FAKAAKOAGA 35
Puhala ke Taute e Tau Fifiliaga Mitaki
Igatia oti a tautolu mo e tau fifiliaga ke taute. Loga e tau fifiliaga nei kua lauia lahi a tautolu mo e ha tautolu a fakafetuiaga mo Iehova. Ma e fakatai, liga lata a tautolu ke fifili e matakavi ke nofo ai, puhala ke leveki fakatupe aki a tautolu, po ke faitaane mo e faihoana. Ka taute e tautolu e tau fifiliaga mitaki, to fiafia e moui mo e fakafiafia a Iehova.
1. Fakaaoga fēfē e koe e Tohi Tapu ke lagomatai a koe ke taute e tau fifiliaga mitaki?
Ato taute e fifiliaga, liogi ma e lagomatai ha Iehova ti kumikumi ke he Tohi Tapu ke kitia e onoonoaga haana ke he matakupu. (Totou Tau Fakatai 2:3-6.) He falu tuaga, foaki e Iehova e poakiaga maaliali. Ka fifili ke omaoma e poakiaga ia kua mitaki lahi ke taute e koe.
Ka e kua ka nakai fai poakiaga maaliali e Tohi Tapu ke he mena ke taute e koe? To takitaki agaia e Iehova a koe “ke he puhala ke fano ai a koe.” (Isaia 48:17) Fēfē? Ha ha i ai e tau matapatu fakaakoaga ka takitaki a koe. Ko e tau matapatu fakaakoaga he Tohi Tapu ko e tau kupu mooli kua fakakite e tau manatu mo e tau logonaaga he Atua. Iloa tumau e tautolu hagaao ke he logonaaga he Atua ke he matakupu ka totou e tautolu e tala i loto he Tohi Tapu. Ka iloa e tautolu e logonaaga ha Iehova, taute e tautolu e tau fifiliaga kua fakafiafia a ia.
2. Ko e heigoa e tau mena kua lata a koe ke manamanatu ki ai ato taute e fifiliaga?
Pehē e Tohi Tapu: “Ko e tagata lotomatala, kua manamanatu a ia ke he hana tau puhala.” (Tau Fakatai 14:15) Kakano ai ato taute e fifiliaga, lata a tautolu ke fai magaaho ke manamanatu ke he tau fifiliaga ha tautolu. He hakahaka e koe e tau manatu takitaha, hūhū hifo: ‘Ko e heigoa e tau matapatu fakaakoaga he Tohi Tapu kua felauaki? Ha fe e fifiliaga kua foaki ki a au e mafola he manamanatuaga? Lauia fēfē e falu he fifiliaga haaku? Mua atu ai, to fakafiafia nakai he fifiliaga haaku a Iehova?’—Teutaronome 32:29.
Tonuhia a Iehova ke tala mai ki a tautolu e mena kua mitaki mo e kelea. Ka mahani a tautolu mo e tau matafakatufono mo e tau matapatu fakaakoaga haana mo e eketaha ke mumuitua ki ai, kua feaki e tautolu e loto manamanatu mitaki. Ko e loto manamanatu ha tautolu ko e fakatonuaga he loto ke he mena hako mo e hepe. (Roma 2:14, 15) Ko e loto manamanatu kua fakamahani ka lagomatai a tautolu ke taute e tau fifiliaga mitaki.
KUMIKUMI FAKAHOKULO
Onoono fakamitaki ke he tau matapatu fakaakoaga he Tohi Tapu mo e loto manamanatu kua lagomatai ke taute e fifiliaga.
3. Fakaatā e Tohi Tapu ke takitaki a koe
Maeke fēfē e tau matapatu fakaakoaga he Tohi Tapu ke lagomatai a tautolu ka taute e tau fifiliaga? Tā e VITIŌ, ti tutala ke he tau hūhū nā.
-
Ko e heigoa e atāina ke fifili?
-
Ko e ha ne foaki e Iehova ki a tautolu e atāina ke fifili?
-
Ko e heigoa e puhala mitaki lahi kua foaki e ia ke lagomatai a tautolu ke fakaaoga e atāina ke fifili?
Ke kitia e fakataiaga he matapatu fakaakoaga he Tohi Tapu, totou Efeso 5:15, 16. Ti tutala ke he puhala ka ‘fakaaoga e koe e tau magaaho’ ke . . .
-
totou tumau e Tohi Tapu.
-
eke mo hoa mau, matua, tama taane, po ke tama fifine mitaki.
-
o atu ke he tau fakapotopotoaga.
4. Fakamahani e loto manamanatu haau ke taute e tau fifiliaga mitaki
Ka kitia maali e poakiaga he Tohi Tapu ke he matakupu, liga mukamuka e fifiliaga hako. Ka e kua ka nakai fai poakiaga pihia? Tā e VITIŌ, ti tutala ke he hūhū nā.
-
He vitiō, ko e heigoa e tau lakaaga ne taute he matakainaga fifine ke fakamahani e loto manamanatu mo e taute e fifiliaga kua fakafiafia a Iehova?
