LÉZIʼI 35
Ngouo pégé gʉo lékô ta mbi méndésiziông mboŋo?
Pégé métsém néŋé mbi méndésiziông. Ngouo lélʉo méndésiziông mié pégé pi gwiée mépiŋé tépong na pégé mboo na ntémté yié pégé gwiée né Jéova. Éfʉʼ ée ngié, ngouo pégé tsôʼô jʉʼ yié pégé gé tsuié wo, ntsôʼô faʼ yié pégé gé wôg, ka ntsôʼ po gning wuié pégé gé zôʼô yé wôô. Pégé lôôn ntsôʼ méndésiziông mboŋo atsèe wégé léwô, mba ngouo yèe gʉo pégé jouʼ mboŋo mbing ngʉo létʉm Jéova kag nti wégé.
1. Ngouo Biible kuiété wégé lé pi méndésiziông mboŋo lékô?
O lôôn gé pi ndésiziông, o vôg ngʉo préya mbwo Jéova ngié a kuiété wou, mbing yousé Biible lé lôg ngiè nti yié Jéova giè yé yèe no pouʼou (toŋo Provèebe 2:3-6). Aa tso fʉʼ, Jéova na mémbʉʉ na tso choum. Aa fouʼou lé pii ndésiziông mboŋo a wo lé yiŋé pa lépʉʉ sié Jéova naa.
Tso no lôôn mbing nthié, Biible té chouŋo wou mmo yié o gé gʉo wô, mba ngouo Jéova tségé wou na «manzsé wuié o gwiée lé yiŋé mmo» (Ésaya 48:17). Biible gwiée mémbʉʉ mié ngouo é tségé wou. Métchʉo mbʉʉ Biible ée métʉnzuing no nénʉ mié é gnièe mmo yié Ssé kouang, ka nti yié a jououʼ pouʼou wôô. O né nziʼi Biible péʼé, ngia nti yié a lôg nkièʼté no na méno ta ngiôôn. Pégé vôg ta nzsé mmo yié Jéova kouang péʼé, mba ngouo pégé pi méndésiziông mié é poŋo yé.
2. O lôôn ngé pii taʼ ndésiziông o vôg ntsigé no na kô?
Biible gôôn ngié: «Gning wuié a gwiée léghié a tsaasé jʉʼ yié a tʉôgô kwo yé wo» (Provèebe 14:15). Ayôôn lôgô gôôn ngié, o lôôn ngouaa pii taʼ ndésiziông, o vôg mbii tam ndôg nkouaŋa no moo. O lôôn mvôg ta ntsaasé nti yié ngouo o gʉo, o zaté two mboum jou ngié: «Ée mèe métchʉo mbʉʉ Biible mié é gôôn no na yôôn no? Ta méng n dôôn tsôʼô wèe manzsé, mba méng gé gwiée suiété létʉm? Ta ndésiziông yié méng ngée mbii gé gégé tso pʉa kéen? Ayié a pou ngouo tʉnzuing aa ngié, ta ndésiziông yôôn gé poŋo Jéova?» (Détéronôm 32:29).
Jéova zo kouʼou lé chouŋo wégé mmo yié a pong po yié a té pong. Pégé lôôn nziʼi lé zsé méloua mé laa mékômangdémang mé, mbing chana lé yiŋé moo, mba yèe gé gʉo pégé tchouŋo ntségé conciencé yégé na nti yé mboŋo. Conciencé aa tso mmo yié aa na pégé, échouŋo wégé mmo mboŋo po yé tépong (Roma 2:14, 15). Pégé lôôn ntchouŋo ntségé conciencé yégé, mba a gé kuiété wégé lé pi méndésiziông mboŋo.
YING NKUIʼI NZIʼI
Kuiʼi ngiè mmo yié aa tʉnzuing na métchʉo mbʉʉ Biible po faʼ yié conciencé gwiée afʉʼ yié mé gée mbii taʼ ndésiziông.
3. Gnié Biible tségé wou
Ngouo métchʉo mbʉʉ Biible kuiété wégé lé pi méndésiziông mboŋo lékô? Tsôʼô VIDÉO, mbing ngôôn no na ménzaté mié ée mvfo.
-
Mé gôôn lékoung koung ntsôʼ, ngôôn kô?
-
No kô Jéova la naa lékoung koung ntsôʼ mbwo pʉa mésong?
-
Aa kô yié Jéova la naa mbwo pégé lé lôg ntchouŋo yousé lékoung koung ntsôʼ wuié a la na né pégé?
Toŋo Éféso 5:15, 16. Ménkang ŋwaʼné môôn gwiée wôôn kômangdémang: «Pi zsé lé zuièʼ mélièʼè laʼ mié Ssé naa mbwo pi.» Ngouo o gʉo lékô ta ngiŋé moo . . .
-
ta ndôg ntoŋo Biible fʉʼ ntsém?
-
ta ndôg njouou tam pi nzuié wou ka ndoum wou ngʉo pénkʉ wôô, ka méta pou wôô néŋé?
-
ta ndôg nkou métchouʼté?
4. Tchouŋo ntségé ngouaalém jou ndôg mbi méndésiziông mboŋo
A zéŋé lé pi ndésiziông fʉʼ yié Biible na mémbʉʉ mié é lié tso no. Tso no lôôn mbing nthié, lépʉʉ té gôôn no moo wô la? Tsôʼô VIDÉO, mbing ngôôn no na ménzaté mié ée mvfo.
