WEKELO 35
Woho wa mbɔsa tɛdikɔ t’amɛna
Sho tshɛ tekɔ la tɛdikɔ ta mbɔsa. Efula ka tɛdikɔ tɔsɔ kokaka monga l’etombelo w’amɛna kana wa kɔlɔ le so ndo lo diɔtɔnganelo diasaso la Jehowa. Ɛnyɛlɔ, sho koka mbɔsa yɛdikɔ yendana la dihole diayotodjasɛ, woho wayotokondjaka falanga ya ndjasɛnya, kana yɛdikɔ yendana la diwala. Naka sho mbɔsa tɛdikɔ t’amɛna, kete tayonga la lɔsɛnɔ l’ɔngɛngɔngɛnɔ ndo tayɔngɛnyangɛnya Jehowa.
1. Ngande wakokayɛ nkamba la Bible dia tɔ kokimanyiya dia mbɔsa tɛdikɔ t’amɛna?
La ntondo ka wɛ mbɔsa yɛdikɔ mɔtshi, lɔmba Jehowa ekimanyielo ndo nsɛdingola Bible dia mbeya kanyi yande lo dikambo diakɔ. (Adia Tokedi 2:3-6.) L’awui amɔtshi, Jehowa mbidjaka ɔlɛmbɛ wokɛma hwe. Laasɔ, yɛdikɔ yoleki dimɛna yakokayɛ mbɔsa ele ya nkitanyiya ɔlɛmbɛ ɔsɔ.
Ko akokaso nsala naka ndooko ɔlɛmbɛ wa lo Bible watotɛ hwe kɛnɛ kahombaso nsala? Jehowa ayotetemala kɔlɔmbɔla ‘lo mboka kahombayɛ nkɛndakɛnda.’ (Isaya 48:17) Lo ngande? Atɔndɔ amɔtshi kokaka kɔlɔmbɔla. Atɔndɔ wa lo Bible wekɔ akambo wa mɛtɛ watosholɛ tokanyi ndo woho wayaoka Jehowa. Mbala efula sho mbekaka woho wayaoka Jehowa lo dikambo dimɔtshi etena kadiaso ɔkɔndɔ ɔmɔtshi wa lo Bible. Naka tamboshihodia woho wayaoka Jehowa, kete tayɔsa tɛdikɔ tɔngɛnyangɛnya.
2. Awui akɔna wahombayɛ nkana yimba lɔkɔ la ntondo ka mbɔsa yɛdikɔ mɔtshi?
Bible mbutaka ɔnɛ: “Kanga kɛsɔ atokanaka yimba lo ena tshɛ katakolande.” (Tokedi 14:15) Dui sɔ nembetshiyaka dia la ntondo ka sho mbɔsa yɛdikɔ mɔtshi, sho la dia mbɔsa etena dia nkana yimba l’ɛsɔnwɛlɔ aso. Etena kasɛdingolayɛ ɔsɔnwɛlɔ tshɛ, yambola wate: ‘Naa atɔndɔ wa lo Bible wɔtɔnɛ la dui nɛ? Ɔsɔnwɛlɔ akɔna wayombisha ki ka lo yimba? Naa shɛngiya yayonga la yɛdikɔ yami le anto akina? Kɛnɛ koleki ohomba ele, onde yɔ yayɔngɛnyangɛnya Jehowa?’—Eohwelo k’Ɛlɛmbɛ 32:29.
Jehowa mbele la lotshungɔ la totɛ kɛnɛ kele ɔlɔlɔ la kɛnɛ kele kɔlɔ. Etena kayaekesanyiyaso l’ɛlɛmbɛ ndo l’atɔndɔ ande ndo kayashikikɛso dia mbayela, sho mongaka la nkum’otema ka dimɛna. Nkum’otema ekɔ dikoka diaso dia lootɔ diatɛnya ɔnɛ dui kapanda diekɔ kɔlɔ kana diekɔ dimɛna. (Rɔmɔ 2:14, 15) Nkum’otema kambekiyama kayotokimanyiya dia mbɔsa tɛdikɔ t’amɛna.
NYOMOTSHIMOLA
Eka woho wakoka atɔndɔ wa lo Bible ndo nkum’otema tokimanyiya dia mbɔsa tɛdikɔ t’amɛna.
3. Etawɔ dia Bible kɔlɔmbɔla
Ngande wakoka atɔndɔ wa lo Bible tɔlɔmbɔla etena kɔsaso tɛdikɔ? Nyende VIDƐO, ndo oma laasɔ, nyɔkɛtshanya ambola wayela anɛ:
-
Naa woshasha wa nɛmɔ wakatosha Jehowa?
-
Lande na kakatosha Jehowa woshasha ɔsɔ?
-
Kakɔna kakandatosha dia tokimanyiya dia mbɔsa tɛdikɔ t’amɛna?
Dia mɛna ɛnyɛlɔ ka tɔndɔ dimɔtshi dia lo Bible, nyadia Ɛfɛsɔ 5:15, 16. Ndo oma laasɔ, nyɔkɛtshanya woho wakokanyu nkamba la “wenya anyu lo yoho yoleki dimɛna” dia . . .
-
mbadiaka Bible mbala la mbala.
-
nkoma olonganyi w’oshika, ombutshi w’oshika kana ɔna l’oshika.
-
mbɔtɔka lo nsanganya ya l’etshumanelo.
