AN̈KEJAYOʼOYI 35
Juutypɨk tan̈wɨpɨkpa tanjɨɨxi
Tantumpɨytyam tampɨkta’mpa jɨɨxiyaj tumtum jaama. Y ja’yan̈ yɨ’pyaj jɨɨxiyaj tɨgɨyku’mpa kun je’m tan̈wɨnanɨgo’oyi kun Jehová y je’m tañityijom. Ju’uts akwiñkejo’oyi, wɨapsɨ iga tanjɨɨspa juuty taitypa, juutypɨk tanamatspaktaap y siiga tan̈komɨ’yba o dya’. Siiga tampɨkpa wɨtampɨk jɨɨxiyaj, tamaymayaap y tammaymaywatpatyim Jehová.
1. ¿Juutypɨk wɨap miyooxpa’t je’m Biblia iga in̈wɨpɨguiñ iñjɨɨxi?
Wiñtyi iga impɨguiñ tuum jɨɨxi, an̈wejpa’atɨ Jehová iga miyooxpa’dyiñ. Y maayɨ’ je’m Biblia iga iñjoodon̈aiñ tyi ijɨɨspa je’ (maayɨ’ Proverbios 2:3-6). Jehová tachi’iba an̈ki’mayo’oyiyaj iga tayooxpa’tpa tan̈wɨpɨk tanjɨɨxi. Y jesɨk tan̈kupɨkpa tsaam tawɨwada’yba.
Pero ¿tyi naspa siiga je’m Biblia dya’ tawɨnɨ’ma’yba tyi wɨɨ iga tan̈wadyiñ? Jehová tajɨɨxian̈chi’iba, «min̈keja’yba je’m tun̈ juuty wɨɨ iga miñɨguiñ» (Isaías 48:17). ¿Juutypɨk iwatpa? Ikuyukmɨ je’m jɨɨxian̈chio’oyiyaj itywɨ’ɨp Bibliajom, yɨ’p tayooxpa’tpa tan̈kutɨ’ɨyɨy jempɨk ijɨɨspa y ijaampa Jehová. Jesɨk tammayba je’m nasɨyo’oyiyaj ityyajwɨ’ɨp Bibliajom tampa’tpa yɨ’pyaj jɨɨxian̈chio’oyiyaj. Siiga tan̈kutɨ’ɨyɨ’yba tyi ijɨɨspa Jehová tampɨkpa jɨɨxiyaj iga ikusu’nɨ’yba.
2. ¿Tyi wɨɨ iga iñjɨɨskupakneiñ wiñtyi iga impɨguiñ tuum jɨɨxi?
Je’m Biblia nɨmpa: «jempɨk jɨɨxiɨy nakuixtyaap» (Proverbios 14:15). Yɨ’p nɨmto’oba iga wiñtyi iga tampɨguiñ tuum jɨɨxi tan̈wɨkujɨɨxiñ y tanakwa’ktaiñ: «¿Ju’ptam an̈ki’mayo’oyiyaj ityyajwɨ’ɨp Bibliajom tɨgɨyku’mpa kun yɨ’p jɨɨxi? ¿Ayooxpa’tpa yɨ’p jɨɨxi iga odoy akobakpijiñ? ¿Juutypɨk iwɨwada’yba o imalwada’yba tun̈gakyaj je’m jɨɨxi ampɨkpa’ap? Y, ¿imaymaywatpa Jehová?» (Deuteronomio 32:29).
Dios jempɨk tanɨ’ma’yba tyi wɨɨ y tyi dya’ wɨɨ tan̈wat. Jesɨk tañixpɨga’yba je’m ian̈ki’mayo’oyiyaj y je’m ijɨɨxian̈chio’oyiyaj y tan̈kupɨkta’mpa, tanaitytya’mpa tuum wɨbɨk jɨɨxi. Je’m tanjɨɨxi jeex ju’uts tuum jɨɨyi iga tanɨ’ma’yba tyi wɨɨ y tyi dya’ wɨɨ tan̈wat (Romanos 2:14, 15). Siiga tanakkuyujkane’ je’m tanjɨɨxi iga tan̈wɨwatpa, tampɨkpa wɨtampɨk jɨɨxiyaj.
