LÈS 35
Kon Nos Por Tuma Bon Desishon?
Nos tur mester tuma desishon den bida. Hopi di e desishonnan akí por influensiá nos bida i nos amistat ku Yehova. Por ehèmpel, kisas nos mester disidí unda nos ta bai biba, kon nos lo sostené nos mes finansieramente i si nos lo kasa òf nò. Ora nos ta tuma bon desishon, nos lo tin un bida felis i nos lo agradá Yehova.
1. Kon bo por laga Beibel yuda bo tuma bon desishon?
Promé ku bo tuma un desishon, pidi Yehova yuda bo i wak kiko Beibel ta bisa tokante e asuntu. (Lesa Proverbionan 2:3-6.) Den algun kaso, Yehova ta duna mandamentu spesífiko. Si esei ta e kaso, ta mihó nos obedesé e mandamentu ei.
Pero, kiko awor si no tin mandamentu spesífiko den Beibel ku ta bisa bo kiko pa hasi? E ora ei tambe Yehova lo guia bo “den e kaminda ku bo mester kana.” (Isaías 48:17) Kon lo e hasi esei? Wèl, Yehova lo guia bo pa medio di prinsipio di Beibel. Prinsipio di Beibel ta bèrdat fundamental, òf básiko, ku ta yuda nos sa kon Yehova ta pensa i sinti. Hopi biaha, nos ta haña sa kon Yehova ta sinti tokante un asuntu ora nos lesa un relato den Beibel. Ora nos haña sa kon Yehova ta sinti, nos por tuma desishon ku ta agrad’é.
2. Kiko bo mester tene kuenta kuné promé ku bo tuma un desishon?
Beibel ta bisa: “Un persona sabí ta pensa bon promé ku e dal un paso.” (Proverbionan 14:15) Ku otro palabra, promé ku nos tuma desishon, nos tin ku tuma tempu pa pensa riba nos opshonnan. Segun ku bo ta analisá bo opshonnan, puntra bo mes: ‘Ki prinsipio di Beibel tin relashoná ku e asuntu akí? Kua di e opshonnan lo laga mi keda ku un konsenshi limpi? Ki efekto mi desishon por tin riba otro hende? Mas importante ainda, lo e hasi Yehova kontentu?’—Deuteronomio 32:29.
Yehova tin derecho di bisa nos loke ta bon i loke ta malu. Ora nos ta siña e lei- i prinsipionan di Yehova bon i ta disidí di sigui nan, e ora ei nos ta entrenando nos konsenshi. Nos konsenshi ta bisa nos loke ta bon i loke ta malu. (Romanonan 2:14, 15) Ora nos konsenshi ta bon entrená, nos por tuma bon desishon.
KIKO MAS NOS POR SIÑA?
Laga nos wak kon prinsipio di Beibel i nos konsenshi ta yuda nos ora di tuma desishon.
3. Laga Beibel yuda bo ora di tuma desishon
Kon prinsipio di Beibel por yuda nos ora di tuma desishon? Pasa e VIDIO. Despues, analisá e siguiente preguntanan:
-
Kiko ta boluntat liber?
-
Dikon Yehova a duna nos boluntat liber?
-
Kiko Yehova a duna nos pa yuda nos usa nos boluntat liber bon?
Pa wak ehèmpel di un prinsipio di Beibel, lesa Efesionan 5:15, 16. Despues, analisá kon bo por ‘usa bo tempu di e mihó manera’ pa . . .
-
lesa Beibel regularmente.
-
bira un mihó esposo, esposa, mayor òf yu.
-
asistí na nos reunionnan.
4. Entrená bo konsenshi pa yuda bo tuma bon desishon
Ora Beibel ta duna un mandamentu spesífiko tokante un asuntu, por ta mas fásil pa tuma e desishon korekto. Pero kiko si no tin un mandamentu spesífiko? Pasa e VIDIO. Despues, analisá e siguiente pregunta:
-
Den e vidio, kiko e ruman muhé a hasi pa entrená su konsenshi i tuma un desishon ku lo agradá Yehova?
Dikon nos no mester pidi otro hende pa tuma desishon pa nos? Lesa Hebreonan 5:14. Despues, analisá e siguiente preguntanan:
-
Aunke por parse mas fásil pa pidi otro hende tuma desishon pa nos, kiko nos mes mester por distinguí?