4. Ekiya nkum’otema kayɛ dia wɛ monga l’akoka wa mbɔsaka tɛdikɔ t’amɛna
Naka didjango dimɔtshi diokɛma hwe dia l’Afundelo diekɔ lo dikambo dimɔtshi, kete hatotonga l’okakanu dia mbeya kɛnɛ ka nsala. Ko ayotota naka ndooko didjango diendana la dikambo diakɔ? Nyende VIDƐO, ndo oma laasɔ, nyɔkɛtshanya dimbola diayela nɛ:
-
Lo vidɛo yɛnyiso, awui akɔna wakasale kadiyɛso dia mbekiya nkum’otema kande ndo mbɔsa yɛdikɔ yakahombe ngɛnyangɛnya Jehowa?
Lande na kahatahombe nɔmba anto akina dia mbɔsa tɛdikɔ lo dihole diaso? Nyadia Hɛbɛru 5:14, ndo oma laasɔ, nyɔkɛtshanya ambola anɛ:
-
Kaanga mbele bu wolo nɔmba anto akina dia vɔ mbɔsa tɛdikɔ lo dihole diaso, kakɔna kahombaso monga l’akoka wa shoamɛ ntshikitanya?
-
Dihomɔ diakɔna diele laso diakoka kokimanyiya dia mbekiya nkum’otema kayɛ ndo dia mbɔsa tɛdikɔ t’amɛna?
L’ɛnyɛlɔ ka kartɛ, nkum’otema kaso tokimanyiyaka dia mbɔsa tɛdikɔ t’amɛna lo lɔsɛnɔ
5. Lɛmiya nkum’otema k’anto akina
Anto mbɔsaka tɛdikɔ totshikitanyi. Ngande wakokaso mɛnya dia sho nɛmiyaka nkum’otema k’anto akina? Tɔsɛdingole akambo ahende anɛ:
Dikambo 1: Kadiyɛso kɛmɔtshi kalanga ndɔta ndo ndjalɛnga lo yoho mɔtshi ambonɔ l’etshumanelo kɛmɔtshi kele akadiyɛso efula wa lɛkɔ hawɔlɔtɛ kana hawoyalɛngɛ lo yoho shɔ.
Nyadia Rɔmɔ 15:1 ndo 1 Kɔrɛtɔ 10:23, 24, ndo oma laasɔ, nyɔkɛtshanya ambola anɛ:
-
Lo ndjela avɛsa anɛ, kakɔna kotokoka nsala kadiyɛso? Kakɔna kayoyosala etena keyɛ l’onto lele nkum’otema kande mboshimbaka dia nsala dui dimɔtshi diahakoshimbe nkum’otema kayɛ?
Dikambo 2: Ɔnangɛso ɔmɔtshi mbeyaka dia Bible hashimbe ɔnwɛlɔ wa wanu wa la wɛdimo. Koko nde ambɔsa yɛdikɔ yaha nnɔ. Nde ambelamɛ lo fɛtɛ kɛmɔtshi kɛnande anangɛso wanɔ wanu.
Nyadia Ondaki 7:16 ndo Rɔmɔ 14:1, 10, ndo oma laasɔ, nyɔkɛtshanya ambola anɛ:
-
Lo ndjala avɛsa anɛ, kakɔna katokoka nsala ɔnangɛso? Kakɔna kayoyosala etena kɛnayɛ onto ɔmɔtshi asala dui dimɔtshi diele nkum’otema kayɛ koshimbaka dia disala?
Awui akɔna wayokokimanyiya dia mbɔsa tɛdikɔ t’amɛna?
1. Lɔmba Jehowa dia kokimanyiya dia mbeya kɛnɛ kahombayɛ nsala.—Jakɔba 1:5.
2. Sala eyangelo lo Bible ndo l’ekanda walembetshiya Bible dia ntana atɔndɔ wendana la dikambo diakɔ. Wɛ mbeyaka nto nsawola l’Akristo wambohokɔ akambo.
3. Sɛdingola etombelo wayonga la yɛdikɔ yayɛ lo nkum’otema kayɛ ndo k’anto akina.
ANTO AMƆTSHI MBUTAKA ƆNƐ: “Wɛ ekɔ la lotshungɔ la nsala kɛnɛ tshɛ kalangayɛ. Ndooko ladja yimba lo kɛnɛ kakanyiya anto akina?”
-
Lande na kahombaso mbidja yimba lo woho wayaoka Nzambi ndo anto akina?
LO TSHENA PE
Sho mbɔsaka tɛdikɔ t’amɛna etena kashihodiaso woho wayaoka Jehowa lo dikambo dimɔtshi, ko oma laasɔ sho nsɛdingola dia kana ditshelo diaso diayokimanyiya anto akina kana diayowasalɛ kɔlɔ.
Ovuswelo
-
Ngande wakokayɛ mbɔsa tɛdikɔ tangɛnyangɛnya Jehowa?
-
Ngande wakokayɛ mbekiya nkum’otema kayɛ?
-
Ngande wakokayɛ mɛnya dia wɛ nɛmiyaka nkum’otema k’anto akina?
SALA EYANGELO
Ngande wakokayɛ mbɔsa tɛdikɔ tayokeketsha lɔngɛnyi lele lam’asayɛ la Nzambi?
“Tɔsake tɛdikɔ tangɛnyangɛnya Nzambi” (Tshoto y’Etangelo, Ngɔndɔ ka nɛi 15, 2011)
Nyomeka akambo akina wendana la woho watosha Jehowa alako.
Enda awui wakakimanyiya pami kɛmɔtshi dia mbɔsa yɛdikɔ mɔtshi ya wolo.
Jehowa toshikikɛka dia nde ayotosha kɛnɛ tshɛ kele dimɛna (5:46)
Eka awui akina wendana la woho wa ngɛnyangɛnya Jehowa etena keso la ntondo ka dikambo dimɔtshi diakinde kotosha ɛlɔmbwɛlɔ ka shikaa.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
