FIANARA 35

Ino ty Hanampy Antsika Handramby Fanapahan-kevitsy Soa?

HANENTY

Mandramby fanapahan-kevitsy iaby tsika. Maro amy fanapahan-kevitsy rambesintsika ro misy vokany bevata amintsika noho ty fifandrambesantsika amy Jehovah. Mety hanapa-kevitsy mikasiky ty tanà hipetrahantsika, ohatsy, tsika na asa hivelomantsika, na amy resaky fanambalea. Laha soa ty fanapahan-kevitsy rambesintsika, le hahasoa antsika raha zay sady hampifalifaly ani-Jehovah.

1. Akory ty azonao ampiasà ty Baiboly mba hanampy anao handramby fanapahan-kevitsy soa?

Mivavaha amy Jehovah alohani-handrambesa fanapahan-kevitsy sady diniho ty Baiboly mba hahaiza ty fomba fihevitsini-Jehovah. (Vakio Ohabolana 2:3-6.) Avy le mazava ty didini-Jehovah amy raha sisany. Lafa amy raha ho zay, le ty fanoriha ani-didy iny ro fanapahan-kevitsy soa marè.

Ka akory laha tsy resahy amy Baiboly ao mazava ty raha teanao hatao? Mbo hitari-dala anao avao Jehovah ka “mampandeha anao amy lala tokony handehananao.” (Isaia 48:17) Amy fomba akory? Maro torolala afaky manampy anao amy Baiboly ao. Ho hitanao amy torolala rey ty fomba fihevitsini-Jehovah noho ty fihetseham-pony. Matetiky lafa mamaky tantara amy Baiboly ao tsika, le mahita hoe akory ty hevitsini-Jehovah mikasiky raha raiky. Lafa haintsika amy zay ty fomba fihevitsini-Jehovah, le afaky mandramby fanapahan-kevitsy mahafalifaly azy tsika.

2. Ino iaby ty raha tokony hodinihinao alohani-handrambesa fanapahan-kevitsy?

Mivola ty Baiboly hoe: “Ty olo mahihitsy mandiniky ty liany.” (Ohabolana 14:15) Midika zay fa alohani-handramby fanapahan-kevitsy tsika, le tokony handiniky soa mikasiky ty hevitsy horambesintsika. Lafa mandiniky ty hevitsy iaby azonao ifiliana iha, le anontaneo ty vatanao hoe: ‘Misy torolalani-Baiboly azo orihy va? Hilamy va ty saiko laha hifily ani-hevitsy io aho? Ino ty ho vokatsini-fanapahan-kevitsiko toy amin’olo hafa? Fa ty vatan-draha marè, hampifalifaly ani-Jehovah va fanapahan-kevitsiko toy?’—Deoteronomia 32:29.

Jehovah ro mana zo hivola amintsika hoe ino ty soa, le ino ty raty. Lafa mahay soa ty lalànany noho ty torolalany tsika sady tapa-kevitsy hanoriky ani-raha rey, le hiasa soa ty feoni-fieritseretantsika. Ty feoni-fieritsereta, le fahaiza anaintsika ao manampy antsika hanavaky ty soa noho ty raty. (Romanina 2:14, 15) Laha fa zatsy manoriky ty raha volanini-Baiboly ty feoni-fieritseretantsika, le hitariky antsika handramby fanapahan-kevitsy soa.

DINIHO LALIKY

Hodinihintsika marerè hoe manino ty torolalani-Baiboly noho ty feoni-fieritseretantsika ro manampy antsika handramby fanapahan-kevitsy.

3. Engao hitari-dala anao ty Baiboly

Manino ty torolalani-Baiboly ro afaky manampy antsika handramby fanapahan-kevitsy? Alefaso VIDEO toy, bakeo iaraho midiniky fanontanea retoa:

VIDEO: Engaho Hitari-dala anao ty Torolalani-Baiboly (5:54)

Engàni-Jehovah hanao ino tsika?
Manino ro engàni-Jehovah hana fahafaha hifily tsika?
Ino ty raha nameani-Jehovah mba hanampy antsika handramby fanapahan-kevitsy soa?

Misy torolalani-Baiboly toy, vakio Efesianina 5:15, 16. Bakeo iaraho midiniky hoe: Ino ty azo atao laha ta ‘hanararaotsy fotoa’ mba...

hamakia Baiboly tsy tampaky?
hanasoava ty fifandrambesa amy valy, anaky, ray aman-dreny?
hanatreha ty fivoriani-fiangona?

