LESONA 35
E Faapefea Ona Tatou Faia Filifiliga Lelei?
E tofu uma lava i tatou ma filifiliga e fai. O le tele o nei filifiliga e iai aafiaga iā i tatou ma la tatou faauōga ma Ieova. Mo se faataʻitaʻiga, e tatou te ono filifili po o fea e nonofo ai, pe faapefea ona maua tupe e tausia ai le aiga, ma pe e tatau ona faaipoipo. Pe a faia filifiliga lelei, o le a tatou maua se olaga fiafia ma faafiafiaina ai Ieova.
1. E faapefea ona fesoasoani le Tusi Paia iā te oe e faia filifiliga lelei?
A o leʻi faia se filifiliga, ia tatalo mo le fesoasoani a Ieova, ma iloilo le Tusi Paia po o le ā lana silafaga i le mataupu. (Faitau le Faataoto 2:3-6.) Ua saunia e Ieova faatonuga manino i nisi mataupu. O lea, o le filifiliga sili e tatau ona e faia, o le usiusitaʻi i na faatonuga.
Ae ā pe afai e leai se faatonuga manino i le Tusi Paia, e taʻu mai ai le mea e ao ona fai? O le a taʻitaʻia pea oe e Ieova “i le ala e ao ona e ui ai.” (Isaia 48:17) E faapefea? E iai mataupu silisili o le Tusi Paia, e mafai ona taʻitaʻia ai oe. O mataupu silisili, o upu moni faavae o loo faailoa mai ai le finagalo o le Atua ma ona faalogona. E masani ona tatou iloa le finagalo o le Atua i se mataupu, pe a tatou faitau i se tala i le Tusi Paia. O le malamalama i faalogona o Ieova, o le a tatou faia ai filifiliga e faafiafiaina ai o ia.
2. O ā mea e tatau ona e iloiloina a o leʻi faia se filifiliga?
Ua faapea mai le Tusi Paia: “O le tagata e iai le utaga mamao, e manatunatu i ona laasaga uma.” (Faataoto 14:15) O lona uiga, e tatau ona faaalu le taimi e manatunatu ai i a tatou filifiliga a o leʻi faia se faaiʻuga. A o e iloiloina filifiliga taʻitasi, ia fesili ifo: ʻO ā mataupu silisili o le Tusi Paia e ao ona ou faatatauina? O lē fea filifiliga ou te maua ai le filemu o le mafaufau? O le a faapefea ona aafia ai isi? Ae o le mea e sili ona tāua, pe o le a faafiafiaina ai Ieova?’—Teuteronome 32:29.
E iā Ieova le aiā e taʻu mai ai le mea e lelei ma le mea e leaga. Pe a tatou malamalama lelei ma maumauaʻi e mulimuli i ana tulafono ma mataupu silisili, ua tatou toleniina ai se lotofuatiaifo lelei. O le lotofuatiaifo, o se lagona i totonu o i tatou e iloa ai le mea saʻo ma le mea sesē. (Roma 2:14, 15) O se lotofuatiaifo e toleni lelei, o le a fesoasoani iā i tatou e faia ai filifiliga lelei.
SAʻILIʻILI ATILI
Iloilo atili pe faapefea ona aogā mataupu silisili o le Tusi Paia ma le lotofuatiaifo, i le faia o filifiliga.
3. Ia taʻitaʻia oe e le Tusi Paia
E faapefea ona taʻitaʻia i tatou e mataupu silisili o le Tusi Paia pe a faia filifiliga? Faaali le VITIŌ, ona talanoa lea i fesili nei:
-
O le ā le filifiliga saʻoloto?
-
Aiseā na tuuina mai ai e Ieova iā i tatou le filifiliga saʻoloto?
-
O le ā le fesoasoani ua ia saunia ina ia faaaogā lelei ai la tatou filifiliga saʻoloto?
Ina ia iloa se mataupu silisili o le Tusi Paia, faitau le Efeso 5:15, 16. Pe a uma, ona talanoa lea pe faapefea ona e “faaaogā tatau le taimi” e . . .
-
faitau ai le Tusi Paia i aso uma.
-
avea ai oe o se paaga faaipoipo lelei, se matua, se atalii po o se afafine lelei.
-
auai ai e lē aunoa i sauniga.
