ELONGESO 35

Oityi Matyikupe Onondunge Utyivile Okutala Nawa Etyi Molingi?

OKUHIKISA

Onthwe atuho pamwe tupanga okulinga otyipuka tyimwe. Ovipuka vimwe tusoka okulinga tuna okuvisoka umwe nawa. Omokonda yatyi? Omokonda viati umwe ovio vipondola okutwetela ehambu, ovio vipondola okutunyona. Tupu pamwe vipondola okutufweneka ku Siovaa, pamwe avituhondovola ku Siovaa. Vimwe tuna okusoka umwe nawa tyina tupanga okuvilinga, ovievi: (1) Apa matukala, (2) ovilinga matuundapa, (3) okunepa, nokuahanepe. Okusoka nawa tyina tuehenelinge ovipuka ngovio, matuhambukwa, tupu matuhambukiswa Siovaa.

1. Oñgeni Ombimbiliya itusokesako tulinge etyi tyikahi nawa?

Tyina pena etyi uhanda okulinga, tete likuambela ku Siovaa, pahe otale mo Mbimbiliya utale etyi ngwe asoka. (Tanga Provérbios 2:3-6.) Pamwe mo Mbimbiliya, Siovaa wapopia-mo umwe nawa-nawa etyi tuna okulinga. Pohika ngo opo hahe tulinge umwe vala etyi tyapopiwa-mo. Otyo vala matyitwetela ouwa, otyo vala matyihambukiswa Siovaa.

Pahe ine etyi tuahanda okulinga katyapopilwe nawa-nawa mo Mbimbiliya, matulingi ñgeni? No ngotyo Siovaa mekulekesa “ondyila una okueendela.” (Isaías 48:17) Mahi metyilingi ñgeni? Mo Mbimbiliya wetupakela-mo onondunge tutyivile okukungunyika etyi asoka. Mo Mbimbiliya muapopiwa ovanthu ovanyingi. Ovipuka vimwe valingaile, Ombimbiliya ipopia oñgeni Siovaa akalele. Pamwe etyi Siovaa akalele, otyo tyitupopila oñgeni atala ovipuka. Naina, opo ovipuka tusoka okulinga vimuhambukiswe, tuesukisa okulilongesa okupunga nawa ovipuka, atunoñgonoka umwe nawa oñgeni Siovaa evitala.

2. Tyina una etyi uhanda okulinga, oityi nkhele una okusoka?

Ombimbiliya yapopia okuti “una walunguka unoñgonoka nawa apa maliate.” (Provérbios 14:15) Onondaka ombo mbahanda okutiwi? Mbahanda okuti tyina pena etyi tuahanda okulinga, tyina nkhele tuehenetyilinge, tuna okupumphama, atutyisoko umwe nawa. Lipula ngetyi: ‘Oityi Ombimbiliya ipopia tyayemba ku etyi ndyihanda okulinga? Tyina pahe nametyilingi, omutima wange maukala ñgeni? Vakuetu matyivekalesa-vo ñgeni? Siovaa matyimukalesa ñgeni?’ — Deuteronômio 32:29.

Siovaa oe vala una okutupopila etyi tyaviuka netyi tyapenga. Tyina tunoñgonoka umwe nawa etyi Siovaa apopia mo Mbimbiliya, atulikuatehila tueendele-mo, ngotyo tuli nokulongesa nawa ombungo yetu. Siovaa wetutunga nombungo tutyivile okupunga otyiwa notyivi. (Ova Loma 2:14, 15) Ine ulongesa umwe nawa ombungo yove, molingi ovipuka mavikukalesa nawa, mahi tupu mavihambukiswa Siovaa.

KUHANDE OKUNOÑGONOKA VALI?

Monoñgonoka okuti tyitukuatesako tusoke nawa tyina pena tuahanda okulinga, Ombimbiliya, nomutima wetu.

3. Tavela Ombimbiliya ikuhongolele

Oñgeni onondunge mbuli mo Mbimbiliya mbutusokesako tyina pena etyi tuahanda okulinga? Talei OVIDIU, amutomphola omapulo aa:

OVIDIU: Tavela Ombimbiliya Ikuhongolele (5:54)

Siovaa utuyeka tulinge-tyi?
Oityi etuyekela tutyilinge?
Oityi Siovaa etuavela tutyivile okupunga nawa etyi matyimuhambukiswa?

Tala etyi Huku ahanda tulinge tyapopiwa momukanda Ova Efesu 5:15, 16. (Tangei). Pahe tompholei oñgeni ove mokwate nawa omuvo . . .

utyivile okutanga Ombimbiliya ononthiki ambuho.
utekule nawa ovana vove; ukale omona wonondunge.
utyivile okuenda komaliongiyo aeho.

