35 CAJ YACHACUY
¿Imanotaj ali caj ruraycunata acrashwan?
Cawayninchicho imata ruranapaj acrashganchipitami canga Jehovapa amistäninta chasquinapaj o manapis. Caway vidanchichoga yarpachacunchi ‘maychoraj cawashaj, imachoraj arushaj o piwanraj casacushaj’ nir. Ali cajcunata rurashganchipitami canga Jehovata cushichir cushi cushila goyäcunapaj.
1. ¿Imanoraj Biblia yanapäshunquiman ali caj ruraylata acranayquipaj?
Imalatapis ruranapaj captenga, ‘rurämanchuraj o manachuraj’ niycarga Diosninchita ruwacuy. Palabranchopis ashiy consejuncunata (leiriy Proverbios 2:3-6). Imata ruranapäpis Bibliacho guelgaraycaptenga calpachacuy cäsucunayquipaj.
¿Y imatapis ruranayquipaj caycaptiqui, y chaypaj Bibliacho ima consejulapis mana guelgaraycaptenga? Yarpachacuychu, Jehovaga pushashunqui “ali nänipa” aywanayquipaj (Isaías 48:17). Jehová pushashunayquipäga, Bibliata leishpayqui tapucunayqui ‘imataraj Jehová nin caypita, ruraptëga imanoraj pay ricacunga’ nir. Chaynoparaj ali cajcunalata ruranapaj acrashun. Jehovata cushichishganchimi imapitapis más ali canman.
2. Imatapis manaraj rurar, ¿imacunamanrätaj yarpachacushwan?
Bibliami nin: “Yarpaysapacunami ichanga imatapis manaraj rurar sumaj yarpachacunraj” (Proverbios 14:15). Chauraga imatapis manaraj rurar alichi canman yarpachacuptiqui ‘caycajtachu ruräman o caycajtachu’ nir. Caynopis tapucunquiman: “¿Bibliapa maygan consejuncuna yanapämanman? ¿Ali cajta mana ruraptëga imanoraj ricacushaj? ¿Waquincuna y quiquin Diosninchipis nengachuraj ‘cushicömi ima acrashgayquiraycur’?” (Deuteronomio 32:29).
Diosninchega imaypis nimäshunmi imataj ali caycan y imataj mana ali caycan. Palabrancho lapan guelgachimushgancunata reguirga y cäsucunapaj calpachacurga conciencianchega alimi ricacunga. Alita o mana alita ruraptinchega conciencianchimi musyachimashun (Romanos 2:14, 15). Conciencianchita Bibliawan ali yachachishga carga imaypis ali cajta acrashun.
SHUMAJ YACHACURCUNAPAJ
Masla yachacushun imanotaj Biblia tantiachimanchi ali cajcunalata rurar goyäcunapaj, conciencianchipis imano ali cananpaj.
3. Bibliaga yanapayculäshunquipämi
Cawayninchicho ali tantiaj canapaj, ¿imanotaj Biblia yanapämanchi? VIDEUTA ricapäcuy y caycunapita parlapacäriy:
-
Imatapis acracunapäga, ¿Jehovaga obligamanchichu?
-
Imatapis ruranapäga noganchipitami caycan, ¿imanir?
-
Imatapis ruranapaj noganchipita caycaptinpis, ¿imatataj Jehová goycalämashcanchi alicunalata rurar cawanapaj?
Juc texto tantiachimanchi ali cajcunata ruranapaj, leipäcuy Efesios 5:15, 16. Nircur caypita parlapacäriy: imanotaj “ima-aycanöpapis allita rurar” cawashwan...
-
... waran waran Bibliata leir.
-
... ali runa, ali warmi, ali tayta, o ali wamra car.
-
... lapan reuniuncunaman aywar.
4. Ali concienciayoj canayquipaj Bibliapita yachacuy
Imatapis ruranapaj o mana, Bibliacho guelgaraycaptenga öraga fácil canman cäsucunapaj. Pero ¿ima consejulapis mana yurimuptenga? VIDEUTA ricapäcuy y caypita parlapacäriy:
-
¿Chauraga imatataj chay pani rurargan conciencianraycur y Jehovata cushichinanraycurpis?
