IREN MEHN KASUKUHL 35

Ia Duwen Atail Kak Wiahda Pilipil Mwahu?

PLAY

Kitail koaros kin anahne wiahda pilipil kan. Tohto pilipil pwukat kak mwahu oh suwed ong kitail oh ong atail nanpwungmwahu rehn Siohwa. Karasepe, kitail pahn anahne pilada ia wasa kitail pahn kousoan, ia duwen atail kak wiahda mwohni me kitail anahne de ma kitail pahn pwopwoudida de soh. Ni atail kin wiahda pilipil mwahu kan, kitail kak ahneki mour nsenamwahu oh kaperenda Siohwa.

1. Ia duwen omw kak doadoahngki Paipel pwehn wiahda pilipil mwahu?

Mwohn omw wiahda pilipil ehu, kapakapki sapwellimen Siohwa sawas oh kilang sapwellime madamadau duwen irairo nan Paipel. (Wadek Lepin Padahk 2:3-6.) Ekei pak, Siohwa kin ketikihda kehkehlik sansal. Eri, pilipil keieu mwahu me ke kak wiahda iei peikiong kehkehliko.

Ahpw, ia duwen ma sohte kehkehlik sansal ehu nan Paipel me pahn padahkihong uhk dahme ke pahn wia? Siohwa pahn ketin pousehlahte kaweid uhk “nan ahl me ke pahn keid ie.” (Aiseia 48:17) Ia duwen? Mwein mie ire mehlel kan nan Paipel me kak kaweid uhk oh me kin kasalehda sapwellimen Koht madamadau oh pepehm kan. Kitail kin kalapw esehda sapwellimen Koht pepehm duwen irair ehu ni atail kin wadek Paipel. Ni atail kin wehwehkihla sapwellimen Siohwa pepehm, kitail kak wiahda pilipil kan me kin kaperenda kupwure.

2. Dahme ke anahne medewe mwohn omw wiahda pilipil?

Paipel mahsanih: “Aramas loalokong kin kanahieng [“medewe,” NW] arail kahk koaros.” (Lepin Padahk 14:15) Met wehwehki me mwohn atail wiahda pilipil ehu, kitail anahne ahnsou en medewe mwahu duwen atail pilipil kan. Ni omw medewe mwahu duwen pilipil kan, pein idek rehmw: ‘Mehnia ire mehlel en Paipel me pidada met? Pilipil dah me kak kihong ie popohl? Dahme meteikan pahn medewehki ei pilipilo? Ahpw, me keieu kesempwal, pilipil wet pahn kaperenda kupwuren Siohwa?’—Deuderonomi 32:29.

Siohwa ketin sapwellimanki pwuhng en padahkihong kitail dahme mwahu oh dahme suwed. Ni atail kin esehla sapwellime kosonned kan oh ire mehlel kan sang nan Paipel oh koasoanehdi en idawehn mepwukat, kitail kin kaiahnehda kadeikpen loalatail. Kadeikpen loalatail iei pepehm me kin padahkihong kitail dahme pwung oh sapwung. (Rom 2:14, 15) Kadeikpen loalatail me kaiahnda pahn sewese kitail en wiahda pilipil mwahu kan.

KALAUDEHLA OMW ESE MET

Sukuhlki ia duwen ire mehlel kan sang nan Paipel oh kadeikpen loalatail eh kak sewese kitail en wiahda pilipil.

3. Mweidohng Paipel en kaweid uhk

Ia duwen ire mehlel kan sang nan Paipel eh kak kaweid kitail ni atail wiahda pilipil kan? Kilang KISIN KASDO, oh mwuri koasoiapene peidek pwukat.

KISIN KASDO: Let Bible Principles Guide You (5:54)

Dahme Siohwa ketin mweidohng kitail en wia?
Dahme kahrehda Siohwa kin ketin mweidohng kitail en kak pein wiahda atail pilipil?
Dahme e ketikihda pwehn sewese kitail en wiahda pilipil mwahu kan?