-
Aa tsèe vidéo, mba Ema la gʉo lékô ta ntségé ngouaalém yé lé lôg mbi ndésiziông yié é poŋo Jéova?
No kô pégé té gwiée lé gôôn né pétso pʉa ngié po pii ndésiziông na yégé jʉʼ wô? Toŋo Héber 5:14, mbing ngôôn no na môôn ménzaté:
-
Mboo paʼ a zéŋé lé zaté pétso pʉa mmo yié po koo yié ngouo po gʉo na yégé jʉʼ, pégé lé two mboum yégé gwiée lé kouʼou lé gʉo kô?
-
Ée sèe choum lôg ngʉo méréchèeché mié ngouo é kuiété wégé lé tchouŋo tségé ngoualém yégé ta ndôg mbi méndésiziông mboŋo?
Ngouaaléem aa paʼ taʼ carte wuié a kuiété wégé lé zsé manzsé wégé.
5. Na mékouʼ ngouaaléem wé pétso pʉa
Pʉa métsém té pi méndésiziông mié é suié wô. Ngouo pége gʉo lékô ta ngniè ngié pégé na mékouʼ ngouaalém pétso pʉa? Pégé giè méfʉʼ mémbʉa:
Mvôg mvfo fʉʼ: Taʼ Sista kouŋo lé jʉôgô pantalon ta ndôg ngouôg méfaʼ mé, ka ndôg ngʉa ngia méchou pé wôô. Yèe nti lémaʼ nzsoo née ngégé mésista nda tchouʼté yié a ka gniée ta ntoo wo.
Toŋo Roma 15:1 po 1 Korénto 10:23, 24, mbing ngôôn no na môôn ménzaté:
-
Wôôn fa wé manzuié lôôn gé yiŋé na môôn ménkang ŋwaʼné, mba ngouo a chan lé gʉo lékô? O lôôn ngouo tso lièʼ pi laa tso pʉa wo, po té koung tso choum sié o koung wô, mba ngouo o chana lé gʉo lékô?
Éfʉʼ mbôônté yépʉa: Mboo Biible té tôʼô wégé lé nou mélouʼ wô, tsoo fè chaan lé kouʼté mboum yé na lénouou mélouʼ. Mé ping ngouou yé tso linôôn lôg nkièʼté nnè, a too wô ngiè paʼ yié tso Pakuié Ntang Jéova né nnouou mélouʼ.
Toŋo Ékléziaste 7:16 po Roma 14:1, 10, mbing ngôôn no na môôn ménzaté:
-
Fa ma lôôn né nkouŋo lé yiŋé na môôn ménkang ŋwaʼné, mba ngouo a gʉo lékô? O lôôn ngouo tso lièʼ ngiè gning gʉo mmo yié ngouaalém jou tôʼôô wou lé gʉo, mba ngouo o kuié yèe no lékô?
Choum sié ngouo é kuiété wou lé pi ndésiziông mboŋo
1. Gʉo préya ngié Jéova kuiété wou (Jag 1:5).
2. Gʉo méréchèeché tsèe Biible laa méŋwaʼné mié tchouʼté na, ndôg nzsé métchʉo mbʉʉ mié é zèté. Ngouo o ying ndouô nkuiété mbwo Mékréeté pié é giè no na chʉo.
3. Tsig mépiŋé mié ngouo méndésiziông mou gwiée na wou mboo na pétso pʉa.
TSO PɄA GÔÔN NGIÉ: «Ammo yié tso pʉa kouang té né ndié wôôn môô. Méng gʉo yôôn po mmo yié n koung.»
-
Pégé gwiée lé zsé nti yié Jéova jououʼ pouʼou, mboo nti yié pétso pʉa jouʼ yôb pouʼou nti kô?
TA O ZIʼII KÔ?
Pégé lôôn ngé mbi méndésiziông mboŋo, mba a zèté ngié pégé zsé mmo yié Jéova kouang nti yèe no, mbing ntsigé no na mépiŋé mboŋo laa mé tépong mié é gé gwiée na pétso pʉa.
Ta o né nkimté?
-
Ngouo o gʉo lékô ta mbi méndésiziông mié é poŋo Jéova?
-
Ngouo o gʉo lékô ta ntségé ngouaalém jou mboŋo?
-
Ngouo o gʉo lékô ta ngniè ngié o na mékouʼ na ngouaalém pétso pʉa?
KUIʼI FAʼ
Ngouo o gʉo lékô ta mbi méndésiziông mié ngouo é kuiété wou lé kuiʼi nto né léjʉng Ssé?
« Prenons des décisions qui honorent Dieu » (La Tour de Garde, 15 avril 2011)
Ménti ta ngiôôn mié Jéova lôg ntʉôgté wégé ée mée?
Ammo yié a la kuiété tsoo ngouachoum lé pi tsoo ndésiziông yié é tʉ tèʼ.
Ngouo o gʉo lékô ta mbi ndésiziông mboŋo mboo paʼ yié no lôôn nthié ssé yié Biible té gôôn no moo wôô.
« Vous faut-il un commandement pour tout ? » (La Tour de Garde, 1er décembre 2003)
