WANGƆ 35

Ye mɛ lengbi ti zangɔ mɔ ya mɔ mu ekateli ti nzɔ̃ni nɛ?

E zu e ndo mu ekateli. Ambanga ekateli ni alengbi ti gbinyangbingɔ dungɔ lɛ ngɛ̃́ tɛ e, bere mangbi tɛ e na Yehova. Na ndakisa, elengbi ti mungɔ ekateli mɛ aba ndo mɛ e na dungɔ da, kwa mɛ e li ti nɛngɔ ya e kokisa na gwɛ̃ tɛ e, nga na ekateli ti lingɔ libala bere ngbãngɔ mɔdo. Se e mu ekateli ti nzɔ̃ni ko, ni na hɛ̃ngɔ e dungɔ lɛ ngɛ̃́ ti dengɔ bɛ, wa Yehova nga na sepalangɔ na e.

1. Ngasia la Ngbangɔ lengbi ti zangɔ e ya e mu ekateli ti nzɔ̃ni nɛ?

Uzu ti nɛngɔ ya mɔ mu ekateli kɔi ko, yɔ ka ti Yehova na lége ti sambela ya lo za mɔ, wa di nga Ngbangɔ ti nɛngɔ ya mɔ hĩnga dangɔ bɛ tɛ Yehova na ndo kpale niko. (Di Masese 2:3-6.) Na ya ambanga lo mɛndɛ̃, Yehova ndo hɛ̃ ndia mɛ yangondo. Se du ngaso, tɔndɔngɔ ndia niko la du nzɔ̃ ye mɛ ayɔ ya mɔ li.

Wa se ta Ngbangɔ hɛ̃ ndia mɛ yangondo na ndo lo mɛ mɔ ye lingɔ ni ma mɛ. Yehova na fangɔ mɔ na “lége mɛ mɔ lengbi ti dɔ̃ngɔ nɔ da.” (Yisaya 48:17) Ngasia? Andia ti ya Ngbangɔ (mitinda) alengbi ti zangɔ mɔ. Andia ti ya Ngbangɔ, adu bɛta tɛnɛ ti ngbondoni mɛ ndo fa se mɛ Yehova ndo ma na tɛrɛ lo nga na dangɔ bɛ mɛ lo na ni. Na ya angoi gba, e ndo hĩnga dangɔ bɛ mɛ Nzapa na ni na ngoi mɛ e di pandɛ kɔi kaya Ngbangɔ. Wa na ngoi mɛ e hĩnga dangɔ bɛ tɛ lo ko, elengbi ti mungɔ ekateli mɛ lo ndo sepala na ni.

2. Aye mɛ ayɔ ya mɔ bani uzu ti nɛngɔ ya mɔ mu ekateli nɛ?

Ngbangɔ tɛnɛ ya: “Zo mɛ na kpengba lɛ ndo ba ndo mɛ lo kpã gɛrɛ lo da.” (Masese 14:15) Ni fa ya, ayɔ ya zo binga li lo uzu ti nɛngɔ ya lo mu ekateli kɔi. Ti nɛngɔ ya mɔ mu ekateli ti nzɔ̃ni ko, hũnda tɛrɛ mɔ na ndo mɛ: ‘Ndia ti ya Ngbangɔ mɛ tɛnɛ tɛnɛ ti lo olo mɛ wa? Na ngoi mɛ mbi mu ekateli mɛ, mbi na dungɔ na siriri ti bɛ? Azi mɛndɛ̃ na hũngɔ ekateli ni ngasia? Omɛ aɔ zu du ya, ekateli mɛ mbi ga mu na hɛ̃ngɔ Yehova dengɔ bɛ?’—Kolimbola Mibeko 32:29.

Bo Yehova la lengbi ti fangɔ e na ye ti nzɔ̃ni nga na ti siɔni. Se e hĩnga ndia nga na andia ti ya Ngbangɔ ko, e na tingɔ na bingangɔ li ti nzɔ̃ni. Bingangɔ li du légɔ̃ kɔi mɛ ndo du kaya tɛrɛ zo, mɛ ndo pa hɛ̃ lo ye ti siɔni na ye ti nzɔ̃ni. (Roma 2:14, 15) Se e wa bingangɔ li tɛ e ko, e na mungɔ ekateli ti nzɔ̃ni.

GI HĨNGANGƆ LO MƐNDƐ̃

Gi hĩngangɔ se mɛ andia ti ya Ngbangɔ nga na bingangɔ li tɛ e alengbi ti zangɔ e ya e mu ekateli ti nzɔ̃ni.

3. Zia ya Ngbangɔ fa mɔ na lége

Ngasia la kpãngɔ andia ti ya Ngbangɔ na kwa lengbi ti zangɔ e ya e mu ekateli ti nzɔ̃ni nɛ? Ba VIDEO, wa na pɛni hɛ̃ gbinya ti ahũnda olo mɛ.

VIDEO: Tiká mitinda ya Biblia etambwisa yo (5:54)

Likoki ti pɔnangɔ lingɔ ye na se bɛ, alengbi na nɛ?
Nda mɛ Yehova hɛ̃ e likoki ti pɔnangɔ lingɔ ye na se bɛ e nɛ?
Ye mɛ Yehova hɛ̃ e ti nɛngɔ ya aza e, e salela likoki ti pɔnangɔ lingɔ ye na se bɛ e na ndenge ti nzɔ̃ni nɛ?

