ADESUA 35

Kyɛbɔ Ekosisi Gyinaeɛ Pá Ɔ

BƆ

Yenu biala le gyinaeɛ bɔ odikyɛ osi ɔ. Sɔ gyinaeɛsilɛ nanu pẽe kɔhora kɔhã yɛ ne Yehowa afĩa adamvoafalɛ ne paa. Kyɛ nneasoɛ ne, ebia odikyɛ yesi nekaa bɔ yɛkɔtena, kyɛbɔ yɛkɔnea yɛnwo, anaa agyaa bɔ yekogya nwo gyinaeɛ. Sɛ yesi gyinaeɛ pá a, yɛnye kɔgye na yɛkɔ sɔ Yehowa nye.

1. Sɛɛ yeɛ Bible ne kɔhora kɔboka wɔ maa ekosisi gyinaeɛ pá ɔ?

Kora bɔ ekosi gyinaeɛ bie ne, bɔ Yehowa mbaeɛ pena ye mmokalɛ, na neanea Bible nanu pena Yehowa adwene wɔ sɔ gyinaeɛsi nanwo. (Kenga Anyandera 2:3-6.) Wɔ tebea pẽe nu ne, Yehowa afa mmraa bɔ enu la berɛ ama. Sɔ mmraa ne bɔ ekotie ne te gyinaeɛ bɔ ɔte pá tra biala bɔ ɛkɔhora kosi ɔ.

Na sɛ ɔkɔba kyɛ annya Bible nu mmraa biala bɔ ɔkɔmaa ekonwu bɔ odikyɛ ɛyɛ koso ɛɛ? Yehowa kɔhɔso kohyire wɔ “atẽe bɔ odikyɛ ɛfa so ɔ.” (Aizaya 48:17) Ɔkɔyɛ ye sɛ? Ebia na nnyinasoɛdwirɛ bie wɔ berɛ bɔ ɔkɔhora kɔboka wɔ ɔ. Bible nu nnyinasoɛdwirɛ te nahorɛ dwirɛ bɔ ɔmaa yenwu Yehowa adwene ne kyɛbɔ ɔte ngã wɔ nningyein nwo ɔ. Mmerɛ pẽe ne, sɛ yekonwu kyɛbɔ Nyameɛpiri te ngã wɔ nikyee bie nwo a, sana yɛkenga Bible nu dwirɛ bie. Sɛ yenwu kyɛbɔ Nyameɛpiri te ngã a, yɛkɔhora yekosi gyinaeɛ bɔ ɔsɔ yenye ɔ.

2. Kora bɔ ekosi gyinaeɛ bie ne, nzu yeɛ odikyɛ esusu yenwo ɔ?

Bible ne kã kyɛ: “Ebie bɔ ɔse nworɛ ne de, ɔnea ye agyirɛ tutulɛ ye.” (Anyandera 14:15) Ɛhe kyire kyɛ kora bɔ yekosi gyinaeɛ bie ne, odikyɛ yɛde mmerɛ yesusu yenwo yé. Mmerɛ bɔ esusu enu biala nwo ne, bisa wɔnwo kyɛ: ‘Bible nu nnyinasoɛdwirɛ beni yeɛ ngɔfa ngɔyɛ adwuma ɔ? Enu beni yeɛ sɛ mefa meyɛ adwuma a, ɔkɔmaa ngonya asomdwee ɔ? Sɛɛ yeɛ me gyinaeɛsi ne kɔhã afoforɛ ɔ? Bɔ ohia paa ne, aso ɔkɔmaa Yehowa nye kɔgye anaa?’—Deuteronomi 32:29.

Yehowa le yenwo atẽe kyɛ okyire yɛ bɔ ɔte pá ɔne bɔ ɔttemayé ɔ. Sɛ yenwu ye mmraa ɔne ye nnyinasoɛdwirɛ, na yesi yehue kyɛ yɛkɔfa yɛkɔyɛ adwuma a, ɔmaa yenya tiboa pá. Tiboa te nikyee bie bɔ ɔwɔ yenu bɔ ɔmaa yenwu pá ne tɛɛ ɔ. (Romanfoɛ 2:14, 15) Sɛ yɛtete yɛ tiboa yé a, ɔkora boka yɛ maa yesi gyinaeɛ pá.

SUA PẼE BOKASO

Sua kyɛbɔ Bible nu nnyinasoɛdwirɛ ne tiboa kora boka yɛ maa yesi gyinaeɛ pá ɔ.

3. Má Bible ne boka wɔ

Sɛ yesi gyinaeɛ ahoroɛ a, sɛɛ yeɛ Bible nu nnyinasoɛdwirɛ kɔhora kɔboka yɛ ɔ? Bɔ VIDIO ne, na susu nzɛmmisa hemɔ nwo.

VIDIO: Má Bible Nu Nnyinasoɛdwirɛ Boka Wɔ (5:54)

Akyɛdeɛ bɔ ɔsombo beni yeɛ Yehowa afa ama yɛ ɔ?
Nzuati yeɛ Yehowa ama yɛ atẽe kyɛ yɛbɔbɔ yesisi gyinaeɛ ɔ?
Nzu yeɛ wafa wama yɛ kyɛ ɔboka yɛ na yahora yasi gyinaeɛ pá ɔ?

