YE TI MANDA 35
Tongana nyen la e lingbi ti mû anzoni desizion?
E kue e yeke na adesizion ti mû. Mingi ti adesizion so apeut ti sara nzoni wala sioni na e nga na songo ti kamarade so e yeke na ni na Jéhovah. Na tapande, peut-être e doit ti mû desizion na ndö ti ndo so e yeke lango dä, kua wa la e yeke sara ti wara aye so e bezoin ni, e yeke sara mariage wala e yeke sara mariage ape. Tongana e mû anzoni desizion, e peut ti duti na ngia nga ti zia ngia na bê ti Jéhovah.
1. Tongana nyen la Bible apeut ti aidé mo ti mû anzoni desizion?
Kozo ti mû mbeni desizion, sambela Jéhovah ti aidé mo nga gbu li na ndö ti ye so Bible atene ti hinga bango ndo ti lo na ndö ti ye ni. (Diko aProverbe 2:3-6.) Na yâ ti ambeni ye, Jéhovah amû mbeni commandement polele. Tongana a yeke tongaso, tâ nzoni desizion so mo peut ti mû ayeke ti mä yanga ti lo.
Me ka tongana mbeni commandement ti Bible so afa na mo polele ye ti sara ayeke dä ape? Jéhovah ayeke fa na mo “lege so a lingbi mo tambela dä.” (Ésaïe 48:17). Lo yeke sara ni tongana nyen? Peut-être amama-ndia ayeke dä so apeut ti fa lege na mo. Amama-ndia ti Bible ayeke akpengba tâ tënë so afa abango ndo nga na atënë ti bê ti Nzapa. Fani mingi, e yeke hinga atënë ti bê ti Nzapa na ndö ti mbeni ye tongana e diko mbeni mbaï na yâ ti Bible. Tongana e hinga tënë ti bê ti Jéhovah awe, e peut ti mû adesizion so anzere na lo.
2. Aye wa la a yeke nzoni mo bâ ni kozo ti mû mbeni desizion?
Bible atene: “Zo so lê ti lo ahan agbu li kozo si lo bi gere ti lo.” (aProverbe 14:15). Tënë so aye ti tene so kozo ti mû mbeni desizion, a yeke nzoni e mû ngoi ti gbu li na ndö ti aye nde nde so e peut ti sara. Na ngoi so mo yeke bâ aye ni oko na oko, hunda terê ti mo: ‘Amama-ndia ti Bible wa la mbi peut ti sara kua na ni? Na popo ti aye so mbi peut ti sara, ti so wa la ayeke sara si mbi duti na siriri ti bê? Desizion ti mbi ayeke sara nyen na ndö ti amba ti mbi? Kota ye ni, eskê a yeke zia ngia na bê ti Jéhovah?’—Deutéronome 32:29.
Jéhovah ayeke na droit ti fa na e ye so ayeke nzoni na ye so ayeke sioni. Tongana e hinga andia nga na amama-ndia ti lo nga e leke na bê ti e ti ngbâ ti sara ye alingbi na ni, e yeke fa lege na conscience ti e. Conscience ti e ayeke mbeni ye so a dü e dungo na ni so ayeke fa na e so mbeni ye ayeke na lege ni wala ayeke na lege ni ape (aRomain 2:14, 15). Tongana e fa lege nzoni na conscience ti e, a yeke aidé e ti mû anzoni desizion.
GI TI HINGA AYE MINGI
Gi ti hinga tongana nyen la amama-ndia ti Bible nga na conscience ti e a-aidé e ti mû adesizion.
3. Zia si Bible afa lege na mo
Tongana nyen la amama-ndia ti Bible apeut ti fa lege na e na ngoi so e yeke mû adesizion? Zia VIDÉO ni, na pekoni kiri tënë na ahunda so:
-
Liberté ti soro ye ayeke nyen?
-
Ngbanga ti nyen la Jéhovah amû ni na e?
-
Nyen la lo mû na e ti aidé e ti sara kua na ni nzoni?
Ti hinga tapande ti mbeni mama-ndia ti Bible, diko aÉphésien 5:15, 16. Tongana nyen la mo peut ti ‘sara kusala nzoni na ngoi’ ti mo . .
-
ti diko Bible lakue.
-
ti ga nzoni koli ti wali wala wali ti koli, nzoni babâ wala mama wala nzoni molenge.
-
ti gue na abungbi ti congrégation.
4. Ti mû anzoni desizion, fa lege na conscience ti mo
Tongana mbeni commandement ti Bible ayeke polele na ndö ti mbeni ye, ti mû nzoni desizion ayeke ngangu ape. Me ka tongana mbeni commandement tongaso ayeke dä ape? Zia VIDÉO ni, na pekoni kiri tënë na ahunda so:
-
Na yâ ti vidéo ni, aye wa la mbeni ita-wali asara ti fa lege na conscience ti lo nga ti mû mbeni desizion so ayeke nzere na Jéhovah?
