TLAMACHTIL 35
¿Tlen techpaleuis kuali matikpejpenakan tlen tikchiuaskej?
Tinochtin moneki tikpejpenaskej tlen tikchiuaskej. Tlen tikpejpenaj uelis techpaleuis matimouikakan iuan Jehová noso matitlajyouikan, xamo moneki tikpejpenaskej kanin tichantiskej, kanin titekipanoskej uan kox timonamiktiskej. Tla kuali tikpejpenaj tlen tikchiuaskej, tiyolpakiskej uan noijki tikyolpaktiskej Jehová.
1. ¿Ken mitspaleuis Biblia kuali xikpejpena tlen tikchiuas?
Ijkuak itlaj moneki tikpejpenas, achto xiktlatlaujti Jehová mamitspaleui uan noijki ximomachti tlen kijtoua Biblia para tikmatis ken mokuayejyekoua (xiktlajtolti Proverbios 2:3-6). Jehová technauatia tlen moneki tikchiuaskej uan tla tiktlakamatiskej, kuali tiyetoskej.
Pero ¿tlen mitspaleuis tla Biblia amo kijtoua tlen moneki tikchiuas? Tla ijkon mitspanos, Jehová mitspaleuis “xinejnemi itech ojtli kanin moneki tias” (Isaías 48:17). ¿Ken kichiua? Ika Biblia techmaka principios tlen techpaleuiaj matikmatikan tlen tikchiuaskej. Principios bíblicos techpaleuiaj matikmatikan ken mokuayejyekoua Jehová uan tlen kimachilia. Ijkuak tiktlajtoltiaj itech Biblia tlen okinpanok sekimej yiuejkika, tikajsikamatij ken mokuayejyekoua Jehová. Uelis tikpejpenaskej tlen ye kipaktia tla tikmatij ken mokuayejyekoua uan tlen kimachilia.
2. ¿Tlen moneki tikilnamiktos ijkuak tikpejpenas tlen tikchiuas?
Biblia kijtoua “akin ixtlamatki mokuayejyekoua itech sejse tlamantli tlen kichiua” (Proverbios 14:15). Tlen kijtoua nin texto kijtosneki ijkuak itlaj tikpejpenaskej moneki kuali timokuayejyekoskej. Ijkuak tikpejpenas tlen tikchiuas, ximotlajtlani: “¿Tlen principio bíblico nechpaleuis? ¿Ken nimomachilis ika tlen nikpejpenas? ¿Kinpaleuis noso kintlajyouiltis oksekimej tlen nikneki nikchiuas? ¿Kipaktis Jehová?” (Deuteronomio 32:29).
Jehová kinamiki techiluis tlen moneki tikchiuaskej, ikinon tla tiktlakamatij uan timoyekanaj ika principios bíblicos, kuali tikpiaskej totlalnamikilis. Non techpaleuis matikmatikan tlen kuali uan tlen amo kuali (Romanos 2:14, 15). Tla tikpiaj kuali totlalnamikilis, techpaleuis kuali matimoyekanakan.
MATIMOMACHTIKAN
Matikitakan ken techpaleuiskej principios bíblicos uan totlalnamikilis matikpejpenakan tlen kuali.
3. Xikchiua tlen kijtoua Biblia
¿Ken techpaleuiaj principios bíblicos ijkuak moneki tikpejpenaskej tlen tikchiuaskej? Xikitakan VIDEO uan satepan xikitakan tlen namechmachtia.
-
¿Tlen techkauilia matikchiuakan Jehová?
-
¿Tleka Jehová techkauilia matikpejpenakan tlen tikchiuaskej?
-
¿Tlen techmaka para kuali tikpejpenaskej tlen tikchiuaskej?
Para tikmatis ken techpaleuiaj principios bíblicos, xiktlajtoltikan Efesios 5:15, 16. Satepan xikitakan ken uelis ijkon tikchiuaskej ijkuak...
-
... nochipa tiktlajtoltiaj Biblia.
-
... timochijchikauaj kuali timouikaskej iuan tofamilia.
-
... timonechikouaj inuan tokniuan.
4. Ximomachti uan ijkon tikpejpenas tlen okachi kuali
Ijkuak Biblia techiluia tlen moneki tikchiuaskej, amo tikitaj oui tikpejpenaskej tlen kuali. Pero ¿tlen tikchiuaskej tla amo techiluia? Xikitakan VIDEO uan satepan xikitakan tlen namechmachtia.
-
Ken otikitakej itech video, ¿tlen okipaleui tokni kuali makipejpena tlen kichiuas uan ijkon kiyolpaktis Jehová?