Sɛ ɛpena kyɛ enwu Bible nu nnyinasoɛdwirɛ nwo nneasoɛ a, Kenga Ɛfesofoɛ 5:15, 16. Na nea kyɛbɔ “ɛkɔfa wɔ mmerɛ koli dwumaa yé” na . . .

ahora akenga Bible ne daa.
ahora ayɛ agyaa nu nwokãfoɛ, awofoɛ, anaa akwalaa pá.
ahora ahɔ asafo nhyiamu.

4. Tete wɔ tiboa yé na ahora asisi gyinaeɛ pá

Sɛ esi gyinaeɛ bie na sɛ twerɔnzɛn ne fa yenwo mmraa bɔ ɛnu laberɛ ma a, ɔnyɛ se kyɛ ekosi gyinaeɛ pá. Nakoso sɛ ɔkɔba kyɛ aanya yenwo mmraa biala koso ɛɛ? Bɔ VIDIO ne, na susu nzɛmmisa hemɔ anwo.

VIDIO: “Tira Tiboa Pá Nu” (5:13)

Wɔ vidio nanu ne, agyirɛ beni yeɛ aliemaa brasua ne tuli fa tetele ye tiboa, ná ɔmaa osili gyinaeɛ bɔ ɔsɔ Yehowa nye ɔ?

Nzuati yeɛ ɔnzɛkyɛ yɛmaa afoforɛ si gyinaeɛ ma yɛ ɔ? Kenga Hebrifoɛ 5:14, na susu nzɛmmisa hemɔ anwo:

Kyɛ ahãa yɛkɔmaa afoforɛ kosi gyinaeɛ kɔma yɛ ne, nzu yeɛ odikyɛ yɛbɔbɔ yɛyɛ ɔ?
Nzu yeɛ ɔwɔ berɛ bɔ ɔkɔhora kɔboka wɔ maa ɛkɔtete wɔ tiboa na ahora asi gyinaeɛ pá ɔ?

Tekyɛ map ne, yɛ tiboa boka yɛ maa yenwu nekaa bɔ odikyɛ yɛkɔ wɔ asetena nu ɔ

5. Kyire obuo ma afoforɛ tiboa

Nekaa bɔ bɛtetele ebie kora maa osi gyinaeɛ bɔ ɔte sorongo. Yɛkɔyɛ sɛɛ na yahyire obuo yama afoforɛ tiboa? Susu tebea nyɔ he anwo nea:

Tebea 1: Aliemaa brasua bie bɔ okuro yenye asĩ ne yenoa nwo tolɛ tu hɔle asafo bie bɔ aliemaa mmrasua bɔ bɛwɔ nu ne pẽe nwu sɔ nikyee ne a, ɔha bɛ nu.

Kenga Romanfoɛ 15:1 ɔne 1 Korintofoɛ 10:23, 24, na susu nzɛmmisa hemɔ anwo:

Sɛ ɛnea sɔ twerɔnzɛm ne a, nzu yeɛ ebia aliemaa brasua ne kosi gyinaeɛ kyɛ ɔkɔyɛ ɔ? Sɛ wɔ tiboa ma wɔ atẽe wɔ nikyeebie nwo ná sɛ ɔmma afoforɛ atẽe a, nzu yeɛ ɛkɔyɛ ɔ?

Tebea 2: Aliemaa bienzua bie se kyɛ, Bible ne ndwudwo ndia nzãa bɔ ebie kɔfa koli dwumaa wɔ atẽe pá so ɔ, nakoso wasi gyinaeɛ kyɛ ɔngɔno. Bato asaa bafrɛ ye maa wahɔ poentolɛ bie bɔ aliɛmaamɔ nnõ nzãa bo.

Kenga Ɔsɛngafoɛ 7:16 ɔne Romanfoɛ 14:1, 10, na susu nzɛmmisa hemɔ nwo:

Sɛ ɛnea sɔ ngyekyɛmue hemɔ a, nzu yeɛ ebia aliemaa ne kosi gyinaeɛ kyɛ ɔkɔyɛ ɔ. Sɛ enwu kyɛ ebie yɛ nikyeebie bɔ wɔ tiboa mma w’atẽe kyɛ ɛkɔyɛ a, nzu yeɛ ɛkɔyɛ wɔ yenwo ɔ?

Agyirɛ beni yeɛ odikyɛ ebie tu kora na wanya tiboa pá ɔ?

1. Bisa Yehowa ma ɔboka wɔ ma enwu bɔ odikyɛ ɛyɛ ɔ.—Yakobo 1:5.

2. Yɛ nhwehwɛmuɛ wɔ Bible ne, ɔne nwomaa ahoroɛ bɔ ogyi Bible so nanu, na pena nnyinasoɛdwirɛ bɔ ɛkɔhora kɔfa kɔyɛ adwuma ɔ. Ɛkɔhora koso kɔpena mmokalɛ kofi Kristofoɛ bɔ bele suanwu ne berɛ.