4. Ia toleni lou lotofuatiaifo e faia filifiliga lelei
Pe a iai se taʻiala manino mai le Tusi Paia e faatatau i se mataupu, e ono faigofie ona faia se faaiʻuga saʻo. Ae ā pe afai e leai se taʻiala manino? Faaali le VITIŌ, ona talanoa lea i le fesili lenei:
-
I le vitiō, o ā auala na faia e le tuafafine e toleni ai lona lotofuatiaifo, ma faia ai se filifiliga e faafiafiaina ai Ieova?
Aiseā e lē tatau ai ona tatou faia filifiliga mo isi? Faitau le Eperu 5:14, ona talanoa lea i fesili nei:
-
E ui e ono faigofie ona talosaga atu i isi e faia se filifiliga mo i tatou, ae o le ā e manaʻomia ona tatou faia?
-
O ā meafaigaluega ua tatou maua e toleni ai o tatou lotofuatiaifo, ma faia ai filifiliga lelei?
E pei o tatou lotofuatiaifo o se faafanua, e taʻitaʻia i tatou i le auala e tatau ona ui ai
5. Ia faaaloalo i lotofuatiaifo o isi
E eseese filifiliga e faia e tagata uma. E faapefea ona tatou faaalia le faaaloalo i lotofuatiaifo o isi? Iloilo ni faataʻitaʻiga se lua:
Faataʻitaʻiga 1: Ua siitia atu se tuafafine e fiafia i vali mata papanu, i se faapotopotoga e lē fiafia ai tuafāfine i na mea.
Faitau le Roma 15:1 ma le 1 Korinito 10:23, 24, ona talanoa lea i le fesili lenei:
-
Pe a fua i nei mau, o le ā e tatau ona faia e le tuafafine? O le ā e ao ona e faia pe a lē tutusa ō oulua lotofuatiaifo ma se tasi i se mataupu?
Faataʻitaʻiga 2: Ua iloa e se uso e lē faasāina i le Tusi Paia le taumafaina o sina ʻava malosi, ae ua ia filifili e na te lē inuina. Ua valaaulia o ia i se faatasiga, ma ua ia vaaia ai o loo taumafaina e nisi uso le ʻava malosi.
Faitau le Failauga 7:16 ma le Roma 14:1, 10, ona talanoa lea i fesili nei:
-
Pe a fua i nei mau, o le ā e tatau ona faia e le uso? O le ā e te faia, pe a fai e se isi tagata se gaoioiga e lē faatagaina oe e lou lotofuatiaifo e fai?
E faapefea ona faia filifiliga lelei?
1. Talosaga atu iā Ieova e fesoasoani iā te oe i le mea e ao ona fai.—Iakopo 1:5.
2. Ia fai saʻiliʻiliga i le Tusi Paia ma lomiga faale-Tusi Paia, ina ia iloa ai mataupu silisili e tatau ona faatatauina. E mafai foʻi ona e talanoa atu i se Kerisiano taʻumatuaina.
3. Ia iloilo aafiaga o lenā filifiliga i lou lotofuatiaifo, ma lotofuatiaifo o isi.
UA FAAPEA MAI NISI: “E pule lava oe i lau filifiliga. E lē manaʻomia ona popole fua i manatu o isi.”
-
Aiseā e tatau ai ona tatou amanaʻia faalogona o le Atua, ma isi tagata?
AOTELEGA
E tatou te faia filifiliga lelei pe a tatou malamalama i faalogona o Ieova i se mataupu, ma iloilo pe o le a fesoasoani a tatou gaoioiga i isi, pe o le a faatigā ai i latou.
Fesili Autalu
-
E faapefea ona e faia filifiliga e faafiafiaina ai Ieova?
-
E faapefea ona toleni lou lotofuatiaifo?
-
E faapefea ona e faaalia le faaaloalo i lotofuatiaifo o isi?
MANATU FAAOPOOPO
E faapefea ona e faia filifiliga e faamalosia ai lau faauōga ma le Atua?
“Ia Fai Filifiliga e Faamamaluina ai le Atua” (Le Olomatamata, Aperila 15, 2011)
Ia faalolotoina lou malamalama i le auala e aumaia ai e Ieova fautuaga.
Mātau po o le ā na fesoasoani i se tamāloa e faia ai se filifiliga faigatā.
Ia aʻoaʻo atili pe faapefea ona faafiafiaina Ieova pe a leai ni faatonuga patino i se mataupu.
“Pe E te Manaʻomia i Taimi Uma se Tulafono Faale-Tusi Paia?” (Le Olomatamata, Tesema 1, 2003)
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