MAAJ TAN̈WƗKUYUJKAIÑ
Tan̈wɨkɨ’pin̈ta’miñ juutypɨk tayooxpa’tpa je’m tanjɨɨxi y je’m jɨɨxian̈chio’oyiyaj tachi’ipa’ap je’m Biblia.
3. A’mchiɨ’ iga je’m Biblia mijɨɨxian̈chi’iñ
¿Juutypɨk wɨap tajɨɨxian̈chi’ je’m Biblia jesɨk tampɨkta’mpa tuum jɨɨxi? A’mta’amɨ je’m VIDEO y an̈matta’amɨ tyi iñjɨɨsta’mpa y kutson̈ta’amɨ:
-
¿Ju’p xaaja tachi’iñe’ Jehová?
-
¿Tyi’iga Jehová taa’mchitya’mpa iga tanya’ak tampɨkta’miñ tanjɨɨxi?
-
¿Tyi tachi’iñeta’m Dios iga tayooxpa’tta’mpa tan̈wɨpɨk tanjɨɨxi?
Tana’miñ tuum akwiñkejo’oyi iga juutypɨk je’m Biblia wɨap tajɨɨxian̈chi’. Maytya’amɨ Efesios 5:15, 16. Okmɨ an̈matta’amɨ tyi wɨap in̈watta’m «iganam it́ tiempo» iga...
-
... tammayiñ je’m Biblia juchixkej.
-
... tatsɨ’ytya’miñ ju’uts tuum wɨbɨk wɨdyaaya’, wɨchoomo’, jaatun̈, aapa o maanɨk.
-
... tanɨguiñ je’m an̈tu’umaajiyaj.
4. An̈keja’ayɨ iñjɨɨxi iga juchixkej in̈wɨwadyiñ
Jesɨk ity tuum an̈ki’mayo’oyi iga tawɨan̈mada’yba tyi wɨɨ iga tan̈wadyiñ, dya’ tan̈ka’ tan̈wɨpɨk tanjɨɨxi. Pero ¿siiga dya’ i? A’mta’amɨ je’m VIDEO y an̈matta’amɨ tyi iñjɨɨsta’mpa y kutson̈ta’amɨ:
-
Ju’uts in̈kej je’m video, ¿tyityam iwat je’m yoomtɨwɨ iga wɨaiñ ipɨk tuum wɨbɨk jɨɨxi jempɨk imaymaywatpa Jehová?
¿Tyi’iga dya’ wɨɨ iga tun̈gakyaj tanɨ’mayyajiñ tyi tan̈watpa? Maytya’amɨ Hebreos 5:14 y an̈matta’amɨ tyi iñjɨɨsta’mpa y kutson̈ta’amɨ:
-
¿Tyi’iga wɨɨ iga cada tumtum de taɨchtyam tan̈kutɨ’ɨyɨ’yiñ tyi wɨɨ y tyi dya’ wɨɨ iga tan̈watta’miñ?
-
¿Tyityam wɨap tayooxpa’t iga tanan̈keja’yiñ tanjɨɨxi iga juchixkej tan̈wɨwadyiñ?
Je’m tanjɨɨxi jeex ju’uts tuum mapa, tayooxpa’tpa tanjoodon̈a tyityam wɨɨ iga tan̈wadyiñ.
5. Naidya’ayɨ respeto jempɨk ijɨɨsyajpa tun̈gakyaj
Iga tantumpɨytyam takukakneta’m, dya’ tumtyi jɨɨxi tampɨkta’mpa. ¿Juutypɨk wɨap tanakwiñkejta’m iga tanaidyaytya’m respeto je’m tun̈gakyaj ijɨɨxi? Tana’mta’miñ wɨsteen akwiñkejo’oyi.
Akwiñkejo’oyi 1: Tuum yoomtɨwɨ iga ikusu’nɨ’yba inikɨn̈ta, nɨkpa kuyooxao’oyi tun̈gak kumunjom, y jeem ja’yan̈ yoomtɨwɨtam dya’ iwɨa’myajpa iga nakɨn̈yajtaiñ.
Maytya’amɨ Romanos 15:1 y 1 Corintios 10:23, 24, y an̈matta’amɨ tyi iñjɨɨsta’mpa y kutson̈ta’amɨ:
-
Ju’uts nɨmpa yɨ’pyaj versículos, ¿ju’p jɨɨxi wɨapsɨ iga ipɨkpa je’m yoomtɨwɨ? ¿Tyi in̈watpa siiga iñjɨɨxi mia’mchi’iba in̈wat algun tyi, pero tun̈gakyaj dya’ iwɨa’myajpa?
