LECCIÓN 35
Ndáa ki̱ʼva vií koo ña̱ ndaka̱xinyó keʼéyó
Ndiʼiyó xíniñúʼu ndaka̱xinyó ña̱ keʼéyó. Ku̱a̱ʼání ña̱yóʼo kivi nasamaña ki̱ʼva ña̱ kéʼéyó ta saátu ña̱ kítáʼanyó xíʼin Jehová. Tá kúú xíniñúʼu ndaka̱xinyó ndáa míí kooyó, míí kachíñuyó á tindaʼa̱yó á va̱ása. Tá vií íyo ña̱ ndáka̱xinyó keʼéyó si̱í kooyó ta saátu sákusi̱íyó-ini Jehová.
1. ¿Ndáa ki̱ʼva chindeétáʼan ña̱ Biblia xíʼún ña̱ vií koo ña̱ ndaka̱xiún keʼún?
Tá kúma̱níka ndaka̱xiún keʼún iin ña̱ʼa, ka̱ʼa̱n xíʼin Jehová ña̱ ná chindeétáʼanra xíʼún. Ta nandukú nu̱ú Biblia xa̱ʼa̱ ña̱ ndákanixi̱níra xa̱ʼa̱ ña̱ kúni̱ún keʼún (kaʼvi Proverbios 2:3-6). Tasaá kiʼún kuenta ña̱ sava yichi̱ káxi káʼa̱n Jehová ndáa ki̱ʼva keʼéyó sava ña̱ʼa. Iin ña̱ va̱ʼa keʼéyó kúú ña̱ kandíxayó ña̱ káʼa̱nra.
Soo, ¿ndáaña keʼéyó tá nu̱ú Biblia va̱ása káxi káʼa̱nña ndáaña xíniñúʼu keʼéyó? Ni saá Jehová kuniʼira yichi̱ nu̱ún ña̱ va̱ʼa vií ndaka̱xiún ndáaña xíniñúʼu keʼún (Isaías 48:17). ¿Ndáa ki̱ʼva keʼéraña? Kuniñúʼura ña̱ va̱xi nu̱ú Biblia ña̱ va̱ʼa chindeétáʼanra xíʼún. Ña̱ nda̱a̱ ña̱ va̱xi nu̱ú Biblia chíndeétáʼanña xíʼinyó ña̱ va̱ʼa kunda̱a̱-iniyó ndáaña ndákanixi̱ní Jehová xa̱ʼa̱ iin ña̱ʼa ta saátu ndáaña ndóʼora. Ta ña̱yóʼo ku̱a̱ʼá yichi̱ ndáni̱ʼíyóña tá káʼviyó ña̱ va̱xi nu̱ú Biblia. Tá kúnda̱a̱-iniyó ña̱ ndákanixi̱ní Jehová xa̱ʼa̱ iin ña̱ʼa, ña̱yóʼo chindeétáʼanña xíʼinyó ña̱ ndaka̱xinyó keʼéyó ña̱ kútóora.
2. ¿Ndáaña xíniñúʼu kiʼún kuenta xíʼin tá kúma̱níka ndaka̱xiún keʼún iin ña̱ʼa?
Ña̱ Biblia káʼa̱nña, na̱ ndíchi ndákani va̱ʼa xi̱nína ndáaña keʼéna (Proverbios 14:15). Ña̱yóʼo kúni̱ kachiña tá kúma̱ní ndaka̱xinyó keʼéyó iin ña̱ʼa siʼna ná ndakanixi̱níyó ndáaña kúú ña̱ kivi keʼéyó. Tá ná ndaka̱xiún ña̱ keʼún ndakanixi̱ní xa̱ʼa̱ ña̱yóʼo: “¿Ndáa texto ña̱ va̱xi nu̱ú Biblia káʼa̱n xa̱ʼa̱ ña̱ kúni̱i̱ keʼíi̱? Ña̱ ndaka̱xii̱n keʼíi̱, ¿á sandíʼi̱ña-inii̱? ¿Ndáaña kundoʼo inkana xa̱ʼa̱ ña̱ ndaka̱xii̱n keʼíi̱? Ta mií ña̱ ndáyáʼvika kúú ña̱yóʼo, ¿á sakúsi̱íña-ini Jehová?” (Deuteronomio 32:29).
Ndióxi̱ kúúmiíra derecho ña̱ ka̱ʼa̱nra xíʼinyó ndáaña kúú ña̱ va̱ʼa ta ndáaña va̱ása va̱ʼa. Tá kúnda̱a̱ va̱ʼa iniyó xa̱ʼa̱ leyra ta saátu ña̱ va̱xi nu̱ú Biblia, va̱ása kaka-iniyó keʼéyó ña̱ káʼa̱nra ta saátu vií koo ña̱ xínitúni̱yó. Ña̱ xínitúni̱yó kúú ña̱ káʼa̱n xíʼinyó ndáaña kúú ña̱ va̱ʼa ta ndáaña kúú ña̱ va̱ása va̱ʼa (Romanos 2:14, 15). Tá vií íyo ña̱ xínitúni̱yó chindeétáʼanña xíʼinyó ña̱ ndaka̱xinyó ña̱ keʼéyó.
