YACHANA PARTI 35

Imatas chara mana raushallata imatata yuyana angui

REPRODUCIR EN

Tucuigunami, alita mana alita rangahua anllana anchi. Imasaibi ñucanchi rangaraushcaga, ñucanchita yanapanata o turmintachinata ushan. Chasnallata, chi anllashcagunaga, Diosma caillayachinata o paimanda caruyachinatahuas ushan. Maibi causanata, imaibi tarbanata, cazaranata o mana cazaranata, caran amu anllana anchi. Alita rashaga, cushillami causashun, Jehovatas cushiyachishun.

1. Bibliaga imasata alita rangahua yanapaitucunchi

Imatas rangahua mana callarishallata, Jehovata mañasha yanapaita tapui. Bibliaibi mascasha, Dios imata yuyashcata tupai (Proverbios 2:3-6ta leipai). Jehovaga imasaibi caita rai nisha pasacta mandaitucunchi. Chasna nicpiga, pai mandashcatami casuna anchi.

Chasna acpihuas, Bibliaibi can ima ranata mana pasacta rimacpiga, imatata rana angui. Chasna tucucpiga, Jehovaga “maita rina ñambibi puringahua” pushaitucungui (Isaias 48:17). Chitaga, imasata ran. Jehovaga Biblia yachachishcagunahuanmi pushaitucunchi. Biblia yachachishcagunaga, Jehova imasa yuyashcata, imasa sintishcata intindingahua yanapaitucunchi. Biblia cuintashcata leishaga chita intindinchi. Jehovata imata gustashcata, ima mana gustashcata yachanaga, imatas alita rangahua yanapaitucunchi.

2. Imatas mana raushallata imatata yuyana angui

Bibliaga nin, “sabiru runaga imatas chara mana raushallata alitami yuyan” (Proverbios 14:15). Caiga intindichitucunchi, imatas mana rangaraushallata, punda alita yuyarina manchi. Imata rangahua anllaushaga, tapuri: “Caita mana raushallata, Biblia ima nishcagunatata yachana ani. Cai rangaraushcaga, cungaillachu sintichihuanga. Ñuca rangaraushcaga, shuccunata yanapangachu. Caiga, Jehovata cushi sintichingachu” (Deuteronomio 32:29).

Ima ali ashcata, ima mana ali ashcataga, Jehovallami nitucunchi. Dios mandashcagunata, Biblia yachachishcagunata casunata munashaga, ali conciencia yuyaita charishun. Conciencia yuyaiga, ñucanchi ucuibi rimac shina man. Ali ashcata, mana ali ashcata rimaitucunchi (Romanos 2:14, 15). Bibliamanda ali yachachishca concienciaga, alita rangahua yanapaitucunchi.

CAIMANDA MASTA YACHAI

Biblia yachachishcaguna, ali conciencia yuyaita charinaga, imashina alita rangahua yanapashcata ricushun.

3. Biblia canda pushachun saqui

Biblia yachachishcagunaga, imasata alita rangahua pushaitucunchi. VIDEOTA ricuichi, huasha cai tapuigunamanda cuintanacuichi:

VIDEO: Biblia yachachishcaguna caran uras pushachun saqui (5:54)

Jehovaga ima lugar causaitata cuitucunchi.
Imahuata Diosca caran runata alita mana alita anllachun nisha saquira.
Jehovaga alita rangahua, imatata cuitucushcanchi.

Biblia yachachishcata ricungahua, Efesios 5:15, 16ta leichi. Huasha, “tucui uras alita rasha causangahua”, ima rana ashcata cuintanacuichi:

Bibliata caran punzha leingahua.
Ali cari, ali yaya, ali churi angahua.
Tandarina huasima ringahua.

4. Alita rangahua camba yuyai concienciata yachachi

Biblia mandashcata yachashaga, imatas anllangahua mana sinzhi chan. Pero can ima ranata Bibliaibi shuc mandashca mana tiacpigá. VIDEOTA ricuichi, huasha cai tapuimanda cuintanacuichi:

VIDEO: “Ali yuyai concienciata charichi” (5:13)

Cai video ricuchishca shina, cai paniga Jehova gustashcata rangahua, imasata paiba concienciata yachachira.

Shuccuna ñucanchimanda anllanauchun nisha, imahuata mana saquina anchi. Hebreos 5:14ta leichi, huasha cai tapuigunamanda cuintanacuichi:

Imasaibi shuccunata can ñuca shina asha, imatata ranguima nisha tapunchi. Chiga, mana ali chan. Imahuata caran amu ima ali acta anllana anchi.
Alita rasha causangahua, ñucanchi conciencia yuyaita alita yachachingahua, ima yanapaigunatata charinchi.

Ñucanchi conciencia yuyaiga, maita ringahua shuc mapa shina man. Ñucanchi causaibi imashina purinata yachachitucunchi.

5. Shuccuna rana munashcata balichi

Huinguna chican chican ashcamanda, imatas rangahua chicanda yuyanchi. Shuccuna rana munashcataga, imahuata saquinalla anchi. Caimanda, ishcai ejemplogunata ricushun:

Shuc: Ñahuita ahuirinata munac paniga, shuc congregacionma sirvingahua rin. Chi congregacionbi paniguna, maican ñahuita ahuirishcata ricushaga, mana alita sintirinaun.

Romanos 15:1 y 1 Corintios 10:23, 24ta leichi, huasha cai tapuigunamanda cuintanacuichi:

Cai textoguna nishca shina, cai paniga imatata rana an. Can raushca, cambaraicu ali ashcata yuyashahuas, shuc runata can raushca mana alita sintichicpiga, can imatata ranguima.

Ishcai: Shuc huauquiga yachanmi, Bibliaga ansa tragota upina mana ucha chan nin. Caita yachashahuas, paiga ima tragotas mana upinzhu. Shuc punzha, huauquigunaga paihuan micungahua cayanaun. Chibiga, paiguna ansa tragota upiushcata ricun.

Lucas 6:37 y Romanos 14:1, 10ta leichi, huasha cai tapuigunamanda cuintanacuichi:

Cai textoguna nishca shina, cai huauquiga imatata rana an. Maican cambaraicu mana ali ashcata racpiga, can imatata ranguima.

Alita rangahua imatata rana angui

1. Jehovata mañai, imata rangahua canda yanapachun (Santiago 1:5).

2. Imata rangaraushcata yachangahua, Bibliaibi, Bibliamanda apishca quillcagunaibihuas yanapaita mascai. Chasnallata, ashcata yachac huauquigunahuanbas cuintanacui.

3. Can rangaraushcaga, canda yanapanata o llaquichinata yuyai. Chasnallata, shuccunata imasa sintichinata yuyai.

MAICANGUNAGA CASNAMI NINAUN: “Can munashcata rai. Shuc runaguna yuyashcaga mana imas chan”.

Imahuata Dios yuyashcata, runaguna yuyashcatas balichina anchi.

IMATA YACHASHCANGUI

Imatas chara mana raushallata, Jehova imasa yuyashcatami yachana anchi. Chasnallata, ñucanchi rangaraushcaga shuccunata yanapangachu o llaquichingachu nisha yuyana anchi.