PĚNGANGĚNDUNGANG 35

Carane Měkoạ Putusang Mapaelẹ̌

MAINKAN

I kitẹ kěbị harusẹ̌ měkoạ putusang. Lawọ bọu manga putusang ene piạ pěngarune gěguwạ si kitẹ lai su pẹ̌dal᷊ahapị i kitẹ dingangi Yehuwa. Contone, i kitẹ aramanung harusẹ̌ měmutusẹ̌ mẹ̌tanạ su apa, kerea mědeạ doitẹ̌, arau měmutusẹ̌ gunang mẹ̌kawing. Mạeng i kitẹ měkoạ putusang mapaelẹ̌, pěbawiahi kitẹ sarung mal᷊uasẹ̌ kụ i kitẹ lai makal᷊uasẹ̌ si Yehuwa.

1. Kerea i kau botonge měpakẹ Alkitapẹ̌ gunang měkoạ putusang mapaelẹ̌?

Těntal᷊ang bědang tawe někoạ putusang, pẹ̌doạe pẹ̌dorong tul᷊ung si Yehuwa kụ pěmarikěsa Alkitapẹ̌ gunang měmanda kerea pěndang’E soal u sěmbaụ hal᷊ẹ̌. (Basa Amsal 2:3-6.) Su piram baụ hal᷊ẹ̌, Yehuwa něnadia parenta mal᷊ahẹ. Mạeng i kitẹ tumuhụ parenta-Ne, ene kai putusang kapaelange.

Kerea mạeng tawẹ apa parenta mal᷊ahẹ su Alkitapẹ̌? Yehuwa sěntiniạ měngẹ̌ngahạ si kau ”su ral᷊eng harusẹ̌ dal᷊engangu”. (Yesaya 48:17) Kerea carane? Piạ lawọ prinsipẹ̌ botonge makaahạ si kau. Prinsip Alkitapẹ̌ kai katěngadẹ̌ dasarẹ̌ nělahẹ tiněna dingangu pěndangu Mawu. Kasauange i kitẹ makasingkạ kerea pěndangu Mawu soal u sěmbaụ hal᷊ẹ̌ mạeng i kitẹ mẹ̌basa sěmbaụ běke su Alkitapẹ̌. Su tempong i kitẹ makasingkạ kerea pěndang i Yehuwa, i kitẹ botonge měkoạ putusang makal᷊uasẹ̌ naung’E.

2. Apa harusẹ̌ tiněnangu těntal᷊ang bědang tawe někoạ putusang?

Alkitapẹ̌ naul᷊ị, ”Taumata matahuěna mẹ̌timbang kěbị lempange.” (Amsal 14:15) Ini mangal᷊ene těntal᷊ang bědang tawe někoạ sěmbaụ putusang, i kitẹ harusẹ̌ mẹ̌tiněna soal u putusang sarung koateng. Kěnang pẹ̌tiněna, ’Prinsip Alkitapẹ̌ sude sarung paketangku? Apa putusang ini sarung makakoạ si siạ makapěndang dame su naung? Apa pengaruh putusangku su taumata wal᷊inẹ? Kụ limembong penting, apa putusang ini sarung makakoạ Yehuwa mal᷊uasẹ̌?’—Ulangan 32:29.

Yehuwa piạ hakẹ̌ gunang maul᷊ị si kitẹ sude mapia dingangu sude ral᷊akị. Mạeng i kitẹ makasingkạ manga hukung dingangu prinsip’E kụ tumol᷊e ene, i kitẹ nělatih hati nuraning i kitẹ. Hati nurani kai pěndang su ral᷊ungu naung i kitẹ kụ maul᷊ị sude nihino dingangu sude nẹ̌sal᷊a. (Roma 2:14, 15) Hati nurani seng nilatih sarung makatul᷊ung si kitẹ měkoạ putusang mapaelẹ̌.

BANGKA PAKARAL᷊UNG

Mahịe měngěndung kerea prinsip Alkitapẹ̌ dingangu hati nurani makatul᷊ung si kitẹ su tempong měkoạ putusang.

3. Balạe Alkitapẹ̌ měngahạ si kau

Kerea prinsip Alkitapẹ̌ makaahạ si kitẹ su tempong měkoạ putusang? Putarẹ̌ VIDEONE, bọu ene bisarai manga kakiwal᷊one.

VIDEO: Balạe Prinsip Alkitapẹ̌ Měngahạ si Kau (5:54)

Apa mangal᷊ene kawawebasẹ̌ gunang měmile?
Kawe nụe Yehuwa něgělị si kitẹ kawawebasẹ̌ gunang měmile?
Apa seng nighělị’E gunang mẹ̌tul᷊ung si kitẹ měkoạ putusang kapaelange?

Gunang měmanda sěmbaụ contoh prinsip Alkitapẹ̌, basa Efesus 5:15, 16. Bọu ene bisarai kerea i kau botonge ’měpakẹ tempo pakapia’ . . .

gunang marading mẹ̌basa Alkitapẹ̌.
tadeạu makoạ kawing, matimadẹ̌, arau anạ limembong mapia.
gunang duměnta su pěngangibadang.

