TAMACHTILIS 35
Keniuj kuali titaixpejpenaskej
Tinochin moneki titaixpejpenaskej. Miak taman tein tikixpejpenaj uelis kipatas tonemilis uan kemej timouikaj iuan Jiova. Xa monekis tikixpejpenaskej kani tinemiskej, keniuj timoixpanoltiskej uan ox timonamiktiskej. Komo kuali titaixpejpenaj, tiyolpakiskej uan tikyolpaktiskej Jiova.
1. ¿Keniuj Biblia uelis mitsonpaleuis kuali xiontaixpejpena?
Achto ke tikonixpejpenas teisa, xikontajtani Jiova maj mitsonpaleui uan xikontemo itech Biblia toni kinemilia ika nejon (xikonita Proverbios 2:3-6). Kemansa Jiova senkis techiluia toni moneki tikchiuaskej. Komo ijkon, okachi kuali xikontakamati.
¿Uan komo itech Biblia amo tikonajsi se tanauatil tein mitsoniluis toni tikonchiuas? Jiova nochipa mitsonixyekanas “itech ojti” kampa moneki tionnejnemis (Isaías 48:17). ¿Keniuj kichiuas? Ika tamachtilismej tein kipia Biblia tein mitsonixyekanaskej. Nejon tamachtilismej kinextiaj tein kinemilia uan tein kimachilia Jiova. Nejin tikmatij keman tiklerouaj se taman itech Biblia. Keman tikmatij tein Jiova kinemilia tikixpejpenaj tein kiyolpaktia.
2. ¿Toni moneki tikonnemilis achto ke tikonixpejpenas teisa?
Biblia kijtoua: “Akin tamatkej kuali kiita kani taksas” (Proverbios 14:15). Nejin kijtosneki ke achto ke tikixpejpenaskej teisa moneki kuali tikitaskej sejse taman tein uelis tikchiuaskej. Keman tikonitas sejse taman, xionmochiuili nejin netajtanilmej: “¿Katiyejua tamachtilismej tein kipia Biblia uelis nechpaleuiskej maj kuali nitaixpejpena? ¿Toni tein nikixtalis nechpaleuis maj kuali nimomachili? ¿Keniuj uelis kinijtakos oksekin tein nikixpejpenas? Uan tein okachi moneki, ¿kiyolpaktis Jiova?” (Deuteronomio 32:29).
Jiova kinamiki techiluis toni tein kuali uan toni amo kuali. Keman kuali tikixmatij itanauatiluan uan tamachtilismej tein kipia Biblia uan tikixtaliaj tikintakamatiskej, tikpiaj se kuali tanemilil. Totanemilil yejua se taman tein tikpiaj tein techiluia tein kuali uan tein amo kuali (Romanos 2:14, 15). Keman kuali tikmachtiaj totanemilil techpaleuia maj kuali titaixpejpenakan.
MAJ OKACHI TIMOMACHTIKAN
Maj tikitakan keniuj tamachtilismej tein kipia Biblia uan totanemilil techpaleuiaj keman monekis titaixpejpenaskej.
3. Xikonkaua maj Biblia mitsonixyekana
¿Keniuj techpaleuiaj tamachtilismej tein kipia Biblia keman moneki titaixpejpenaskej? Xikitakan VIDEO uan ika xitajtokan nejin:
-
¿Toni kualtsin netetayokolil techmakatok Jiova?
-
¿Keyej Jiova techkaua maj toselti titaixpejpenakan?
-
¿Toni techmakani Dios tein techpaleuia maj toselti kuali titaixpejpenakan?
Para nankiitaskej se tamachtilis tein kipia Biblia, xikitakan Efesios 5:15, 16. Ompa ika xitajtokan keniuj kuali tikuiskej tiempo para...
-
... tikleroskej Biblia mojmostaj.
-
... kuali timouikaskej akin timonamiktijkejya, timochiuaskej kuali tetatmej oso kuali tekoneuan.
-
... tiaskej nechikolmej.
4. Xikonmachti motanemilil para kuali tiontaixpejpenas
Keman onkak se tanauatil itech Biblia tein techiluia toni tikchiuaskej, amo ouij techkisa tikmatiskej toni tikixpejpenaskej. Sayoj ke, ¿komo amo moajsi nion se tanauatil? Xikitakan VIDEO uan ika xitajtokan nejin:
-
Ijkon kemej moitak itech video, ¿keniuj tokniuj kimachtij itanemilil para kiixpejpenas tein kiyolpaktiskia Jiova?
