LISOMO LYA 35

Kukita Siani Eevi Tukwate Bupinguzi Buweeme?

PLAY

Fwe bonse tuli twakwata bupinguzi. Bupinguzi buingi pakati ka bupinguzi butuli twakwata, kunti bwatukwasia ao kutuleetela maavia. Kabili kunti bwainoona ao kulumia bukibuza bwetu pamo ni Yehova. Kwa mufuano, kunti twapingula ku fuasi kwa kwikala, vya kupata nfalanga, kine twakaba kuupa ao kuupua ao abe. Kine twakwata bupinguzi buweeme, kunti twaaluka ni buikazi buli ni nsaansa, kabili kunti twamusaansamusia Yehova.

1. Kunti wabombia siani Bibilia eevi ikukwasie kukwata bupinguzi buweeme?

Ntaanzi ya kukwata bupinguzi, muloombe Yehova akukwasie. Kabili, keba mu Bibilia eevi umane Yehova vyali watontonkania palua bobo bupinguzi. (Some Tuswalo ni Mafunde 2:3-6.) Musita unge, Yehova ali watupeela malaizio alandilesie paswetele kintu kya kukita. Kunakila azo malaizio, i kintu kikilile kuwaama kya kunti ukite.

Ale kine Bibilia te ilandile paswetele kintu kya kunti ukite? Yehova wakaba kuya watwaliliile kukutungulula “mu nzila iupalile kwendamo.” (Isaya 48:17) Yehova wakaba kuya wakutungulula siani? Kuli mafunde a Bibilia ali kuviinda kukutungulula. Mafunde a Bibilia ni bisinka bya musinzi bilangiliile Leeza vyali watontonkania ni vyali waiunvua. Lingi lutuli twasoma mpunda ili mu Bibilia, tuli twamana Leeza vyali waiunvua mu aali kampanda. Kine twainika Yehova vyali waiunvua, kunti twakwata bupinguzi buli kumusaansamusia.

2. Ni biki biupalile kutontonkania ntaanzi ya kukwata bupinguzi?

Bibilia ili yalanda eevi: “Muntu akengeele ali watoosia kubalua lutanfu.” (Tuswalo ni Mafunde 14:15) I kulanda nangue ntaanzi ya kukwata bupinguzi, tupalile kukwata musita wa kutontonkania palua keelia kitukebele kukita. Ntaanzi ya kukita kintu, iipuzie eevi: ‘Ni mafunde ki a Bibilia ali kunkwasia? Nkitepo kalipi eevi nkabe kuya nali ni mutende mu maano? Eba, bupinguzi bwane bwakaba kwinoona kampingu ao zamiri ya bantu bange? Kiipuzio kya mana saana ni keeki: Eba, bupinguzi bwane bwakaba kumusaansamusia Yehova?’—Malanguluzi a Mizilo 32:29.

Yehova ali ni nsaambu ya kutubuila kintu kiweeme ni kibiipile. Kine twamana buino mizilo yakue, mafunde akue ni kuakoonka lyonse, tuli kwaluka ni kampingu kaweeme. Kampingu ni buviinde buli mukati mwetu bwa kwinika kiweeme ni kibiipile. (Baroma 2:14, 15) Kine kampingu keetu kabeeleziiziwe, kakaba kutukwasia kukwata bupinguzi buweeme.

TUKEBE SAANA

Tumone mafunde a Bibilia pamo ni kampingu keetu vibili kutukwasia musita wa kukwata bupinguzi.

3. Lekela Bibilia ikutungulule

Musita utwakeba kukwata bupinguzi, mafunde a Bibilia kunti atukwasia siani? Mone VIIDEO, kisia londoluele beebi biipuzio.

VIIDEO: Lekela Mafunde a Bibilia Akutungulule (5:54)

Yehova atupeele nsaambu ya kukita ki?
Juu ya ki Yehova waatupeele buntungua ao uuru wa kusaakula?
Waatupeele kintu ki kya kutukwasia kukwata bupinguzi bukilile kuwaama?