¿Alichuraj canman pitapis ‘nimay, cawaynëcho caytachu o wactachu ruräman’ nirla cawacuptinchi? Leipäcuy Hebreos 5:14 y caycunapita parlapacäriy:
-
‘Cayta ruray o wacta ruray’ waquincuna nimaptinchipis, ¿imanirtaj ali tantiaycur quiquinchi decidinanchi ‘caymi ali, cayga mana alimi’ nir?
-
¿Imacunataj yanapämänanchipaj caycan ali concienciayoj canapaj y cawayninchichopis ali ruraycunata acranapaj?
Conciencianchega juc mapa cuentami, yanapämanchi cawayninchicho ali nänilapa aywanapaj.
5. Waquincunapa conciencianta respetay
May chaycho winashga carmi waquincunawanga manami igualchu canchi. Chayraycur ¿imanirtaj waquincunapa conciencianta respetashwan? Mä ricärishun ishcaylata.
Yarpachacunapaj 1: Juc pani, ‘ali camaränäpaj’ nir, caranta shimintapis shumajraj pintacun; pero canan aywashgan mushoj congregaciunninchoga, cristiana masincunaga jucnopa rican chayno pintacoj hermanacunata.
Leipäcuy Romanos 15:1 y 1 Corintios 10:23, 24 y caycunapita parlapacäriy:
-
Cay textucunapita ali yachacur, ¿imataraj chay panilanchi ruranman? Y gampis, ¿imataraj ruranquiman waquincunapa conciencianta respetanayquipaj?
Yarpachacunapaj 2: Juc waugui ichicla vinulatapis o aguardientilatapis maliycuyta munanchu. Pero juc cuticho hermanucuna wasinman aywananpaj invitapäcun y chayman aywar rican waquin hermanucunata traguta upuycashganta.
Leipäcuy Eclesiastés 7:16 y Romanos 14:1, 10 y caycunapita parlapacäriy:
-
Cay textucunapita ali yachacur, ¿imataraj chay wauguilanchi ruranman? Y gampis, ¿imataraj ruranquiman waquincunapa conciencianta respetanayquipaj?
¿Imataraj ruranquiman ali cajta acranayquipaj?
1. Jehová Diostaraj mañacuy yanapäshunayquipaj (Santiago 1:5).
2. Yanapacuycunata ashiy Bibliacho y publicaciunninchicunachopis. Ali tantiaj hermanucunapis yanapäshunquimanmi.
3. Shumaj yarpachacuy: ‘¿ali cajta mana ruraptëga imanoraj ricacushaj?, ¿waquincunapis imanoraj ricacunga?’ nir.
WAQUINCUNA NIPÄCUN: “Ima munashgayquitapis ruracuy. ¡Pitaj imatapis nishunqui!”.
-
¿Imanirtaj aliraj yarpachacunanchi ‘waquincuna y quiquin Diospis imataraj nenga caypita’ nir?
ICHIC YACHACUY
Alita ruraycanchi, imatapis manaraj rurar, Jehová ima nishgantaraj cäsucur y waquincunapa concienciantapis respetar.
Yarpänapaj
-
¿Imanotaj ali ruraycunata acranquiman Jehovata cushichinayquipaj?
-
¿Imatataj ruranquiman ali concienciayoj canayquipaj?
-
¿Imata rurartaj waquincunapa conciencianta respetanquiman?
MASLATA YACHACUNAYQUIPAJ
Cawayniquicho imatapis ali deciderga, ¿imanoraj yanapäshunquiman Diosta masraj cuyanayquipaj?
“Diosta cushichej ali cajcunata ruray” (Wilacamoj, 15 abril quilla, 2011)
Masla tantiarcuy imanotaj Jehová consejamanchi.
Yachacuy imanotaj juc runa alapa calpachacurgan cawaynincho ali cajta acrananpaj.
Yachacuy imata rurashwan Jehovata cushichinapaj lapancho cäsucuptinchi.
“¿Lapancunapärächu Bibliacho mandatucuna canman?” (Wilacamoj, 1 diciembre quilla, 2003)
