اَسی اپنی زندگی چ بوہت سارے فیصلے کرنے آں۔ کجھ فیصلے بوہت ای اہم ہوندے نیں جیویں کہ اَسی کتھے رہواں گے، ویاہ کدے نال کراں گے یاں فیر کیہڑی نوکری کراں گے وغیرہ وغیرہ۔ ایہناں فیصلیاں دا ساڈی زندگی تے یہوواہ خدا نال ساڈی دوستی تے بڑا گُوڑھا اثر ہوندا اے۔ جدوں اَسی چنگے فیصلے کرنے آں تے اَسی آپ وی خوش رہنے آں تے یہوواہ نُوں وی خوش کرنے آں۔‏

1.‏ بائبل چنگے فیصلے کرن چ تواڈی مدد کیویں کر سکدی اے؟‏

کوئی وی فیصلہ کرن توں پہلاں یہوواہ خدا کولوں دُعا کرو۔ نالے پاک کلام چوں ایہہ ویکھو کہ اوس معاملے بارے یہوواہ دی سوچ کیہہ اے جدے بارے تُسی فیصلہ کرنا اے۔ (‏امثال 2:‏3-‏6 نُوں پڑھو۔)‏ کجھ معاملیاں بارے تے یہوواہ نے اپنے کلام چ صاف صاف حکم دِتے نیں۔ ایس لئی ایہناں حکماں تے عمل کرنا ای سب توں بہتر ہوندا اے۔‏

پر جدوں کسے معاملے بارے کوئی حکم نئیں دِتا گیا ہوندا تے فیر اَسی کیہہ کر سکنے آں؟ یہوواہ اوہدوں وی صحی فیصلے کرن چ ساڈی مدد کردا اے۔ اوہ سانوں اوس راہ وَل لے کے جاندا اے جدے تے سانوں جانا چاہی دا اے۔‏ (‏یسعیاہ 48:‏17‏)‏ اصل چ اوہنے اپنے کلام چ بوہت سارے اصول دِتے نیں۔ ایہہ اصول اوہ بنیادی سچائیاں نیں جنہاں توں اَسی یہوواہ خدا دی سوچ تے جذباتاں نُوں سمجھن دے قابل ہنے آں۔ جدوں اَسی بائبل چوں کسے واقعے بارے پڑھنے آں تے سانوں یہوواہ دی سوچ دا اندازہ ہو جاندا اے۔ فیر اَسی ایہو جہے فیصلے کرن دے قابل ہنے آں جنہاں توں یہوواہ خوش ہوندا اے۔‏

2.‏ سانوں کوئی وی فیصلہ کرن توں پہلاں کیہڑیاں گلاں نُوں دھیان چ رکھنا چاہی دا اے؟‏

پاک کلام چ دَسیا گیا اے کہ عقل‌مند آدمی دیکھ‌بھال کے قدم چُک دا اے۔‏ (‏امثال 14:‏15‏)‏ ایہدا مطلب اے کہ سانوں ہر فیصلہ سوچ سمجھ کے کرنا چاہی دا اے۔ مثال لئی اَسی سوچ سکنے آں:‏ ”‏بائبل دے کیہڑے اصول ایہہ فیصلہ کرن چ میری مدد کر سکدے نیں؟ ایس فیصلے دا میری زندگی تے کیہہ اثر ہوئے گا؟ ایہدا دُوجیاں دی زندگی تے کیہہ اثر ہوئے گا؟ کیہہ ایہدے نال مینوں خوشی تے سکون ملے گا؟ تے سب توں اہم گل ایہہ وے کہ کیہہ میرے فیصلے توں یہوواہ خوش ہوئے گا؟“‏—‏اِستثنا 32:‏29‏۔‏

یہوواہ نُوں سانوں ایہہ دَسن دا پورا حق اے کہ کیہہ صحی اے تے کیہہ غلط۔ نالے اوہنے سانوں صحی تے غلط چ فرق کرن دی صلاحیت دِتی اے۔ جدوں اَسی اوہدے اصولاں تے معیاراں نُوں سمجھ کے اوہناں تے عمل کرنے آں تے اِنج اَسی اپنے ضمیر دی تربیت کر رہے ہنے آں۔ یہوواہ دی سوچ اپنا کے اَسی چنگے تے صحی فیصلے کر سکنے آں۔—‏رومیوں 2:‏14، 15‏۔‏

 ہور سوچ‌وچار لئی

3.‏ بائبل چ دِتے گئے اصولاں تے سوچ‌وچار کر کے فیصلے کرو

4.‏ صحی فیصلے کرن لئی اپنے ضمیر دی تربیت کرو

 خلاصہ

سانوں کوئی وی فیصلہ کردے ویلے ویکھنا چاہی دا اے کہ ایہدے بارے یہوواہ دی سوچ کیہہ اے۔ نالے ایس گل دا وی خیال رکھنا چاہی دا اے کہ ساڈے فیصلے توں دُوجیاں نُوں فائدہ ہوئے گا یاں نقصان۔ ایس طرحاں اَسی چنگے تے صحی فیصلے کر سکاں گے۔‏

دہرائی

• تُسی یہوواہ نُوں خوش کرن والے فیصلے کیویں کر سکدے او؟‏

• تُسی اپنے ضمیر دی تربیت کیویں کر سکدے او؟‏

• سانوں فیصلے کردے ویلے ایہہ خیال کیوں رکھنا چاہی دا اے کہ دُوجیاں نُوں کوئی ٹھیس نہ پونچے؟‏