LEKCIJA 35
Sar te ana šukar odluke
Sarine valjani te ana odluke. O odluke so anaja len isi len baro vlijanie upri amende hem upro amaro odnos e Jehovaja. Na primer, šaj valjani te odlučina kote ka živina, sar te grižina amen bašo amare finansiska potrebe hem dali te khuva ko brako ili na. Keda anaja šukar odluke, amen šaj te ovel amen bahtalo životo hem te kera e Jehova bahtalo.
1. Sar šaj i Biblija te pomožinel tuke te ane šukar odluke?
Angleder te ane nesavi odluka, molin e Jehova baši pomoš hem istražin ki Biblija te šaj te haljove sar o Jehova dikhela ki adaja buti. (Čitin Izreki 2:3-6.) Bašo nesave bukja, o Jehova dengja jasno zapoved. Ko asavke situacie najšukar tano te šuna adaja zapoved.
Ama, so ako nane jasno zapoved ki Biblija bašo adava so valjani te kere? O Jehova tegani da ka vodinel tut „ko drumo koleste so valjani te dža“ (Isaija 48:17). Sar? Preku o načelija so arakhljovena ko leskoro Lafi. O bibliska načelija tane osnovna bibliska čačipa kola so pomožinena amenge te haljova so mislinela o Devel hem so osetinela bašo nesave bukja. But puti taro nesavo izveštaj ki Biblija šaj te sikljova so o Jehova mislinela baši nesavi buti. Keda džanaja sar o Jehova dikhela ki nesavi buti, ka šaj te ana odluke so ka keren le bahtalo.
2. Bašo so valjani te razmisline angleder te ane odluka?
Ki Biblija pišinela: „O pametno pazinela ko sekova plo čekori“ (Izreki 14:15). Adava značinela kaj angleder te ane nesavi odluka valjani te odvojne vreme hem te razmisline save opcie isi tut. Džikote kerea adava, puč tut: „Kola bibliska načelija važinena ki akaja situacija? Koja odluka ka anel mange andruno mir? Sar mli odluka ka vlijajnel upro javera? A soj najvažno, dali mli odluka ka kerel bahtalo e Jehova?“ (5. Mojseeva 32:29).
O Jehova isi le pravo te vakerel amenge soj tano šukar, a soj tano lošno. Keda zapoznajnaja šukar leskere zakonija hem načelija hem keda siem rešime te ikera amen ki lende, tegani ka razvina šukar sovest. I sovest tani čuvstvo so isi amen andre ki amende bašo adava soj tano ispravno, a soj pogrešno (Rimjanite 2:14, 15). Jekh šukar školujmi sovest ka pomožinel amenge te ana šukar odluke.
DOZNAJN POVIŠE
Sikljov sar o bibliska načelija hem amari sovest šaj te pomožinen amenge te ana šukar odluke.
3. Mukh i Biblija te vodinel tut
Sar šaj o bibliska načelija te pomožinen amenge te ana šukar odluke? Dikh o VIDEOKLIPI, a palo adava keren lafi bašo akala pučiba:
-
Soj tani i slobodno volja?
-
Soske o Jehova dengja amen slobodno volja?
-
So dengja amen o Jehova te šaj te ana šukar odluke?
Te šaj te dikhe jekh primer bašo biblisko načelo čitin Efešanite 5:15, 16, a palo adava keren lafi bašo akala pučiba. Sar šaj šukar te koristine tlo vreme...
-
te šaj te uspejne te čitine redovno i Biblija?
-
te ove pošukar bračno partneri, roditeli, čhavo ili čhaj?
-
te ove prisutno ko sostanokija?
4. Školujn tli sovest te šaj te anel šukar odluke
Lokho tano amenge te ana ispravno odluka keda isi jasno zapoved bašo adava ki Biblija. Ama, so ako nane jasno zapoved? Dikh o VIDEOKLIPI, a palo adava keren lafi bašo akava pučibe:
-
So kergja i phen ko videoklipi te šaj te školujnel pli sovest hem te anel odluka koja so ka kerel bahtalo e Jehova?
