aisi banhma:
-
Upla wala mita yawan dîa daukaia wan wibia ba kau isi sa, sakuna ¿dîa muni yawan silp ridi kaia sa klir kaikaia dîa ba pain bara dîa ba saura?
-
¿Dîa hilp wan munisa wan kupia dara walra wapni briaia bara diara pain wahbi sakaia?
Wan kupia dara walra ba map kum baku sa, wan rayaka ra anik waia wan marikisa
5. Upla wala kupia dara walra ba rispik munaia sa
Wan lukanka ba sât wala sa upla wala ba wal, baha mita yawan diara daukaia luki ba sim dukia apia sa upla wala dauki ba wal. ¿Yawan nahki marikaia sip sa upla wala kupia dara walra ba rispik muni ba? Tânka wâl ba laki kaiks:
Tânka 1: Kristian mairin kum wan mawan paudika (maquillaje) ni ai mawan skahki ba kangrigisan wala ra tawisa, sakuna baha kangrigisanka ra kristian mairin nani ba wan mawan paudika (maquillaje) ni mawan aiskahkaia ba pain kaikras, ba mita saura ai dara wali banhwisa.
Roman 15:1 bara 1 Korint 10:23, 24 aisi kaikma, bara naha dukiara aisi banhma:
-
Baha borska nani aisi ba baku, ¿kristian mairin ba dîa daukaia sip sa? Ban kra upla kum ai kupia dara walra kat diara kum daukaia saura sa wisa, sakuna man kupiam dara walra kat lika pain sa baha daukaia, ¿baha uplika lamara sma kaka las kat dîa daukma?
Tânka 2: Kristian waitna kum nu sa Baibil mapara rum wiria diaia ba saura apia sa, ban sakuna witin rum diaia want apia sa. Yu kum upla bui witin ra paiwisa liliaka kum ra waia. Bahara sa taim witin kaikisa muihni lakri kum kum rum dih banhwi ba.
Smasmalkra 7:16 bara Roman 14:1, 10 aisi kaikma, bara naha dukiara aisi banhma:
-
Baha borska nani aisi ba baku, ¿kristian waitna ba dîa daukaia sip sa? Ban kra kupiam dara walra kat baha man daukras, sakuna upla wala lika daukisa kaka, ¿man dîa lukma?
¿Man dîa daukaia sip sma diara pain wahbi sakaia dukiara?
1. Jehova ra makas hilp mai munbia dîa daukma ba pain lukaia (Jems 1:5).
2. Baibil ra tânka pliki kaiks bara ulbi sakanka nani ra sin, bahara Baibil smalkanka plamaya nani ba sâkma. Baku sin spirit lâka ra aitani pâwan kristianka kum wal aisas.
3. Dîa takbia ba ra luks, man nahki damra walma bara upla wala nani sin nahki ai dara walbia ba laki kaiks.
UPLA KUM KUM NAKU LUKISA: “Man lika silp raitkam brisma pri diara daukaia. Upla wala dîa lukbia ba yawan kulkras”.
-
¿Dîa muni Gâd yawan dukiara luki ba kulkaia sa, bara upla wala dîa luki ba sin?
DÎA LAN TAKRAM
Jehova dîa luki ba kat yawan diara wahbi sakisa kaka sut pain takisa, baku sin yawan lukaia sa upla wala ra yamni munbia, apia kaka saura munbia sapa.
Wan kupia krawaia
-
¿Man nahki sip sma diara pain wahbi sakaia Jehova lilia takbia dukiara?
-
¿Man nahki sip sma kupiam dara walra ba pain ridi daukaia?
-
¿Man nahki marikaia sip sma upla wala kupia dara walra rispik munisma ba?
KAU PLIKI KAIKS
¿Man nahki sip sma diara pain wahbi sakaia bara baku Jehova wal kau pâna takaia?
“Diara pain wahbi saki Gâd kupia lilia dauks” (La Atalaya abril 15, 2011)
Kau lan taks nahki Jehova wapni wan mangkisa.
Kaiks nahki waitna kum hilp brin diara karna kum daukaia lukan taim.
Lan taks nahki Jehova kupia lilia daukaia diara kum mapara nahki daukaia lâ âpu sa taim.
“¿Piua bani Baibil adarka kum nit sa ki?” (La Atalaya diciembre 1, 2003)
Baha sin laik kaikma
JEHOVA WITNISKA NANI DUKIARA UPLA NANI DÎA MAKABI WALI BA
¿Jehova witniska nani Baibil klaska yabi ba nahki sa ki?
Jehova witniska nani Baibil klaska yabi ba ra, man ani Baibil bîla lakanka want sma ba yus munaia sip sma. Baku sin, pamalikam apia kaka pâmnika nani paiwaia sip sma.