¿Tleka amo moneki ikaj matikiluikan matechilui tlen tikchiuaskej? Xiktlajtoltikan Hebreos 5:14 uan satepan xikitakan tlen namechmachtia.
-
Maski ikaj uelis techiluis tlen moneki tikchiuaskej, san tejuan moneki tikpejpenaskej tlen kuali noso amo, ¿tleka?
-
¿Tlen techpaleuis matimomachtikan uan ijkon kuali tikpejpenaskej tlen tikchiuaskej?
Totlalnamikilis ken se mapa, techpaleuia ma tikpejpenakan tlen tikchiuaskej itech tonemilis.
5. Xiktlakaita tlen oksekimej kipejpenaj
Amo san se tlamantli timokuayejyekouaj ikinon tlatlamantli tikpejpenaj tlen tikchiuaskej. ¿Ken uelis tikteititiskej tiktlakaitaj tlen oksekimej kipejpenaj? Matikitakan ome tlamantli.
1: Se tokni tlen kipaktia kimotlalilis maquillaje yaui tlapaleuiti itech okse tlanechikol, kanin sekimej tokniuan amo kinpaktia kimotlaliliskej maquillaje.
Xiktlajtoltikan Romanos 15:1 uan 1 Corintios 10:23, 24 uan satepan xikitakan tlen namechmachtia.
-
¿Ken kipaleuis tokni ninmej versículos makipejpena tlen kichiuas? Matikijtokan tika iuan akin amo kichiua seki tlamantli porque ye kita amo kuali, pero te timokuayejyekoua non kuali, ¿tlen tikchiuaskia?
2: Se tokni kimati amo tlajtlakoli konis tepitsin alcohol pero ye amo kineki ijkon kichiuas. Se tonal sekimej tokniuan kiyoleuaj kanaj matlakuati uan kinmita konij alcohol.
Xiktlajtoltikan Eclesiastés 7:16 uan Romanos 14:1, 10 uan satepan xikitakan tlen namechmachtia.
-
¿Ken kipaleuis tokni ninmej versículos? Uan, ¿tlen tikchiuaskia tla tikita oksekimej kichiuaj tlen te amo tikchiuaskia?
¿Tlen mitspaleuis xikpejpena tlen kuali?
1. Xikilui Jehová mamitspaleui xikpejpena tlen tikchiuas (Santiago 1:5).
2. Xiktlajtolti Biblia uan amatlajkuilolmej kanin kijtoua tlen uelis tikchiuas. Noijki uelis timotlapouis inuan tokniuan tlen kipiaj chikauak intlaneltokilis.
3. Xikita kox kuali timomachilis uan ken kitaskej oksekimej tlen tikneki tikchiuas.
SEKIMEJ KIJTOUAJ: “Uelis tikchiuas san tlen te tiknekis, amo mamitstekipacho tlen oksekimej kijtoskej”.
-
Pero, ¿tleka moneki tikilnamiktoskej tlen mokuayejyekoua toTajtsin Dios uan oksekimej?
XIKILNAMIKTO
Tikpejpenaskej tlen kuali tla achto timomachtiaj tlen kipaktia Jehová uan noijki ijkuak timokuayejyekouaj ken kitaj oksekimej tlen tikchiuaj.
Matikojpauikan
-
¿Ken uelis tikpejpenas tlen kipaktia Jehová?
-
¿Tlen moneki tikchiuas para motlalnamikilis mitspaleuis xikchiua tlen kuali?
-
¿Ken uelis tikteititis tiktlakaita tlen oksekimej kipejpenaj kichiuaskej?
NIN NOIJKI MITSPAKTIS
¿Ken uelis tikpejpenas tlen okachi mitspaleuis ximouika iuan toTajtsin Dios?
“Ma tikueyichiuakan Jehová ika tlen tikpejpenaj” (Akin Tetlapouijtok, 15 de abril 2011)
Xikita ken techpaleuia Jehová.
Xikita tlen okipaleui se tlakatl kuali makipejpena tlen kichiuaskia.
Xikita ken uelis tikyolpaktis Jehová ijkuak amo tikajsis se tlanauatil.
“¿San tlanauatilmej uelis techpaleuiskej?” (Akin Tetlapouijtok, 1 de diciembre 2003)
Xamo noijki mitspaktis
TLEN MIAKEJ MOTLAJTLANIAJ
¿Ken tlamachtiaj iTlaixpantijkauan Jehová?
Ijkuak mitstlajpalotiuij iTlaixpantijkauan Jehová uelis timomachtis ika moBiblia. Noijki uelis tikinyoleuas mofamilia noso moyolikniuan mouan mamomachtikan.
