LEZZJONI 35
Kif Tieħu Deċiżjonijiet Tajbin
Kulħadd għandu deċiżjonijiet x’jieħu. Ħafna minn dawn id-deċiżjonijiet jistgħu jeffettwaw lilna u l-ħbiberija tagħna maʼ Ġeħova. Pereżempju, irridu niddeċiedu fejn se ngħixu, kif se naqilgħu l-flus biex ngħixu, u jekk hux se niżżewġu. Meta tieħu deċiżjonijiet tajbin, jistaʼ jkollok ħajja ferħana u togħġob lil Ġeħova.
1. Kif tistaʼ tuża l-Bibbja biex tgħinek tieħu deċiżjonijiet tajbin?
Qabel ma tieħu deċiżjoni, itlob lil Ġeħova biex jgħinek u ara mill-Bibbja x’jaħseb fuq dik is-sitwazzjoni. (Aqra Proverbji 2:3-6.) F’xi sitwazzjonijiet, Ġeħova jgħidilna eżatt xi rridu nagħmlu. Mela l-aħjar deċiżjoni tkun li tobdih.
Imma x’se tagħmel jekk Ġeħova ma jgħidlekx eżatt xi trid tagħmel fil-Bibbja? Ġeħova xorta se ‘jmexxik fit-triq li għandek timxi.’ (Isaija 48:17) Kif? Jistaʼ jkun hemm prinċipji li jgħinuk. Prinċipji mill-Bibbja huma veritajiet importanti li juruna kif iħossu u x’jaħseb Alla. Meta naqraw rakkont mill-Bibbja, kemm-il darba nitgħallmu kif iħossu Alla dwar xi ħaġa partikolari. U meta nsiru nafu kif iħossu Ġeħova, inkunu nistgħu nieħdu deċiżjonijiet li jogħġbuh.
2. Fuqiex għandek taħseb qabel ma tiddeċiedi?
Il-Bibbja tgħidilna biex ‘inqisu l-passi tagħna.’ (Proverbji 14:15) Dan ifisser li qabel nieħdu deċiżjoni, irridu nieħdu l-ħin biex naħsbu dwar l-għażliet li għandna. Qabel tiddeċiedi saqsi lilek innifsek: ‘Liema prinċipji mill-Bibbja se jgħinuni? B’liema deċiżjoni se jkolli moħħi mistrieħ? Id-deċiżjoni li nieħu kif se teffettwa lil oħrajn? U l-iżjed importanti, Ġeħova se jkun ferħan b’dak li nagħżel?’—Proverbji 27:12.
Ġeħova għandu d-dritt li jgħidilna x’inhu tajjeb u x’inhu ħażin. Aħna nistgħu nsiru nafu sew il-liġijiet u l-prinċipji taʼ Ġeħova u nkunu determinati li nobduhom. Meta nagħmlu hekk, inkunu qed nittrennjaw il-kuxjenza tagħna. Il-kuxjenza tgħidilna x’inhu tajjeb u x’inhu ħażin. (Rumani 2:14, 15) Kuxjenza trenjata se tgħinna nieħdu deċiżjonijiet tajbin.
TGĦALLEM IŻJED
Sir af kif il-prinċipji tal-Bibbja u l-kuxjenza tagħna jgħinuna niddeċiedu.
3. Ħalli l-Bibbja tgħinek
Il-prinċipji tal-Bibbja kif jgħinuna meta nieħdu deċiżjonijiet? Ara l-VIDJOW, u mbagħad iddiskuti l-mistoqsijiet.
-
X’inhi l-libertà tal-għażla?
-
Ġeħova għala tana l-libertà li niddeċiedu għalina?
-
X’tana biex jgħinna nieħdu l-aħjar deċiżjonijiet?
Biex tara eżempju taʼ prinċipju mill-Bibbja, aqra Efesin 5:15, 16. Imbagħad iddiskuti kif tistaʼ ‘tuża l-ħin bl-aħjar mod’ biex . . .
-
taqra l-Bibbja b’mod regolari.
-
tkun persuna aħjar fil-familja.
-
tmur il-laqgħat.
4. Ittrennja l-kuxjenza tiegħek biex tieħu deċiżjonijiet tajbin
Meta jkun hemm kmand ċar fil-Bibbja, ikun faċli biex tieħu d-deċiżjoni t-tajba. Imma x’tagħmel jekk m’hemmx kmand? Ara l-VIDJOW, u mbagħad iddiskuti l-mistoqsija.