4. Latih hati nuraninu gunang měkoạ putusang mapaelẹ̌

Su tempong piạ parenta mal᷊ahẹ su Alkitapẹ̌ soal u sěmbaụ hal᷊ẹ̌, měkoạ putusang nihino kakělaěng limembong gampang. Katewe, kerea mạeng tawẹ apa parenta mal᷊ahẹ? Putarẹ̌ VIDEONE, bọu ene bisarai kakiwal᷊one.

VIDEO: ”Diagạ Hati Nuraning i Kamene Tatapẹ̌ Burěsi” (5:13)

Su video ene, apa piram baụ hal᷊ẹ̌ nikoạ u sěngkatau saudari gunang melatih hati nuranine dingangu gunang měkoạ putusang makal᷊uasẹ̌ si Yehuwa?

Kawe nụe i kitẹ tawe wotonge mẹ̌dorong taumata wal᷊inẹ měkoạ putusang gunang i kitẹ? Basa Ibrani 5:14, bọu ene bisarai manga kakiwal᷊o ini:

Mẹ̌kiwal᷊o su taumata wal᷊inẹ soal u putusang apa harusẹ̌ koateng ěndịu kakělaěng limembong gampang. Katewe, tumuhụ ayatẹ̌ ini, i kitẹ harusẹ̌ makasingkạ soal u apa?
Apa seng nasadia kụ botonge makatul᷊ung si kau melatih hati nurani dingangu měkoạ putusang mapaelẹ̌?

Kere peta, hati nurani makatul᷊ung si kitẹ měmutusẹ̌ apa harusẹ̌ koateng su pěbawiahẹ̌

5. Pěngarěga hati nuraning taumata wal᷊inẹ

Putusang koatengu taumata ene nẹ̌tatěntang sěmbaụ su wal᷊inẹ. Kerea i kitẹ botonge měngarěga hati nuraning taumata wal᷊inẹ? Pẹ̌tiněna darua situasi ini:

Situasi 1: Sěngkatau saudari puluang měpakẹ makeup něngal᷊ing sarang sěmbaụ sidang, kụ su sidang ene lawọ saudari madiri měmanda taumata wal᷊inẹ měpakẹ makeup.

Basa Roma 15:1 dingangu 1 Korintus 10:23, 24, bọu ene bisarai kakiwal᷊o ini:

Tumuhụ manga ayatẹ̌ ini, putusang kerea ěndịu koatengu saudari ene? Apa sarung koatengu mạeng i kau ene dingangu taumata wal᷊inẹ kụ hati nuranine nẹ̌sěding si sie měkoạ sěmbaụ hal᷊ẹ̌, katewe hati nuraninu tawe nẹ̌sěding si kau měkoạ ene?

Situasi 2: Sěngkatau saudara masingkạ Alkitapẹ̌ tawe nẹ̌sěding měnginung alkohol, katewe i sie němile tawe měnginung. Bọu ene i sie nakoạ sarang sěmbaụ acara, kụ sene anạu sěmbaụ něnginung alkohol.

Basa Pengkhotbah 7:16 dingangu Roma 14:1, 10, bọu ene bisarai kakiwal᷊o ini:

Tumuhụ manga ayatẹ̌ ini, putusang kerea ěndịu koatengu saudara ene? Apa sarung koatengu mạeng i kau nakasilo taumata wal᷊inẹ někoạ sěmbaụ hal᷊ẹ̌ katewe hati nuraninu nẹ̌sěding si kau měkoạ ene?

Apa piram baụ hal᷊ẹ̌ makatul᷊ung si kau měkoạ putusang mapaelẹ̌?

1. Pẹ̌dorong tul᷊ungke si Yehuwa gunang měmutusẹ̌ apa harusẹ̌ koateng.—Yakobus 1:5.

2. Pěkoạ riset su Alkitapẹ̌ dingangu su publikasi dasare Alkitapẹ̌ gunang makaěbạ manga prinsipẹ̌ botonge paketangu. I kau lai botonge mẹ̌bisara dingangu anạu sěmbaụ apang matělang su rohani.

3. Pẹ̌tiněna apa pengaruh putusangu su hati nuraninu dingangu su hati nuraning taumata wal᷊inẹ.

PIẠ U NAUL᷊Ị: ”I kau piạ hakẹ̌ měkoạ apa ikẹ̌kapulunu. Kuhạe mẹ̌pandung pěndangu taumata wal᷊inẹ.”

Kawe nụe i kitẹ harusẹ̌ mẹ̌tiněna pěndangu Mawu dingangu pěndangu taumata wal᷊inẹ?

RINGKASAN

I kitẹ měkoạ putusang mapaelẹ̌ mạeng mẹ̌tiněna kerea pěndang i Yehuwa soal u sěmbaụ hal᷊ẹ̌ dingangu mạeng mẹ̌tiněna apa kakanoạ i kitẹ sarung makatul᷊ung taumata wal᷊inẹ arau makawahaya si sire.