Pwehn kilang ehu ire mehlel en Paipel, wadek Episos 5:15, 16. Mwuri koasoiapene ia duwen omw kak ‘doadoahngki mwahu omw ahnsou’ pwehn . . .

kaukaule wadek Paipel.
wiahla ohl de lih pwopwoud, pahpa de nohno, pwutak de serepein mwahu.
iang towehda mihting en mwomwohdiso kan.

4. Kaiahnehda kadeikpen loalomw pwe ken wiahda pilipil mwahu

Ni ahnsou me mie kehkehlik sansal ehu sang nan Paipel duwen irair ehu, e kin mengei en wiahda pilipil pwung. Ahpw ia duwen ma sohte mie soangen kehkehlik wet? Kilang KISIN KASDO, oh mwuri koasoiapene peidek wet.

KISIN KASDO: “Maintain a Good Conscience” (5:13)

Dahme sistero wia pwehn kaiahnehda kadeikpen loale oh wiahda pilipil ehu me pahn kaperenda kupwuren Siohwa?

Dahme kahrehda kitail en dehr peki meteikan en wiahda pilipil me pein kitail anahne wiahda? Wadek Ipru 5:14, oh mwuri koasoiapene peidek pwukat:

Mendahki e mengei kitail en peki meteikan ren wiahiong kitail pilipil kan, dahme pein kitail anahne ese?
Dahme ke kak doadoahngki pwe ken kaiahnehda kadeikpen loalomw oh wiahda pilipil mwahu?

Duwehte map ehu, kadeikpen loalatail kin kaweid atail mour

5. Wauneki kadeikpen loalen meteikan

Aramas akan kin wiahda pilipil kan me wekpeseng. Ia duwen atail kak wauneki kadeikpen loalen meteikan? Medewehla karasepe riau pwukat:

Karasepe 1: Sister men me kin perenki makeup keseula nan mwomwohdiso ehu me sister tohto kin soansuwedki ni ar kilang meteikan makeup.

Wadek Rom 15:1 oh 1 Korint 10:23, 24, oh mwuri koasoiapene peidek pwukat:

Dahme sistero ele pahn pilada ni eh doadoahngki iretikitik pwukat? Dahme ke pahn wia ma kadeikpen loalen aramas emen medewe me e sapwung en wia mehkot ehu me ke medewe e sohte sapwung?

Karasepe 2: Brother men ese me Paipel sohte mahsanih me e sapwung en nim sakau en wai, ahpw e pilada en dehr nim. E iang kamadipw ehu oh kilang brother teikan niminim sakau.

Wadek Eklesiasdes 7:16 oh Rom 14:1, 10, oh mwuri koasoiapene peidek pwukat:

Dahme brothero ele pahn pilada ni eh doadoahngki iretikitik pwukat? Dahme ke pahn wia ma ke kilang aramas emen wia mehkot ehu me kadeikpen loalomw pehm me e sapwung?

Ia duwen omw kak wiahda pilipil mwahu?

1. Peki Siohwa en ketin seweseiuk pilada dahme ke pahn wia.—Seims 1:5.

2. Wia omw roporop nan Paipel oh sawaspen Paipel kan pwe ken diar ire mehlel kan me ke kak doadoahngki. Ke pil kak koasoiong Kristian koahiek kan.

3. Medewe dahme pilipilo pahn wiahiong kadeikpen loalomw oh meteikan.

EKEI ARAMAS KIN NDA: “Mie omw pwuhng en wia dahme ke men wia. Sohte katepen dahme meteikan medewe.”

Dahme kahrehda ke anahne medewe sapwellimen Koht pepehm oh pil en meteikan pepehm?

DAHME KE SUKUHLKIER

Kitail kin wiahda pilipil mwahu ni atail kin diarada sapwellimen Siohwa pepehm duwen irair ehu oh medewe ma atail wiewia kan pahn sewese meteikan de kamedekeirailla.