THUTO 35

O ka Thušwa ke Eng go Dira Diphetho tše Dibotse

BAPALA

Ka moka ga rena re swanetše go dira diphetho. Diphetho tše dintši tšeo re di dirago di ka ba le ditlamorago tše dibotse goba tše mpe, e bile di ka ama segwera sa rena le Jehofa. Ka mohlala, re ka swanelwa ke go dira phetho ya gore re tlo dula kae, re tlo itlhokomela bjang ka tša ditšhelete, le gore re tlo nyala goba ra se nyale. Ge re dira diphetho tše dibotse re tlo ipshina ka bophelo, e bile ra thabiša Jehofa.

1. Beibele e ka go thuša bjang gore o dire diphetho tše dibotse?

Pele o dira phetho e itšego, rapela Jehofa gore a go thuše. E bile diriša Beibele gore o kwe gore Jehofa o nagana eng ka taba yeo. (Bala Diema 2:3-6.) Ditabeng tše dingwe Jehofa o re nea melao e kwagalago phaa. Ka gona, ge o ekwa melao yeo o ka se tsoge o itshotše.

Eupša o ka dira’ng ge go se na molao wa ka Beibeleng wo o go botšago gore o dire eng? O se ke wa tshwenyega, Jehofa o tla go bontšha ‘tsela yeo o swanetšego go sepela ka yona.’ (Jesaya 48:17) O tlo go bontšha yona bjang? O tlo diriša melao ya motheo ya ka Beibeleng. Melao ya motheo ke’ng? Ke dithuto tša ka Beibeleng tšeo di re thušago go tseba gore Jehofa o nagana eng, le gore o ikwa bjang ka dilo tše itšego. Gantši re kgona go tseba gore Jehofa o ikwa bjang ge re bala taba e itšego ka Beibeleng. Ge re bona gore Jehofa o ikwa bjang, re ka kgona go dira diphetho tšeo di mo thabišago.

2. O swanetše go nagana ka eng pele o dira diphetho?

Beibele e re: “[Motho] yo bohlale o šetša dikgato tša gagwe.” (Diema 14:15) Se se ra gore ga se ra swanela go no kitimela go dira diphetho. Eupša re swanetše go ipotšiša dipotšišo tša go swana le gore: ‘Ke dikeletšo dife tša ka Beibeleng tšeo di ka nthušago tabeng ye? Na phetho yeo ke tlago go e dira e tlo dira gore ke ikwe bjang? E tlo ama batho ba bangwe bjang? Sa bohlokwa le go feta, na e tlo thabiša Jehofa?’—Doiteronomio 32:29.

Jehofa ke yena feela a ka re botšago gore ke selo sefe seo se lokilego le seo e le go se sebe. Ge re ithuta melao ya Jehofa le melao ya gagwe ya motheo, e bile re lwela go phela ka yona, re tlo ba le letswalo le lebotse. (Baroma 2:14, 15) Letswalo ke eng? Ke maikwelo a ka gare ao a re botšago ge e ba selo se itšego se lokile goba e le se sebe. Ge re tlwaetša letswalo la rena go kwa melao ya Modimo, re tlo kgona go dira diphetho tše dibotse.

ITHUTE KA MO GO TSENELETŠEGO

Ekwa kamoo melao ya motheo ya ka Beibeleng le matswalo a rena a ka re thušago go dira diphetho tše dibotse.

3. Dumelela Beibele gore e go hlahle

Melao ya motheo ya ka Beibeleng e ka re thuša bjang go dira diphetho? Bapalang bidio ye, gomme le boledišaneng ka dipotšišo tše di latelago:

BIDIO: Dumelela Melao ya Motheo ya Beibele Gore e go Hlahle (5:54)

Ke mpho efe yeo Jehofa a re filego yona?
Ke ka baka la’ng a re file mpho yeo?
Ke dilo dife tšeo Jehofa a re filego tšona tšeo di ka re thušago go dira diphetho tše dibotse?

E le gore o bone mohlala o mongwe wa molao wa motheo wa ka Beibeleng, balang Baefeso 5:15, 16. Ke moka le boledišaneng ka gore wena o ka ‘diriša nako ya gago gabotse’ bjang . . .

tabeng ya go bala Beibele ka mehla.
go ba molekane, motswadi, morwa, goba morwedi yo mokaone.
go ba gona dibokeng.

