OSHILESHWA 35
Nkene tatu vulu okuninga omatokolo omawanawa
Atuheni ohatu ningi omatokolo. Ogendji gomugo ohaga vulu oku tu etela uuwanawa nenge uuwinayi nohaga vulu okuguma ekwatathano lyetu naJehova. Pashiholelwa, otashi vulika tu tokole kutya otatu ka kala peni, nkene tatu vulu okwiimonena oshimaliwa nosho wo ngele natu ye ngaa mondjokana. Ngele ohatu ningi omatokolo omawanawa, otatu vulu okukala twa nyanyukwa monkalamwenyo notatu ka nyanyudha Jehova.
1. Ombiimbeli otayi ku kwathele ngiini wu ninge omatokolo omawanawa?
Manga inoo ninga etokolo lyontumba, galikana kuJehova e ku kwathele, e to konakona Ombiimbeli wu mone kutya oshinima shoka okwe shi tala ko ngiini. (Lesha Omayeletumbulo 2:3-6.) Jehova oha gandja elombwelo lyokondandalunde miinima yimwe. Ngele opu na elombwelo lyokondandalunde, etokolo lya dhenga mbanda ndyoka to vulu okuninga, okuvulika kulyo.
Ongiini ngele Ombiimbeli inayi ku lombwela kondandalunde kutya ninga shike? Jehova ote ke ku ulukila natango “ondjila u na okweenda nayo.” (Jesaja 48:17) Ngiini mbela? Otashi vulika pu kale pu na omakotampango ngoka taga vulu oku ku wilika. Omakotampango gOmbiimbeli ogo oshili ndjoka tayi holola omadhiladhilo nomaiyuvo gaKalunga. Olundji ohatu mono kutya Jehova oku uvitile ngiini oshinima shontumba, uuna twa lesha ehokololo mOmbiimbeli. Ngele otwa mono kutya Jehova oku uvite ngiini, ohatu vulu okuninga omatokolo ngoka tage mu nyanyudha.
2. Oshike wu na okudhiladhila kusho manga inoo ninga etokolo?
Ombiimbeli otayi ti kutya omuntu “onkotoki ota ndhindhilike oonkatu dhe.” (Omayeletumbulo 14:15) Shika osha hala okutya manga inaatu ninga etokolo, otu na okudhiladhila nawa kombinga yalyo. Sho to dhiladhila kombinga yetokolo ndyoka, ipula to ti: ‘Omakotampango gOmbiimbeli geni tandi vulu okutula miilonga? Etokolo lini tali vulu okweetela ndje ombili yopamadhiladhilo? Etokolo lyandje otali ka guma ngiini yalwe? Shono sha simanenena, mbela otali ka nyanyudha ngaa Jehova?’ — Deuteronomium 32:29.
Jehova oku na uuthemba woku tu lombwela shoka oshiwanawa naashoka oshiwinayi. Uuna twa tseya nawa oompango nomakotampango ge, notwa tokola toko oku ga landula, ohatu kala tu na eiyuvo ewanawa. Eiyuvo olyo hali tu lombwele kutya oshinima shontumba oshi li mondjila nenge osha puka. (Aaroma 2:14, 15) Eiyuvo lya dheulwa ohali tu kwathele tu ninge omatokolo omawanawa.
ILONGA OSHINDJI
Ilonga nkene omakotampango gOmbiimbeli nosho wo eiyuvo lyetu hali tu kwathele tu ninge omatokolo.
3. Etha Ombiimbeli yi ku wilike
Omakotampango gOmbiimbeli otaga vulu ngiini oku tu kwathela, uuna tatu ningi omatokolo? Dhana OKAVIDIO, e tamu kundathana omapulo taga landula.
-
Jehova okwe tu pa omagano ga dhenga mbanda geni?
-
Omolwashike Jehova e tu pa emanguluko lyokuninga omatokolo?
-
Jehova okwe tu pa shike shi tu kwathele tu ninge omatokolo ga dhenga mbanda?
Opo wu mone ekotampango limwe ndyoka li li mOmbiimbeli, lesha Aaefeso 5:15, 16, e tamu kundathana nkene wu na ‘okulongitha nawa ethimbo’ lyoye . . .
-
wu leshe Ombiimbeli pandjigilile.
-
wu kale kuume kopandjokana, omuvali nenge omunona e li nawa.
-
wu kale ho yi kokugongala.
4. Dheula eiyuvo lyoye wu kale ho ningi omatokolo omawanawa
Okuninga etokolo li li mondjila, otashi vulika ku monike kwa fa okupu, uuna pu na enyolo lyokondandalunde tali tu lombwele kutya natu ninge shike. Ihe ongiini ngele kapu na elombwelo lyokondandalunde? Dhana OKAVIDIO, e tamu kundathana epulo tali landula.
