YAĆHACHICUY 35
Allinta tantiayculmi decidiśhun
Imacta lulananchicpäpis tantiaśhunmi. Tantiaśhuntacmi mayćhu yaćhananchicpä, imaćhu trabajananchicpä ñatac casaracunanchicpä o manapis. Chaycunapi allinta tantiacuptinchic’a cushisham cawsacuśhun ñatac Jehovatapis cushichiśhunmi.
1. ¿Yanapaśhunquimanchun Bibliaca allinta decidinayquipä?
Imactapis lulayta munal, puntacta Jehovatam mañacunayqui. Ñatac Bibliaćhu ashinqui imactam pay piensan chaypi (liguicuy Proverbios 2:3-6). Bibliaćhu canmi mandatucuna imacta mana lulanayquipä o imacta lulanayquipä. Chaymi mas allin cäsucunayqui.
Pero ayveces Bibliaćhu manam canchu mandatucuna clarulla lulanapä o mana lulanapä, chaynü captinpis Jehová yanapamäśhunmi “allin caminup” pulinanchicpä (Isaías 48:17). ¿Imanuypam? Bibliaćhu cä yaćhachicuycunawan, yanapamäśhun allicta entindinapä Dios ima piensaśhanta ñatac munaśhanta. Taliśhuntacmi chay yaćhachicuycunata Diospa siervuncunapi liguil Bibliaćhu. Diospa ima piensaśhancunacta yaćhalculmi lulaśhun pay munaśhanta.
2. ¿Imacunamanmi pinsanayqui manalapis dicidil?
Bibliami nin, “tantiayniyüca […] tuquicta licaycul’a imactapis lulan” (Proverbios 14:15). Chayurá, decidinanchicpä puntacta allictalämi tantiaycuśhun. Chaymi, piensal tapucunanchic: “¿Mayannin Bibliapa-yaćhachicuynincunam yanapamanman? ¿Jawcachućh caman chayta lulalul? ¿Ima ninmanćha juccuna cayta lulaluptï? ¿Cushicunmanchućh Jehová cayta lulaluptï?” (Deuteronomio 32:29).
Jehovapa derechun canmi nïmananchicpä allin caśhanta o mana allin caśhanta. Diospa mandatuncunacta ñatac Bibliapa-yaćhachicuynincunacta yaćhal, chaycunacta cäsucul allin concienciayümi caśhun. Conciencianchicmi willamanchic śhun’unchicćhu mana allin caśhanta o allin caśhanta (Romanos 2:14, 15). Conciencianchic Bibliawan allin educaśha captin’a allintam decidiśhun.
MASTA YAĆHAYCUŚHUN
Yaćhaśhun masta Bibliapa-yaćhachicuynincunacta ñatac conciencianchicpis yanapamäśhunmi allinta decidinanchicpä.
3. Bibliapa niśhantanümi imactapis lulanqui
Bibliapa-yaćhachicuynincuna yanapamäśhunmi allinta pinsaycul decidinanchicpä. Licaśhun VIDEUCTA ñatac limaśhun caypi:
-
¿Ima regaluctam umalanchic Jehová?
-
¿Imapïmi Jehová umalanchic chay regaluta?
-
¿Ima yanapaycunactam Jehová umalanchic quiquinchicpï decidinanchicpä?
Licaśhun juc Bibliapa-yaćhachicuyninta, liguiśhun Efesios 5:15, 16. Chaypi’a limaśhun: ¿Imanuypam tiempunchacunquiman...
-
... Bibliata cada muyun liguinayquipä?
-
... esposuyquiwan, walmiquiwan, mamayquiwan, taytayquiwan o chuliquiwan canayquipä?
-
... utunacuycunaćhu canayquipä?
4. Educaśha concienciayquim yanapaśhunqui allinta decidinayquipä
Juc mandato mas clarulla captin’a mas facilmi cäsucuy. Pero mana clarulla captin’a, yaćhaycunanchicmi allinta Dios chaypi piensaśhanta. Licaśhun VIDEUCTA ñatac limaśhun caypi:
-
Video licaśhanchicnü, ¿imanuypam juc hermana educala conciencianta Diosta cushichinanpä?
