ƐZUKOALƐDEƐ 35
Kɛzi Yɛbahola Yɛazi Kpɔkɛ Kpalɛ La
Yɛ muala yɛsi kpɔkɛ. Kpɔkɛzilɛ ɛhye mɔ anu dɔɔnwo kola ka yɛdayɛ mumua ne yɛɛ agɔnwolɛvalɛ mɔɔ yɛ nee Gyihova lɛ la. Kɛ neazo la, bie a ɔwɔ kɛ yɛsi ɛleka mɔɔ yɛbadɛnla, ezukoa mɔɔ yɛbanyia yɛanlea yɛ nwo yɛɛ kɛ yɛbagya anzɛɛ yɛnrɛgya la anwo kpɔkɛ. Saa yɛsi kpɔkɛ kpalɛ a yɛ nye balie wɔ ɛbɛlabɔlɛ nu na ɛhye bazɔ Gyihova anye.
1. Kɛ ɔkɛyɛ na Baebolo ne aboa wɔ yeamaa wɔazi kpɔkɛ kpalɛ ɛ?
Kolaa na wɔazi kpɔkɛ bie la, dimoa sɛlɛ Gyihova moalɛ na yɛ kɛzi ɔbu edwɛkɛ ne la anwo neɛnleanu wɔ Baebolo ne anu. (Kenga Mrɛlɛbulɛ 2:3-6.) Ɔdwu mekɛ ne bie a, Gyihova maa yɛ mɛla fɔɔnwo bie. Saa zɔhane a ɔde a, ɛnee ɔle kpalɛ kɛ ɛbali mɛla zɔhane azo.
Na saa mɛla fɔɔnwo bie ɛnle Baebolo ne anu mɔɔ maa ɛnwu mɔɔ ɔwɔ kɛ ɛyɛ la ɛ? Yemɔ bɔbɔ, Gyihova bahile wɔ “adenle mɔɔ ɔwɔ kɛ ɛdua nu la.” (Ayezaya 48:17) Adenle boni azo? Ngyinlazo dɔɔnwo wɔ ɛkɛ mɔɔ bahola aboa wɔ a. Baebolo ngyinlazo le nɔhalɛ edwɛkɛ titili bie mɔ mɔɔ maa yɛnwu Nyamenle adwenle nee kɛzi ɔbu ninyɛne bie mɔ la. Yɛta yɛnwu kɛzi Gyihova te nganeɛ wɔ debie bie anwo la wɔ mekɛ mɔɔ yɛbagenga edwɛkɛ bie wɔ Baebolo ne anu la. Saa yɛnwu kɛzi Gyihova te nganeɛ wɔ debie bie anwo a, yɛbahola yɛazi kpɔkɛ mɔɔ ɔ nye die nwo la.
2. Ninyɛne boni mɔ a ɔwɔ kɛ ɛsuzu nwo kolaa na wɔazi kpɔkɛ bie a?
Baebolo ne ka kɛ: “[Sonla] mɔɔ anye gyi ɔ ti anwo la dwenle ɔ gyakɛ biala mɔɔ ɔlɛtu la anwo.” (Mrɛlɛbulɛ 14:15) Ɛhye kile kɛ kolaa na yɛazi kpɔkɛ bie la, ɔwɔ kɛ yɛnyia mekɛ yɛdwenle mɔɔ yɛkulo kɛ yɛyɛ la anwo kpalɛ. Saa ɛlɛsuzu mɔɔ ɛkulo kɛ ɛyɛ la ko biala anwo a, biza ɛ nwo kɛ: ‘Baebolo ngyinlazo boni a fale nwo a? Nuhua ne boni a bamaa me nzo nu adwo me a? Kɛzi me kpɔkɛzilɛ ne baha awie mɔ ɛ? Mɔɔ hyia kpalɛ la, asoo ɔbamaa Gyihova anye alie ɔ?’—Ditilɔnomi 32:29.
Gyihova a lɛ adenle kile yɛ mɔɔ le kpalɛ nee ɛtane la a. Saa yɛnwu ye mɛla nee ye ngyinlazo ne mɔ kpalɛ na yɛbɔ kpɔkɛ kɛ yɛbali zo a, ɛnee yɛlɛtete yɛ adwenle ne. Adwenle ne a maa yɛnwu kpalɛ nee ɛtane a. (Wulomuma 2:14, 15) Adwenle mɔɔ bɛtete ye kpalɛ la boa yɛ maa yɛsi kpɔkɛ kpalɛ.