¿Keyej amo moneki tikiluiskej aksa maj kiixpejpena tein tikchiuaskej? Xikitakan Hebreos 5:14 uan ika xitajtokan nejin:
-
Maski okachi amo ouij maj aksa toka taixpejpena, ¿toni moneki tikmatiskej tikchiuaskej toselti?
-
¿Toni nepaleuilmej tikpiaj para tikmachtiskej totanemilil uan maj kuali titaixpejpenakan?
Ijkon kemej se mapa, totanemilil techixyekana itech tonemilis.
5. Xikonpoujkaita inintanemilil oksekin
Kemej tinochin titatamamej, tataman tein tikixpejpenaj tikchiuaskej. ¿Keniuj uelis tiknextiskej ke tikpoujkaitaj inintanemilil oksekin? Maj tikitakan ome taman tein ueliskia panos.
Yekinika taman: Se tokniuj siuatsin akin kiuelita moixpintaros tapaleuiti itech okse nechikol kampa tokniuan siuamej amo kiuelitaj maj moixpintarokan.
Xikitakan Romanos 15:1 uan 1 Corintios 10:23, 24, uan ika xitajtokan nejin:
-
Maj tikijtokan ke itanemilil aksa amo kikaua maj kichiua se taman tein tejuatsin kemaj. ¿Keniuj uelis tikonchiuas tein kijtouaj nejin textos keman iuan tionyetos?
Ojpatika taman: Se tokniuj kimati ke Biblia kijtoua ke amo tajtakol maj se tayi tein teuintij, sayoj ke yejua kiixtalia amo tayis. Se tonal, kiyoleuaj se iluit uan kiita ke tokniuan tayitokej.
Xikitakan Eclesiastés 7:16 uan Romanos 14:1, 10, uan ika xitajtokan nejin:
-
¿Keniuj uelis mitsonpaleuis nejin textos keman oksekin kichiuaskej teisa tein motanemilil amo mitsonkaua xikonchiua?
¿Toni uelis tikonchiuas para kuali tiontaixpejpenas?
1. Xikontajtani Jiova maj mitsonpaleui xikonmati toni tikonchiuas (Santiago 1:5).
2. Xikontemo itech Biblia uan itech okseki amaixmej tamachtilismej tein mitsonpaleuiskej xiontaixpejpena. No xikontajtani maj mitsonpaleuikan tokniuan akin mochikauaj kuali taixpejpenaskej.
3. Xikonnemili keniuj kijtakos motanemilil uan inintanemilil oksekin tein tikonixtalis tikonchiuas.
TEIN SEKIN KIJTOUAJ: “Tejuatsin uelis tikonixpejpenas tein tikonnekis. ¡Amo inintekiuj oksekin tein tikonchiuas!”.
-
¿Keyej moneki ika titanemiliskej keniuj momachilia Jiova uan no oksekin?
TEIN TIKITAKEJ
Kuali titaixpejpenaj keman tikmatij keniuj kiita Jiova se taman, uan keman tikitaj ox tein tikchiuaj kinpaleuia oso kinijtakoua oksekin.
Maj tikelnamikikan
-
¿Keniuj uelis tiontaixpejpenas kemej kiyolpaktis Jiova?
-
¿Keniuj uelis tikonmachtis motanemilil?
-
¿Keniuj uelis tikonnextis ke tikonpoujkaita inintanemilil oksekin?
NO XIKONITA NEJIN
¿Keniuj tein tikonixpejpenas mitsonpaleuis okachi kuali xionmouika iuan Dios?
“Tomemos decisiones que honren a Dios” (La Atalaya, 15 de abril de 2011)
Okachi xikonita keniuj Jiova techyolmajxitia.
Xikonita tein kipaleuij se takat keman kiixpejpenak se taman tein semi moneki.
Xikonita keniuj tikyolpaktiskej Jiova keman amo kitemakani se tanauatil itech se taman.
“¿Hace falta siempre un mandato bíblico?” (La Atalaya, 1 de diciembre de 2003)
Xa no tikonuelitas
NETAJTANILMEJ TEIN MOCHIUAJ
¿Keniuj itaixpantijkauan Jiova kimachtiaj aksa ika Biblia?
Keman se itaixpantijkauj Jiova mitsonmachtis, tejuatsin uelis tikonkuis tein yeski Biblia. No uelis tikonyoleuas akin nemij mokalijtik oso akin yeski.