Eevi mumone mufuano umo wa lifunde lya Bibilia, some Baefeso 5:15, 16. Kisia, londoluele vimuli ‘kubombia buino musita onse umuli nao’ eevi . . .

kusoma Bibilia kila busiku.
kwaluka mulume ao mukazi aweeme, muviazi ao muana aweeme.
kuya ku kulonghaana.

4. Beelezia kampingu kobe eevi ukwate bupinguzi buweeme

Kunti kyamoneka kyaleengele kukwata bupinguzi buweeme kine Bibilia ilandile paswetele palua buavia butuli nabo. Ale kine te pali malaizio alandile paswetele? Mone VIIDEO, kisia londoluele keeki kiipuzio.

VIIDEO: “Twalilila kuya wali ni Kampingu Kaweeme” (5:13)

Mu eezi viideo, ozu nkazi wakita ki eevi abeelezie kampingu kakue ni kukwata bupinguzi bwa kuti bumusaansamusie Yehova?

Juu ya ki te tupalile kulanda bange batupinguile? Some Baebrania 5:14, kisia londoluele beebi biipuzio:

Anzia kine kunti kyamoneka kyaleengele saana kubeepuzia bange batupinguile, tupalile kuya twali ni buviinde bwa kukita ki?
Ni mpapulo ki ili kukukwasia kulumia kampingu kobe ni kukwata bupinguzi buweeme?

Karte, ili yakwasia muntu amane kwapalile kuya. Ni kampingu keetu, kali katukwasia kumana keelia kitupalile kukita mu buikazi bwetu

5. Kindika kampingu ka bantu bange

Paantu fwe bantu tupuseene, tuli twakwata bupinguzi bwapuseene. Kunti twalangilila siani nangue tukindikile kampingu ka bantu bange? Mona eezi mifuano ibili:

Mufuano wa 1: Nkazi umo olia ali waisuba bya kwifuanizia , wakuukila mu kilonghaano muli ba nkazi bengi basiizi kutona kumona muntu wakita evio.

Some Baroma 15:1 ni 1 Bakorinto 10:23, 24, kisia londoluele beebi biipuzio:

Kukoonkana ni aza maleembo, ozo nkazi apalile kupingula kukita ki? Weewe pa lobe, kine uli pamo ni muntu wakaaniiwa na kampingu kakue kukita kintu keelia kiwalandua na kampingu kobe ukite, kunti wakita siani?

Mufuano wa 2: Lupua umo amanine nangue Bibilia te ikaaniizie kumina bualua wailingiliile. Inzi, wasaakula te kunti amine ata tuniini. Bamukupa aye ku maliila ni kooko wamonako ba lupua bali mukumina bualua.

Some Kasimika 7:16 ni Baroma 14:1, 10, kisia londoluele beebi biipuzio:

Kukoonkana ni aza maleembo, ozo lupua apalile kupingula kukita ki? Weewe pa lobe, kunti wakita siani kine wamona muntu unge wakita kintu keelia kya kulanda kampingu kobe nangue te kukita?

Kukita siani eevi ukwate bupinguzi buweeme?

1. Muloombe Yehova akukwasie umone kya kukita.—Yakobo 1:5.

2. Keba mu Bibilia ni mu mpapulo iswapiile Bibilia eevi upate lifunde lya kukukwasia. Kabili kunti wabeepuziako ni ba lupua ao bankazi bali ni kibeelezio.

3. Tontonkania kine bupinguzi buuli kukwata buli kwinoona ao kuwaamia kampingu ka bange.

BANGE BALI BALANDA: “Uli ni nsaambu ya kukita kyonse kiwatona. Te upalile kukoonka beelia bili byalanda bange.”

Juu ya ki tupalile kutontonkania vili vyaiunvua Yehova ni bantu bange?

MU KIFUPI

Tuli twakwata bupinguzi buweeme kine twamana Yehova vyali waiunvua palua keelia kitukebele kukita. Kabili, musita utuli twamana beelia bituli kukita kine bili kubakwasia bange ao kubakisia.