SUKOA DƆƆNWO
Sukoa kɛzi Baebolo ngyinlazo nee yɛ adwenle ne boa maa yɛsi kpɔkɛ la anwo debie.
3. Maa Baebolo ne ɛhile wɔ adenle
Kɛzi Baebolo ngyinlazo boa yɛ maa yɛsi kpɔkɛ ɛ? Ye VIDIO ne, na akee bɛzuzu kpuya ɛhye mɔ anwo.
-
Ahyɛlɛdeɛ mɔɔ sonle bolɛ la boni a Gyihova ɛva ɛmaa yɛ a?
-
Duzu ati a Gyihova maa yɛkola yɛsi yɛ ti anwo kpɔkɛ a?
-
Duzu a yeva yemaa yɛ amaa yeaboa yɛ yeamaa yɛazi kpɔkɛ kpalɛ a?
Amaa wɔanwu Baebolo ngyinlazo nwo neazo ko la, kenga Ɛfɛsɛsema 5:15, 16. Akee bɛzuzu kɛzi ɛbahola ‘wɔava wɔ mekɛ wɔali gyima kpalɛ’ amaa wɔayɛ ɛhye mɔ la anwo:
-
kɛzi ɛbagenga Baebolo ne dahuu la.
-
kɛzi ɛbayɛ kunli anzɛɛ yelɛ, awovolɛ, ralɛ nrenyia anzɛɛ ralɛ raalɛ kpalɛ la.
-
kɛzi ɛbahɔ debiezukoalɛ ne mɔ bie la.
4. Tete wɔ adwenle amaa wɔazi kpɔkɛ kpalɛ
Saa edwɛkɛ bie anwo mɛla fɔɔnwo wɔ Baebolo ne anu a, nwolɛ kpɔkɛzilɛ ɛnyɛ se. Na saa mɛla zɛhae bie ɛnle ɛkɛ ɛ? Ye VIDIO ne, na akee bɛzuzu kpuya ɛhye anwo.
-
Wɔ vidio ne anu, ninyɛne boni mɔ a adiema raalɛ ne yɛle amaa yeatete ye adwenle na yeazi kpɔkɛ mɔɔ Gyihova anye balie nwo a?
Duzu ati a ɔnle kɛ yɛmaa awie mɔ si kpɔkɛ maa yɛ a? Kenga Hibuluma 5:14, na akee bɛzuzu kpuya ɛhye mɔ anwo:
-
Ɔnyɛ se kɛ yɛbaha yɛahile awie mɔ kɛ bɛzi kpɔkɛ bɛmaa yɛ ɛdeɛ, noko duzu a ɔwɔ kɛ yɛdayɛ mumua ne yɛkola yɛnwu ye a?
-
Ninyɛne boni mɔ a bahola aboa wɔ yeamaa wɔatete wɔ adwenle amaa wɔazi kpɔkɛ kpalɛ a?
Yɛ adwenle ne le kɛ mape la, ɔkile yɛ adenle wɔ ɛbɛlabɔlɛ nu
5. Bu adwenle mɔɔ awie mɔ lɛ la
Asolo awie biala nee ye kpɔkɛzilɛ. Kɛ ɔkɛyɛ na yɛahile kɛ yɛbu adwenle mɔɔ awie mɔ lɛ la ɛ? Nea tɛnlabelɛ nwiɔ bie:
Tɛnlabelɛ 1: Adiema raalɛ mɔɔ ɛlɛkɔ ɛkponledolɛ bo anzɛɛ ɔlɛyɛ ye debie a ɔwula telawoza la ɛhɔ asafo mɔɔ nuhua mediema mraalɛ dɔɔnwo nwu kɛ awie wula bie a ɔgyegye bɛ la anu.
