35 NUENƆ

Kɛ̄ Ebiaɛ Nu Fii Bu Le Sīdee Doo

PLAY

Dɛ̄dɛɛ̄ nɛɛ ɛrɛ nu ebiaɛfii. Gbɛnɛ-edo pya biaɛfii ama ɛrɛ i kaāna pah nyɔɔ le i gbanialoo kumaloo Jɛhova. Bu edoba, i ɛrɛ ebiaɛfii kɛ̄ i tɔɔ̄, sīdee e’ɛrɛ kpugi i kuādɛɛ̄loo aba ii, lo i gbī e’ii wa ale gbī e’iya dam. Sɔ̄ i biaɛfii nu a lee, i dum ele bu ɛɛbu sa i doo nu Jɛhova gbī.

1. Bu mɛ sīdee na Baibol edap a yerebah nɛ kɔ o biaɛ nu fii bu le sīdee a?

Lɛɛ o gae biaɛ nu fii, yere kara bara Jɛhova kɔ a yerebah a nɛ sa su Baibol ɛma nu a kɛɛrɛ kumaloo lo ue. (Buū Kam 2:3-6.) Jɛhova wee nɛ lok nyɔɔ pio nu. Lo a le wo, biaɛfii lo egbaɛ̄tɔ̄loo ye lok na lo a lee eera a.

E lo a le lɔgɔ lok akiiloo nu o doo bu ziī kɛ̄tɔɔ̄ naale bu Baibol a? Jɛhova ebaɛnage a loo “bu dee o ɛrɛ ekii.” (Aisaia 48:17) Bu mɛ sīdee? A ɛrɛ pya zuurabahtɔ̄ a a dap baɛloo. Pya zuurabahtɔ̄ a le bu Baibol na pya kaka ue a tɔgɛ nu a lu ekɛɛrɛ Bari le kɛ̄ nu ye tɔɔ̄loo doo. Gbɛnɛ-edo sɔ̄ i wee suā kɛ̄ Bari kɛɛrɛ nu kiiloo ziī kɛ̄tɔɔ̄ doo tɛ̄maloo ebuū lo e’ɛma a le bu Baibol. Sɔ̄ i suā kɛ̄ Jɛhova kɛɛrɛ nu doo, i dap biaɛfii nu bu sīdee e’ɛɛrɛ ye bu.

2. Pya ena i kɛɛrɛ lɛɛ i gae biaɛfii nyɔɔ ziī nu a?

Baibol kɔ: “Nɛɛ buā-bee ɛp kɛ̄ a gaa kii.” (Kam 14:15) Lo ama kura kɔ lɛɛ i gae biaɛfii ziī nu, i su sɔ̄ ɛā ekɛɛrɛ nyɔɔ pya nu i gbī ebiaɛfii. Sɔ̄ o gaa ɛp ziī ziī ɛɛ, bip aba ɔɔ kɔ: ‘Amunu daakuu Baibol na a kɔ ue nyɔɔ ue ama a? Amunu na edoo kɔ m ɛrɛ efɛɛloo beenyiɛ a? Na biaɛfii e’ɛrɛ pah nyɔɔ pya dɔɔ̄na doodoo wa? E lo a kuī eera, e dooge kɔ bu Jɛhova a ɛɛ ni?’—Deuteronomi 32:29.

Jɛhova ɛrɛ ekpo ekɔ nu a lee le nu a bee piya i nɛ. Susuā pya ye lok le ye daakuu sa biaɛfii lo enyɔɔnɛ edoo kɔ i ɛrɛ le ekɛɛrɛ beenyiɛ. I ekɛɛrɛ beenyiɛ na nu a i le bu a i kɔ nɛ nu a lee le nu a bee piya. (Pya Rom 2:14, 15) Ekɛɛrɛ beenyiɛ a lele eyerebah i nɛ kɔ i biaɛ nu fii bu le sīdee.

NƆ YERELOO

Ɛp kɛ̄ pya daakuu Baibol le i ekɛɛrɛ beenyiɛ i dap yerebah nɛ kɔ i biaɛfii nu bu le sīdee doo.

3. Lɛɛbaloo kɔ daakuu Baibol a baɛ a loo

Bu mɛ sīdee na pya daakuu a le bu Baibol i dap yerebah nɛ sɔ̄ i gaa biaɛfii nu a? Bira lo VIDIO, lɛɛ o agara pya ebip a nyɔɔnɛ ama.