-
Mokavidio haka, oonkatu dhini omumwameme a katuka, opo a dheule eiyuvo lye noku ninge etokolo ndyoka tali nyanyudha Jehova?
Omolwashike kaatu na okupula yalwe ye tu ningile omatokolo? Lesha Aahebeli 5:14, e tamu kundathana omapulo taga landula:
-
Nonando oshi kale tashi monika sha fa oshipu okupula yalwe ye tu ningile omatokolo, oshike tu na okuyoolola kutse yene?
-
Iilongitho yini tayi vulu oku ku kwathela wu dheule eiyuvo lyoye nowu ninge omatokolo omawanawa?
Eiyuvo lyetu ohali tu wilike ngaashi okaalita, tu ninge omatokolo monkalamwenyo
5. Simaneka omaiyuvo gayalwe
Aantu ohaya ningi omatokolo ga yoolokathana. Ongiini tatu vulu okuulika kutya otwa simaneka omaiyuvo gayalwe? Natu tale koonkalo mbali:
Onkalo 1: Omumwameme gumwe ngoka e hole okugwaya omeyikapa okwa tembukile kegongalo hoka ku na aamwameme oyendji haya uvu nayi uuna ya mono gumwe e yi gwaya.
Lesha Aaroma 15:1 nosho wo 1 Aakorinto 10:23, 24, e tamu kundathana omapulo taga landula:
-
Shi ikolelela koovelise ndhika, omumwameme ngoka otashi vulika a ninge po shike? Oto ka ninga po shike, ngele owu li nomuntu ngoka eiyuvo lye itaali mu pitike a ninge oshinima shoka eiyuvo lyoye tali ku pitike wu shi ninge?
Onkalo 2: Omumwatate oku shi kutya Ombiimbeli inayi indika okunwa omalovu pandjele, ihe okwa tokola kee ga nwe. Okwa hiywa kokatuthi hono a mono aamwatate taya nu omalovu.
Lesha Omuuvithi 7:16 nosho wo Aaroma 14:1, 10, e tamu kundathana omapulo taga landula:
-
Shi ikolelela koovelise ndhika, omumwatate ngoka ota vulu okuninga etokolo lini? Oto ka ninga po shike ngele gumwe ota ningi oshinima shontumba, shoka eiyuvo lyoye itaali ku pitike wu shi ninge?
Iinima yini tayi vulu oku ku kwathela wu ninge omatokolo omawanawa?
1. Pula Jehova e ku kwathele wu ninge etokolo lyomondjila.— Jakob 1:5.
2. Ninga omapekapeko mOmbiimbeli nosho wo miileshomwa ya kankamena kOmbiimbeli wu mone omakotampango ngoka to vulu okutula miilonga. Oto vulu wo okupopya nAakriste mboka ye na owino.
3. Dhiladhila wo kunkene etokolo lyoye tali ka guma eiyuvo lyoye nosho wo omaiyuvo gayalwe.
AANTU YAMWE OHAYA TI: “Owu na uuthemba wokuninga shoka wa hala, kutya nduno yalwe otaya ti shike.”
-
Omolwashike tu na okudhiladhila kunkene Kalunga ta ka kala e uvite nosho wo yalwe?
OWI ILONGO SHIKE?
Ohatu ningi omatokolo omawanawa, uuna twa mono kutya Jehova oha kala e uvitile ngiini oshinima shontumba, nokutala ngele omatokolo ngoka otaga ka kwathela yalwe nenge otage ke ya yemateka.
Omapulo geendululo
-
Ongiini to vulu okuninga omatokolo ngoka taga nyanyudha Jehova?
-
Ongiini to vulu okudheula eiyuvo lyoye?
-
Ongiini to vulu okuulika kutya owa simaneka omaiyuvo gayalwe?
UUYELELE WA GWEDHWA PO
Ongiini to vulu okuninga omatokolo ngoka taga koleke ekwatathano lyoye naKalunga?
“Ninga omatokolo taga simanekitha Kalunga” (Oshungolangelo, 1 Apilili 2011)
Ilonga oshindji kombinga yankene Jehova he tu pe omayele.
Tala kutya iinima yini ya li ya kwathele omulumentu gumwe a ninge etokolo lya kwata miiti.
Ilonga oshindji kombinga yankene to vulu okunyanyudha Jehova, uuna inee ku pa elombwelo lyokondandalunde kutya ninga shike.
“Mbela otwa pumbwa aluhe elombwelo okuza mOmbiimbeli?” (Oshungolangelo, 1 Desemba 2003)
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