Kenga Wulomuma 15:1 yɛɛ 1 Kɔlentema 10:23, 24, na akee bɛzuzu kpuya ɛhye anwo:
-
Kɛ mɔɔ ngyehyɛnu ɛhye mɔ kile la, kpɔkɛ boni a adiema raalɛ zɔhane bahola azi a? Saa ɛ nee awie wɔ ɛleka bie na ye adwenle gyegye ye wɔ debie mɔɔ wɔ adwenle maa ɛkola ɛyɛ la anwo a, duzu a ɛbayɛ a?
Tɛnlabelɛ 2: Adiema nrenyia bie ze kɛ Baebolo ne ɛndua nza ekyi ɛnlonlɛ, noko akee ɔnno bie. Bɛdo ɛsalɛ bɛvɛlɛ ye wɔ ɛkponledolɛ bie abo na yenwu kɛ mediema mrenyia ɛlɛno nza.
Kenga Nolobɔvo 7:16 yɛɛ Wulomuma 14:1, 10, na akee bɛzuzu kpuya ɛhye mɔ anwo:
-
Kɛ mɔɔ ngyehyɛnu ɛhye mɔ kile la, kpɔkɛ boni a adiema nrenyia zɔhane bahola azi a? Saa ɛnwu kɛ awie ɛlɛyɛ debie mɔɔ gyegye wɔ adwenle a, duzu a ɛbayɛ a?
Ninyɛne boni mɔ a maa awie si kpɔkɛ kpalɛ a?
1. Sɛlɛ Gyihova kɛ ɔboa wɔ ɔmaa ɛzi mɔɔ ɔwɔ kɛ ɛyɛ la anwo kpɔkɛ.—Gyemise 1:5.
2. Yɛ neɛnleanu wɔ Baebolo ne nee mbuluku mɔɔ gyi Baebolo ne azo la anu kpondɛ nwolɛ ngyinlazo. Ɛbahola noko ɛ nee Kilisienema mɔɔ lɛ anwubielɛ la azuzu nwo.
3. Suzu kɛzi wɔ kpɔkɛzilɛ ne baha wɔ adwenle nee adwenle mɔɔ awie mɔ lɛ la anwo.
BIE MƆ KA KƐ: “Ɛkola ɛyɛ debie biala mɔɔ ɛkulo la. Kɛmɔti a ɔwɔ kɛ ɛdwenle mɔɔ awie mɔ ka la anwo ɛ?”
-
Duzu ati a ɔwɔ kɛ yɛdwenle kɛzi Nyamenle nee awie mɔ te nganeɛ wɔ debie bie anwo la anwo a?
EDWƐKƐ TITILI
Saa yɛnwu kɛzi Gyihova te nganeɛ wɔ edwɛkɛ bie anwo na akee yɛsuzu kɛzi yɛ nyɛleɛ baboa awie mɔ anzɛɛ ɔbagyegye bɛ la anwo a ɔmaa yɛsi kpɔkɛ kpalɛ.
Ndinu
-
Kɛ ɔkɛyɛ na wɔazi kpɔkɛ mɔɔ Gyihova anye die nwo ɛ?
-
Kɛzi ɛbahola wɔatete wɔ adwenle ne ɛ?
-
Kɛ ɔkɛyɛ na wɔahile kɛ ɛsuzu adwenle mɔɔ awie mɔ lɛ la anwo ɛ?
KPONDƐ DƆƆNWO
Kɛ ɔkɛyɛ na wɔazi kpɔkɛ mɔɔ bamaa agɔnwolɛvalɛ mɔɔ ɛ nee Nyamenle lɛ la anu amia ɛ?
“Si Kpɔkɛ Mɔɔ Wula Nyamenle Anyunlunyia La” (Ɛzinzalɛ Arane, April 1, 2011)
Sukoa kɛzi Gyihova tu yɛ folɛ la anwo ninyɛne dɔɔnwo.
Nea debie mɔɔ boale nrenyia bie ɔmaanle ɔzile kpɔkɛ bie mɔɔ yɛ se la.
Sukoa kɛzi yɛbahola yɛayɛ mɔɔ sɔ Gyihova anye wɔ mekɛ mɔɔ ɔtɛmaanle yɛ adehilelɛ fɔɔnwo wɔ edwɛkɛ bie anwo la anwo ninyɛne dɔɔnwo.
“Ɛhyia Baebolo Ne Anu Mɛla Dahuu Ɔ?” (Ɛzinzalɛ Arane, December 1, 2003)
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