4. Zaro handramby fanapahan-kevitsy soa ty feoni-fieritseretanao

Mora ty mandramby fanapahan-kevitsy lafa hita mazava ty didini-Baiboly mikasiky raha raiky. Fe akory laha tsy resahini-Baiboly mazava raha zay? Alefaso VIDEO toy, bakeo iaraho midiniky fanontanea toy.

VIDEO: “Manàna Feoni-Fieritsereta Malio Avao” (5:13)

Ino ty nanampy ani-ranabavy tamy video teo iny, mba ho zatsy miasa soa ty feoni-fieritseretany, ka handramby fanapahan-kevitsy mahafalifaly ani-Jehovah?

Manino ro tsy mety laha olo hafa ro angatahintsika hanapa-kevitsy ho antsika? Vakio Hebreo 5:14, bakeo iaraho midiniky fanontanea retoa:

Mora ty mangataky ty hafa mba hanapa-kevitsy ho antsika. Fe ino ty raha azontsika kiraidraiky atao laha hentea andinin-teny io?
Ino ty fitaova afaky manampy antsika hanazatsy ty feoni-fieritseretantsika noho handramby fanapahan-kevitsy soa?

Sahala sarintany manampy antsika hahita ty lala tokony handehanantsika ty feoni-fieritsereta

5. Hajao ty feoni-fieritseretan’olo hafa

Samby hafa ty olo ka tsy hitovy mihintsy ty fanapahan-kevitsiny. Akory ty ampisehoantsika hoe manaja ty feoni-fieritseretan’olo hafa tsika? Diniho raha miseho roe retoa:

Raha miseho 1: Tea manao makiazy ty ranabavy raiky, fe hafahafa amy ty ranabavy amy fiangona vo nifindrany any ty olo manao makiazy.

Vakio Romanina 15:1 noho 1 Korintianina 10:23, 24, bakeo iaraho midiniky fanontanea toy:

Ino ty mety hataoni-ranabavy io laha manoriky ty raha volany amy andinin-teny reo ao ie? Ino ty hataonao laha misy raha raiky mety amy feoni-fieritseretanao kanefa tsy mety amy feoni-fieritseretan’olo hafa?

Raha miseho 2: Haini-rahalahy raiky hoe tsy raràni-Baiboly ty finoma toaky amy antonony, fe fa nanapa-kevitsy tsy hino toaky mihintsy ie. Nahazo fanasà hamonjy mariazini-mpiara-manompo ie, le nahita rahalahy vitsivitsy nino toaky lafa tany.

Vakio Mpitoriteny 7:16 noho Romanina 14:1, 10, bakeo iaraho midiniky fanontanea retoa:

Mety ho tapa-kevitsy hanao ino rahalahy io laha hentea andinin-teny reo? Ino ty hataonao laha mahita olo manao raha tsy mety amy feoni-fieritseretanao iha?

Ino ty dingana hanampy anao handramby fanapahan-kevitsy soa?

1. Mivavaha amy Jehovah mba hanampy anao hahita ze tokony hatao.—Jakoba 1:5.

2. Manaova fikaroha amy Baiboly, boky noho gazety mba hahitanao ty torolala azonao orihy. Afaky manontany Kristiana matotsy koa iha.

3. Diniho ty ho vokatsini-fanapahan-kevitsinao amy ty feoni-fieritseretanao noho ty feoni-fieritseretan’olo hafa.

MIERITSERITSY TY OLO SISANY HOE: “Afaky manao ze hitanao fa mety iha, fa tsy voatery hivaky loha amy ty raha mety hoeritseretin’olo hafa.”

Manino tsika ro tokony handiniky ty raha tsapa-Ndranahary noho ty olo hafa?

FAMINTINA

Handramby fanapahan-kevitsy soa tsika laha miezaky hahay ty fomba fihevitsini-Jehovah. Mila dinihintsika koa hoe ino ty ho vokatsini-raha ataontsika iny amin’olo hafa.

Famerena

Ino ty hanampy anao handramby fanapahan-kevitsy mahafalifaly ani-Jehovah?
Ino ty azonao atao mba ho zatsy hiasa soa ty feoni-fieritseretanao?
Akory ty ampisehoanao hoe manaja ty feoni-fieritseretan’olo hafa iha?

Daty nahavita ani-fianara toy:

Raha kendrè

Diniho ty raha tsy maintsy andrambesanao fanapahan-kevitsy, bakeo oriho dingana telo niresahy tamy efajoro hoe “ Ino ty Dingana Hanampy Anao Handramby Fanapahan-kevitsy Soa?”

Raha hafa:

Raha hafa kendrènao