NÁ SAKUAʼAKAYÓ XA̱ʼA̱ÑA
Ná kotoyó ndáa ki̱ʼva chíndeétáʼan ña̱ va̱xi nu̱ú Biblia xíʼinyó ta saátu ña̱ xínitúni̱yó tá ndáka̱xinyó keʼéyó iin ña̱ʼa.
3. Taxi ná kuniʼi ña̱ Biblia yichi̱ nu̱ún
¿Ndáa ki̱ʼva chíndeétáʼan ña̱ Biblia xíʼinyó tá ndáka̱xinyó iin ña̱ keʼéyó? Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Ndáaña kúni̱ kachi ña̱ ndaka̱xin miíyó ña̱ keʼéyó?
-
¿Nda̱chun ta̱xi Jehová ña̱ ndaka̱xin miíyó ña̱ keʼéyó?
-
¿Ndáaña ta̱xi Ndióxi̱ ndaʼa̱yó ña̱ va̱ʼa chindeétáʼanra xíʼinyó ña̱ viíní koo ña̱ ndaka̱xinyó keʼéyó?
Ña̱ va̱ʼa kotoún iin ejemplo ña̱ va̱xi nu̱ú Biblia, kaʼvindó Efesios 5:15, 16. Tándi̱ʼi ka̱ʼa̱nndó ndáa ki̱ʼva “vií kuniñúʼuyó tiempo” ña̱...
-
... kaʼviyó Biblia ndiʼi ki̱vi̱.
-
... viíka keʼéyó xíʼin na̱ ti̱ndaʼa̱ xíʼinyó, na̱ yiváyó á xíʼin na̱ se̱ʼeyó.
-
... ku̱ʼu̱nyó reunión.
4. Tá vií íyo ña̱ xínitúni̱ún vií koo ña̱ ndaka̱xiún keʼún
Tá káxi káʼa̱n ña̱ Biblia xa̱ʼa̱ iin ña̱ ndáka̱xinyó keʼéyó, va̱ása ixayo̱ʼvi̱ña xíʼinyó. Soo, ¿tá kǒo ña̱ káxi káʼa̱n xa̱ʼa̱ ña̱yóʼo? Kotondó VIDEO ta ka̱ʼa̱nndó xa̱ʼa̱ ña̱yóʼo:
-
Nda̱a̱ táki̱ʼva xi̱toyó nu̱ú video, ¿ndáaña ke̱ʼé ñá hermana ña̱ vií koo ña̱ xínitúni̱ñá ta saátu ña̱ nda̱kaxinñá keʼéñá ña̱ va̱ʼa sakúsi̱íñá-ini Jehová?
¿Nda̱chun kǒo xíniñúʼu ka̱ʼa̱nyó xíʼin inkana ña̱ ná ndaka̱xinna ña̱ keʼéyó? Kaʼvindó Hebreos 5:14 ta ka̱ʼa̱nndó xa̱ʼa̱ ña̱yóʼo:
-
Kiviva ka̱ʼa̱nyó xíʼin iinna ná ka̱ʼa̱nna xíʼinyó ndáaña keʼéyó, soo ¿nda̱chun iin tá iinyó xíniñúʼu kotoyó ndáaña kúú ña̱ va̱ʼa?
-
¿Ndáaña kúú ña̱ kivi chindeétáʼan xíʼinyó ña̱ vií koo ña̱ xínitúni̱yó ta saátu ña̱ vií koo ña̱ ndaka̱xinyó keʼéyó?
Ña̱ xínitúni̱yó íyoña nda̱a̱ táki̱ʼva íyo iin mapa, saáchi chíndeétáʼanña xíʼinyó ña̱ kunda̱a̱-iniyó ndáaña keʼéyó.
5. Ixato̱ʼó ña̱ xínitúni̱ inkana
Xa̱ʼa̱ ña̱ xa̱a̱ síín síín íyoyó xa̱a̱ síín síín íyo ña̱ ndáka̱xinyó keʼéyó. ¿Ndáa ki̱ʼva na̱ʼa̱yó ña̱ íxato̱ʼóyó ña̱ xínitúni̱ inkana? Ná kotoyó u̱vi̱ ña̱yóʼo.
Ña̱ nu̱ú: Iin ñá hermana ñá kutóoní ndakaʼyí nu̱ú, nása̱mañá ku̱a̱ʼa̱nñá inka congregación nu̱ú ku̱a̱ʼa̱n ná hermana ná va̱ása kutóo ndakaʼyí nu̱ú.
Kaʼvindó Romanos 15:1 xíʼin 1 Corintios 10:23, 24, ta ka̱ʼa̱nndó xa̱ʼa̱ ña̱yóʼo:
-
Nda̱a̱ táki̱ʼva káʼa̱n ña̱ versículo yóʼo, ¿ndáaña kúú ña̱ ndaka̱xin ñá hermana yóʼo keʼéñá? Ta miíún, ¿ndáaña keʼún tá ña̱ xínitúni̱ inka na̱ yiví va̱ása táxiña keʼún ña̱ kúni̱ún?