Ko e ha kua nakai lata a tautolu ke ole ke he falu ke taute e tau fifiliaga ne kua lata ke taute e tautolu? Totou Heperu 5:14, ti tutala ke he tau hūhū nei:
-
Liga mukamuka lahi ke ole ke he falu ke taute e tau fifiliaga ma tautolu, ko e heigoa kua lata ke mailoga ni e tautolu?
-
Ko e heigoa kua ha ha i ai ka lagomatai a koe ke feaki e loto manamanatu mo e taute e tau fifiliaga mitaki?
Tuga e mepe, ko e loto manamanatu kua lagomatai a tautolu ke fifili e fanoaga he moui
5. Fakalilifu e loto manamanatu he falu
To taute he tau tagata e tau fifiliaga kehekehe. Fakalilifu fēfē e tautolu e tau loto manamanatu he falu? Fakatutala ke he ua e tuaga:
Tuaga 1: Ko e matakainaga fifine ne fiafia ke fakaaoga e tau valivali mata, ne hiki atu ke he fakapotopotoaga ne tokologa e matakainaga fifine ne tupetupe ka kitia falu he fakaaoga ai.
Totou Roma 15:1 mo e 1 Korinito 10:23, 24, ti tutala ke he tau hūhū nei:
-
Fakavē ke he tau kupu tohi nei, ko e heigoa ka fifili he matakainaga fifine ia? Ko e heigoa haau ka taute kaeke ko koe mo e tagata kua fakataputapu ke taute e mena kua atāina e loto manamanatu haau ke taute?
Tuaga 2: Ko e matakainaga taane ne iloa kua nakai pā malu he Tohi Tapu e inu fakalatalata he kava, ka e fifili a ia ke nakai inu. Uiina a ia ke he fakafiafiaaga ne kitia e tau matakainaga taane ne inu kava.
Totou Fakamatalaaga 7:16 mo e Roma 14:1, 10, ti tutala ke he tau hūhū nei:
-
Fakavē ke he tau kupu tohi nei, ko e heigoa ka fifili he matakainaga taane ia? Ko e heigoa haau ka taute ka kitia e koe e taha tagata kua taute e mena ne nakai felauaki mo e loto manamanatu haau?
Ko e heigoa e tau lakaaga kua takitaki ke he tau fifiliaga mitaki?
1. Ole ki a Iehova ke lagomatai a koe ke fifili e mena ke taute.—Iakopo 1:5.
2. Kumikumi ke he Tohi Tapu mo e tau tohi ne fakavē ke he Tohi Tapu ke moua e tau matapatu fakaakoaga kua latatonu. Maeke foki a koe ke tutala ke he tau Kerisiano malolō fakaagaaga.
3. Manamanatu ke he lauiaaga he fifiliaga haau ke he loto manamanatu haau mo e loto manamanatu he falu.
PEHĒ FALU TAGATA: “Tonuhia a koe ke taute e mena ne loto a koe ki ai. Ua tupetupe ke he logonaaga he falu tagata.”
-
Ko e ha kua lata ke manamanatu ke he logonaaga he Atua mo e falu tagata?
MANATU KATOA
Taute e tautolu e tau fifiliaga mitaki ka iloa e logonaaga ha Iehova ke he matakupu ti manamanatu to lagomatai nakai he tau gahua ha tautolu e falu po ke fakamamahi ki a lautolu.
Liu Fakamanatu
-
Taute fēfē e koe e tau fifiliaga ne fakafiafia a Iehova?
-
Fakamahani fēfē e koe e loto manamanatu haau?
-
Fakalilifu fēfē e koe e loto manamanatu he falu tagata?
KUMI FOKI
Taute fēfē e koe e tau fifiliaga kua fakamalolō e fakafetuiaga haau mo e Atua?
“Taute e Tau Fifiliaga kua Fakaheke e Atua” (Ko e Kolo Toko, Aperila 15, 2011)
Fakahokulo e maamaaga haau ke he puhala kua foaki mai e Iehova e fakatonuaga.
Kitia e tau puhala kua lagomatai e taha tagata ke taute e fifiliaga uka.
Fakaako foki e puhala ke fakafiafia a Iehova ka nakai foaki e ia e fakatonuaga pauaki ke he matakupu.
“Lata Tumau Kia a Koe mo e Poakiaga he Tohi Tapu?” (Vala tala he Kolo Toko)
Liga Manako Foki a Koe
TAU HŪHŪ MAHANI MAU
Ko e Heigoa e Fakaakoaga Tohi Tapu ne Foaki he Tau Fakamoli a Iehova?
He fakaholoaga fetutalaaki ne foaki he Tau Fakamoli a Iehova kua nakai totogi, maeke a koe ke fakaaoga ha Tohi Tapu. Atāina ke uiina e magafaoa katoa po ke tau kapitiga ke fakalataha mo koe.