Akwiñkejo’oyi 2: Tuum tɨɨwɨ ijoodon̈ iga je’m Biblia dya’ nɨmpa iga malo siiga taukpa uxan̈, pero ipɨkpa ijɨɨxi iga je’ ni uxan dya’ ukpa. Tuum jaama an̈tu’umaap kun tun̈gak tɨwɨtam y ia’mpa iga je’eyaj sɨ’ iukyaj uxan̈.
Maytya’amɨ Eclesiastés 7:16 y Romanos 14:1, 10, y an̈matta’amɨ tyi iñjɨɨsta’mpa y kutson̈ta’amɨ:
-
Ju’uts nɨmpa yɨ’pyaj versículos, ¿ju’p jɨɨxi wɨap ipɨk je’m tɨɨwɨ? Y mich, ¿tyi in̈watpa siiga iña’mpa iga tun̈gakyaj iwatyajpa algun tyi jempɨk iñjɨɨxi dya’ mia’mchi’iba?
¿Tyityam wɨɨ iga in̈wadyiñ iga in̈wɨpɨguiñ iñjɨɨxi?
1. An̈wejpa’atɨ Jehová iga miyooxpa’dyiñ (Santiago 1:5).
2. Kua’mɨ yooxpado’oyi Bibliajom y je’m totjaayijomyaj iga in̈wɨpɨguiñ iñjɨɨxi. Wɨaptyim inimuru tun̈gak tɨwɨtam.
3. Kujɨɨsɨ juutypɨk jempɨk in̈watpa wɨap iwɨwaday o imalwaday je’m iñjɨɨxi o je’m tun̈gakyaj ijɨɨxi.
WEEÑI NƗMYAJPA IGA: «Mich wɨap in̈wat tyiam iñxunba. ¡Dya’ tyi ijoo tyi ijɨɨsyajpa tun̈gakyaj!».
-
¿Tyi’iga wɨɨ iga tanjɨɨskupakneta’miñ ju’uts in̈jaam Dios y je’m tun̈gakyaj jesɨk tampɨkpa tuum jɨɨxi?
JEMPƗK TAN̈KUYUJKA’
Tan̈wɨpɨkpa tanjɨɨxi jesɨk tan̈wɨkɨ’pin̈ba tyi ijɨɨspa Jehová y siiga tanjɨɨskupakne’eba iga jempɨk tan̈watpa iwɨwada’yba o imalwada’yba tun̈gakyaj.
¿Iñjɨɨspanam?
-
¿Juutypɨk wɨap impɨk wɨtampɨk jɨɨxiyaj jempɨk ikusu’nɨ’yba Jehová?
-
¿Tyi wɨap in̈wat iga in̈wɨpɨguiñ iñjɨɨxi?
-
¿Juutypɨk wɨap inikwiñkej iga iniidyay respeto jempɨk ijɨɨsyajpa tun̈gakyaj?
JODON̈AAJƗNAM
¿Juutypɨk wɨap impɨk jɨɨxiyaj jempɨk miyooxpa’tyajpa iga in̈wɨnanɨga’yiñ Dios?
«Tampɨkta’miñ jɨɨxiyaj ikuji’ppa’ap Dios» (La Atalaya, 15 de abril de 2011)
Kɨ’pin̈ɨ juutypɨk Jehová tajɨɨxian̈chi’iba.
A’mɨ tyi iyooxpa’t tuum pɨɨxiñ iga iwɨpɨguiñ ijɨɨxi mex iga tan̈ka’ idyɨk.
Wɨkɨ’pin̈ɨ juutypɨk wɨap tan̈wat jempɨk Jehová ixunba mex iga dya’ tachi’iñe’ tuum an̈ki’mayo’oyi juuty tawɨnɨ’ma’yba tyi wɨɨ y tyi dya’ wɨɨ tan̈wat.
«¿Nasuntaap juchixkej tuum an̈ki’mayo’oyi itywɨ’ɨp Bibliajom?» (La Atalaya, 1 de diciembre de 2003)
