FAMAHAʼÖ 35
Lala ba Wangai Angetula si Sökhi
Fefu ita moguna tahalö gangetula. So lua-lua gangetula nihalöda ba waʼaurida hegöi ba wahuwusada khö Yehowa. Duma-dumania, moguna tahalö gangetula hezo toröi ita, hewisa wangalui soguna khöda ba hadia omasi ita mangowalu mazui löʼö. Na tahalö gangetula si sökhi, ohahau dödöda ba omuso dödö Yehowa.
1. Hewisa wangogunaʼömö Sura Niʼamoniʼö ba wangai angetula si sökhi?
Fatua lö öhalö gangetula, andrö wanolo moroi khö Yehowa ba fareso ayati Zura Niʼamoniʼö sangoromaʼö hewisa dödö Yehowa ba gangetula nihalömö andrö. (Baso Gamaedola 2:3-6.) Itaria ibeʼe khöda wanuturu lala Yehowa salio aboto ba dödöda. Ba na öʼoʼö wanuturu lala nibeʼenia andrö, hasambalö ösöndra waʼomuso dödö.
Hizaʼi, hewisa na so wanuturu lala moroi ba Zura Niʼamoniʼö si lö aboto sibai ba dödöda? Törö tödöu wa Yehowa ’zameʼe khöu fanuturu lala ba döröwau’. (Yesaya 48:17) Hewisa lalania? Ba Zura Niʼamoniʼö, so goi-goi si tola manolo yaʼugö. Goi-goi si so ba Zura Niʼamoniʼö, daʼö dane-dane sindruhu sangoromaʼö lala wangera-ngera Yehowa hegöi nirasoinia ba ngawalö hadia ia. Si toʼölönia, na tabaso waö-waö salua ba Zura Niʼamoniʼö, ba daʼö taʼila hewisa dödö Lowalangi. Na taʼila hewisa dödö Yehowa ba daʼö, tola tahalö gangetula si sökhi si möi fangomuso dödönia.
2. Hadia manö zinangea öʼangeragö fatua lö öhalö gangetula?
Imane Sura Niʼamoniʼö, ”Niha satua-tua ihaogö ifatimbaisi mbekania.” (Amaedola 14:15) Eluahania, fatua lö tahalö gangetula, moguna taʼangeragö hadia zinangea tafalua. Ba ginötö öʼangeragö hadia zinangea öfalua, sofu khöu samösa: ’Hadia goi-goi Zura Niʼamoniʼö sanandrösa ba daʼa? Hadia möi fangomuso dödögu gangetula nihalögu andre dania? Hadia lua-lua gangetula nihalögu andre ba niha böʼö? Sabölö mogunania, hadia möi fangomuso dödö Yehowa gangetulagu andre?’—5 Moze 32:29.
Ha Yehowa zinangea motatugöi hadia zi sökhi ba si lö sökhi. Moguna aboto ba dödöda goroisa Yehowa awö goi-goinia, ba tahalö gangetula wamalua daʼö ba waʼaurida. Na tafalua daʼö, no taʼokhögö dödö side-ide si no tefomaha ba wangai angetula. Tödö side-ide yaʼia daʼö tödö sameʼe khöda famangelama hadia zatulö ba hadia zi fasala. (Roma 2:14, 15) Na no tefomaha dödöda side-ide, tola tahalö gangetula si sökhi.
ODÖDÖGÖ NASA WANGALUI
Tatutunö dania hewisa goi-goi Zura Niʼamoniʼö hegöi tödöda side-ide, tola möi fanolo khöda ba wangai angetula si sökhi.
3. Oʼö wanuturu lala moroi ba Zura Niʼamoniʼö
Hewisa goi-goi Zura Niʼamoniʼö möi fanuturu lala khöda ba wangai angetula? Futa VIDEO, ba beʼe wanema li ba wanofu-nofu daʼa:
-
Hadia mbuala nibeʼe Yehowa khöda?
-
Hana wa itehegö khöda Yehowa ba wangai angetula?
-
Hadia niʼamualagö Yehowa khöda enaʼö sökhi gangetula nihalöda?
Enaʼö öʼila sambua goi-goi Zura Niʼamoniʼö, baso Efeso 5:15, 16. Aefa daʼö, tutunö hewisa enaʼö öʼila ’öhaogö wangogunaʼö inötö’ irege tola . . .
-
öbaso Zura Niʼamoniʼö ero maʼökhö.
-
tobali ndraʼugö foʼomo si sökhi, satua mazui iraono si sökhi amuata.
-
öʼondrasi gangowuloa.
4. Fahaʼö dödöu side-ide ba wangai angetula si sökhi
Na so wanuturu lala salio aboto ba dödöda moroi ba Zura Niʼamoniʼö, tola manö aoha khöda wangai angetula si sökhi. Hizaʼi, hewisa na ambö aboto ba dödöda wanuturu lala nibeʼenia? Futa VIDEO, ba beʼe wanema li ba wanofu daʼa:
-
Ba video andrö mege, hadia manö nifalua zi samösa talifusöda ira alawe ba wamahaʼö tödönia side-ide hegöi ba wangai angetula sangomusoiʼö tödö Yehowa?
