ITYOUGH 35
Er U Tsua Akaa sha Inja Yô
Se cii ka i gba u se tsua akaa a se er yô. Man akaa ne agen kpishi doo sha ci wase shi aa wase se u lun kôôsôô a Yehova, agen di doo sha ci wase ga shi aa fatyô u vihin ijende i se ye a Yehova la kpaa. Ikyav i tesen yô, alaghga a gba u se tsua ijiir i se lu man tom u se eren u zuan a inyaregh ki kuren mbamgbe asev gayô u eren kwase shin nom, shin eren ga. Shighe u se tsough akaa sha inja yô, ka i saan se iyol shi Yehova kpa i saan un iyol.
1. Bibilo ia wase u u tsua akaa sha inja nena?
Cii man u tsua kwagh yô, er msen, sôn Yehova wer a wase u shi time ken Bibilo sha er u fa mnenge na sha kwagh u u soo u eren la yô. (Ôr Anzaakaa 2:3-6.) Ashighe agen yô, Yehova ka a wa tindi sha kwagh wang. Nahan aluer ka kwagh u a we tindi sha mi yô, dondo tindi la, ka kwagh u hemban doon u u er je la.
Nahan kpa, aluer Bibilo kera wa tindi sha kwagh shon jighilii, u tesen we kwagh u u er ga di ye? Aluer ka nahan kpa, Yehova una ‘hemen we sha gbenda u ú zende sha mi’ yô. (Yesaia 48:17) Una er kwagh ne nena? Akaawan aa lu a aa fatyô u wasen we yô. Akaawan a Bibilo, ka akaa a mimi a ka a pase mhen u Aôndo kua mnenge na sha kwagh yô. Ashighe kpishi ka se fa mnenge u Aôndo sha kwagh zum u se ôr ma kwagh ken Bibilo yô. Ka sea faan mnenge na yô, se tsua u eren akaa a doon un.
2. Ka akaa a nyi nahan i doo u u vande henen sha mi cii ve u tsua kwagh u u ere?
Bibilo kaa ér: ‘Orfankwagh yô, ka nan ver ishima sha zende u nan.’ (Anzaakaa 14:15) Kwagh ne tese ér cii man se tsua kwagh u se er yô, doo u se tôô shighe se hen sha kwagh u se soo u eren la tsembelee. Er u lu henen sha akaa kposo kposo a u soo u eren la, pine iyol you wer: ‘Ka hanma kwaghwan u Bibilo nahan a zough sha kwagh nee? Akaa a m lu henen sha mi ne, ka hanmô me er ve ishima ia zam iyol ga? Kwagh u m soo u eren ne mbagen vea nenge un nena? Man u hemban cii yô, una doo Yehova kpa?’—Duteronomi 32:29.
Yehova ngu a ian i ôron se kwagh u i doo u se er man u se er ga yô. Ka sea faan atindi man akaawan a na tsembelee shi sea kange ishima u dondon a yô, se tsaase imoshima yase. Imoshima ka mfe u ken atô u ishima yase u ka a na se fa kwagh u a lu u dedoo man u bo la. (Mbaroma 2:14, 15) Aluer se tsaase imoshima yase yô, ia wase se u tsuan akaa sha inja.
HEN KWAGH I ZA SHIMI
Hen fa er akaawan a Bibilo man imoshima yase ka i wase se u tsuan akaa yô.
3. De Bibilo i hemen we
Akaawan a Bibilo aa wase shighe u se lu tsuan akaa la nena? Nenge VIDIO i i lu heen ne, maa lam nen sha mbampin mba ve dondo ne.
-
Ka iyua i injaa i nyi Yehova a ne se?
-
Er nan ve Yehova a ne se ian i tsuan kwagh u se soo ciilii?
-
Ka nyi Yehova a ne se i wasen se u tsuan akaa sha injaa?
Wea soo u fan ma kwaghwan u ken Bibilo yô, ôr Mbaefese 5:15, 16. Maa pase er u fatyô u ‘eren kwagh a shighe wou sha inja’ sha u . . .
-
ôron Bibilo hanma shighe yô.
-
hingir nom shin kwase shin ormaren gayô wan u injaa yô.
-
zan mbamkombo mba tiônnongo yô.