-
Kiko por yuda nos entrená nos konsenshi i tuma bon desishon?
Meskos ku un mapa ta guia nos, nos konsenshi tambe ta guia nos pa tuma bon desishon den bida
5. Tene kuenta ku konsenshi di otro hende
No ta tur hende lo tuma e mes desishonnan. Kon nos por tene kuenta ku konsenshi di otro hende? Laga nos wak dos situashon:
Situashon 1: Un ruman muhé ku ta gusta usa makiahe ta muda bai un kongregashon unda e ruman muhénan ta sinti nan inkómodo ora nan mira otro hende ku makiahe.
Lesa Romanonan 15:1 i 1 Korintionan 10:23, 24. Despues, analisá e siguiente preguntanan:
-
A base di e versíkulonan akí, kiko e ruman muhé por disidí di hasi? Kiko abo lo hasi si bo ta ku un persona kende su konsenshi no ta permitié hasi algu ku bo konsenshi sí ta permití bo hasi?
Situashon 2: Un ruman hòmber sa ku Beibel no ta bisa ku ta malu pa bebe alkohòl na un manera moderá. Pero e ta skohe pa no bebe alkohòl. E ruman hòmber ta haña invitashon pa pasa tempu ku algun ruman i e ta mira nan ta bebe alkohòl.
Lesa Eklesiástes 7:16 i Romanonan 14:1, 10. Despues, analisá e siguiente preguntanan:
-
A base di e versíkulonan akí, kiko e ruman hòmber por disidí di hasi? Kiko abo lo hasi si bo mira un persona ta hasi algu ku bo konsenshi no ta permití bo hasi?
Kiko bo mester hasi pa tuma bon desishon?
1. Hasi orashon. Pidi Yehova yuda bo disidí kiko pa hasi.—Santiago 1:5.
2. Hasi investigashon. Usa Beibel i e publikashonnan basá riba Beibel pa buska informashon i pa haña prinsipio ku por yuda bo. Bo por papia ku ruman ku eksperensia tambe.
3. Pensa riba e resultado di bo desishon. Pensa ki efekto bo desishon lo tin riba bo konsenshi i riba konsenshi di otro hende.
LOKE HENDE SA BISA: “Bo tin derecho di hasi loke bo ke. Bo no mester wòri ku loke otro hende ta pensa.”
-
Dikon nos mester tene kuenta ku e sintimentunan di Dios i di otro hende?
RESÚMEN
Nos por tuma bon desishon ora nos haña sa kiko Yehova ta pensa di un asuntu i ora nos ta tuma tempu pa pensa si nos desishon lo yuda otro hende òf hasi nan daño.
Repaso
-
Kon bo por tuma desishon ku ta agradá Yehova?
-
Kon bo por entrená bo konsenshi?
-
Kon bo por tene kuenta ku konsenshi di otro hende?
MAS INFORMASHON INTERESANTE
Kon bo por tuma desishon ku por fortalesé bo amistat ku Dios?
“Tuma Desishon Ku Ta Onra Dios” (E Toren di Vigilansia di 1 di aprel 2011)
Haña mas informashon ku por yuda bo mira kon Yehova ta duna nos konseho.
Wak kiko a yuda un hòmber tuma un desishon difísil.
Yehova Ta Garantisá Nos Ku E Ta Duna Nos Tur Loke Ta Bon (5:46)
Haña mas informashon ku por yuda bo agradá Yehova ora no tin un mandamentu spesífiko tokante un asuntu.
“Ta Semper Bo Mester di un Mandamentu Bíbliko?” (E Toren di Vigilansia di 1 di desèmber 2003)
Otro Artíkulo Interesante
PREGUNTA KU HOPI HENDE SA HASI
Kon un Kurso di Beibel Ku Testigunan di Yehova Ta Bai?
Pa sigui un kurso di Beibel interaktivo grátis ku Testigunan di Yehova, bo por usa kualke tradukshon di Beibel ku bo ta preferá. Sinti bo liber pa invitá henter bo famia òf kualke amigu pa sigui e kurso di Beibel huntu ku bo.
