MUTU 35
Mwatingapangile Zosankha Mwanzelu
Tonse tupanga zosankha pa umoyo wasu. Zosankha zinyinji zatupanga zukhuza umoyo wasu na ushamwali wasu na Yehova. Mwacisanzo, tingafunike kupanga cosankha cokhuza kwati tikonkhala na mwati tikopezela ndalama zozicilikizila pa umoyo. Tingafunike soti kupanga cosankha cakuti kaya tikwatile kapena yai. Ngati tupanga zosankha mwanzelu, tunkhala na umoyo wacimwemwe ndipo tukondwelesha Yehova.
1. Kansi Baibo ingakuyavyeni tyani kupanga zosankha mwanzelu?
Mukaliyopanga cosankha, mufunika kupemphela kwa Yehova nofufuza mfundo za m’Baibo. (Ŵelengani Miyambo 2:3-6.) Nthawi ziyakine, Yehova angatipase lamulo yacindunji. Ngati n’tetyo, tufunika kusankha kumvwila lamulo yamene iyo. Tikacita izi, ndiye kuti tapanga cosankha cabwino ngako.
Koma nanga tyani ngati paliye lamulo yacindunji yokuuzhyani zamufunika kucita? Yehova angakusogoleleni mphela “m’njila yamufunika kuyendamo.” (Yesaya 48:17) Angakusogoleleni poseŵenzesha mfundo za m’Baibo. Mfundo za m’Baibo ndiye zingakuyavyeni kuziŵa maganizo a Mulungu. Nthawi zinyinji, tingaziŵe maganizo a Mulungu tikaŵelenga nkhani iyakine m’Baibo. Tikazindikila mwakumvwila Yehova, tupanga zosankha zomukondwelesha.
2. Ni zinthu zotyani zamufunika kuganizila mukaliyopanga cosankha?
Baibo yukamba kuti: “Wocenjela oganizila mwakuyendela.” (Miyambo 14:15) Izi zutanthauza kuti tikaliyopanga cosankha, tufunika kuganizila za vofumapo vake. Poganizila za cosankha ciliconse camufuna kupanga, mungacite bwino kuzikonsha kuti: ‘Ni mfundo zotyani za m’Baibo zaningaseŵenzeshe? Ni cosankha cotyani cinganipase mtendele wa m’maganizo? Kansi cosankha cangu cikhuze tyani ŵanthu ayakine?’ Ndipo konsho yofunika ngako ni yakuti, ‘Kansi cosankha cangu cikondweleshe Yehova?’—Deuteronomo 32:29.
Yehova ali na ufulu wotiuzhya cabwino na ciipa. Tikaziŵa bwino malamulo na mfundo zake, nonkhala ofunishisha kuzikonkha, ndiye kuti tuphunzisa cikumbumtima casu. Cikumbumtima ni umunthu wasu wamkati wamene utiuzhya coyenela na cosayenela. (Aroma 2:14, 15) Cikumbumtima cophunzisiwa bwino cingatiyavye kupanga zosankha mwanzelu.
PHUNZILANI ZINYINJI
Onani mwamene mfundo za m’Baibo na cikumbumtima casu zingatiyavyile kupanga zosankha mwanzelu.
3. Lolani Baibo kukusogolelani
Kansi mfundo za m’Baibo zingatisogolele tyani popanga zosankha? Onelelani VIDYO, nokambilana makonsho okonkhapo.
-
Kansi Mulungu etipasa mphaso yanji yamtengo wapatali?
-
Ndaŵa yanji Yehova etipasa ufulu wopanga seka zosankha?
-
N’cinji cawatipasa Yehova camene cingatiyavye kupanga zosankha mwanzelu?
Kuti muone cisanzo cimozi ca mfundo ya m’Baibo, ŵelengani Aefeso 5:15, 16. Pavuli pake, kambilanani ‘mwamungaseŵenzeshele bwino nthawi yanu’ kuti . . .
-
mukoŵelenga Baibo nthawi zonse.
-
munkhale munalume kapena munakazi wabwino m’banja, kolo yabwino kapena mwana wabwino.
-
mukopezeka pa misonkhano ya mpingo.
4. Phunzisani cikumbumtima canu kuti mukopanga zosankha mwanzelu
Ngati pali lamulo yacindunji ya m’Malemba pa nkhani iyakine, cunkhala cosavuta kupanga cosankha. Koma nanga tyani ngati paliye lamulo yacindunji? Onelelani VIDYO, nokambilana konsho yokonkhapo.