VIDIO: Doolo Daakuu Baibol A Baɛloo (5:54)

Ena Jɛhova i nɛ dee kɔ i doo a?
Ena anua Jɛhova lɛɛ i baloo kɔ i biaɛfii nu a?
Ena a enɛa i lo eyerebah i nɛ kɔ i biaɛfii nu bu le sīdee a?

Lo esuā ziī daakuu a le bu Baibol, buū Pya Ɛfɛsɔs 5:15, 16. Lɛɛ o ɛp pya kɛ̄ o dap “su [o] sɔ̄ leere” lo e . . .

nɔā Baibol dɛ̄dɛɛ̄ dee.
lu le dam ale le wa, le tɛ le ka, le nwiī nɛɛdam ale nwiīnɛɛwa.
si enɔānu bu bɔŋanaloo.

4. Kpɔā o ekɛɛrɛ beenyiɛ lokwa o dap biaɛfii nu a lee

Sɔ̄ Baibol nɛ lok nyɔɔ ziī ue, a waɛ ebiaɛfii nyɔɔ nu a lee. Mɛ ena o doo lo a le lok a doo wo naale a? Bira lo VIDIO, lɛɛ o agara ebip a nyɔɔnɛ ama.

VIDIO: “Ɛrɛ Le Ekɛɛrɛ Beenyiɛ” (5:13)

Bu vidio ama, pio ena wuga nɛɛwa ama doo lo ekpɔā ye ekɛɛrɛ beenyiɛ le lo ebiaɛfii nu e’ɛɛrɛbu Jɛhova a?

Ena anua ii le ekɔ pya dɔɔ̄na a biaɛfii nu i nɛ a? Buū Pya Hibru 5:14, lɛɛ o agara pya ebip ama:

Kuma sɔ̄ a dap waɛ ekɔ nɛ pya dɔɔ̄na kɔ ba a biaɛfii nu i nɛ a, ena i piiga lo esere kee yɛɛ a?
Pya ena a le kɛ̄ lo edap a yerebah nɛ kɔ o ɛrɛ le ekɛɛrɛ sa biaɛfii nu a lee a?

Doodoo nu a wee tɔgɛ dee nɛɛ a kura map, i ekɛɛrɛ beenyiɛ yerebah i nɛ kɔ i biaɛfii nu i doo bu dum

5. Nɛ enwadɛɛ̄ ekɛɛrɛ beenyiɛ pya dɔɔ̄na

Biaɛfii pya nɛɛ wee lugara keekee. Bu mɛ sīdee na i dap nɛ enwadɛɛ̄ ekɛɛrɛ beenyiɛ pya dɔɔ̄na a? Naa ɛp baɛ kɛ̄tɔɔ̄ ama:

1 Kɛ̄tɔɔ̄: Ziī wuga nɛɛwa ɛmasī wee nia kii dɔɔ̄na bɔŋanaloo lo ɛmasī wee bɛā pya wuga nɛɛwa a le bu.

Buū Pya Rom 15:1 le 1 Pya Kɔrint 10:23, 24, lɛɛ o agara pya ebip ama:

Dɛɛa nyɔɔ pya dɔ ama, ena lo wuga nɛɛwa ebiaɛfii a? Ena o doo lo o le kpaɛ̄ nɛɛ nu o ekɛɛrɛ beenyiɛ a aaloo kɔ o doo naa nia ye a?

2 Kɛ̄tɔɔ̄: Ziī wuga nɛɛdam suā kɔ Baibol naa kɔ ɔ̄ mii bu sīdee a kuūnadɛɛ̄ bee piya, mɛ a biaɛfii kɔ a naale e’ɔ̄e mii. Lu ekue ye loo gbaa bɔŋana sa a muɛ pya dɔɔ̄na wuga nɛɛdam a gaa ɔ̄ mii.

Buū Eklisiastis 7:16 le Pya Rom 14:1, 10, lɛɛ o agara pya ebip ama:

Dɛɛa nyɔɔ pya dɔ ama, ena lo wuga nɛɛdam edoo a? Ena o doo lo a le o muɛ ziī nɛɛ a gaa doo nu o ekɛɛrɛ beenyiɛ a kɔ nɛ kɔ a naa lee a?

Pya ena eyerebah i nɛ kɔ i biaɛfii nu a lee a?

1. Bara Jɛhova kɔ a yerebah a nɛ lo ebiaɛfii nu o doo.—Jemes 1:5.

2. Gbītɛ̄ nu bu Baibol le bu pya i kpa a dɛɛa nyɔɔ Baibol lo esuā pya daakuu a kɔ ue kumaloo lo kɛ̄tɔɔ̄. O dapnage kɔ ue nɛ Pya Nɛɛ Kraist enyima tura.