4. Tlwaetša letswalo la gago go dira diphetho tše dibotse

Ge go na le molao wa ka Beibeleng wo o re botšago seo re swanetšego go se dira, go ka no ba bonolo go dira phetho. Eupša o tla dira’ng ge go se na molao wo o re botšago gore re dire eng? Bapalang bidio ye, gomme le boledišaneng ka potšišo e latelago:

BIDIO: “Ebang le Letswalo le Lebotse” (5:13)

Kgaetšedi wa mo bidiong ye o ile a dira’ng go tlwaetša letswalo la gagwe le go dira phetho yeo e thabišago Jehofa?

Ke ka baka la’ng re se ra swanela go kgopela batho ba bangwe gore ba re direle diphetho? Balang Baheberu 5:14, gomme le boledišaneng ka dipotšišo tše di latelago:

Le ge go ka no bonagala go le bonolo go kgopela batho ba bangwe gore ba re direle diphetho, ke ka baka la’ng rena re swanetše go itlwaetša go itirela diphetho?
Ke dilo dife tšeo Jehofa a re neilego tšona, tšeo di ka re thušago go tlwaetša matswalo a rena le go dira diphetho tše dibotse?

Letswalo la rena le swana le mmepe, ka gore le ka re thuša go kgetha tsela yeo re swanetšego go sepela ka yona mo bophelong

5. Hlompha matswalo a batho ba bangwe

Ka moka ga rena re dira diphetho tša go se swane. Re ka bontšha bjang gore re hlompha matswalo a batho ba bangwe? A re boleleng ka mehlala ye e mebedi:

Mohlala 1: Kgaetšedi yo a ratago go tlola makeup, o hudugela phuthegong yeo dikgaetšedi tše dintši di kgopišegago ge di bona motho a tlotše makeup.

Balang Baroma 15:1 le 1 Bakorinthe 10:23, 24, gomme le boledišaneng ka dipotšišo tše di latelago:

Go ya ka mangwalo a, kgaetšedi yo a ka dira phetho efe? Wena o tla dira eng ge o na le motho yo letswalo la gagwe le mo ganetšago go dira selo seo letswalo la gago le go dumelelago go se dira?

Mohlala 2: Ngwanabo rena yo mongwe o tseba gore Beibele ga e gane re enwa bjala gabotse, eupša yena o kgetha go se bonwe. Ka letšatši le lengwe ba mo mema gore a tle a ipshine le bana babo rena ba bangwe, bjale ge a le moo o bona bana babo rena bao ba enwa bjala.

Balang Mmoledi 7:16 le Baroma 14:1, 10, gomme le boledišaneng ka potšišo e latelago:

Go ya ka mangwalo a, ngwanabo rena yoo a ka dira phetho efe? Wena o tla dira eng ge o na le motho yo letswalo la gagwe le mo ganetšago go dira selo seo wena letswalo la gago le go dumelelago go se dira?

O swanetše go dira eng gore o dire diphetho tše dibotse?

1. Kgopela Jehofa gore a go thuše go dira phetho e botse. —Jakobo 1:5.

2. Dira nyakišišo ka Beibeleng le ka dikgatišong tšeo di nago le mangwalo a Beibele, gore o hwetše melao ya motheo yeo o ka e dirišago. Le gona o ka boledišana le bana babo rena le dikgaetšedi bao o tsebago gore ba rata Jehofa kudu, e bile ba tla go eletša ba diriša Beibele.

3. Ipotšiše gore phetho ye o nyakago go e dira e tlo ama letswalo la gago le matswalo a batho ba bangwe bjang.

BATHO BA BANGWE BA RE: “Ke bophelo bja ka, nka no dira nto e nngwe le e nngwe yeo ke e ratago, a ke ne taba le gore batho ba bangwe ba reng.”

Ke ka baka la’ng go le bohlokwa gore pele re dira phetho, re nagane pele gore Jehofa o ikwa bjang, le gore batho ba bangwe ba tlo ikwa bjang?

O ITHUTILE ENG?

Re tlo kgona go dira diphetho tše dibotse ge re nagana gore Jehofa o ikwa bjang ka phetho yeo, le gore e tlo ama batho ba bangwe bjang.

Dipotšišo

O ka thušwa ke eng go dira diphetho tšeo di thabišago Jehofa?
O ka tlwaetša letswalo la gago bjang?
O ka bontšha bjang gore o hlompha matswalo a batho ba bangwe?

Re feditše go bala thuto ye ka di:

Seo o ka se dirago

Nagana ka phetho yeo o swanetšego go e dira e se kgale. Ke moka o dire dilo tše tharo tšeo di lego lepokising leo le rego: “ O Swanetše go Dira Eng Gore o Dire Diphetho tše dibotse?”

Dilo tše dingwe:

Your other goal