Ngbanga ti nyen la a yeke nzoni ape ti hunda amba ti e ti mû adesizion so e la e doit ti mû ni? Diko aHébreu 5:14, na pekoni kiri tënë na ahunda so:
-
Atâa so a yeke ngangu ape ti hunda na amba ti e ti mû adesizion na place ti e, aye wa la a yeke nzoni e wani e zia kangbi na popo ni?
-
Nyen la apeut ti aidé mo ti fa lege na conscience ti mo nga ti mû anzoni desizion?
Legeoko tongana ti so mbeni carte ayeke fa lege na zo, conscience ti e ayeke aidé e ti mû anzoni desizion
5. Ne conscience ti amba ti mo
Azo nde nde ayeke mû adesizion nde nde. Tongana nyen la e peut ti fa so e ne conscience ti amba ti e? Bâ aye use so apeut ti si:
Kozo ye ni: Mbeni ita-wali so aye mingi ti kpaka aye ti baba na lê ti lo nga na yanga ti lo ague na yâ ti mbeni congrégation so bê ti aita-wali mingi ayeke son tongana ala bâ zo asara ni.
Diko aRomain 15:1 nga na 1 aCorinthien 10:23, 24, na pekoni kiri tënë na ahunda so:
-
Ti gue oko na aversê so, ita-wali ni apeut ti soro ti sara nyen? Nyen la mo yeke sara tongana mo yeke na terê ti mbeni zo so conscience ti lo ake na lo ti sara mbeni ye so conscience ti mo amû lege na mo ti sara ni?
Use ye ni: Mbeni ita-koli ahinga so Bible ake na zo ape ti nyon sämba alingbi na ni, me lo soro ti nyon ni ape. A tisa lo na mbeni ndo, kâ lo bâ aita so ayeke nyon sämba.
Diko Zo-ti-fa-tene 7:16 nga na aRomain 14:1, 10, na pekoni kiri tënë na ahunda so:
-
Ti gue oko na aversê so, ita-koli ni apeut ti soro ti sara nyen? Nyen la mo yeke sara tongana mo bâ so mbeni zo ayeke sara mbeni ye so conscience ti mo amû lege na mo ti sara ni ape?
Aye wa la ayeke aidé mo ti mû anzoni desizion?
1. Hunda Jéhovah ti aidé mo ti hinga ye so mo peut ti sara.—Jacques 1:5.
2. Sara recherche na yâ ti Bible nga na ambeti ti e ti wara amama-ndia so mo peut ti sara ye alingbi na ni. Mo lingbi nga ti sara lisoro na aChrétien so akpengba.
3. Gbu li na ndö ti ye so desizion ni ayeke sara na ndö ti conscience ti mo nga na ti amba ti mo.
AMBENI ZO ATENE: “Zo ayeke na droit ti sara ye so lo ye. Bango ndo ti azo na ndö ti ye so zo asoro ti sara ayeke kota ye ape.”
-
Ngbanga ti nyen la a yeke nzoni e pensé na bango ndo ti Nzapa nga na ti ambeni zo?
NA NDURU TËNË
E yeke mû anzoni desizion tongana e hinga tënë ti bê ti Jéhovah na ndö ti mbeni tënë nga e bâ wala aye so e yeke sara ayeke aidé azo wala ayeke sara sioni na ala.
Dango bê
-
Tongana nyen la mo peut ti mû adesizion so anzere na Jéhovah?
-
Tongana nyen la mo peut ti fa lege na conscience ti mo?
-
Tongana nyen la mo peut ti fa so mo ne conscience ti amba ti mo?
GI NDA TI YE
Tongana nyen la mo peut ti mû adesizion so ayeke kpengba songo ti kamarade so mo yeke na ni na Nzapa?
“Mû adesizion so amû gonda na Nzapa” (Tour ti Ba Ndo ti lango 1 ti avril 2011)
Gi ti hinga ye mingi na ndö ti fason so Jéhovah ayeke mû na e wango.
Bâ aye so amû maboko na mbeni koli ti mû mbeni desizion so ayeke ngangu.
Gi ti hinga tongana nyen la mo peut ti zia ngia na bê ti Jéhovah na ngoi so lo mû commandement polele pëpe na ndö ti mbeni ye.
“A lingbi lakue mbeni ndia ti Bible afa lege na mo?” (Tour ti Ba Ndo ti lango 1 ti décembre 2003)
Bâ nga
ATËNË SO AZO AYEKE HUNDA KA
A-Témoin ti Jéhovah ayeke manda Bible na azo tongana nyen?
Mo peut ti sara kua na traduction ti Bible so mo ye na temps so a-Témoin ti Jéhovah ayeke manda Bible na mo senge senge. Mo peut ti tisa afami ti mo kue wala ambeni kamarade ti mo.