4. Longesa ombungo yove utyivile okupunga etyi Siovaa ahanda ulinge

Pamwe Ombimbiliya itupopila umwe nawa-nawa etyi Siovaa ahanda tulinge. Opo katyesukile vali okuliipaa kokusoka matulingi ñgeni. Pahe ine Ombimbiliya etyi tuahanda okulinga kaityipopi, matulingi ñgeni? Talei OVIDIU, amutomphola epulo eli:

OVIDIU: “Longesa Omutima Wove” (5:13)

Oityi omukai ou tuamona movidiu alinga alongese nawa omutima wae, etyivili okupunga etyi matyihambukiswa Siovaa?

Oityi tyahahandela vakuetu ngavo vetupopila etyi tuna okulinga? Tangei Ova Hebeleu 5:14, amutomphola omapulo aa:

Tyapepuka umwe vali okuita ku vakuetu vetupopile etyi matulingi. Mahi oityi tyahandela ove muene upunge etyi Siovaa ahanda ulinge?
Oityi una okulinga utyivile okupunga etyi matyihambukiswa Siovaa?

Omapa alekesa ondyila apa omunthu ena okukuata. Nombungo yetu itupopila etyi tuna okulinga, netyi tuahapondola okulinga

5. Linga-vo onthilo etyi vakwenyi vasoka

Onthwe vanthu, katusoko otyipuka tyike. Otyo tuesukisila okulinga onthilo etyi vakuetu vasoka, atuehevekuluminya vala valinge etyi onthwe tuasoka. Pahe tutalei oñgeni tupondola okutyilinga:

Tyo tete: Omuhikuena utyihole tyokukeya onohuki. Pahe ailuka mewaneno liavo aende kewaneno ekuavo. Mahi pahe kewaneno oko aya nako kavetyiliyile okutala omuhikuena ukululwa, tyivekalesa otyipuka ñgaa.

Tangei Ova Loma 15:1 na 1 Ova Kolindu 10:23, 24, amutomphola omapulo aa:

Pahe okusoka kono tesitu ombu tuatanga, ñgeno omuhikuena oo wokukululwa ulinga ñgeni? Ove ine una otyipuka ulinga, hamwe uhole, utyii okuti katyapengele, mahi vakwenyi tyivekalesa omapita, molingi ñgeni?

Tya vali: Omukulu umwe utyii okuti Ombimbiliya kailika okunwa. Mahi pahe ngwe asoko ati hahe nahanwe. Pahe akongwa na vakuavo vakalie keumbo liavo. Ina kuna vakuavo vati umwe otyo valia otyo vanwa.

Tangei Eclesiastes 7:16 nomukanda Ova Loma 14:1, 10, amutomphola omapulo aa:

Pahe okusoka kono tesitu ombu tuatanga, ñgeno omukulu oo ulinga ñgeni? Molingi ñgeni ine mukwenyi ulinga otyipuka tyehekukalesa nawa, mahi otyo no ove utyii umwe okuti katyapengele?

Etyi una okulinga opo utyivile okupunga etyi matyihambukiswa Siovaa

1. Likuambela ku Siovaa omuiti ekukuateseko upunge nawa ovipuka. — Tiaku 1:5.

2. Lilongesa utale etyi tyipopia Ombimbiliya, nomikanda vietu, tyiyemba ku etyi uli nokusoka okulinga. Tupu pula kovakulu weete okuti vehole unene Huku.

3. Lipula okuti: ‘Etyi nahanda okulinga ha matyinkhalesa ñgeni? Matyikalesa ñgeni vakuetu?’

OVANTHU VAMWE VATI: “Muene ove utyii etyi molingi, wehesuke netyi vakwenyi vasoka.”

Tyina tuahanda okulinga otyipuka, oityi tyahandela okusoka ku etyi Siovaa makala, netyi vakuetu mavakala?

ETYI WELILONGESA

Welilongesa okuti tyina uhanda okulinga otyipuka, tete una okusoka oñgeni Siovaa makala. Pahe osoko oñgeni matyikalesa vakwenyi. Opo motyivili okulinga ovipuka nonondunge.

Okupitulula

Oityi una okulinga opo evi ulinga vihambukiswe Siovaa?
Oityi una okulinga ulongese nawa ombungo yove?
Omunthu wokuna onthilo netyi vakuavo vasoka, oityi alinga? Oityi ahalingi?

Namana okulilongesa elongeso eli monthiki:

Hetekela okulinga ñgaa:

Soka kotyipuka tyimwe wapanga okulinga apa kapii. Tyina nkhele wehenetyilinge, tete linga ovipuka viapopiwa apa pokuati: “ Etyi Una Okulinga Opo Utyivile Okupunga Etyi Matyihambukiswa Siovaa.”

Ovikwavo :

Ovikwavo