-
M’vidyo iyi, ni zinthu zotyani zecicita kalongosi kuti aphunzise cikumbumtima cake, nopanga cosankha cokondwelesha Yehova?
Tufunika lini kusenga ŵanthu ayakine kuti atipangile zosankha. Ndaŵa yanji? Ŵelengani Aheberi 5:14, nokambilana makonsho aŵa:
-
Olo kuti nthawi ziyakine zingaoneke monga ni zosavuta kusenga ayakine kutipangila zosankha, kansi tufunika kukwanisha kusiyanisha cinji paseka?
-
Ni zinthu zotyani zingatiyavye kupitilizhya kuphunzisa cikumbumtima casu kuti tikopanga zosankha mwanzelu?
Molingana na mapu, cikumbumtima cingatisogolele pa umoyo wasu
5. Mukolemekeza cikumbumtima ca ŵanthu ayakine
Ŵanthu opanga zosankha zosiyanasiyana. Tingaoneshe tyani kuti tulemekeza cikumbumtima ca ŵanthu ayakine? Tiyeni tikambilane vocitika viŵili:
Cocitika coyamba: Kalongosi wamene okonda kuzikonzakonza wakukila mumpingo mwamene azilongosi okhumudwa akaona munthu okonda kuzikonzakonza.
Ŵelengani Aroma 15:1 na 1 Akorinto 10:23, 24, nokambilana makonsho aŵa:
-
Molingana na malemba aŵa, kansi kalongosi uyu angasankhe kucita cinji? Kansi mungacitenji ngati muli na munthu wamene cikumbumtima cake cumulesha kucita zinthu zamene mweo cikumbumtima canu cukulolani kuzicita?
Cocitika caciŵili: Mkwasu oziŵa kuti Baibo yulesha lini kumwa walwa pamlingo woyenelela. Koma epanga cosankha cakuti osati akokumwa olo patontho. Waitiwa ku cikondwelelo kwamene oona akwasu akumwa walwa.
Ŵelengani Mlaliki 7:16 na Aroma 14:1, 10, nokambilana makonsho aŵa:
-
Molingana na malemba aŵa, kansi mkwasu uyu angasankhe kucita cinji? Kansi mungacitenji mukaona munthu wamene ocita vinthu vamene cikumbumtima canu cukuleshani?
Zamungacite kuti mukopanga zosankha mwanzelu
1. Sengani Yehova kuti akuyavyeni kupanga zosankha mwanzelu.—Yakobo 1:5.
2. Fufuzani m’Baibo na m’zofalisa zozikiwa pa Baibo kuti mupeze mfundo zamungaseŵenzeshe. Mungakonshe soti Akhristu acikulile mwauzimu.
3. Ganizilani mwamene zosankha zanu zingakhuzile cikumbumtima canu na ca ayakine.
ŴANTHU AYAKINE OKAMBA KUTI: “Nili na ufulu wocita zilizonse zanufuna. Niliye nazo kanthu zakuganiza ayakine?”
-
Ndaŵa yanji tufunika kuganizila mwakumvwila Yehova, na ŵanthu ayakine?
MFUNDO ZACIDULE
Tupanga zosankha mwanzelu tikaziŵa mwakumvwila Yehova noganizila mwamene zosankha zasu zukhuzila ŵanthu ayakine.
Kuwelezhya mfundo zikulu-zikulu
-
Mungacitenji kuti mupange zosankha zokondwelesha Yehova?
-
Kansi mungaciphunzise tyani cikumbumtima canu?
-
Mungaoneshe tyani kuti mulemekeza cikumbumtima ca ŵanthu ayakine?
FUFUZANI
Mungacitenji kuti mukopanga zosankha zamene zingatang’ishe ushamwali wanu na Mulungu?
“Pangani Zosankha Zolemekeza Mulungu” (Nsanja ya Olonda, April 15, 2011)
Phunzilani zinyinji zokhuza mwamene Yehova otipasila malangizo.
Onani zeyavya munalume muyakine kupanga cosankha pa nkhani yovuta ngako.
Onani mwamungapangile zosankha zokondwelesha Yehova olo pa nkhani zakuti aliyotipase lamulo yacindunji.
“Kansi Mufunikila Lamulo ya m’Baibo Nthawi Zonse?” (Nsanja ya Olonda, December 1, 2003)