Ña̱ u̱vi̱: Iin ta̱ hermano kúnda̱a̱-inira ña̱ Biblia va̱ása káʼa̱nña ña̱ kǒo xíniñúʼu koʼoyó ndixi, soo ta̱yóʼo va̱ása xíínra koʼorará. Iin ki̱vi̱ ka̱nanara ña̱ ná ku̱ʼu̱nra iin vikó ta xítora ña̱ sava na̱ hermano xíʼina loʼo ndixi.
Kaʼvindó Eclesiastés 7:16 xíʼin Romanos 14:1, 10, ta ka̱ʼa̱nndó xa̱ʼa̱ ña̱yóʼo:
-
Nda̱a̱ táki̱ʼva káʼa̱n ña̱ versículo yóʼo, ¿ndáaña kúú ña̱ ndaka̱xin ta̱ hermano yóʼo keʼéra? Ta miíún, ¿ndáaña keʼún tá xítoún iinna kéʼéna iin ña̱ va̱ása va̱ʼa?
¿Ndáaña xíniñúʼu kundiku̱ún ña̱ va̱ʼa vií koo ña̱ ndaka̱xiún keʼún?
1. Ka̱ʼa̱n xíʼin Jehová ña̱ ná chindeéra yóʼo ña̱ ndaka̱xiún ña̱ keʼún (Santiago 1:5).
2. Nandukú nu̱ú Biblia ta saátu nu̱ú tutu ña̱ tává na̱ ñuu Ndióxi̱ ña̱ va̱ʼa ndani̱ʼún ña̱ káʼa̱n xa̱ʼa̱ ña̱ kúni̱ún keʼún. Ta saátu kivi nda̱ka̱tu̱ʼún na̱ hermano na̱ xa̱a̱ xu̱xa-ini.
3. Ndakanixi̱ní xa̱ʼa̱ ña̱ kundoʼo ña̱ xínitúni̱ún xa̱ʼa̱ ña̱ ndaka̱xiún keʼún ta saátu ña̱ kundoʼo inkana xa̱ʼa̱ña.
ÑA̱ KÁʼA̱N SAVA NA̱ YIVÍ: “Miíún kúú na̱ xíniñúʼu ndaka̱xin ndáaña kúú ña̱ xíniñúʼu keʼún. Va̱ása ndáyáʼviví ña̱ ndákanixi̱ní inka na̱ yiví”.
-
¿Nda̱chun xíniñúʼu kiʼinyó kuenta xíʼin ña̱ ndákanixi̱ní Ndióxi̱ ta saátu inkana?
ÑA̱ XA̱A̱ SA̱KUAʼAYÓ
Va̱ʼa kána ña̱ ndáka̱xinyó keʼéyó tá nándukúyó xa̱ʼa̱ ña̱ ndákanixi̱ní Jehová xa̱ʼa̱ ña̱yóʼo ta saátu tá ná kiʼinyó kuenta xa̱ʼa̱ ña̱ ndáka̱xinyó keʼéyó á chindeétáʼanña xíʼin inkana á saxóʼvi̱ñana.
Ná ndakaʼányó xa̱ʼa̱ ña̱yóʼo
-
¿Ndáa ki̱ʼva vií koo ña̱ ndaka̱xiún keʼún ña̱ va̱ʼa ná kutóo Jehová ña̱yóʼo?
-
¿Ndáaña keʼún ña̱ va̱ʼa vií koo ña̱ xínitúni̱ún?
-
¿Ndáa ki̱ʼva na̱ʼún ña̱ íxato̱ʼún ña̱ xínitúni̱ inkana?
NANDUKÚKA XA̱ʼA̱ÑA
¿Ndáa ki̱ʼva vií koo ña̱ keʼún tasaá viíka kutáʼún xíʼin Ndióxi̱?
“Ña̱ ndáka̱xinyó keʼéyó ná ndasakáʼnuña Ndióxi̱” (La Atalaya, 15 tí abril ku̱i̱ya̱ 2011)
Kunda̱a̱ka-ini ndáa ki̱ʼva táxi Jehová consejo ndaʼa̱yó.
Koto ndáaña chi̱ndeétáʼan xíʼin iin ta̱a ni yo̱ʼvi̱ní ni̱xi̱yo ña̱ nda̱kaxinra ke̱ʼéra.
Koto ndáa ki̱ʼva sakúsi̱íyó-ini Jehová ni va̱ása káxi káʼa̱nra xa̱ʼa̱ ndáaña xíniñúʼu keʼéyó.
“¿Á ndiʼi tiempo xíniñúʼu ka̱ʼa̱n ña̱ Biblia xa̱ʼa̱ ña̱ keʼéyó?” (La Atalaya, 1 tí diciembre ku̱i̱ya̱ 2003)
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