Soske na valjani te roda o javera te anen odluke namesto amende? Čitin Evreite 5:14, a palo adava keren lafi bašo akala pučiba:
-
Iako šaj amenge polokho o javera te anen odluka namesto amen, sepak so valjani sekoj amendar te sikljovel te kerel?
-
So šaj te pomožinel tuke te školujne tli sovest hem te ane šukar odluke?
Isto sar so i navigacija pomožinela amenge te arakha o ispravno drumo, agjaar amari sovest pomožinela amenge te ana šukar odluke
5. Poštujn e javerengiri sovest
Sarine amen siem različna hem adaleske na anaja o ista odluke. Sar šaj te sikava kaj poštujnaja e javerengiri sovest? Te dikha duj situacie:
1. Situacija: Jekh phen koja so mangela te šminkinel pe selinela pe ko jekh javer sobranie kote so bute phenjenge adava smetinela.
Čitin Rimjanite 15:1 hem 1. Korinkjanite 10:23, 24, a palo adava keren lafi bašo akala pučiba:
-
Sprema akala stihija, koja odluka šaj te anel i phen? So bi tu kerea, ako tli sovest dozvolinela tuke nešto te kere, ama sian nekasaja kaskiri sovest na dozvolinela leske te kerel adava?
2. Situacija: Jekh phral kanimo tano ko družibe kote so o phralja piena umereno alkohol. Ov džanela kaj i Biblija na zabraninela umereno te piel pe alkohol, ama sepak ov odlučinela te na piel ni najhari.
Čitin Propovednik 7:16 hem Rimjanite 14:1, 10, a palo adava keren lafi bašo akala pučiba:
-
Sprema akala stihija, koja odluka šaj te anel o phral? So bi tu kerea, ako dikhea kaj nekoj kerela nešto so tli sovest na dozvolinela tuke?
Kola čekorija ka pomožinen tuke te ane šukar odluke?
1. Molin e Jehova te pomožinel tuke te šaj te džane so te kere (Jakov 1:5).
2. Istražin ki Biblija hem ko amare publikacie bašo bibliska načelija so šaj te pomožinen tuke ki adaja situacija. Isto agjaar, šaj te kere lafi jekhe zrelo hristijanea.
3. Razmislin sar tli odluka ka vlijajnel upri tli hem e javerengiri sovest.
NESAVE ŠAJ VAKERENA: „Tut isi tut pravo te kere adava so mangea. Nane važno so o javera mislinena“.
-
Soske tano važno te la ko obzir e Devleskere hem e javerengere čuvstvija?
SO SIKLILEM
Amen šaj te ana šukar odluke keda sikljovaja sar o Jehova dikhela ki nesavi buti hem keda laja ko obzir sar amare odluke ka vlijajnen upro javera.
Sar ka odgovorine?
-
Sar šaj te ane odluke kola so ka keren bahtalo e Jehova?
-
Sar šaj te školujne tli sovest?
-
Sar šaj te sikave kaj poštujnea e javerengiri sovest?
ISTRAŽIN
Sar šaj te ane odluke kola so ka keren pozoralo tlo amalipe e Devlea?
„Donesuvaj odluki so koi kje go slaviš Bog“ (Stražarska kula taro 15 april 2011)
Sar šaj te ova poslušna e Jehovaske keda ko leskoro Lafi na pišinela so valjani te kera?
„Dali sekogaš ti treba bibliska zapoved?“ (Stražarska kula taro 1 dekemvri 2003)
Šaj isto ka interesinel tut
NAJČESTA PUČIBA
Sar izgledinela o biblisko kursi so nudinena e Jehovaskere svedokija?
Džikote ikerela pe o besplatno biblisko kursi, šaj te koristine bilo kova prevod tari Biblija. Ko kursi šaj te kanine nekas tari tli familija ili nesave amale.