¿Imapïmi mana ninanchicchu juccunacta ya’anchicpï decidinanpä? Liguiśhun Hebreos 5:14 ñatac limaśhun caypi:
-
Masqui juccunawan yanapachicuy allin captinpis, ¿imapïmi quiquinchic tantiacunanchic allin caśhanta o mana?
-
¿Imacunam yanapamäśhun allin conciencianchic cananpä ñatac allinta decidinanchicpä?
Conciencianchic juc mapanümi, yanapamanchic cawsayninchicćhu maypä linanchicpä.
5. Juccunapa conciencianta respetananchicmi
Llapanchicpis manam igualchu canchic, chaymi mana igualllachu imactapis piensanchic ñatac lulanchic. ¿Imanuypam licachichwan juccunapa conciencianta respetaśhanchicta? Cayćhu yaćhaśhun ishcay ejempluctam.
1: Juc hermananchictam ñawinta, shiminta pintacuyta gustala, payshi licula juc malcaman, chayćhu hermanacunashi mana allinpä licapäcula pintacuśhampi.
Liguiśhun Romanos 15:1 ñatac 1 Corintios 10:23, 24, ñatac limaśhun caypi:
-
Cay textucuna liguiśhanchicnü, ¿imactam lulanman chay hermanaca? Amtapis chaynü pasaśhuptiqui, ¿imactam lulanquiman?
2: Juc hermano yaćhan ashllay tragullacta upiay mana jucha caśhanta Biblia nishannü, pero pay decidila tragucta mana nunca upiananpä. Payta invitaycula juc utunacuyman chayćhushi licala hermanucunata ashllay tragullacta upiayäta.
Liguiśhun Eclesiastés 7:16 ñatac Romanos 14:1, 10, ñatac limaśhun caypi:
-
Cay textucuna liguiśhanchicnü, ¿imactam lulanman chay hermanuca? Amtapis chaynü pasaśhuptiqui, ¿imactam lulanquiman?
¿Imam yanapaśhunquiman allinta decidinayquipä?
1. Jehovata mañacuy yanapayta (Santiago 1:5).
2. Ashiy yaćhachicuycunacta Bibliaćhu ñatac publicaciuncunaćhu chayćhumi yaćhanqui Dios niśhancunacta. Hermanucunactapis tapucunquimanmi.
3. Piensay imaćh pasaśhunquiman. ¿Imanuymi can’a concienciayqui? ¿Imanuytam licanman juccuna am lulaśhayquita?
WAQUINCUNA NIPÄCUN: “Munaśhayquita lulacuy, ama cäsuychu nunacuna niśhuśhayquita”.
-
¿Imapïmi respetananchic Dios piensaśhanta ñatac nunacuna piensaśhanta?
IMACTAM YAĆHALUNCHIC
Allinta decidinanchicpä yaćhananchicmi Jehová imanuy piensaśhanta ñatac tantiananchicmi lulaśhanchiccuna yanapanmanchun o llaquichinmanchun juccunacta.
Yalpaśhun
-
¿Imactam lulanayqui Jehovata cushichinayquipä lulaśhayquiwan?
-
¿Imactam lulanquiman concienciayquita educanayquipä?
-
¿Imanuypam licachinquiman juccunapa conciencianta respetaśhayquita?
MASTA YAĆHANAYQUIPÄ
¿Imanuypam decidinquiman Diosta cushichinayquipä? Chayta yaćhanayquipä liguiy.
“Tomemos decisiones que honren a Dios” (La Atalaya, 15 de abril de 2011)
¿Imanuypam Jehová yaćhachimanchic? Licay videucta.
¿Imactam lulala juc hombre Jehovata servinanpä? Licay videucta.
Bibliaćhu mana juc mandato captin, ¿imanuypam cushichinquiman Jehovata? Chayta yaćhanayquipä liguiy.
“¿Hace falta siempre un mandato bíblico?” (La Atalaya, 1 de diciembre de 2003)