-
Fil-vidjow, l-oħt x’għamlet biex tittrennja l-kuxjenza tagħha u tieħu deċiżjoni li togħġob lil Ġeħova?
Għala m’għandniex insaqsu lil oħrajn biex jiddeċiedu għalina? Aqra Ebrej 5:14, u mbagħad iddiskuti:
-
Għalkemm hu faċli biex insaqsu lil oħrajn biex jiddeċiedu għalina, xi rridu nkunu nafu aħna stess?
-
X’jistaʼ jgħinek tittrennja l-kuxjenza u tieħu deċiżjonijiet tajbin?
Il-kuxjenza hi bħal mappa. Din tgħinna nieħdu deċiżjonijiet f’ħajjitna
5. Irrispetta l-kuxjenza t’oħrajn
Kulħadd jieħu deċiżjonijiet differenti. Kif nistgħu nuru li nirrispettaw il-kuxjenza t’oħrajn? Ejja naraw żewġ eżempji:
L-1 eżempju: Oħt li tħobb stil partikolari bidlet il-kongregazzjoni tagħha. Hemmhekk ħafna aħwa nisa ma jiħdux pjaċir bl-istil tagħha.
Aqra Rumani 15:1 u l-1 Korintin 10:23, 24, u mbagħad iddiskuti:
-
Skont dawn il-versi, l-oħt x’tistaʼ tiddeċiedi li tagħmel? Int x’tagħmel jekk tkun maʼ persuna li l-kuxjenza tagħha tgħidilha biex ma tagħmilx xi ħaġa waqt li l-kuxjenza tiegħek tħallik?
It-2 eżempju: Ħu jaf li l-Bibbja ma tgħidx li ma tistax tixrob l-alkoħol. Imma hu ddeċieda li ma jridx jixrob. Hu jiġi mistieden u jara aħwa oħrajn jixorbu l-alkoħol.
Aqra Ekkleżjasti 7:16 u Rumani 14:1, 10, u mbagħad iddiskuti:
-
Skont dawn il-versi, il-ħu x’jistaʼ jiddeċiedi li jagħmel? Int x’se tagħmel jekk tara lil xi ħadd ieħor jagħmel xi ħaġa li l-kuxjenza tiegħek ma tħallikx tagħmilha?
X’se jgħinek tieħu deċiżjonijiet tajbin?
1. Saqsi lil Ġeħova biex jgħinek tiddeċiedi x’se tagħmel.—Ġakbu 1:5.
2. Fittex fil-Bibbja u pubblikazzjonijiet ibbażati fuq il-Bibbja biex issib prinċipji li se jgħinuk. Tistaʼ wkoll issaqsi ħu jew oħt matura fil-kongregazzjoni biex tgħinek.
3. Aħseb kif se teffettwa l-kuxjenza tiegħek u t’oħrajn b’dak li tagħmel.
ĦAFNA JGĦIDU: “Int għandek id-dritt li tagħmel li trid. Mhux importanti x’jaħsbu n-nies.”
-
Għala għandu jinteressana kif iħossu Alla u kif iħossuhom oħrajn?
XI DDISKUTEJNA?
Aħna nieħdu deċiżjonijiet tajbin meta nkunu nafu x’jaħseb Alla. Imbagħad naħsbu jekk dak li se nagħmlu hux se jgħin jew iweġġaʼ lil oħrajn.
X’Tgħallimt
-
Kif tistaʼ tieħu deċiżjonijiet li jogħġbu lil Ġeħova?
-
Kif tistaʼ tittrennja l-kuxjenza tiegħek?
-
Kif tirrispetta l-kuxjenza t’oħrajn?
ARA IŻJED
Kif tistaʼ tieħu deċiżjonijiet li se jgħinuk issir iżjed ħabib t’Alla?
“Ħu Deċiżjonijiet li Jonoraw lil Alla” (It-Torri tal-Għassa, 15 t’April 2011)
Sir af iżjed kif Ġeħova jurina x’għandna nagħmlu.
Tgħallem x’għen lil raġel biex jieħu deċiżjoni diffiċli.
Sir af kif tistaʼ togħġob lil Ġeħova meta ma jgħidilniex eżatt xi rridu nagħmlu.
“Dejjem Għandek Bżonn Kmand tal-Bibbja?” (It-Torri tal-Għassa, 1 taʼ Diċembru 2003)