Hana wa tebai tawaʼö ba niha böʼö enaʼö yaʼira zangai angetula khöda? Baso Heberaiʼo 5:14, ba beʼe wanema li ba wanofu-nofu daʼa:
-
Te abölö aoha na taʼandrö ba niha böʼö enaʼö yaʼira zangai angetula khöda. Hizaʼi sindruhunia, hadia zinangea tafalua samösa?
-
Hadia manö zi no tehenaigö sanolo yaʼugö ba wamahaʼö tödömö side-ide hegöi ba wangai angetula si sökhi?
Hulö simane peta, tola itolo ita tödöda side-ide ba wangai angetula hezo lala sinangea tatörö ba waʼauri andre
5. Osinangegö dödö side-ide niʼokhögö niha böʼö
Faböʼö-böʼö gangetula nihalö niha ero samösa. Hewisa enaʼö tola taʼosinangegö dödö side-ide niha böʼö? Faigi zalua si dombua andre:
Salua 1: Samösa dalifusöda ira alawe samake nukha si toʼölö ba mbanuara, findra ia ba mbanua niha Keriso tanö böʼö. Ira talifusöda ira alawe si so ba mbanua niha Keriso andrö, fatuwu ira na so dalifusöda samake nukha simane daʼö.
Baso Roma 15:1 hegöi 1 Korindro 10:23, 24, ba beʼe wanema li ba wanofu-nofu daʼa:
-
Na iʼoʼö mene-mene si so ba ayati no mege, hadia gangetula nihalö dalifusöda ira alawe andrö? Hewisa na so nifaluamö, fatema daʼö ba dödöu side-ide hizaʼi te lö fatema ba dödö ndra talifusöda si fao khömö, hadia zinangea öfalua?
Salua 2: So samösa dalifusöda ira matua, aboto ba dödönia wa lö itegu ita Sura Niʼamoniʼö ba wamadu tuo. Hizaʼi, ihalö gangetula wa lö ibadu duo. Samuza maʼökhö, lakaoni ia ba walöwa ba iʼila ndra talifusöda samadu tuo.
Baso Zangombakha 7:16 hegöi Roma 14:1, 10, ba beʼe wanema li ba wanofu-nofu daʼa:
-
Na öʼoʼö mene-mene si so ba ayati no mege, hadia gangetula nihalömö? Hewisa na so zi lö omasiʼö öfalua börö me lö fatema daʼö ba dödöu side-ide, hizaʼi lafalua daʼö niha böʼö, hadia zinangea öfalua?
Hewisa enaʼö tola öhalö gangetula si sökhi?
1. Andrö khö Yehowa enaʼö itolo ndraʼugö ba wangai angetula.—Yakobo 1:5.
2. Falua riset moroi ba Zura Niʼamoniʼö hegöi publikasi si teʼodane-dane moroi ba Zura Niʼamoniʼö, enaʼö öʼila goi-goi sinangea öfalua. Tola öʼandrö wanuturu lala khö ndra talifusöda niha Keriso si no toʼölö ba wangai angetula.
3. Angeragö hadia lua-lua gangetula nihalömö andrö ba dödöu side-ide hegöi ba niha böʼö.
SO ZANGUMAʼÖ: ”Tola tafalua fefu zomasi-masi dödöda. Lö moguna taʼangeragö hewisa dödö niha böʼö.”
-
Hana wa moguna taʼangeragö hewisa dödö Lowalangi ba hewisa göi dödö niha böʼö?
RAHU-RAHU WAMAHAʼÖ
Enaʼö tola tahalö gangetula si sökhi, moguna taʼila hewisa dödö Yehowa ba gangetula nihalöda andrö. Moguna göi taʼangeragö hadia so gunania ba niha böʼö gangetula nihalöda andrö mazui möi famaʼalara.
Hadia Wamahaʼö si Tola Öhalö?
-
Hewisa enaʼö möi fangomuso dödö Yehowa gangetula nihalöu?
-
Hewisa wamahaʼöu tödöu side-ide?
-
Hewisa wangoromaʼöu wa öʼangeragö dödö side-ide niʼokhögö niha böʼö?
ALUI NASA DANÖ BÖʼÖ
Hewisa enaʼö möi fangaro wahuwusamö khö Yehowa gangetula nihalöu?
”Halö Gangetula Sangomusoiʼö Tödö Lowalangi” (Menara Pengawal, 15 Mbaŵa si Öfa 2011)
Hadia nifalua Yehowa ba wameʼe khöda mene-mene?
Hadia zanolo si samösa ira matua irege tola ihalö gangetula si tefaudu hewaʼae abua?
Fahaʼö ndraʼugö ba wangai angetula sangomusoiʼö tödö Yehowa, hewaʼae na lö hadöi fanuturu lala si tefaudu sanandrösa ba daʼö.
”Hadia Lö Tebulö Moguna Khöu Nifakhoi Zura Niʼamoniʼö?” (Menara Pengawal, 1 Mbaŵa si Felendrua 2003)
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
