LES 35

Fa wi kan teki bun bosroiti?

PREI

Wi alamala musu teki bosroiti. Furu fu den bosroiti disi kan abi bun bakapisi noso takru bakapisi gi wi. Den kan meki taki wi tron moro bun mati fu Yehovah noso den kan meki taki wi nanga en pori. Fu eksempre, wi musu bosroiti pe wi o libi, sortu wroko wi o du, noso efu wi o trow. Te wi e teki bun bosroiti, dan wi o de koloku èn wi o meki Yehovah prisiri.

1. Fa Bijbel kan yepi yu fu teki bun bosroiti?

Fosi yu teki wan bosroiti, dan begi Yehovah fu yepi yu èn studeri Bijbel fu kon sabi fa a e si a tori. (Leisi Odo 2:3-6.) Son leisi a makelek fu teki wan bosroiti fu di Bijbel abi wet di e sori krin san Yehovah feni bun èn san a no feni bun. A moro bun sani di wi kan du na fu gi yesi na den wet disi.

Ma a no ala ten Bijbel abi wet di e sori krin san yu musu du. Toku Yehovah kan sori yu „a pasi di yu musu waka” (Yesaya 48:17). Fa a e du dati? Na ini Bijbel yu kan feni tekst di e sori fa Gado e denki fu son sani. Furu tron den tori na ini Bijbel e sori wi tu fa Gado e si son sani di sma e du. Te wi kon sabi fa Yehovah e denki, dan wi kan teki bosroiti di a feni bun.

2. San yu musu du fosi yu teki wan bosroiti?

Bijbel e taki: „A koniwan e luku bun pe a e poti en futu” (Odo 14:15). Disi wani taki dati fosi yu teki wan bosroiti yu musu go sidon denki san yu o du. Aksi yusrefi: ’Sortu Bijbeltekst e taki fu a tori disi? A bosroiti di mi o teki o meki mi firi bun noso a o gi mi moro broko-ede? Sortu bakapisi a bosroiti fu mi kan abi gi trawan?’ Èn a moro prenspari sani di yu musu aksi yusrefi na disi: ’Yehovah o breiti nanga a bosroiti di mi o teki?’—Deuteronomium 32:29.

Yehovah abi a reti fu taigi wi san bun èn san no bun. Dati meki wi musu du muiti fu kon sabi den wet fu en moro bun èn wi musu kon sabi fa a e denki. Te wi e meki muiti fu du sani soleki fa Yehovah wani, dan dati o meki taki a konsensi fu wi wroko moro bun. A konsensi e piki wi efu wi du wan sani di bun noso efu wi du wan sani di no bun (Romesma 2:14, 15). Te a konsensi fu wi e wroko bun, dan a o yepi wi fu teki bun bosroiti.

SORTU TRA SANI YU KAN LERI?

Wi o si fa Bijbel nanga a konsensi fu wi kan yepi wi fu teki bun bosroiti.

3. Suku rai na ini Bijbel

Fa Bijbel kan yepi wi fu teki bun bosroiti? Prei a FELEM èn taki fu den aksi disi:

FELEM: Meki Bijbel gronprakseri tiri yu (5:54)

Sortu moi kado Yehovah gi wi?
Fu san ede Yehovah meki wi na so wan fasi taki wi kan teki wi eigi bosroiti?
San a gi wi fu kan teki bun bosroiti?

Kon meki wi luku wan Bijbeltekst di kan yepi wi fu teki bun bosroiti. Leisi Efeisesma 5:15, 16 èn taki fu den aksi disi. Te yu e gebroiki ’a ten fu yu na wan koni fasi’, dan . . .

fa dati kan yepi yu fu leisi Bijbel ala dei?
fa dati kan yepi yu fu de wan moro bun trowpatna, fu de wan moro bun papa, wan moro bun mama, wan moro bun manpikin, noso wan moro bun umapikin?
fa dati kan yepi yu fu go na den konmakandra?

4. Wan konsensi di e wroko bun o yepi yu fu teki bun bosroiti

A kan makelek fu teki wan bosroiti te Bijbel abi wet di e sori krin san wi musu du. Ma san wi musu du efu wi no man feni wan wet na ini Bijbel di kan yepi wi nanga a bosroiti di wi musu teki? Prei a FELEM èn taki fu na aksi disi:

FELEM: „Tan abi wan bun konsensi” (5:13)

San a sisa du fu kon abi wan konsensi di e yepi en fu teki bosroiti di Yehovah feni bun?

Fu san ede wi no musu aksi tra sma fu teki bosroiti gi wi? Leisi Hebrewsma 5:14 èn taki fu den aksi disi:

A kan makelek fu aksi trawan fu teki bosroiti gi wi. Ma soleki fa a tekst e sori, dan san wi srefi musu du?
Sortu sani kan yepi yu fu kon abi wan konsensi di e yepi yu fu teki bun bosroiti?

Neleki wan karta, wi konsensi kan sori wi sortu pasi wi musu waka

5. Lespeki a konsensi fu tra sma

A no ala sma e teki den srefi bosroiti. Fa wi kan sori taki wi e lespeki den bosroiti di trawan e teki? Kon meki wi luku tu eksempre:

Eksempre 1: Wan sisa di lobi poti make-up e froisi go na wan gemeente pe den sisa no lobi en te sma e poti make-up.

Leisi Romesma 15:1 nanga 1 Korentesma 10:23, 24. Baka dati taki fu den aksi disi:

Te yu luku den tekst disi, dan san a sisa kan du? San yu o du te yu e du wan sani di no fowtu, ma a e trobi a konsensi fu wan tra sma?

Eksempre 2: Wan brada sabi taki Bijbel no e krutu wan sma di e dringi pikinso sopi. Ma toku a bosroiti fu no dringi sopi srefisrefi. A e go na wan fesa pe a e si taki wan tu brada e dringi sopi.

Leisi Preikiman 7:16 nanga Romesma 14:1, 10. Baka dati taki fu den aksi disi:

Te yu luku den tekst disi, dan san a brada ben kan bosroiti? San yu o du te yu e si taki wan sma e du wan sani di e trobi yu konsensi?

San kan yepi yu fu teki bun bosroiti?

1. Aksi Yehovah fu yepi yu fu teki wan bun bosroiti.—Yakobus 1:5.

2. Suku rai na ini Bijbel èn na ini den buku fu wi. Yu kan suku rai tu na lepi brada nanga sisa fu a gemeente.

3. Luku efu a bosroiti di yu o teki o gi yu konsensi fonfon noso efu a o trobi a konsensi fu trawan.

SON SMA E TAKI: „Yu kan du san yu wani. Yu no abi fu span nanga san tra sma e denki.”

Fu san ede wi musu hori den firi fu Gado nanga den firi fu tra sma na prakseri?

SAN YU LERI?

Wi o man teki bun bosroiti te wi e luku fa Yehovah e denki fu wan tori. Wi musu luku tu efu a sani di wi wani du o bun gi trawan noso efu a o tyari takru bakapisi kon gi den.