4. Tsaase imoshima you u tsuan akaa sha inja
Shighe u Bibilo i we tindi sha kwagh jighilii yô, ka i lu se ican u fan kwagh u a lu u vough la ga. Kpa aluer Bibilo kera wa tindi sha kwagh jighilii ga di ye? Nenge VIDIO i i lu heen ne, maa lam nen sha mpin u a dondo ne.
-
Ken vidio la, ka akaa a nyi nahan anmgbian u kwase la a er sha u tsaase imoshima na shi tsuan kwagh u una doo Yehova?
Er nan i doo u se ôr a mbagenev ser ve tsua akaa sha ci wase ga? Ôr Mbaheberu 5:14, maa lam nen sha mbampin mban:
-
Er alaghga a lu se zange u kaan ser mbagenev ve tsua akaa sha ci wase nahan kpa, ka nyi i doo u se ayol a ase se fa?
-
Ka nyi ia wase u u tsaase imoshima you shi tsuan akaa sha injaa?
Imoshima yase ka i wase se u fan kwagh u se er yô, vough er mape kpa ka a wase or u fan ape nan lu zan la nahan
5. Wa imoshima i mbagenev ikyo
Ior vea fatyô u tsuan akaa kposo kposo. Se tese ser se wa imoshima i mbagenev ikyo nena? Nenge ase akav a ahar ne:
Ikyav 1: Tôô wer anmgbian u kwase ugen u ka a soo u shighen akaa sha ishi kpishi yô, mough yem hen tiônnongo ugen ape anmgbianev mbakasev kpishi ka vea nenge mbagenev vea shighe akaa la ve i za ve iyol yô.
Ôr Mbaroma 15:1 man 1 Mbakorinte 10:23, 24, maa lam nen sha mbampin mban:
-
Sha kwagh u avur ne a ôr yô, anmgbian u kwase la una fatyô u eren nyi? Aluer u ngu vea or u imoshima i nan i yange nan u eren kwagh u we imoshima you i ne u ian i eren nahan u er nena?
Ikyav 2: Anmgbian u nomso ugen fa er Bibilo i yange msôrom ma man akuma akuma ga yô, kpa a tsua ér una ma msôrom ga kuaa. Kpa mba lehe un iniongo igen, ze yô a nenge anmgbianev mbanomso mbagen mba man msôrom.
Ôr Orpasenkwagh 7:16 man Mbaroma 14:1, 10, maa lam nen sha mbampin mban:
-
Sha kwagh u avur ne a ôr yô, anmgbian u nomso la una fatyô u eren nyi? Aluer u nenge orgen ngu eren kwagh u imoshima you i yange u u eren nahan u er nena?
Ka akaa a nyi ka a wase or u tsuan akaa sha inja?
1. Sôn Yehova a wase u u fan kwagh u u er yô.—Yakobu 1:5.
2. Ker akaawan ken Bibilo man ken ityakeda i pasen Bibilo a a zough sha kwagh u u soo u eren la yô. Shi u fatyô u lamen a Mbakristu mba ve vie ken jijingi yô.
3. Hen fa er kwagh u u lu tsuan la una bende a imoshima you man imoshima i mbagenev la.
IOR MBAGENEV KA VE KAA ÉR: “U ngu a ian i eren kwagh u soo cii. Ityôkyaa ngi i wan mnenge u mbagenev ikyo ga.”
-
Er nan i gbe u se wa mnenge u Aôndo man u mbagenev ikyo?
KA NYI U HENE?
Ka sea tôv sea fa mnenge u Yehova sha kwagh shi sea gbidye kwar sea nenge aluer kwagh u se soo u eren la una wase mbagen shin una bula ve yô, kwagh la a wase se u tsuan akaa a se er la sha inja.
Mbampin mba umbur kwagh u i hen yô
-
U er nan ve u tsua akaa a aa doo Yehova?
-
U tsaase imoshima you nena?
-
U tese wer u wa imoshima i mbagenev ikyo nena?
SEER HENEN KWAGH
U tsua akaa a aa wase u u seer taver ijende i u ye vea Aôndo la nena?
Seer henen er Yehova ka a wa se kwagh yô.
Nenge kwagh u yange wase orgen tsua u eren kwagh u taver un tsung yô.
Hen fa er u er kwagh u doon Yehova shighe u a we tindi sha ma kwagh jighilii ga kpaa yô.
“Hanma Shighe yô Ka U Soo Wer Bibilo ma I We Tindi sha Kwagha?” (Iyoukura, Disemba 1, 2003)
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