Ti nɛngɔ ya mɔ hũ ndakisa ti ndia ti ya Ngbangɔ kɔi ko, di Efɛzɛ 5:15, 16. Li kpengbani ya mɔ ‘salela ngoi tɛ mɔ’ na ndenge ti nzɔ̃ni ti nɛngɔ ya . . .

mɔ di Ngbangɔ bí kɔi kɔi.
mɔ ti kɔ wali bere ya kɔli ti nzɔ̃ni, nzɔ̃ to nzɔ̃ ta, bere nzɔ̃ nyingambi
mɔ ndo gwe bombi zu.

4. Ti nɛngɔ ya mɔ mu ekateli ti nzɔ̃ni ko, ayɔ ya mɔ wa bingangɔ li tɛ mɔ

A ndo du woni mungɔ ekateli na ndo lo mɛ Ngbangɔ hɛ̃ ndia ni yangondo. Wa se ta Ngbangɔ hɛ̃ ndia ti yangondo ma mɛ? Ba VIDEO, wa na pɛni hɛ̃ gbinya ti ahũnda olo mɛ.

VIDEO: “Batelá lisosoli na yo malamu” (5:13)

Na ya video mɛ, aye mɛ wali kɔi li ti nɛngɔ ya lo wa bingangɔ li tɛ lo wa lo mu ekateli mɛ Yehova ndo sepala na ni nɛ?

Nda mɛ ta elengbi ti yɔngɔ ka ti azi mɛndɛ̃ ya ala mu ekateli hɛ̃ e ma nɛ? Di Aebreo 5:14, wa na pɛni hɛ̃ gbinya ti ahũnda olo mɛ:

Abɛse du ya ta hũndangɔ dangɔ bɛ tɛ azi mɛndɛ̃ du siɔni ma, e nvɛ̃ni elengbi ti dungɔ na likoki ti lingɔ nɛ?
Ye mɛ e na ni, mɛ alengbi ti zangɔ e ya e wa bingangɔ li tɛ e ti nɛngɔ ya aza e, wa e mu ekateli ti nzɔ̃ni nɛ?

Nga ma se mɛ kartɛ ndo fa zo na ndo ko, bingangɔ li tɛ e ndo za e ti nɛngɔ ya e mu ekateli ti nzɔ̃ni

5. Tɔndɔ bingangɔ li tɛ azi mɛndɛ̃

Ta e zu e ndo mu ekateli kwɛ kɔi ma. Ngasia la elengbi ti fangɔ ya e ndo tɔndɔ bingangɔ li tɛ azi mɛndɛ nɛ? E ba na ya alo sɛ:

Ti 1: Nyita wali kɔi ndo sepala yungɔ patalɔ̃ na ngoi mɛ lo ndo li kwa tɛ lo ti ya da bere na ngoi mɛ lo ndoni kɔi na afɔ̃ lo. Yungɔ bɔngɔ ti ngaso ndo gia bingangɔ li tɛ ayata ti ya bombi tɛ lo ti fãnani.

Di Roma 15:1 nga na 1 kɔrinto 10:23, 24, wa na pɛni hɛ̃ gbinya ti ahũnda olo mɛ:

Se lo kpã avɛrsɛ mɛ na kwa, ekateli mɛ lo lengbi ti mungɔ nɛ? Se du ya mɔ du ndoni kɔi na nyita kɔi mɛ lo ndo hũ siɔni ye mɛ bingangɔ li tɛ mɔ hɛ̃ mɔ lége ya mɔ li, ye mɛ mɔ na lingɔ nɛ?

Ti 2: Abɛse du ya ta Ngbangɔ gbanzi nyɔ̃ngɔ samba ma ko, ta nyita kɔli kɔi ndo nyɔ̃ samba ma, kanda a ili lo ka fɛtɛ kɔi. Ngoi mɛ lo gwe fɛtɛ niko, lo tã Atɛmwɛ tɛ Yehova mɛndɛ̃ ndo nyɔ̃ samba.

Di Mosakoli 7:16 nga na Roma 14:1, 10, wa na pɛni hɛ̃ gbinya ti ahũnda olo mɛ:

Se lo kpã avɛrsɛ mɛ na kwa, ekateli mɛ lo lengbi ti mungɔ nɛ? Ye mɛ mɔ li se zo kɔi ndo li ye mɛ ta bingangɔ li tɛ mɔ hɛ̃ mɔ lége ya mɔ li ni ma nɛ?

Aye mɛ ayɔ ya mɔ li ti nɛngɔ ya mɔ mu ekateli ti nzɔ̃ni nɛ?

1. Yɔ ka ti Yehova ya, lo za mɔ ti nɛngɔ ya mɔ mu ekateli ti nzɔ̃ni.—Zaki 1:5.

2. Li bolukiluki kaya Ngbangɔ nga na ambɛti mɛndɛ̃ ti nɛngɔ ya, mɔ mu ekateli ti nzɔ̃ni mɛ a mangbi na kpale tɛ mɔ. Mɔ lengbi nga ti gingɔ wangɔ ka tɛ nyita kɔi mɛ kpengbani na ya nyingɔ.